အင်းမရိတ်ကွင်းတွင် အာဆင်နယ်အသင်းနှင့် ယှဉ်ပြိုင်ကစားခဲ့သည့် ပရီးမီးယားလိဂ်ပွဲစဉ်မှ ချယ်လ်ဆီးအသင်း၏ ကစားကွက် အခင်းအကျင်း၊ မီခေးလ် မာရီနို ၏ ထောင့်ကန်ဘောမှ ခေါင်းတိုက်သွင်းယူသွားခဲ့သည့်ဂိုးတွင် ချယ်လ်ဆီးအသင်း၏ ခံစစ်ပိုင်းကာကွယ်မှု အားနည်းချက်များနှင့် အဝေးကွင်းပွဲစဉ်များတွင် ရုန်းကန်နေရသည့် ချယ်လ်ဆီးအသင်း၏ တိုက်စစ်ပိုင်းအားနည်းချက်၊ နည်းပြအင်ဇို မာရက်စ်ကာ ၏ နည်းစနစ်အခင်းအကျင်းအပေါ် တော့တင်ဟမ်အသင်း ကွင်းလယ် ကစားသမားဟောင်း တင်မ် ရှားဝုဒ် နှင့် အဲဗာတန်အသင်း ကွင်းလယ် ကစားသမားဟောင်း လီယွန် အော့စ်မန်း တို့က Premier League Production မှ တင်ဆက်သော Generation XG အစီအစဉ်တွင် အောက်ပါအတိုင်း သုံးသပ်၊ ပြောကြားခဲ့ပါသည်..။

လီယွန် အော့စ်မန်း - ဒီတစ်ပါတ်မှာ အသင်းကြီးထိပ်တိုက် (big game) ပွဲစဉ်လို့ ပြောရမယ့် အာဆင်နယ်နဲ့ ချယ်လ်ဆီးအသင်းတို့ရဲ့ ပွဲစဉ်မှာ အာဆင်နယ်အသင်းက ချန်ပီယံဆုဖလား စိန်ခေါ်နိုင်မယ့် လမ်းကြောင်းပေါ်မှာ ရှိနေဆဲဖြစ်ပြီး ချယ်လ်ဆီးအသင်းဟာ ချန်ပီယံလိဂ်ဝင်ခွင့် မျှော်လင့်ချက် ရှိနေပါတယ်..။ ဒါပေမယ့်တကယ် ကန်သွားတဲ့ပွဲစဉ်ဟာ အဲဒီလိုထိပ်တန်းအသင်းကြီးချင်း ယှဉ်ပြိုင်ခဲ့တဲ့ ပွဲကြီးပွဲကောင်းတစ်ပွဲ ဖြစ်မလာခဲ့ဘူး..။ ဟုတ်တယ်မလား.. တင်မ် ရေ..?

တင်မ် ရှားဝုဒ် - ဟုတ်ပါတယ်..။ အာဆင်နယ်အသင်းဟာ ခံစစ်ပိုင်းကာကွယ်မှု အတော်ကောင်းမွန်ပြီး ပရီးမီးယားလိဂ်မှာ ပေးဂိုးအနည်းဆုံးအသင်း ဖြစ်ပါတယ်..။ ဒါပေမယ့် အခုလောလောဆယ်မှာ တိုက်စစ်ပိုင်း အားနည်းချက်တွေရှိနေပြီး ဒီနေ့ပွဲကလိုပဲ တည်ကန်ဘောတွေ (set pieces) ကနေ ဂိုးရဖို့ အားကိုးနေရတဲ့ အနေအထားပါ..။ ဒဏ်ရာရနေတဲ့ ဘူကာရို ဆာကာ ပြန်လည်ပါဝင်လာနိုင်တဲ့ အချိန်ကျရင် တိုက်စစ်ပိုင်းခြိမ်းခြောက်မှုတွေ ပိုပြီးပြုလုပ်နိုင်ပါလိမ့်မယ်..။ ဘယ်လိုပဲဖြစ်ဖြစ်ပါ သူတို့ဟာ ဒုတိယနေရာကို ရနိုင်ဖို့အခွင့်အရေး များပါတယ်..။

