3 Marc Cucurella

ကိုယ်ရေးအကျဉ်း
========
မာ့ခ် ကူကူရယ်လာ မှာ ဘရိုက်တန်အသင်းနှင့် ပရီးမီးယားလိဂ် ပွဲဦးထွက်ရာသီတွင် ခြေစွမ်းပြနိုင်ခဲ့ပြီးနောက် ချယ်လ်ဆီးအသင်း သို့ ပြောင်းရွှေ့လာခဲ့သည်..။ အသက် (၂၄) နှစ်ပြည့် မွေးနေ့အပြီး ရက်သတ္တပါတ် အနည်းငယ်အကြာတွင် ချယ်လ်ဆီးအသင်းသို့ ရောက်ရှိလာခဲ့သည့် စပိန်ကစားသမားမှာ ဘယ်အစွန် နောက်ခံလူ၊ wing back နှင့် ဗဟိုခံစစ်မှူးနေရာများတွင် ကစားခဲ့သည်..။ ကူကူရယ်လာ မှာ ၂၀၂၁/၂၂ ဘောလုံးရာသီတွင် ဘရိုက်တန်အသင်းဖော်များနှင့် ပရိသတ်များက ရွေးချယ်သော ‘တစ်နှစ်တာ အကောင်းဆုံး ကစားသမားဆု’ ကို ဆွတ်ခူးနိုင်ခဲ့သည်..။

လုပ်အားနှုန်း ကောင်းမွန်ပြီး ဘယ်တောင်ပံတစ်လျှောက် မနားတမ်း အတက်အဆင်း ပြုလုပ်နိုင်သည့် စပိန်ကစားသမားမှာ ဘောလုံးဖျက်ထုတ်ရာတွင် ကောင်းမွန်သူလည်း ဖြစ်သည်..။ မနှစ်ကဘောလုံးရာသီ အချက်အလက်များအရ ပရီးမီးယားလိဂ် ပြိုင်ပွဲအတွင်း ဖျက်ထုတ်မှု (၉၃) ကြိမ်အထက် ပြုလုပ်နိုင်သည့် ကစားသမား သုံးဦးထဲတွင် ပါဝင်ခဲ့သည်..။
 
ကူကူရယ်လာ မှာ စပိန်နိုင်ငံ၊ အက်စ်ပါညို အသင်းလူငယ် အကယ်ဒမီတွင် ကြီးပြင်းလာခဲ့ပြီး အသက် (၁၄) နှစ်တွင် ဘာစီလိုနာ လူငယ်အကယ်ဒမီသို့ ရောက်ရှိခဲ့သည်..။ ထို့နောက်လာလီဂါပြိုင်ပွဲတွင် အယ်လ်ဘာ၊ ဂီတာဖေးလ် အသင်းများသို့ အဌားထွက်ခဲ့ပြီး ဂီတာဖေးလ် အသင်းနှင့်ဒုတိယရာသီတွင် အပြီးသတ် ပြောင်းရွှေ့ခဲ့သည်..။ စပိန်လာလီဂါ ပြိုင်ပွဲတွင် ဘယ်တောင်ပံ ကွင်းလယ် ကစားသမားအဖြစ် အများဆုံးကစားခဲ့သော်လည်း ဘရိုက်တန်အသင်းသို့ ရောက်ရှိလာချိန်တွင် နည်းပြ ဂရေဟမ် ပေါ်တာ က နောက်ခံလူအဖြစ် ပြောင်းလဲ၊ ကစားစေခဲ့သည်..။

မာ့စ် ကူကူရယ်လာ မှာ ၂၀၂၂/၂၃ ဘောလုံးရာသီ၏ အဖွင့်ပွဲစဉ်ဖြစ်သော အဲဗာတန်အသင်းနှင့်ပွဲတွင် လူစားဝင် ကစားသမားအဖြစ် စတင်ပါဝင်ခဲ့ပြီး သူ၏လုပ်အားနှုန်းနှင့် ပေးပို့မှုများကြောင့် ပရိသတ်များ၏ နှစ်သက်မှုကို ရရှိခဲ့ပါသည်..။ ဒုတိယပွဲစဉ်ဖြစ်သော တော့တင်ဟမ်အသင်းနှင့် နှစ်ဂိုးစီသရေကျခဲ့သည့်ပွဲစဉ်တွင် နောက်ခံလူ ကာလီဒူ ကူလီဘာလေ ၏ မြေမကျကန်ချက်ဖြင့် သွင်းယူခဲ့သည့်ဂိုးကို ထောင့်ကန်ဘောမှတဆင့် ဖန်တီးပေးနိုင်ခဲ့ပါသည်..။

