၂၀၂၄/၂၅ ဘောလုံးရာသီ၊ ပရီးမီးယားလိဂ် ပွဲစဉ် (၇) အပြီး ချယ်လ်ဆီးအသင်း၏ ရာသီအဖွင့်ခြေစွမ်းအပေါ် ချယ်လ်ဆီးအသင်း ကစားသမားဟောင်းများ ဖြစ်ကြသည့် နောက်ခံလူ ဖရန့်ခ် လီဘော့ဖ် နှင့် မာရီယို မဲလ်ချီးယော့တ်၊ ကွင်းလယ် ကစားသမား ခရိတ်ခ် ဘာလေ နှင့် လီဗာပူးလ်အသင်း နောက်ခံလူဟောင်း စတိဗ် နီကိုးလ် တို့က အပါတ်စဉ်တင်ဆက်နေသည့် ESPN FC စကားဝိုင်း အစီအစဉ်တွင် ယခုလိုဆွေးနွေးသွားခဲ့ပါသည်...။ 

အလက်ဆစ် နူးနက်စ် - နိုင်ငံတကာ ပွဲစဉ်တွေကြောင့် အနားရနေတဲ့ ပရီးမီးယားလိဂ်ပရိသတ်တွေ စောင့်မျှော်နေခဲ့ကြတဲ့ ပွဲစဉ်တွေဟာ အခုလာမယ့်စနေနေ့မှာ ပြန်လည်စတင်တော့မှာပါ..။ အခုအပါတ် အစီအစဉ်မှာ ချယ်လ်ဆီးအသင်း ကစားသမားဟောင်းတွေ စုံနေတုန်း ပွဲစဉ် (၇) အပြီး ချယ်လ်ဆီးအသင်းရဲ့ ခြေစွမ်းအပေါ် ရှင်တို့ရဲ့အမြင်တွေကို ဆွေးနွေးပေးကြဖို့ ဖိတ်ခေါ်လိုက်ပါတယ်..။ ပထမဆုံးအနေနဲ့ မာရီယို ရေ… အခုလက်ရှိ ချယ်လ်ဆီးအသင်းရဲ့ အနေအထားပေါ် ရှင့်ရဲ့သုံးသပ်ချက်နဲ့အတူ စတင်လိုက်ကြရအောင်လားရှင့်..

မာရီယို မဲလ်ချီးယော့တ် - ချယ်လ်ဆီးအသင်းဟာ ရာသီမစခင်မှာ ကလပ်အသင်းများ ကမ္ဘာ့ဖလား ချန်ပီယံဆုကို ဆွတ်ခူးနိုင်ခဲ့ပေမယ့် ရာသီကြိုပြင်ဆင်မှုတွေကို ကောင်းကောင်းမပြုလုပ်နိုင်ခဲ့ပါဘူး..။ အဲဒီအကျိုးဆက်အနေနဲ့ အခုလက်ရှိအချိန်မှာ ဒဏ်ရာပြဿနာတွေနဲ့ ရင်ဆိုင်နေရတယ်.. ဆိုတဲ့ သုံးသပ်ချက်တွေ ရှိနေပါတယ်..။ အခုပွဲစဉ် (၇) ပြီးတဲ့အချိန်ထိ ကျွန်တော်တို့အသင်း ကစားခဲ့တဲ့ပွဲတွေကို ပြန်ကြည့်မယ်ဆိုရင် ခြေစွမ်းကောင်းမွန်ခဲ့တဲ့ပွဲတွေ ရှိခဲ့သလို တစ်ချို့ပွဲတွေမှာ သူတို့ရဲ့ကစားပုံဟာ အံ့ဩဖို့ကောင်းတယ်ဗျ..။ အထူးသဖြင့် ဘရိုက်တန်အသင်းကို အိမ်ကွင်းမှာ ၃ဂိုး- ၁ဂိုးနဲ့ ရှုံးနိမ့်ခဲ့တဲ့ပွဲဟာ အတော်လေးကို အထိနာတဲ့ပွဲလို့ ပြောရမှာပါ..။ ရလဒ်ပိုင်းထက်စာရင် ခြေစွမ်းပိုင်းမှာပါ ဘရိုက်တန်က အသာစီးရသွားခဲ့တာ ဆိုးပါတယ်..။ 

