20 Cole Palmer

ကိုယ်ရေးအကျဉ်း
==========

ကိုးလ် ပါးလ်မား မှာ မန်ချက်စတာ စီးတီးအသင်းမှ အပြောင်းအရွှေ့ရာသီ နောက်ဆုံးရက်ဖြစ်သော ၂၀၂၃ ခုနှစ်၊ စက်တင်ဘာလ (၁) ရက်နေ့တွင် ချယ်လ်ဆီးအသင်းသို့ ခုနှစ်နှစ်သက်တမ်းစာချုပ် (+ တစ်နှစ်သက်တမ်း ထပ်မံတိုးခွင့် အပါအဝင်) ဖြင့် ရောက်ရှိလာခဲ့သည်..။

ပါးလ်မား မှာ မန်ချက်စတာ စီးတီးအသင်း လူငယ်အကယ်ဒမီသို့ အသက် (၈) နှစ်အောက် လူငယ်အသင်းနှင့်အတူ စတင်ရောက်ရှိပြီး လူငယ်အသင်းအဆင့်ဆင့်ကို ဖြတ်သန်းခဲ့ရသည်..။ ၂၀၁၉/၂၀ ဘောလုံးရာသီတွင် FA လူငယ်ဖလား ဗိုလ်စွဲခဲ့သည့် မန်ချက်စတာ စီးတီး လူငယ်အသင်းကို အသင်းခေါင်းဆောင်အဖြစ် တာဝန်ယူခဲ့ရသလို ဗိုလ်လုပွဲစဉ်တွင် ချယ်လ်ဆီးအသင်းအား အနိုင်ဂိုးတစ်ဂိုး သွင်းယူပေးခဲ့သည်..။ အဆိုပါဘောလုံးရာသီတွင် စတန်းဖို့ဒ် ဘရစ်ခ်ျကွင်း၌ ချယ်လ်ဆီးအသင်းနှင့် ယှဉ်ပြိုင်ခဲ့သည့် မန်ချက်စတာ စီးတီးအသင်းကြီးတွင် လူစားဝင်ကစားသမားစာရင်း၌ ပါဝင်ခွင့်ရခဲ့သည်..။

မန်ချက်စတာ စီးတီးအသင်းကြီးအတွက် ပထမဆုံး ပွဲထွက်ခွင့်ကို ဘန်လေအသင်းအား အနိုင်ရရှိခဲ့သည့် Carabao ဖလားပြိုင်ပွဲ၊ စတုတ္ထအဆင့် ပွဲစဉ်တွင် စတင်ရရှိခဲ့ပြီး Wycombe Wanderers အသင်းအား အနိုင်ရရှိခဲ့သည့် ပွဲတွင် အသင်းကြီးအတွက် ပထမဆုံးသွင်းဂိုး ရရှိခဲ့သည်..။

၂၀၂၂/၂၃ ဘောလုံးရာသီတွင် အသင်းကြီးလူစာရင်းတွင် ပုံမှန်ကစားခွင့် ရရှိခဲ့ပြီး ပြိုင်ပွဲစုံ (၂၅) ပွဲ ပါဝင်ကစားခဲ့ရကာ ပရီးမီးယားလိဂ်၊ ချန်ပီယံလိဂ် နှင့် FA ဖလား တို့ကို ဆွတ်ခူးရရှိခဲ့သည်..။ ၂၀၂၃/၂၄ ဘောလုံးရာသီအစတွင် အာဆင်နယ်အသင်းအား အနိုင်ရရှိခဲ့သည့် Community Shield ပြိုင်ပွဲနှင့် ဆီဗီးလားအသင်းအား အနိုင်ရရှိခဲ့သည့် UEFA စူပါဖလား၊ ဗိုလ်လုပွဲများတွင် မန်ချက်စတာ စီးတီးအသင်းအတွက် သွင်းဂိုးများကို ရယူပေးခဲ့သည်..။