ကူကူရယ်လာ မှာ ဘယ်နောက်ခံလူ၊ left wing back နှင့် left center back နေရာများတွင် ကစားခဲ့ပြီး ကမ္ဘာ့ဖလားပြိုင်ပွဲ မတိုင်ခင်အထိ အသင်း၏ခံစစ်ကြောင်းတွင် အဓိကကစားသမားအဖြစ် ပါဝင်ခဲ့ရသည်..။ စက်တင်ဘာလကုန်ခါနီးတွင် ပြင်းထန်သည့် အာသီးယောင်ရောဂါဖြင့် အောက်တိုဘာလ အစောပိုင်းပွဲစဉ်များကို လွဲချော်ခဲ့ရသည်..။ ဧပြီလအလယ်ပိုင်းတွင် ကြွက်သားဒဏ်ရာဖြင့် ခေတ္တအနားယူခဲ့ရသော်လည်း မာ့စ် ကူကူရယ်လာ မှာ ဂရေဟမ် ပေါ်တာ ၏ အသင်းတွင် အဓိကကစားသမားဖြင့် ပွဲစဉ်အများစုတွင် ပါဝင်ခဲ့ရသည်..။ သူ၏အကောင်းဆုံး ခြေစွမ်းပြနိုင်သည့်ပွဲစဉ်မှာ ဒေါ့မွန်အသင်းအား ၂ - ၀ ဖြင့် အနိုင်ရရှိခဲ့သည့် ချန်ပီယံလိဂ်ပြိုင်ပွဲ၊ (၁၆) သင်းအဆင့် ရှုံးထွက်ပွဲစဉ် (ဒုတိယအကျော့) ဖြစ်ခဲ့သည်..။

၂၀၂၃/၂၄‌ ဘောလုံးရာသီတွင် မာ့စ် ကူကူရယ်လာ မှာ ဒဏ်ရာပြဿနာကြောင့် အချိန်ကြာမြင့်စွာ အနားယူခဲ့ရသော်လည်း ရာသီကုန်ကာလတွင် ခြေစွမ်းပြနိုင်ခဲ့သည်..။ ထို့အပြင် ညာနောက်ခံလူ နေရာတွင် ဒဏ်ရာပြဿနာ များပြားခဲ့သော ကာလများအတွင်း ညာနောက်ခံလူအဖြစ် ကစားပေးခဲ့ရသေးသည်..။

ရာသီအလယ်ပိုင်း ကာလတွင် ခြေကျင်းဝတ်ခွဲစိတ် ဒဏ်ရာကြောင့် အနားယူခဲ့ရပြီး ပြန်လည်ကစားနိုင်ချိန်တွင် ချယ်လ်ဆီးအသင်းအတွက် သူ၏ပထမဆုံးသွင်းဂိုးကို လက်စ်တာ အသင်းအား အနိုင်ရရှိခဲ့သည့် FA ဖလားပြိုင်ပွဲ၊ ကွာတားဖိုင်နယ် ပွဲစဉ်တွင် သွင်းယူပေးခဲ့သည်..။ ဘရိုက်တန်နှင့် အဲဗာတန်အသင်းများကို အနိုင်ရရှိခဲ့သော ပွဲစဉ်များတွင် ဖြတ်တင်ဘောများမှတဆင့် ဂိုးဖန်တီးမှုများ ပြုလုပ်ပေးနိုင်ခဲ့သည်..။ မာ့စ် ကူကူရယ်လာ မှာ ချယ်လ်ဆီးအသင်း၏ ရာသီကုန်ကာလ ပွဲစဉ် (၁၂) ပွဲတွင် ပွဲစဉ်တိုင်း ပါဝင်ကစားခွင့် ရရှိခဲ့သည်..။