တနင်္ဂနွေနေ့ကပွဲဟာ ချယ်လ်ဆီးအသင်းအတွက်လည်း ချန်ပီယံလိဂ်ဝင်ခွင့်တိုက်ပွဲမှာ အရေးပါခဲ့တဲ့ပွဲတစ်ပွဲ ဖြစ်ပါတယ်...။ ဒါပေမယ့် သူတို့ဟာချန်ပီယံလိဂ်ဝင်ခွင့်ရဖို့ အများကြီးကြိုးစား ရဦးမယ့်ပုံပါပဲ..။ တကယ်လို့ ကျွန်တော်သာ တနင်္ဂနွေနေ့က အာဆင်နယ်အသင်းရဲ့ အဝတ်လဲခန်းထဲမှာ ရှိနေမယ်ဆိုရင် ချယ်လ်ဆီးအသင်းရဲ့ ပွဲထွက်လူစာရင်းကို မြင်လိုက်တာနဲ့ အရမ်းကိုပျော်သွားမှာပဲဗျ…။ ဘာဖြစ်လို့လည်းဆိုတော့ အခုပူးတွဲပုံ (ပုံ- ၁) မှာ ပြထားတဲ့သလို သူတို့အသင်းရဲ့ ပွဲထွက်အခင်းအကျင်းမှာ ကစားသမား အတော်များများကို သူတို့ကစားနေကျ နေရာမှာမဟုတ်ပဲ (out of position) နေရာချထားခဲ့တာ တွေ့မိလို့ပါပဲ..။

ညာနောက်ခံလူ ရိစ် ဂျိမ်းစ် ကို ကွင်းလယ်မှာ ကစားခိုင်းထားခဲ့သလို ဗဟိုနောက်ခံလူ ဝက်စ်လေ ဖိုဖားနား ကို ညာနောက်ခံနေရာ ပို့ထားပါတယ်..။ ကိုးလ် ပါးမား မပါဝင်နိုင်တာ ပြိုင်ဘက်အသင်းအတွက် ကြီးမားတဲ့ အားဆေးတစ်ခု ဖြစ်စေခဲ့သလို ကျန်တဲ့တိုက်စစ် ကစားသမားတွေဟာ ထိထိရောက်ရောက် ခြိမ်းခြောက်နိုင်မယ့်ပုံ မရှိပါဘူး..။

 လီယွန် အော့စ်မန်း - အင်းဗျ..။ နှစ်သင်းစလုံးရဲ့ အဲဒီနေ့ကပွဲထွက်လူစာရင်းမှာ တိုက်စစ်မှူး မပါဝင်နိုင်ခဲ့ပါဘူး..။ ချယ်လ်ဆီးအသင်းရဲ့ ပီဒရို နက်တို ဟာ နီကိုလပ်စ် ဂျက်ဆင် လို တိုက်စစ်မှူး မဟုတ်သလို အာဆင်နယ်ဘက်က မီခေးလ် မာရီနို ကလည်း တိုက်စစ်မှူးနေရာမှာ ယာယီကစားနေရတဲ့ ကွင်းလယ် ကစားသမား ဖြစ်နေပါတယ်..။ ဒါ့ကြောင့်အဲဒီပွဲမှာ နှစ်သင်းစလုံးဟာ သွင်းဂိုးမများပဲ ခံစစ်ပိုင်းကို အားပြုကစားကြလိမ့်မယ်.. လို့ ထင်မှတ်စရာ ရှိလာတယ်.. မဟုတ်လားဗျ..?

