6 Levi Colwill

ကိုယ်ရေးအကျဉ်း
=========

လီဗိုင်း ကိုဝဲလ် မှာ ချယ်လ်ဆီးအသင်း လူငယ်အကယ်ဒမီသို့ အသက် (၉) နှစ်အောက် ကစားသမားအုပ်စုနှင့်အတူ ရောက်ရှိလာခဲ့ပြီး လူငယ်အသင်းအဆင့်ဆင့်ကို ဖြတ်သန်းခဲ့ကာ ယခုနှစ်ဘောလုံးရာသီတွင် ချယ်လ်ဆီးအသင်းကြီးသို့ ရောက်ရှိလာခဲ့သည်..။ အင်္ဂလန် လူငယ်လက်ရွေးစင် ကစားသမားမှာ ဗဟိုနောက်ခံလူအဖြစ် အများဆုံးကစားခဲ့ပြီး ဘယ်အစွန် နောက်ခံလူ၊ left wing back အဖြစ်လည်း ကစားနိုင်သူဖြစ်သည်..။ ဘောလုံးပေးပို့၊ ဖြန့်ဝေမှု ကောင်းမွန်သည့် ball playing defender အဖြစ် လူသိများသည်..။

ကိုဝဲလ် မှာ ၂၀၁၉/၂၀ ဘောလုံးရာသီတွင် ချယ်လ်ဆီးလူငယ် (အသက် ၁၈ နှစ်အောက်) အသင်းသို့ ရောက်ရှိခဲ့ပြီး ဗလင်စီယာအသင်းနှင့် UEFA Youth League လူငယ်ချန်ပီယံလိဂ် ပြိုင်ပွဲတွင် ချယ်လ်ဆီးလူငယ် (အသက် ၁၉ နှစ်အောက်) အသင်းနှင့်အတူ ပါဝင်ခွင့်ရခဲ့သည်..။ လူငယ် FA ဖလားပြိုင်ပွဲတွင် ဘရန့်ဒ်ဖို့ဒ် စီးတီးအသင်းအား ၅ဂိုး- ဂိုးမရှိဖြင့် အနိုင်ရရှိခဲ့သည့်ပွဲတွင် စတင်ပါဝင်ခွင့်ရခဲ့သည်..။ အဆိုပါဘောလုံးရာသီတွင် ဒူးဒဏ်ရာကြောင့် အချိန်အတော်ကြာကြာ အနားယူခဲ့ရသောကြောင့် စုစုပေါင်း (၂၂)ပွဲသာ ပါဝင်ကစားခဲ့ရသည်..။ ထို့နောက် အသက် (၁၇) နှစ်ပြည့်မြောက်ခဲ့သည့် မွေးနေ့တွင် အသင်းနှင့်ပထမဆုံး စာချုပ်ချုပ်ဆိုခဲ့သည်..။

၂၀၂၁ ခုနှစ်၊ ဇွန်လတွင် ချယ်လ်ဆီးအသင်းနှင့် လေးနှစ်သက်တမ်းစာချုပ် ချုပ်ဆိုနိုင်ခဲ့ပြီး ချန်ပီယံရှစ် ပြိုင်ပွဲဝင် ဟာဒက်စ်ဖီးလ် တောင်းအသင်းသို့ အဌားထွက်ခွာခဲ့သည်..။ လီဗိုင်း ကိုဝဲလ် မှာ ဟာဒက်စ်ဖီးလ် တောင်းအသင်းတွင် ပုံမှန်ကစားခွင့် ရရှိခဲ့ပြီး  ချန်ပီယံရှစ်ပြိုင်ပွဲ၊ တတိယနေရာရရှိခဲ့သည့် အသင်းတွင် ဗဟိုနောက်ခံလူအဖြစ် ပွဲပေါင်း (၂၉) ပွဲ ပါဝင်ကစားခဲ့ရသည်..။ သို့သော် ပရီးမီးယားလိဂ် တန်းတက်ခွင့်အဆုံးအဖြတ်အတွက် ယှဉ်ပြိုင်ခဲ့ရသည့် play off final ပွဲစဉ်တွင် ပွဲချိန်ပြီးဆုံးခါနီး နောက်ဆုံးထိချက်တွင် ကိုယ့်ဂိုးကိုယ် သွင်းမိခဲ့သဖြင့် ရှုံးနိမ့်ခဲ့ရသည်..။