၂၀၂၄/၂၅ ဘောလုံးရာသီတွင် နည်းပြသစ် အင်ဇို မာရက်စ်ကာ ၏ လက်ထက်တွင် ဘယ်နောက်ခံလူနေရာ၌ ဦးစားပေး ကစားသမားအဖြစ် ပါဝင်ခွင့်ရခဲ့ပြီး တိုက်စစ်ပိုင်းကိုပါ လိုက်ပါရသည့် inverted full back အဖြစ် တာဝန်ယူခဲ့ရသည်..။ ကူကူရယ်လာ မှာ ခရစ္စမတ်ကာလအထိ ဆက်တိုက်ပါဝင်ခွင့်ရခဲ့ပြီး ဘရန့်တ်ဖို့ဒ် အသင်းနှင့်ပွဲတွင် ပွဲပြီးချိန်အနီကတ်ဒ်ပြ ထုတ်ပယ်ခံရမှုကြောင့် အဲဗာတန်အသင်းနှင့်ပွဲစဉ်ကို လွဲချော်ခဲ့သည်..။

အဆိုပါဘရန့်တ်ဖို့ဒ်အသင်းနှင့်ပွဲစဉ်တွင် ဂိုးသွင်းယူနိုင်ခဲ့သလို ရှမ်းရော့ခ် ရိုဗာအသင်းနှင့် ကွန်ဖရင့်စ်လိဂ် ပွဲစဉ်တွင်လည်း ဂိုးရရှိခဲ့ပြန်သည်..။ ဖူးလ်ဟမ်းအသင်းနှင့်ပွဲတွင် သူ၏ကန်ချက်အား ဂိုးသမားဘန်းဒ် လီနို ကာကွယ်နိုင်ခဲ့သောကြောင့် သုံးပွဲဆက်တိုက် ဂိုးမသွင်းနိုင်ခဲ့ခြင်းဖြစ်သည်..။

၂၀၂၅ ခုနှစ်၊ နှစ်ဆန်းတွင် ဆက်လက်ခြေစွမ်းပြနိုင်ခဲ့သလို ဝုလ်ဖ်အသင်း၊ ဆောက်ပ်သမ်တန်အသင်းနှင့် ပွဲစဉ်များတွင် ဂိုးသွင်း၊ ဂိုးဖန်တီးမှုများ ပြုလုပ်နိုင်ခဲ့သည်..။ ထို့နောက်လက်စ်တာ အသင်းအား အနိုင်ရရှိခဲ့သည့်ပွဲတွင် တစ်လုံးတည်းသော အနိုင်ဂိုးကို သွင်းယူပေးနိုင်ခဲ့ပါသည်..။ ကူကူရယ်လာ မှာ ခံစစ်ပိုင်းသာမက တိုက်စစ်ပိုင်းမှာပါ ပံ့ပိုးနိုင်မှုအား ကောင်းမွန်ခဲ့ပြီး ချယ်လ်ဆီးအသင်း၏ ချန်ပီယံလိဂ်ဝင်ခွင့် တိုက်ပွဲနှင့် ကွန်ဖရင့်စ်လိဂ်ပြိုင်ပွဲများတွင် အရေးပါသော အခန်းကဏ္ဍမှာ ပါဝင်ခဲ့သည်..။

ထို့အပြင် စပိန်ဘယ်နောက်ခံလူမှာ စတန်းဖို့ဒ် ဘရစ်ချ်ကွင်းတွင် မန်ချက်စတာ ယူနိုက်တက်အသင်းအား အနိုင်ရရှိခဲ့သည့်ပွဲစဉ်၏ တစ်လုံးတည်းသော အနိုင်ဂိုးကို ခေါင်းတိုက်သွင်းယူပေးခဲ့ပြီး ရီးရဲလ် ဘက်တစ်အသင်းနှင့် ကွန်ဖရင့်စ်လိဂ်ပြိုင်ပွဲ၊ ဗိုလ်လုပွဲတွင်လည်း ပွဲချိန်ပြည့်ပါဝင် ခြေစွမ်းပြနိုင်ခဲ့သည်..။ ကူကူရယ်လာ မှာ ကလပ်အသင်းများ ကမ္ဘာ့ဖလားပြိုင်ပွဲ မစထင်မီ ၂၀၂၄/၂၅ ဘောလုံးရာသီတွင် (၄၈) ပွဲကစား၊ (၆) ဂိုးသွင်းယူပေးခဲ့ပြီး အဆိုပါဘောလုံးရာသီတွင် ချယ်လ်ဆီးအသင်းအတွက် ပွဲအများဆုံးကစားခွင့် ရခဲ့သည့် ကစားသမားအဖြစ် မှတ်တမ်းတင်နိုင်ခဲ့သည်..။