လက်ရှိအသင်းရဲ့ခြေစွမ်းကို ခြုံငုံသုံးသပ်ရမယ်ဆိုရင် တစ်ခုခုလိုအပ်နေသေးသလို ခံစားနေရပါတယ်…။ လူငယ်လေးတွေဟာ တစ်ချို့အရာလေးတွေကို ခက်ခက်ခဲခဲ ကြိုးစားနေရသလို အသင်းရဲ့ အရေးကြီးတဲ့ တစ်ချို့အစိတ်အပိုင်းတွေမှာ လိုအပ်ချက်တွေ ရှိနေပါသေးတယ်..။ ဒါ့အပြင်အခုနောက်ပိုင်း ယှဉ်ပြိုင်ခဲ့ရတဲ့ ပွဲကြီးပွဲကောင်းတွေမှာ မွိုက်စ် ကိုင်ဆီဒို ဟာ ဒဏ်ရာအရှင်းမပျောက်သေးပဲ ကစားနေရတယ်..၊ အင်ဇို ဖာနန်ဒက်စ် လည်း ဒဏ်ရာရနေတယ်လို့ပြောတယ်..။ နောက်ပြီးအသင်းရဲ့ အဓိက ကစားသမားဖြစ်တဲ့ ကိုးလ် ပါးမား ဟာ အောက်တိုဘာလကုန်အထိ ပါဝင်နိုင်ဦးမှာ မဟုတ်သေးပါဘူး..။ အသင်းရဲ့ကွင်းလယ်အင်ဂျင်စက်ကို မောင်းနှင်နေတဲ့ ကစားသမား (၃) ယောက် အကောင်းဆုံးခြေစွမ်း မရရှိတာ..၊ မပါဝင်နိုင်တာဟာ အသင်းရဲ့တည်ငြိမ်မှုကို အနည်းနဲ့အများ ထိခိုက်စေမှာ အမှန်ပဲဗျ..။

ခရိတ်ခ် ဘာလေ - နောက်ဆုံးယှဉ်ပြိုင်ခဲ့တဲ့ (၃) ပွဲမှာ လီဗာပူးလ်နဲ့ပွဲမှာ သူတို့ရဲ့ကစားပုံ ကောင်းမွန်ပါတယ်..။ အငြင်းပွားစရာ မရှိပါဘူး.။ သူတို့တွေရဲ့ လုပ်အားနှုန်း၊ ကြိုးစားအားထုတ်မှု၊ pressing ကစားပုံတွေ၊ ပွဲအရှိန် (tempo) အတင်အချ ထိန်းညှိတာတွေ၊ တိုက်စစ်လမ်းကြောင်း ဖန်တီးမှုတွေ ကောင်းမွန်ခဲ့ပါတယ်..။ ဒါ့အပြင် ဒဏ်ရာရ ကစားသမား များပြားမှုကြောင့် နောက်တန်းလေးယောက်ကို ရှိတဲ့သူနဲ့ စီစဉ်ခဲ့ရပေမယ့် ခံစစ်ပိုင်း စုစည်းမှုလည်း ကောင်းခဲ့တာပါပဲ..။ ပြီးခဲ့တဲ့ နိုင်ငံတကာပွဲစဉ်တွေ မတိုင်ခင်မှာ ဒဏ်ရာရ ကစားသမား (၁၀) ယောက်အထိ ရှိခဲ့ပါတယ်..။

ဘရိုက်တန်နဲ့ မန်ချက်စတာ ယူနိုက်တက်အသင်းနဲ့ပွဲတွေမှာ အနီကတ်ဒ်တွေကြောင့် အသင်းရဲ့ကစားပုံ ပျက်ခဲ့ရတာပါ..။ ဘရိုက်တန်နဲ့ပွဲမှာ အစောပိုင်းမှာ ကစားပုံ ကောင်းမွန်ခဲ့ပေမယ့် ဂျာအို ပီဒရို အထုတ်ခံရသလို နာကျင်အချိန်ပိုမှာ ပေးလိုက်ရတဲ့ဂိုးတွေ ရှုံးခဲ့တာဗျ..။ မန်ချက်စတာ ယူနိုက်တက်အသင်းနဲ့ ပွဲကတော့ ပွဲအစ (၅) မိနစ်မှာတင် ဂိုးသမား ရောဘတ် ဆန်းချက်ဇ် အထုတ်ခံလိုက်ရတာကြောင့် အသင်းရဲ့ခြေစွမ်းအမှန်ကို သုံးသပ်ရတာ ခက်ပါတယ်..။ ဒါ့အပြင် နည်းပြအင်ဇို မာရက်စ်ကာ ဟာ သွေးရူးသွေးတန်း လူစားလဲမှုတွေနဲ့ အသင်းကိုပိုပြီး အခက်တွေ့စေခဲ့ပါတယ်..။ 

