15 Nicolas Jackson

ကိုယ်ရေးအကျဉ်း
========

ချယ်လ်ဆီးအသင်းမှာ တိုက်စစ်မှူး နီကိုလပ်စ် ဂျက်ဆင် အား စပိန်လာလီဂါ ပြိုင်ပွဲဝင် ဗီလာရီးရဲလ်အသင်းမှ ရှစ်နှစ်သက်တမ်း စာချုပ်ဖြင့် ၂၀၂၃ ခုနှစ်၊ ဩဂုတ်လတွင် ခေါ်ယူခဲ့သည်..။ အသက် (၂၂) နှစ်အရွယ်  ဆီနီဂေါ လက်ရွေးစင် တိုက်စစ်မှူးမှာ ၂၀၂၂/၂၃ ဘောလုံးရာသီတွင် စပိန်လာလီဂါပြိုင်ပွဲ၌ (၁၂) ဂိုးသွင်းယူပေးခဲ့ပြီး ခြေစွမ်းပြ၊ ကစားနိုင်ခဲ့သည်..။

ဂျက်ဆင် မှာ အာဖရိကတိုက်၊ ဂမ်ဘီယာ နိုင်ငံတွင် မွေးဖွားခဲ့သော်လည်း ဆီနီဂေါနိုင်ငံတွင် ကြီးပြင်းခဲ့သည်..။ ဆီနီဂေါ ပရီးမီးယားလိဂ် အသင်းတစ်သင်းဖြစ်သော Casa Sports အသင်းတွင် ကစားသမားဘဝ စတင်ခဲ့ပြီး ၂၀၁၉ ခုနှစ်၊ စက်တင်ဘာလတွင် ဗီလာရီးရဲလ် အသင်းသို့ ပြောင်းရွှေ့ခဲ့သည်..။ ထို့နောက် စပိန်ဒုတိယတန်းမှ Mirandes အသင်းသို့ အဌားသွားရောက်ခဲ့သည်..။

စပိန်နိုင်ငံမှ ဒုတိယဘောလုံးရာသီတွင် ဗီလာရီးရဲလ် (ခ) အသင်းတွင် ကစားခဲ့ပြီး play-off ဗိုလ်လုပွဲတွင် အဆုံးအဖြတ် သွင်းဂိုးများကို သွင်းယူပေးခဲ့သည်..။ ၂၀၂၂ နွေရာသီတွင် ဗီလာရီးရဲလ် အသင်းကြီးသို့ ရောက်ရှိခဲ့ပြီး အဆိုပါဘောလုံးရာသီတွင် အသင်းအတွက် (၃၈) ပွဲ ကစားပေးခဲ့သည်..။

နီကိုလပ်စ် ဂျက်ဆင် မှာ ရာသီပြီးဆုံးခါနီး ကာလတွင် လာလီဂါပြိုင်ပွဲ၏ ခြေစွမ်းအပြနိုင်ဆုံး ကစားသမားအဖြစ် နောက်ဆုံး (၈) ပွဲတွင် (၉) ဂိုး သွင်းယူပေးနိုင်ခဲ့ပြီး ၂၀၂၃ ခုနှစ်၊ မေလအတွက် ‘တစ်လတာ အကောင်းဆုံး ကစားသမားဆု’ ချီးမြှင့်ခံခဲ့ရသည်…။

၂၀၂၃/၂၄ ဘောလုံးရာသီတွင် ရာသီအဖွင့် လီဗာပူးလ်အသင်းနှင့် ပွဲစဉ်မှစတင် ပွဲထွက်ခွင့်ရခဲ့ပြီး လူတန် တောင်းအသင်းအား အနိုင်ရခဲ့သည့်ပွဲစဉ်တွင် အသ်းအတွက် ပထမဆုံးဂိုး ရရှိခဲ့သည်..။ ၂၀၂၃ ခုနှစ်၊ နိုဝင်ဘာလ၊ တော့တင်ဟမ်အသင်းအား ၄ဂိုး- ၁ဂိုးဖြင့် အနိုင်ရရှိခဲ့သော အဝေးကွင်းပွဲစဉ်တွင် သုံးဂိုးသွင်းပြီး ပထမဆုံး hattrick ရရှိခဲ့သည်..။

ပထမဆုံးဂိုးဖန်တီးမှုကို ဘရိုက်တန်အသင်းနှင့်ပွဲစဉ်တွင် လီဗိုင်း ကိုဝဲလ် သွင်းယူခဲ့သောဂိုးအတွက် ခေါင်းတိုက်ပြီး ဖန်တီးပေးခဲ့သည်..။ အဆိုပါဘောလုံးရာသီတွင် တိုက်စစ်မှူးနေရာသာမက ဘယ်တောင်ပံ တိုက်စစ်မှူးအဖြစ်ပါ ကစားပေးခဲ့ရသည်..။ တိုက်စစ်မှူး ဂျက်ဆင် မှာ ၂၀၂၃/၂၄ ဘောလုံးရာသီတွင် (၄၄) ပွဲကစားခွင့်ရခဲ့ပြီး ပြိုင်ပွဲစုံ သွင်းဂိုး (၁၇) ဂိုး ရရှိခဲ့သည်..။

ဗီလာရီးရဲလ် အသင်းတွင် ပြသခဲ့သော ခြေစွမ်းကြောင့် တိုက်စစ်မှူး ဂျက်ဆင် မှာ ၂၀၂၂ ခုနှစ်၊ ကမ္ဘာ့ဖလား ပြိုင်ပွဲဝင် ဆီနီဂေါ လက်ရွေးစင် အသင်းအတွက် ခေါ်ယူခြင်းခံခဲ့ရသည်..။ သူ၏ပထမဆုံး နိုင်ငံအသင်းအတွက် ပွဲထွက်ခွင့်ကို နယ်သာလန်အသင်းနှင့် အုပ်စုအဖွင့်ပွဲစဉ်တွင် ရရှိခဲ့သည်..။

၂၀၂၄ ခုနှစ်၊ နှစ်ဆန်းပိုင်းတွင် ကျင်းပသော အာဖရိက ဖလားပြိုင်ပွဲတွင် ဆီနီဂေါအသင်းအတွက် ရွေးချယ်ခံခဲ့ရပြီး အုပ်စုပွဲစဉ်များတွင် လူစားဝင်ကစားသမားအဖြစ် ပါဝင်ခဲ့ရသည်..။ သို့သော် (၁၆) သင်းအဆင့် ရှုံးထွက်ပွဲစဉ်တွင် ဆီနီဂေါအသင်းမှာ အိမ်ရှင်အိုင်ဗရီကို့စ် အသင်းအား ပင်နယ်တီငါးလုံးစီ အဆုံးအဖြတ်ကန်သွင်းရာတွင် ရှုံးနိမ့်ခဲ့သည်..။ နီကိုလပ်စ် ဂျက်ဆင် မှာ အဆိုပါပွဲစဉ်တွင် ဒုတိယပိုင်းအစတွင် လူစားဝင်ခွင့်ရခဲ့သော်လည်း ပင်နယ်တီအဆုံးအဖြတ် ကန်သွင်းရာတွင် ပါဝင်ခဲ့ခြင်းမရှိပေ..။