နွေရာသီတွင် ကျင်းပခဲ့သော ကလပ်အသင်းများ ကမ္ဘာ့ဖလားပြိုင်ပွဲတွင်လည်း ဆက်လက်ခြေစွမ်းပြခဲ့ပြီး ချယ်လ်ဆီးအသင်း ယှဉ်ပြိုင်ခဲ့ရသည့် (၇) ပွဲတွင် (၆) ပွဲကစားခွင့်ရခဲ့သည်..။ 

မာ့ခ် ကူကူရယ်လာ မှာ စပိန်လက်ရွေးစင်အသင်းအတွက် ၂၀၂၁ ခုနှစ်က လစ်သူယေးနီးယားအသင်းနှင့် ခြေစမ်းပွဲစဉ်တွင် စတင်ကစားခွင့်ရရှိခဲ့ပြီး ၂၀၂၂ ခုနှစ်၊ တိုကျိုနွေရာသီ အိုလံပစ်ပြိုင်ပွဲဝင် စပိန်အသင်းနှင့်အတူ ဒုတိယငွေတံဆိပ်ဆု ရရှိခဲ့သည်..။ ချယ်လ်ဆီးအသင်းကို ရောက်ရှိခဲ့ပြီးနောက်ပိုင်း ၂၀၂၄ ခုနှစ်၊ မတ်လ၊ ဘရာဇီးလ်အသင်းနှင့် ယှဉ်ပြိုင်ကစားခဲ့သည့် ခြေစမ်းပွဲစဉ်တွင် စပိန်လက်ရွေးစင် အသင်းအတွက် ပြန်လည်အရွေးခံခဲ့ရသည်..။ ထို့နောက် ဂျာမနီနိုင်ငံတွင် ကျင်းပခဲ့သည့် ယူရို ၂၀၂၄ ပြိုင်ပွဲဝင် စပိန်အသင်းတွင် ရွေးချယ်ခံခဲ့ရသည့်အပြင် ပါဝင်ကစားခွင့်ရခဲ့သည့် ပွဲစဉ်များတွင် ခြေစွမ်းပြနိုင်ခဲ့သောကြောင့် ဦးစားပေး ဘယ်နောက်ခံလူအဖြစ် အုပ်စုအဆင့် ပွဲစဉ်များတွင် ပါဝင်ခဲ့ရသည်..။

အင်္ဂလန်အသင်းနှင့် ယှဉ်ပြိုင်ခဲ့သည့် ဗိုလ်လုပွဲတွင် မီခေးလ် အိုရာဇဘယ်လ် သွင်းယူပေးခဲ့သည့် အနိုင်ဂိုးအား တိကျသည့် ဖြတ်တင်ဘောမှတဆင့် ဖန်တီးပေးနိုင်ခဲ့သည်..။ မာ့စ် ကူကူရယ်လာ မှာ ယူရို ၂၀၂၄ ပြိုင်ပွဲ၏ အကောင်းဆုံးအသင်း (Team of the Tournament) တွင် ရွေးချယ်ခံခဲ့ရသည်..။

၂၀၂၄/၂၅ ဘောလုံးရာသီတွင် စပိန်လက်ရွေးစင် အသင်းနှင့်အတူ နောက်ထပ်တစ်ကြိမ် ဗိုလ်လုပွဲ တက်ရောက်နိုင်ခဲ့ပြီး UEFA Nations League ပြိုင်ပွဲ၊ ဗိုလ်လုပွဲစဉ်အဖြစ် ပေါ်တူဂီအသင်းအား ပင်နယ်တီ အဆုံးအဖြတ် ကန်သွင်းရာတွင် ရှုံးနိမ့်ခဲ့သည်..။