တင်မ် ရှားဝုဒ် - သေချာတာပေါ့..။ ဒါပေမယ့် ချယ်လ်ဆီးအသင်းရဲ့ ခံစစ်ကြောင်းဟာ အာဆင်နယ်အသင်းလို တောင့်တင်းမှုမရှိပါဘူး..။ ဘာဒီယာရှီးလ် ဟာ စိတ်ချရတဲ့ ဗဟိုနောက်ခံလူ မဟုတ်သလို လီဗိုင်း ကိုဝဲလ် ကလည်း ပြီးပြည့်စုံတဲ့ နောက်ခံလူအဖြစ် မရောက်ရှိသေးပါဘူး..။ သူတို့အသင်းရဲ့ နောက်တန်းခံစစ်ကြောင်း တစ်ခုလုံးမှာ မာ့စ် ကူကူရယ်လာ ကပဲ အကောင်းဆုံး ဖြစ်နေပါတယ်..။ ဖိုဖားနား ဟာ ဒဏ်ရာကနေ ပြန်လည်ကောင်းမွန်လာတာ မကြာသေးသလို အဲဒီပွဲမှာ ညာနောက်ခံလူအဖြစ် ကစားခဲ့ရပါတယ်..။

ရိစ် ဂျိမ်းစ် ဟာ right wing back နေရာမှာ အကောင်းဆုံး ခြေစွမ်းပြခဲ့တဲ့သူ ဖြစ်ပါတယ်..။ သူဟာသိပ်ကိုခြေစွမ်းကောင်းမွန်တဲ့ ကစားသမားတစ်ယောက် ဖြစ်နေတဲ့အတွက် ကွင်းလယ်အဖျက်နေရာမှာ ကစားပေးနိုင်ပါတယ်..။ ဒါပေမယ့် ချယ်လ်ဆီးအသင်းရဲ့ ဒီနေ့ပွဲအခင်းအကျင်းကို ကြည့်ရတာ ကစားသမားတွေရဲ့ ပင်ကိုယ်ခြေစွမ်းနဲ့ အံဝင်ဂွင်ကျ ဖြစ်မနေဘူးလို့ ခံစားမိခဲ့ပါတယ်..။ ကျွန်တော်သာ နည်းပြခွင့်ရမယ်ဆိုရင် ဘယ်လိုနည်းနဲ့မှ ဒီလိုပွဲထွက်လူစာရင်း စဉ်းစားမိမှာ မဟုတ်သလို အဲဒီနေ့က အခင်းအကျင်းကို ချယ်လ်ဆီးပရိသတ်တွေလည်း သဘောကျမှာ မဟုတ်တာ သေချာပါတယ်..။

လီယွန် အော့စ်မန်း - အဲဒီပွဲမှာ နှစ်သင်းစလုံးရဲ့ ရသင့်တဲ့သွင်းဂိုး (expected goals- xG) အရေအတွက်ကို ကြည့်မယ်ဆိုရင် အခုအပေါ်ကပုံ (ပုံ- ၂) မှာ ပြထားတဲ့အတိုင်း အာဆင်နယ်အသင်းဟာ xG- (ဝ.၇၁) ဂိုးပဲ ရှိခဲ့ပြီး ချယ်လ်ဆီးအသင်းက xG (ဝ.၃၆) ပဲ ရှိခဲ့ပါတယ်..။ ဒါ့ကြောင့်တစ်ပွဲလုံးမှာ နှစ်သင်းစလုံးဟာ ဂိုးသွင်းခွင့် ကောင်းကောင်းမရခဲ့သလို အာဆင်နယ်ဘက်က ရရှိသွားခဲ့တဲ့ တစ်လုံးတည်းသောဂိုးကလည်း ထောင့်ကန်ဘော (set piece) ကနေ ရရှိသွားတဲ့ဂိုး ဖြစ်ခဲ့ပါတယ်..။