ချယ်လ်ဆီးအသင်းအတွက် ပထမဆုံး ပွဲကစားခွင့်ကို နော့တင်ဟမ် ဖောရက်စ်အသင်းနှင့် အိမ်ကွင်းပွဲစဉ်တွင် လူစားဝင် ကစားသမားအဖြစ် စတင်ပါဝင်ပြီး ရရှိခဲ့သည်..။ ဘရိုက်တန်အသင်းအား အနိုင်ရရှိခဲ့သည့် Carabao ဖလားပြိုင်ပွဲတွင် အသင်းနှင့်ပထမဆုံး ပွဲထွက်ခွင့်ရခဲ့ပြီး ပွဲစဉ်၏တစ်လုံးတည်းသော အနိုင်ဂိုးကို ဖန်တီးပေးနိုင်ခဲ့သည်..။ ၂၀၂၃ ခုနှစ်၊ အောက်တိုဘာလ၊ ဘန်လေအသင်းအား ၄ဂိုး- ၁ဂိုးဖြင့် အနိုင်ရရှိခဲ့သည့် အဝေးကွင်းပွဲစဉ်တွင် ပင်နယ်တီပြစ်ဒဏ်ဘောမှတဆင့် ချယ်လ်ဆီးအသင်းအတွက် ပထမဆုံး သွင်းဂိုးရရှိခဲ့သည်..။

ကိုးလ် ပါးမား မှာ ပွဲထွက်ကစားသမား နေရာအပြင် ပထမဦးစားပေး ပင်နယ်တီကန်သွင်းသူအဖြစ်ပါ မြန်မြန်ဆန်ဆန် ရရှိခဲ့ပြီး အသင်းဟောင်း မန်ချက်စတာ စီးတီးအသင်းနှင့် ရင်ဆိုင်ခဲ့ရသည့် ပွဲစဉ်အပါအဝင် သူ၏ပထမဆုံး သွင်းဂိုးလေးဂိုးစလုံးကို ပင်နယ်တီ ပြစ်ဒဏ်ဘောများမှ သွင်းယူပေးခဲ့သည်..။ အဆိုပါကာလအတွင်း ဂိုးဖန်တီးမှု လေးကြိမ်ကိုပါ ပြုလုပ်ပေးနိုင်ခဲ့သည်..။

လူတန် တောင်းအသင်းအား အနိုင်ရရှိခဲ့သည့်ပွဲစဉ်တွင် ပင်နယ်တီ မဟုတ်သည့် သွင်းဂိုးစတင်ရရှိခဲ့ပြီး အဆိုပါပွဲစဉ်မှ ဂိုးသမားကိုပါ ကျော်ဖြတ်သွင်းယူပေးခဲ့သည့် ဒုတိယဂိုးမှာ ချယ်လ်ဆီးအသင်း၏ ဒီဇင်ဘာလအတွက် အကောင်းဆုံးသွင်းဂိုးအဖြစ် ရွေးချယ်ခံခဲ့ရသည်.။ ထို့နောက် မစ်ဒယ်လ်ဘရော့အသင်းနှင့် တွေ့ဆုံခဲ့သည့် Carabao ဖလား၊ အကြိုဗိုလ်လုပွဲတွင်လည်း နှစ်ဂိုးသွင်းပေးနိုင်ခဲ့သည်..။

၂၀၂၄ ခုနှစ် မတ်လနှင့် ဧပြီလအတွင်း ယှဉ်ပြိုင်ခဲ့ရသည့် (၆) ပွဲတွင် (၁၁) ဂိုး သွင်းပေးနိုင်ခဲ့သလို အဆိုပါကာလအတွင်း မန်ချက်စတာ ယူနိုက်တက်နှင့်ပွဲစဉ်တွင် သုံးဂိုးသွင်းပြီး hattrick ရရှိခဲ့သည်..။ အဲဗာတန်အား အနိုင်ရခဲ့သည့်ပွဲတွင် တစ်ဦးတည်းလေးဂိုး သွင်းယူနိုင်ခဲ့သလို ထိုပွဲ၏အဖွင့်ဂိုးမှာ ပရီးမီးယားလိဂ် ပြိုင်ပွဲ၏ တစ်လတာ အကောင်းဆုံးသွင်းဂိုး (Goal of the Month) အဖြစ် ရွေးချယ်ခံခဲ့ရသည်..။ ထို့အပြင် ဧပြီလ၏ တစ်လတာ အကောင်းဆုံး ကစားသမားဆုကိုပါ ဆွတ်ခူးနိုင်ခဲ့သည်…။