ကိုးလ် ပါးမား ဟာ ဒဏ်ရာရနေတာဆိုတော့ လူစားလဲရမှာပဲ..။ ဒါပေမယ့် ပီဒရို နက်တို နဲ့ အက်စ်တီဗာအို တို့နှစ်ယောက်ကို လူစားလဲလိုက်တာ သိပ်ကိုစောလွန်းခဲ့ပါတယ်..။ သူ့ရဲ့ဆန္ဒစောမှုကြောင့် အသင်းဟာ အပြောင်းအလဲထပ်လုပ်ဖို့ အခက်တွေ့သွားခဲ့ပါတယ်..။ ဒါ့ကြောင့်ယူနိုက်တက် အသင်းဘက်ကပဲ တစ်ဖက်သတ် ဖိကစားသွားခဲ့တာပါ..။ အဲဒီပွဲတွေကနေ အသင်းရဲ့ခြေစွမ်းအမှန်ကို အကဲဖြတ်နိုင်ဖို့ ခက်ခဲပါတယ်..။ တကယ်လို့ လီဗာပူးလ်အသင်းနဲ့ပွဲမှာ ပြသခဲ့တဲ့ခြေစွမ်းအတိုင်း ဆက်လက်ထိန်းသိမ်း သွားနိုင်မယ်..၊ အဲဒီပွဲက ခြေစွမ်းဟာ သူတို့ရဲ့ခြေစွမ်းအမှန်ဆိုရင် အခုဘောလုံးရာသီဟာ အောင်မြင်တဲ့ဘောလုံးရာသီတစ်ခု ဖြစ်လာမှာပါ..။

နောက်ထပ်သတိထားရမှာက အသင်းရဲ့စည်းကမ်းပိုင်းဆိုင်ရာ ပြဿနာ (disciplinary issue) ပေါ့ဗျာ..။ ဂျာအို ပီဒရို၊ ရောဘတ် ဆန်းချက်ဇ် တို့လို ဆုံးဖြတ်ချက် အမှားအယွင်းတွေဟာ အရေးအကြောင်းဆိုရင် အသင်းကို ထိခိုက်နိုင်ပါတယ်..။ ဒါ့ကြောင့်အခုရှေ့လာမယ့် ပွဲစဉ်တွေအတွက် ချယ်လ်ဆီးအသင်းနဲ့ ပတ်သက်တဲ့ ကျွန်တော့်ရဲ့မေးခွန်းက လီဗာပူးလ်နဲ့ပွဲ ခြေစွမ်းဟာ သူတို့ရဲ့ပုံမှန်ခြေစွမ်း ဟုတ်ရဲ့လား..? ဆိုတာပါပဲ..။

စတိဗ် နီကိုးလ် - မှန်ပါတယ်..။ သူတို့ဟာ အဲဒီပွဲက ခြေစွမ်းမျိုးကို ပွဲစဉ်တိုင်းမှာ ပြသနိုင်ဖို့ လိုအပ်ပါတယ်..။ ဒါပေမယ့် အခုအချိန်မှာ ပုံမှန်ခြေစွမ်းပျောက်ဆုံးနေတာ ချယ်လ်ဆီး တစ်သင်းထဲ မဟုတ်ပါဘူး..။ ပရီးမီးယားလိဂ် အသင်းအများစုဟာ သူတို့ရဲ့အကောင်းဆုံးခြေစွမ်း ပြသနိုင်ဖို့ ရုန်းကန်နေရဆဲ ဖြစ်ပါတယ်..။ ဒါ့ကြောင့်အင်ဇို မာရက်စ်ကာ တို့ကို ‘အဖော်တွေအများကြီး ရှိသေးတယ်..’ လို့ အားပေးလိုက်ပါတယ်..။ ဒါပေမယ့် အနီကတ်ဒ်တွေ မကြာခဏ ပြသခံနေရတာ၊ ဒဏ်ရာရ ကစားသမား များပြားနေတာ..၊ တခါတလေမှာ မန်နေဂျာက ရုးကြောင်ကြောင် ဆုံးဖြတ်ချက်တွေ ချမှတ်တတ်တာ.. စတဲ့အချက်တွေကို ထည့်တွက်မယ်ဆိုရင် အကောင်းဆုံးခြေစွမ်းကို ကာလရှည်ကြာကြီး တသမှတ်တည်း ပြသနိုင်ပါ့မလား..? သံသယရှိပါတယ်..။ 