ဒါပေမယ့် အဲဒီဂိုးဟာ သေသေချာချာ ဇာတ်တိုက်၊ လေ့ကျင့်ထားတဲ့ဂိုး ဖြစ်သလို အာဆင်နယ် ကစားသမားတွေဟာ ချယ်လ်ဆီးအသင်း နောက်ခံလူတွေကို သူတို့လိုချင်တဲ့ပုံစံအတိုင်း နေရာယူသွားရအောင် ထောင်ချောက်ဆင်.. မောင်းနှင်သွားခဲ့တာ တွေ့မိတယ်ဗျ..။ သူတို့တွေရဲ့ နေရာယူပုံကြောင့် ချယ်လ်ဆီးအသင်းဘက်က ကစားသမားအားလုံးဟာ အခုပူးတွဲပုံ (ပုံ - ၃) မှာ မြင်တွေ့ရတဲ့အတိုင်း သူတို့ဂိုးရှေ့ (၆) ကိုက်စည်းထဲမှာပဲ အကုန်လုံးစုပြုံ နေရာယူမိသလို ဖြစ်သွားခဲ့ရတယ်.. မဟုတ်လားဗျ..။

တင်မ် ရှားဝုဒ် - မှန်တာပေါ့..။ ခင်ဗျားပြထားတဲ့ပုံထဲမှာ နေရာယူထားပုံ အဆိုးဆုံးက ဂိုးသမား ရောဘတ် ဆန်းချက်ဇ် ပဲဗျ..။ သူဟာချယ်လ်ဆီးအသင်းရဲ့ အဓိကအားနည်းချက်တစ်ခု ဖြစ်နေတယ်လို့ ကျွန်တော်ထင်ပါတယ်..။ ကန်ချက်တွေကို ကာကွယ်တဲ့နေရာ (shots stopping) မှာ ကောင်းပါတယ်..။ ပရီးမီးယားလိဂ်လို ပြိုင်ပွဲအဆင့်ကို ရောက်လာပြီ.. ဆိုမှတော့ အနည်းနဲ့အများ ဂိုးဖမ်းတာ ကောင်းမှာပါပဲ..။ ဒါပေမယ့်  သူဟာ ဆုံးဖြတ်ချက် ချမှတ်တဲ့အပိုင်း (decision making) မှာ အတော်လေး အားနည်းပြီး အမှားအယွင်းများသလို ဖြတ်ဘင်ဘောတွေ (crossing) တွေ ထွက်ဆွဲတဲ့နေရာမှာလည်း ရုန်းကန်ရလေ့ရှိတာ သတိပြုမိပါတယ်..။

ဒါ့အပြင်ထောင့်ကန်ဘောကို ကာကွယ်ဖို့ ချယ်လ်ဆီးအသင်းရဲ့ ခံစစ်ကြောင်း စုဖွဲ့ထားပုံမှာ အဝေးဂိုးတိုင် (far post) ကို ဘာဖြစ်လို့လွှတ်ထားတာလဲ..? ကျွန်တော်စဉ်းစားမရပါဘူး..။ အဲဒီနေရာကနေ ဂိုဝင်သွားတော့မှ ‘ပေါက်ဖော်’ လာလုပ်နေတယ်.. ဆိုပြီး ဝေဖန်ကြမှာကို နားလည်ပါတယ်..။ ဒါပေမယ့် အခုပြထားတဲ့ပုံ (ပုံ- ၄) မှာ အဲဒီအဝေးဂိုးတိုင်ဘက်မှာ လုံးဝပွင့်ထွက်နေတာ တွေ့ရမှာပါ..။ ဂိုးသမားလည်း ဘယ်လိုမှ မမှီနိုင်ဘူးလေ..။ နောက်ပြီးဂိုးသမားရဲ့ နေရာယူထားတဲ့ပုံစံက အဆိုးရွားဆုံး နေရာမှာ ရှိနေတာကြောင့် မာရီနို ခေါင်းတိုက်လိုက်တဲ့အချိန် လှမ်းပြီးပုတ်ထုတ်နိုင်ဖို့ ကြိုးစားပေမယ့် ဘယ်လိုမှမမှီနိုင်တော့ပါဘူး..။