၂၀၂၄ ခုနှစ်၊ မေလတွင် ကိုးလ် ပါးမား မှာ ချယ်လ်ဆီးအသင်းမှ အသက် (၂၁) နှစ်အောက် ကစားသမားများအနက် တစ်ရာသီအတွင်း ပရီးမီးယားလိဂ် ဂိုးပါဝင်ပတ်သက်နိုင်မှု (သွင်းဂိုး + ဂိုးဖန်တီးမှု) (၃၀) ကျော်အောင် စွမ်းဆောင်နိုင်ခဲ့သော ပထမဆုံး ကစားသမားအဖြစ် စံချိန်မှတ်တမ်း ရေးထိုးနိုင်ခဲ့သည်..။

ထို့အပြင် ချယ်လ်ဆီးအသင်း၏ နှစ်ပတ်လည် ညစာစားပွဲတွင် ချယ်လ်ဆီးအသင်း ပရိသတ်များက ရွေးချယ်၊ ချီးမြှင့်သည့် တစ်နှစ်တာ အကောင်းဆုံး ကစားသမားဆု (Chelea Player of the Year) နှင့် အသင်းဖော် ကစားသမားများက ချီးမြှင့်သည့် တစ်နှစ်တာ အကောင်းဆုံး ကစားသမားဆု (Players’ Player of the Year) များကိုပါ ဆွတ်ခူးနိုင်ခဲ့သည်..။

ကိုးလ် ပါးမား မှာ ၂၀၂၃/၂၄ ဘောလုံးရာသီ၊ ပရီးမီးယားလိဂ် ပြိုင်ပွဲ၏ အကောင်းဆုံး လူငယ်ကစားသမားဆု (Premier League’s Young Player of the Season) နှင့် ကစားသမားများ သမဂ္ဂ (PFA) က ချီးမြှင့်သော ပရိသတ်များ၏ အကောင်းဆုံး ကစားသမားဆု (PFA Premier League Fans’ Player of the Year)၊ တစ်နှစ်တာ အကောင်းဆုံး လူငယ်ကစားသမားဆု (PFA Young Player of the Year) များကိုပါ ဆက်လက် ရရှိခဲ့သည်..။

ပါးမား မှာ ၂၀၂၃/၂၄ ဘောလုံးရာသီအတွင်း ချယ်လ်ဆီးအသင်းနှင့် (၄၅) ပွဲကစား၊ (၂၅) ဂိုးသွင်းယူပေးနိုင်ပြီး ဂိုးဖန်တီးမှု (၁၁) ကြိမ် ပြုလုပ်ပေးနိုင်ခဲ့သည်..။ ပါးမား မှာ ဒီဒီယာ ဒရော့ဘာ၊ ဖရန့် လမ်းပတ် တို့နောက်ပိုင်း ပရီးမီးယားလိဂ် တစ်ရာသီအတွင်း သွင်းဂိုး (၂၀) အထက်၊ ဂိုးဖန်တီးမှု (၁၀) ကြိမ်အထက် ပြုလုပ်ပေးနိုင်ခဲ့သည့် ကစားသမားအဖြစ် မှတ်တမ်းတင်နိုင်ခဲ့သည်..။