ဒါ့ကြောင့်လည်း အခုပွဲစဉ် (၇) အပြီးမှာ သူတို့ဟာ အဆင့် (၇) နေရာ ရောက်နေတာပါ..။ တကယ်တမ်းဆိုရင် အသင်းမှာရှိနေတဲ့ ကစားသမားတွေရဲ့ အရည်အသွေးအရ အမှတ်ပေးဇယားမှာ အခုထက်ပိုပြီး အဆင့်ကောင်းတွေ ရရှိနေသင့်ပါတယ်..။ ဒါပေမယ့် အစောကပြောခဲ့သလိုပါပဲ.. အသင်းအများစုဟာ အခုပွဲစဉ် (၇) အထိ အကောင်းဆုံးခြေစွမ်း ပြသနိုင်ဖို့ ရုန်းကန်နေရပါတယ်.။ ချယ်လ်ဆီး တစ်သင်းထဲ မဟုတ်ပါဘူး.။ 

အလက်ဆစ် နူးနက်စ် - ဖရန့်ခ် ရေ..။ မာရီယို ကတော့ အသင်းဟာ ဒဏ်ရာရ ကစားသမား များပြားနေတယ်.. ဆိုပေမယ့် ကစားသမားအင်အား တောင့်တင်းမှုရှိတယ်..၊ လုံလောက်တယ်လို့ မှတ်ချက်ပေးပါတယ်..။ ဒါဆိုရင် လက်ရှိအသင်းမှာ ရှင့်ရဲ့စိတ်ထဲမှာ ဖွဲ့စည်းထားတဲ့ အကောင်းဆုံးပွဲထွက် (၁၁) ယောက်ကို ပြောပြနိုင်မလား..?

ဖရန့်ခ် လီဘော့ဖ် - ဒဏ်ရာပြဿနာမရှိဘူးဆိုရင် ကျွန်တော့်ရဲ့ပွဲထွက် (၁၁) ယောက်မှာ ဗဟိုနောက်ခံလူနေရာမှာ လီဗိုင်း ကိုဝဲလ် နဲ့ တိုဆင် အဒါယာဘိုင်ယိုရို တို့နှစ်ယောက်ကို ထားရှိပါမယ်..။ ညာနောက်ခံလူနေရာက ရိစ် ဂျိမ်းစ် ဟာ ခြေစွမ်းကောင်းမွန်သလို အသင်းကိုဦးဆောင်နိုင်စွမ်းရှိတဲ့ ခေါင်းဆောင်ကောင်း တစ်ယောက်ပါ..။ နောက်ပြီးအသင်းမှာ ကိုးလ် ပါးမား ပြန်လည်ပါဝင်ဖို့ အမြန်ဆုံး လိုအပ်နေပါတယ်..။ လက်ရှိအချိန်မှာ ကိုင်ဆီဒို နဲ့ ဖာနန်ဒက်စ် တို့နှစ်ယောက်က ပရီးမီးယားလိဂ်ရဲ့ အကောင်းဆုံး ကွင်းလယ် ကစားသမားတွေထဲမှာ ပါဝင်ပါတယ်..။