မာတင် အိုဒီဂါ့တ်ဒ် ရဲ့ ကန်တင်ပေးမှု တကယ့်ကို အတိအကျ ကောင်းမွန်သလို အနီးတိုင်ဘက်ကို ဖြတ်ပြေးပြီး ခေါင်းတိုက်လိုက်တဲ့ မာရီနို ရဲ့ လှုပ်ရှားမှုဟာ လေ့ကျင့်ကွင်းမှာ အကြိမ်ကြိမ် ဇာတ်တိုက်ထားအတိုင်း ပြုလုပ်သွားတာပါ..။ အာဆင်နယ်အသင်း ကံကောင်းသွားတာလည်း ပါတာပေါ့ဗျာ..။ အခုအချိန်ကျမှ မီခေးလ် မာရီနို ကိုသွားပြီးမေးရင် ခေါင်းတိုက်ဂိုးသွင်းလိုက်တာပါ.. လို့ပဲ ဖြေပါလိမ့်မယ်..။ ဒါပေမယ့် သူဟာအဝေးဂိုးတိုင်ဘက် အန္တရာယ်ပေးနိုင်မယ့်နေရာဆီ နောက်ပြန်ခေါင်းလှန်တိုက်ပြီး ချပေးလိုက်တာပါ..။ တကယ်လို့ အဝေးဂိုးတိုင်မှာ ချယ်လ်ဆီးဘက်က တစ်ယောက်ယောက်သာ ရှိနေခဲ့ရင် အေးအေးဆေးဆေး ရှင်းထုတ်နိုင်မယ့်ဘောလုံးပါ..။ အနီးဆုံးက ‘လီဗိုင်း ကိုဝဲလ်’ ပေါ့ဗျာ..။

ကိုဝဲလ် ဟာ ဘာမှမလုပ်ပဲ အစအဆုံး မတ်တပ်ရပ်ပြီး ပွဲကြည့်နေတာဗျ..။ အခုပြထားတဲ့ပုံကို ကြည့်မယ်ဆိုရင် သူဟာဘာအကြောင်းနဲ့မှ ရှေ့ကိုတက်.. လူအုပ်ကြားထဲဝင်ပြီး မတ်တပ်ရပ်နေစရာ အကြောင်းကို မရှိပါဘူး..။ နောက်ပြီး ဆန်းချက်ဇ် ရဲ့ နေရာယူထားတဲ့ပုံစံဟာ သေသေချာချာ ကြည့်လေလေ၊ ပိုပြီးဆိုးရွားလေလေပါပဲဗျာ..။

လီယွန် အော့စ်မန်း - မာတင် အိုဒီဂါ့တ်ဒ် ရဲ့ ကန်တင်ပေးမှု တကယ့်ကိုကောင်းပါတယ်..။ တည်ကန်ဘောတွေမှာ ပေးပို့မှုမကောင်းရင် ကျန်တဲ့ကစားသမားတွေ နေရာယူ ဘယ်လောက်ကောင်းကောင်း ဘာမှလုပ်မရပါဘူး..။ အိုဒီဂါ့တ်ဒ် ကန်တင်လိုက်တဲ့အချိန် အာဆင်နယ် ကစားသမားတွေရဲ့ နေရာယူထားပုံကို ကြည့်မယ်ဆိုရင် အခုပူးတွဲပုံ (၅) မှာ မြင်တွေ့ရတဲ့အတိုင်း အနီးဂိုးတိုင်မှာပဲ အကုန်လုံးစုပြုံနေရာယူထားတယ်ဆိုတာ တွေ့ရမှာပါ..။ မာရီနို ကတော့ runner အနေနဲ့ ရှေ့ကနေ ဖြတ်ပြီးပြေးသွားတာပေါ့..။