ထို့အပြင် သူ၏ သွင်းဂိုး (၂၅) မှာ ၂၀၀၉/၂၀ ဘောလုံးရာသီနောက်ပိုင်း တစ်ရာသီအတွင်း ဂိုးအများဆုံး သွင်းပေးနိုင်ခဲ့သည့် ချယ်လ်ဆီးအသင်း ကစားသမားအဖြစ် မှတ်တမ်းဝင်စေခဲ့သည်..။

ကိုးလ် ပါးမား မှာ လီဗိုင်း ကော်ဝီးလ်၊ နိုနီ မာဒူအီကေး တို့နှင့်အတူ ၂၀၂၃ ခုနှစ်၊ နွေရာသီတွင် ကျင်းပခဲ့သော ဥရောပလူငယ် (အသက် ၂၁ နှစ်အောက်) တံခွန်စိုက်ပြိုင်ပွဲတွင် ဗိုလ်စွဲခဲ့သည့် အင်္ဂလန်လူငယ် (အသက် ၂၁ နှစ်အောက်) အသင်းတွင် ပါဝင်ခဲ့သည်..။

၂၀၂၃ ခုနှစ်၊ နိုဝင်ဘာလတွင် မော်လ်တာ၊ မြောက်မက်ဆီဒိုးနီးယား အသင်းများနှင့် ဥရောပခြေစစ်ပွဲစဉ် ယှဉ်ပြိုင်ကစားမည့် အင်္ဂလန်အသင်းအတွက် ပထမဆုံးအကြိမ် ခေါ်ယူခြင်းခံခဲ့ရသည်..။ ဝင်ဘလေကွင်း၌ မော်လ်တာ အသင်းအား ၂ဂိုး- ဂိုးမရှိဖြင့် အနိုင်ရရှိခဲ့သည့်ပွဲစဉ်တွင် အင်္ဂလန်အသင်းကြီးအတွက် ပထမဆုံး ကစားခွင့်ကို ဒုတိယပိုင်း လူစားဝင် ကစားသမားအဖြစ် ရရှိခဲ့သည်..။

အင်္ဂလန်အသင်းအတွက် ပထမဆုံးသွင်းဂိုးကို ၂၀၂၄ ခုနှစ်၊ ဇွန်လ၊ ဘော့စ်နီးယားအသင်းနှင့် ခြေစမ်းပွဲတွင် ပင်နယ်တီပြစ်ဒဏ်ဘောမှတဆင့် သွင်းယူပေးခဲ့ပြီး ဂျာမနီနိုင်ငံသို့ သွားရောက်မည့် အင်္ဂလန်အသင်း လူစာရင်းတွင် ပါဝင်ခဲ့သည်..။

ယူရို ၂၀၂၄ ပြိုင်ပွဲ၏ အစောပိုင်း အုပ်စုအဆင့်ပွဲစဉ်များတွင် ပါဝင်ကစားခွင့် မရခဲ့သော်လည်း ဆွစ်ဇာလန်အသင်းနှင့် ကွာတားဖိုင်နယ် ပွဲစဉ်တွင် ပင်နယ်တီအဆုံးအဖြတ် ကန်သွင်းရာတွင် အရေးပါသော သွင်းဂိုးကို ရယူပေးနိုင်ခဲ့သည်..။ နယ်သာလန်အသင်းအား အနိုင်ရရှိခဲ့သည့်ပွဲစဉ်တွင် အိုလေး ဝက်ကင်းစ် သွင်းယူပေးခဲ့သော အနိုင်ဂိုးကို ဖန်တီးပေးနိုင်ခဲ့သည်..။

စပိန်အသင်းနှင့် ယှဉ်ပြိုင်ခဲ့သည့် ဗိုလ်လုပွဲတွင် အင်္ဂလန်အသင်းအတွက် တစ်လုံးတည်သော ချေပဂိုးကို သွင်းယူပေးနိုင်ခဲ့သော်လည်း စပိန်အသင်းမှာ ဒုတိယပိုင်းပြီးခါနီးတွင် သွင်းယူပေးခဲ့သော အနိုင်ဂိုးဖြင့် ဗိုလ်စွဲသွားခဲ့သည်..။