ကိုင်ဆီဒို ဆိုရင် သူ့ကိုပေးလိုက်ရတဲ့ ပြောင်းရွှေ့ကြေးနဲ့ ထိုက်တန်တဲ့ခြေစွမ်း ပြသနေသလို အန်ဂိုလို ကန်တေး၊ ကလော့ဒ် မက်ခလီလီ တို့လို ဂန္ထဝင်ကစားသမားတွေနဲ့တောင် နှိုင်းယှဉ်နေတဲ့အထိ ခြေစွမ်းပြနေပါတယ်..။ ပီဒရို နက်တို ရဲ့ ခြေစွမ်းကို သဘောကျတာကြောင့် ပွဲထွက် (၁၁) ယောက်ထဲမှာ ထည့်ထားပါတယ်..။ သူဟာညာတောင်ပံမှာ ပိုပြီးခြေစွမ်းပြနေပေမယ့် အသင်းရဲ့ဟန်ချက်၊ အသင်းဖော်တွေရဲ့ အနေအထားအရ လိုအပ်ရင် ဘယ်တောင်ပံမှာ ကစားပေးနိုင်တဲ့သူလည်း ဖြစ်ပါတယ်..။ အခုပူးတွဲပုံမှာ တွေ့မြင်ရတဲ့ လူစာရင်းဟာ လက်ရှိချယ်လ်ဆီးအသင်းမှာ ကျွန်တော့်ရဲ့ အကောင်းဆုံး (၁၁) ယောက် ဖြစ်ပါတယ်..။

ဒါပေမယ့် အစောပိုင်းက စတီဗီ ပြောသွားသလို ဒီအသင်းဟာ တည်ငြိမ်တဲ့ခြေစွမ်း (consistency) မပြသနိုင်သေးပါဘူး..။ ဒါ့ကြောင့်သူတို့ရဲ့ အကောင်းဆုံးခြေစွမ်းကို ပုံမှန်ပြသနိုင်မယ်..၊ ဒဏ်ရာရကစားသမားတွေ နည်းပါးခဲ့မယ်..၊ စည်းကမ်းပိုင်းဆိုင်ရာ ပြဿနာတွေ နည်းပါးခဲ့မယ်ဆိုရင် အောင်မြင်တဲ့ ဘောလုံးရာသီ ဖြစ်လာမှာပါ..။ အခုလက်ရှိအချိန်ထိကတော့ လီဗာပူးလ်နဲ့ပွဲကလို အကောင်းဆုံးခြေစွမ်း ကျွန်တော်တို့ မြင်တွေ့ခဲ့ရသလို ဘရိုက်တန်နဲ့ပွဲကလို ဆိုးရွားတဲ့ ကစားပုံတွေလည်း ပြသခဲ့တာပါပဲ..။

ခရိတ်ခ် ဘာလေ - ရောဘတ် ဆန်းချက်ဇ် ဟာ အမှားအယွင်းတွေ မကြာခဏ ကျူးလွန်တတ်တယ်ဗျာ..။ သူ့ဆီကို ဘောလုံးပြန်ပေးရင် ဘာတွေများ တလွဲထလုပ်မလဲ..? ကြောက်နေရတယ်..။ တခြားဘက်က ကြည့်ပြန်တော့ တကယ့်ကို ကောင်းမွန်တဲ့ ကာကွယ်မှုတွေ ပြုလုပ်ခဲ့ပါတယ်..။ ဒါပေမယ့် အမှားများလွန်းပါတယ်..။ လီဗာပူးလ်မှာဆိုရင် အယ်လစ်ဆန်၊ အာဆင်နယ်အသင်းက ဒေးဗစ် ရာယာ တို့ဟာ သူ့ထက်စာရင် လက်စွမ်းတည်ငြိမ်တဲ့ ဂိုးသမားတွေ ဖြစ်ကြသလို မန်ချက်စတာ စီးတီးအသင်းဟာ ကမ္ဘာ့အကောင်းဆုံး ဂိုးသမား (၃) ယောက်ထဲမှာပါတဲ့ အီတလီဂိုးသမား ဂျီဂျီ ဒိုနာရူးမား ကို အားဖြည့်ထားပါတယ်..။ ကြီးမားတဲ့ အောင်မြင်မှုတွေ ဆွတ်ခူးနိုင်ဖို့ဆိုရင် ဂိုးသမားနေရာဟာ ချယ်လ်ဆီးအသင်းရဲ့ အဓိကပြဿနာ ဖြစ်နိုင်ပါတယ်..။

အဲဒီပြဿနာကို အခုအချိန်ထိ မဖြေရှင်းခဲ့သလို လာမယ့်ဇန်နဝါရီမှာလည်း ဖြေရှင်းသွားဦးမှာ မဟုတ်သေးပါဘူး..။ တကယ်လို့ကိုယ့်အသင်းရဲ့ ဂိုးသမားဟာ ဆုံးဖြတ်ချက်အမှားတွေ ပြုလုပ်နေမယ်၊ အမှားအယွင်းတွေ မကြာခဏ ကျူးလွန်နေမယ်ဆိုရင် ရေရှည်အတွက် စိုးရိမ်စရာပါပဲ..။