နည်းပြသောမတ်စ် တူခယ်လ် ၏ ၂၀၂၂/၂၃ ဘောလုံးရာသီအတွက် ရာသီကြိုပြင်ဆင်မှုများ ပြုလုပ်နေသည့်အသင်းတွင် ပါဝင်ခဲ့သော်လည်း ရာသီစတင်ခါနီးတွင် ဘရိုက်တန်အသင်းသို့ အဌားသွားရောက်ခဲ့ပြန်သည်..။ ဘရိုက်တန်အသင်းမှာ ပရီးမီးယားလိဂ် ပြိုင်ပွဲတွင် အဆင့် (၆) နေရာ ရရှိခဲ့သလို လီဗိုင်း ကိုဝဲလ် မှာ ဗဟိုနောက်ခံလူအဖြစ် (၂၃) ပွဲ ကစားခွင့်ရရှိခဲ့သည်..။ ၂၀၂၃/၂၄ ဘောလုံးရာသီတွင် နည်းပြမော်ရစ္စစီယို ပိုချက်တီနို ၏ အမေရိကန်ပြည်ထောင်စု ရာသီကြိုခရီးစဉ်တွင် ပါဝင်ခဲ့ပြီး ၂၀၂၃ ခုနှစ်၊ ဩဂုတ်လတွင် အသင်းနှင့် (၆) နှစ်သက်တမ်း (+ ၁ နှစ် ထပ်မံသက်တမ်းတိုးခွင့် အပါအဝင်) စာချုပ်သစ် ချုပ်ဆိုနိုင်ခဲ့သည်..။ လီဗိုင်း ကိုဝဲလ် မှာ ချယ်လ်ဆီးအသင်းနှင့် ပထမဆုံးပွဲထွက်ခွင့်ကို လီဗာပူးလ်အသင်းနှင့် ရာသီအဖွင့်ပွဲစဉ်တွင် ရရှိခဲ့ပြီး ၂၀၂၃ ခုနှစ်၊ ဒီဇင်ဘာလက ဘရိုက်တန်အသင်းနှင့် အိမ်ကွင်းပွဲစဉ်တွင် ထောင့်ကန်ဘောမှတဆင့် ချယ်လ်ဆီးအသင်းအတွက် ပထမဆုံးဂိုးကို သွင်းယူပေးခဲ့သည်..။

မန်ချက်စတာ ယူနိုက်တက်အသင်းနှင့် ယှဉ်ပြိုင်ခဲ့သည့် အဝေးကွင်းပွဲစဉ်တွင် ရိစ် ဂျိမ်းစ်၊ ကော်နာ ဂါလက်ချာ တို့ မပါဝင်နိုင်ခဲ့သောကြောင့် အသင်းခေါင်းဆောင်အဖြစ် ပထမဆုံးအကြိမ် တာဝန်ယူခဲ့ရသည်..။ ဘယ်အစွန် နောက်ခံလူအဖြစ် ကစားနေရင်း ဒဏ်ရာရရှိခဲ့သောကြောင့် ခေတ္တအနားယူခဲ့ရပြီး ဒဏ်ရာပြန်လည် ကောင်းမွန်လာချိန်တွင် ဗဟိုနောက်ခံလူအဖြစ် ပြန်လည်ကစားခဲ့ရသည်..။

၂၀၂၄ ခုနှစ်၊ မတ်လနှင့် ဧပြီလများတွင် ဒဏ်ရာကြောင့် ထပ်မံအနားယူခဲ့ရပြီး မေလဆန်းတွင် လူစားဝင် ကစားသမားအဖြစ် ပြန်လည်ပါဝင်နိုင်ခဲ့သည်..။ ကိုဝဲလ် မှာ ၂၀၂၃/၂၄ ဘောလုံးရာသီတွင် (၂၇) ပွဲကစားခဲ့ရပြီး လူစားဝင် ကစားသမားအဖြစ် (၅) ပွဲ ပါဝင်ခဲ့ရသည်..။

လီဗိုင်း ကိုဝဲလ် မှာ အင်္ဂလန်လူငယ် ကျောင်းသားအသင်း အဆင့်ဆင့်တွင် ပါဝင်ခဲ့ရပြီး အင်္ဂလန်လူငယ် (အသက် ၂၁ နှစ်အောက်) အသင်းတွင် ၂၀၂၂ ခုနှစ်၊ မတ်လအတွင်း အင်ဒိုရာအသင်းအား အနိုင်ရရှိခဲ့သောပွဲတွင် စတင်ပါဝင်ခွင့်ရရှိခဲ့သည်..။ နောက်ခံလူ ကော်ဝီးလ် မှာ ၂၀၂၃ ခုနှစ်၊ နွေရာသီတွင် ကျင်းပခဲ့သည့် ဉရောပလူငယ် (အသက် ၂၁ နှစ်အောက်) တံခွန်စိုက် ချန်ပီယံဖလားပြိုင်ပွဲတွင် ပေးဂိုးမရှိစံချိန်ဖြင့် ဗိုလ်စွဲခဲ့သည့် အင်္ဂလန်လူငယ်အသင်းတွင် အဓိကနောက်ခံလူအဖြစ် ပွဲစဉ်တိုင်းတွင် ခြေစွမ်းပြ ကစားနိုင်ခဲ့သည်..။

အင်္ဂလန်လက်ရွေးစင် အသင်းကြီးအတွက် ပထမဆုံး ခေါ်ယူခံခဲ့ရမှုကို ၂၀၂၃ ခုနှစ်၊ ဩဂုတ်လတွင် ရရှိခဲ့ပြီး ပထမဆုံး ကစားခွင့်ကို ၂၀၂၃ ခုနှစ်၊ အောက်တိုဘာလက ဩစတြီးယားအသင်းအား အနိုင်ရခဲ့သည့်ပွဲစဉ်တွင် ဘယ်နောက်ခံလူအဖြစ် ပွဲချိန်မိနစ် (၉၀) အပြည့် ကစားခွင့်ရခဲ့သည်..။