စတိဗ် နီကိုးလ် - (၁၀၀ %) သေချာတာပေါ့..။ ချယ်လ်ဆီးအသင်းရဲ့ အကြီးမားဆုံး ပြဿနာဟာ ‘ဂိုးသမား’ နေရာ ဖြစ်နေပါတယ်..။ နောက်ပြီးဂိုးသမားနဲ့ ဗဟိုနောက်ခံလူ နှစ်ယောက်ကြားကတြိဂံ (triangle) ပေါ့ဗျာ..။ ဗဟိုခံစစ်မှူးတွေထဲမှာလည်း အမှန်တကယ် ယုံစားလို့ရတာ ‘လီဗိုင်း ကိုဝဲလ်’ တစ်ယောက်တည်း ရှိပါတယ်..။ သူတို့အသင်းရဲ့ ခံစစ်ကြောင်းဟာ လီဗာပူးလ်နဲ့ပွဲမှာ ခြေစွမ်းပြနိုင်ပေမယ့် ဂိုးသမားနဲ့ ဗဟိုနောက်ခံလူ နှစ်ယောက်ရဲ့ တြိဂံ နေရာဟာ ချယ်လ်ဆီးအသင်းရဲ့ အားအပျော့ဆုံး ခြေဖနောင့်နေရာ (Achille’s heel) ဖြစ်ပါတယ်..။

မာရီယို မဲလ်ချီးယော့တ် - ဂိုးသမားနဲ့ နောက်ခံလူတွေအကြောင်းကို ပြောမယ်ဆိုရင် ‘အသင်းရဲ့ ခံစစ်ကြောင်းဟာ တည်ငြိမ်မှု (stability)’ ရှိဖို့ လိုအပ်ပါတယ်..။ ခံစစ်ကြောင်းမှာ ပါဝင်တဲ့ ကစားသမားတွေ အပြောင်းအလဲ များလွန်းတာ မကောင်းပါဘူး..။ နောက်ပြီးတစ်ဦးချင်းစီကလည်း တည်ငြိမ်တဲ့ခြေစွမ်း ပြသနိုင်ရပါမယ်..။ ဂိုးသမား ရောဘတ် ဆန်းချက်ဇ် ဟာ စွန့်စားမှုယူလွန်းတယ်.. (taking risks) လို့ ကျွန်တော်မြင်မိပါတယ်..။ ဘာဖြစ်လို့လည်းဆိုတော့ သူ့ဆီကို ဘောလုံးပေးပြီဆိုရင် လိုအပ်တာထက်ပိုပြီး ဘောလုံးကို ကိုင်ထားလွန်းသလိုပါပဲ..။ လွယ်လွယ်ကူကူနဲ့ ပေးပို့ရမယ့် ဘောလုံးတွေကို မလိုအပ်ပဲ ကိုင်ထားတာကြောင့် သူနဲ့တွဲဖက် နောက်ခံလူတွေမှာ ဖိအားတွေ များလာရပါတယ်..။ အဲဒီတစ်ချက်ကိုတော့ ဂရုစိုက်ပြီး ပြင်ဆင်နိုင်ရပါလိမ့်မယ်..။ ကိုယ့်ဆီကို ပြန်ပေးတဲ့ ဘောလုံးတိုင်းကို ဘယ်ရောက်ရောက်.. ဆိုပြီး ကန်ထုတ်ရမယ်.. လို့ ဆိုလိုတာ မဟုတ်ပါဘူး..။

အခုစကားဝိုင်းမှာ ကျွန်တော်တို့ဟာ လီဗာပူးလ်နဲ့ပွဲက ခြေစွမ်းအကြောင်းကို ပြောနေကြပါတယ်..။ အဲဒီပွဲမှာ ချယ်လ်ဆီးကစားသမားတွေဟာ လက်ရှိချန်ပီယံအသင်းနဲ့ ရင်ဆိုင်နေရတယ်..၊ သူတို့ကိုယှဉ်ပြိုင် ကစားနိုင်တဲ့ အသင်းဖြစ်တယ်.. ဆိုတာ သက်သေပြရနိုင်မယ်.. ဆိုတဲ့ ခံယူချက်၊ စိတ်ဓါတ်အပြည့်နဲ့ ကစားခဲ့ကြတာ ဖြစ်ပါတယ်..။ ခုနက ဖရန့်ခ် လီဘော့ဖ် ရဲ့အသင်းမှာ ပါဝင်ခဲ့တဲ့ ‘မာလို ဂတ်စ်တို’.. သူဆိုရင် လီဗာပူးလ်နဲ့ပွဲမှာ ကွင်းလယ်က မက်ခ် အယ်လစ္စတာ ကို အာရုံစိုက်ပြီး ထိန်းချုပ်၊ ကစားသွားခဲ့ပါတယ်..။ အထူးသဖြင့် သူတို့တွေဟာ တကယ့်အသင်းကြီးတွေနဲ့ ယှဉ်ပြိုင်ရတဲ့ပွဲတွေမှာ အာရုံစူးစိုက်မှုအပြည့်နဲ့ အားထည့်ကစားသွားကြပါတယ်..။

ဒါပေမယ့် အသင်းငယ်တွေနဲ့ ရင်ဆိုင်ရတဲ့ပွဲတွေမှာလည်း အဲဒီလိုခံယူချက်၊ စိတ်ဓါတ်နဲ့ မလျော့တဲ့ ကြိုးစား အားထုတ်မှု၊ မလျော့တဲ့ အာရုံစူးစိုက်မှုတွေနဲ့ ရင်ဆိုင်သွားရပါမယ်..။ ဘာဖြစ်လို့လည်းဆိုတော့ အဲဒီလိုအသေးစိတ်လေးတွေဟာ ပွဲတစ်ပွဲရဲ့ အနိုင်အရှုံးကို အဆုံးအဖြတ် ပေးသွားတာပါ..။ ဒါ့ကြောင့်အသင်းမှာရှိနေတဲ့ ကစားသမားတိုင်းဟာ အသင်းရဲ့သွားနေတဲ့လမ်းကြောင်း၊ ရှည်မှန်းချက်တွေကို ရှင်းရှင်းလင်းလင်း သဘောပေါက်ထားဖို့ လိုအပ်ပါတယ်..။ ကျွန်တော်ကတော့ ဒဏ်ရာပြဿနာ.. လို ထိန်းချုပ်လို့မရနိုင်တဲ့ အကြောင်းအရာတွေကို ထည့်မစဉ်းစားပါဘူး..။

နောက်ပြီးအခုရာသီမှာ ထွန်းတောက်မယ့် လူငယ်သွေးသစ် ‘အက်စ်တီဗာအို’.. သူ့ရဲ့ကစားပုံနဲ့ ပြိုင်ဘက်ကစားသမားတွေကို ကျော်ဖြတ်နိုင်စွမ်း၊ ဘောလုံးပညာကျွမ်းကျင်မှုတွေကို ကျွန်တော်အရမ်း သဘောကျပါတယ်..။ ဒါ့ကြောင့်အခုလက်ရှိအသင်းမှာ သူ့ကိုအရမ်းမြင်တွေ့ချင်တာပေါ့ဗျာ..။ ဒါပေမယ့် တည်ငြိမ်မှုမရှိသေးတဲ့ အသင်းတစ်သင်းမှာ ပရီးမီးယားလိဂ်ကို အခုမှရောက်ရှိလာတဲ့ လူငယ်သွေးသစ် တစ်ယောက်အနေနဲ့ တောက်ပတဲ့ခြေစွမ်း ပြသနိုင်ဖို့ သိပ်မလွယ်ဘူးဗျ..။ 

လက်ရှိချယ်လ်ဆီးအသင်းမှာ ပင်ကိုယ်ပါရမီ အရည်အသွေးမြင့်မားတဲ့ လူငယ်ကစားသမားတွေ အများကြီးရှိပါတယ်..။ သူတို့လေးတွေရဲ့ အကောင်းဆုံးခြေစွမ်း ရရှိနိုင်ဖို့၊ ပွဲတွေအပေါ်မှာ လွှမ်းမိုးနိုင်ပြီး အဆုံးအဖြတ် အခိုက်အတန့်တွေ ဖန်တီးနိုင်တဲ့ ကစားသမားတွေ ဖြစ်လာဖို့ဆိုရင် ခိုင်မာတဲ့ အသင်းတစ်သင်း ပေါ်ထွက်နေမှ ဖြစ်နိုင်ပါမယ်..။ ဒီလိုမှမဟုတ်ရင် လူငယ်သွေးသစ်တွေအနေနဲ့ အသင်းမှာရုန်းကန်နေရတဲ့ အချိန်တွေ ပိုများပြီး အခက်အခဲတွေရဲ့ ရင်ဆိုင်ရနိုင်ပါတယ်..။

ခရိတ်ခ် ဘာလေ - လက်ရှိအသင်းမှာ နောက်ခံအစွန်လူတွေ (full backs) သိပ်ကောင်းပါတယ်..။ မာ့စ် ကူကူရယ်လာ နဲ့ ရိစ် ဂျိမ်းစ် တို့ဟာ ပွဲအဖြေကို ပြောင်းလဲပေးနိုင်တဲ့ ကစားသမားတွေ ဖြစ်နေကြပါပြီ..။ ဒါပေမယ့် ကျွန်တော်သာ ကွင်းထဲမှာ ကစားနေဦးမယ်.. ဆိုရင် ကူကူရယ်လာ ကို ဆွဲထိုးမိမလား မပြောတတ်ဘူး.. ဟားဟား..။ ဒါပေမယ့် သူဟာအသင်းအတွက် အများကြီးအကျိုးရှိတဲ့သူ (effective) ဖြစ်နေပါတယ်..။

 
သူဟာပြိုင်ဘက် ကစားသမားတွေကို မသက်မသာ (nuisance) ဖြစ်စေပေမယ့် ကိုယ့်အသင်းအတွက် အများကြီး အကျိုးဖြစ်စေတဲ့ ကစားသမားပါ..။ လီဗာပူးလ်နဲ့ပွဲမှာ မိုဟာမက် ဆာလာ ကို မလှုပ်နိုင်အောင် ထိန်းချုပ်ထားနိုင်ခဲ့ပါတယ်..။ ညာတောင်ပံမှာဆိုရင် ရိစ် ဂျိမ်းစ် ဟာ ဒဏ်ရာပြဿနာကြောင့် ရုန်းကန်ခဲ့တဲ့ ကာလတွေ ရှိခဲ့ပေမယ့် အခုအချိန်မှာ အဲဒီအခက်အခဲတွေကို ကျော်ဖြတ်နိုင်ခဲ့ပါပြီ..။

ရိစ် ဂျိမ်းစ် ဟာ မာကျော၊ ကြံ့ခိုင်တဲ့ နောက်ခံအစွန်လူတစ်ယောက် ဖြစ်သလို လျှင်မြန်တယ်..၊ ဘောလုံးပေးပို့မှု ကောင်းမွန်တဲ့ ထိပ်တန်းကစားသမား တစ်ယောက် ဖြစ်ပါတယ်..။ လိုအပ်လာရင် ကွင်းလယ်မှာ ကစားပေးနိုင်သလို လီဗာပူးလ်နဲ့ပွဲမှာ ဗဟိုနောက်ခံလူအဖြစ်နဲ့ပါ ကစားခဲ့ပါသေးတယ်..။ ရိစ် ဂျိမ်းစ် သာ ကြံ့ခိုင်မှုအပြည့် ရှိနေပြီး ဘယ်တောင်ပံက ကူကူရယ်လာ နဲ့ တွဲဖက်လိုက်ရင် ဘယ်အသင်းနဲ့မဆို ရင်ဆိုင်လို့ရတဲ့ တောင်ပံခံစစ် ဖြစ်ပါတယ်..။

ဒါပေမယ့် ခုနက စတီဗီ ပြောခဲ့တဲ့ ဗဟိုခံစစ်မှူးနှစ်ယောက်နဲ့ ဂိုးသမား.. နေရာပေါ့ဗျာ..။ ချယ်လ်ဆီးအသင်းမှာ အားနည်းနေတာဆိုလို့ အဲဒီနေရာမှာပဲ ရှိပါတယ်..။ တကယ်လို့ အဲဒီပြဿနာကိုသာ ဖြေရှင်းနိုင်ခဲ့မယ်ဆိုရင် အခုဘောလုံးရာသီဟာ ချယ်လ်ဆီးအသင်းအတွက် အောင်မြင်တဲ့ ဘောလုံးရာသီ ဖြစ်လာမှာပါ..။