ခင်ဗျားက အဝေးဂိုးတိုင်ဘက်ကို ‘မ’ ပေးလိုက်တယ်လို့ ယူဆနေပေမယ့် အခုအပေါ်ကပုံအရဆိုရင် အဝေးဂိုးတိုင်ဘက်မှာ အာဆင်နယ်ဘက်က တစ်ယောက်မှ ရှိမနေပါဘူး..။ ဒါ့ကြောင့်ရည်ရွယ်ချက်ရှိရှိနဲ့ အဝေးဂိုးတိုင်ဘက်ကို နောက်ပြန်လှန်တိုက်ပြီး ဂိုးသွင်းခဲ့တာလည်း ဖြစ်နိုင်တာပါပဲ..။

တင်မ် ရှားဝုဒ် - အဝေးဂိုးတိုင်ဘက်ကို ‘မ’ ပေးလိုက်တာပါ...။ အဲဒီလိုနေရာကနေ နောက်ပြန်လှန်တိုက်ပြီး ဂိုးသွင်းမယ်ဆိုရင် (၁၀) ခါသွင်းစမ်းပါ..၊ တစ်ခါဂိုးဝင်ရင် ကံကောင်းပေါ့ဗျာ..။ ဒါ့ကြောင့်ကံကောင်းလို့ ရသွားတဲ့ဂိုးပါပဲ..။ သူဟာနောက်ပြန်လှန်တိုက်ပြီး အဝေးဂိုးတိုင်ဘက်ကို ‘မ’ ပေးလိုက်တာပါ..။ အဲဒီအချိန်မှာ ချယ်လ်ဆိးဘက်က ခံစစ်ကြောင်းနေရာယူမှု အနေအထားကို ကြည့်မယ်ဆိုရင် ဆန်းချက်ဇ် နဲ့ ကိုဝဲလ် တို့နှစ်ယောက်ကလွဲပြီး ကျန်တဲ့သူတွေရဲ့ နေရာယူထားပုံတွေဟာ ကောင်းမွန်ပါတယ်..။ ချယ်လ်ဆီးအသင်းရဲ့ တည်ကန်ဘောတွေ လေ့ကျင့်ပေးတဲ့နည်းပြ (defensive set-piece coach) ဟာ ဘာဖြစ်လို့ အဝေးဂိုးတိုင်ဘက်မှာ နောက်ခံလူတစ်ယောက် အမြဲတမ်းရပ်နေဖို့ မမှာကြားခဲ့လဲ..? မပြောတတ်ဘူးဗျ..။ တကယ်လို့ နည်းပြကဘာမှ မပြောရင်တောင် လီဗိုင်း ကိုဝဲလ် တို့လို ကစားသမားတွေအနေနဲ့ ကိုယ်တာဝန်ယူရမယ့်နေရာရဲ့ အခြေအနေကို နားလည်နေဖို့ လိုအပ်ပါတယ်..။     

လီယွန် အော့စ်မန်း - ဟုတ်ကဲ့ပါ..။ အခုဆက်ပြီးဆွေးနွေးမှာက ချယ်လ်ဆီးအသင်းရဲ့ အဝေးကွင်းပွဲစဉ် ရလဒ်တွေ ဆိုးရွားနေတဲ့အပေါ်မှာပဲ ဖြစ်ပါတယ်..။ အင်ဇို မာရက်စ်ကာ ရဲ့အသင်းဟာ ဒီဇင်ဘာလနှောင်းပိုင်းကစပြီး တိုက်စစ်ပိုင်း ဖန်တီးမှုအားနည်းနေသလို နောက်ဆုံးယှဉ်ပြိုင်ခဲ့တဲ့ အဝေးကွင်းပွဲစဉ် (၇) ပွဲရဲ့ ရလဒ်တွေကို အခုပူးတွဲပုံ (ပုံ- ၆) မှာ မြင်တွေ့ရမှာပါ…။ ချယ်လ်ဆီးအသင်းဟာ ဒီဇင်ဘာ (၂၁) ရက်နောက်ပိုင်း အဝေးကွင်းပွဲစဉ် (၇) ပွဲမှာ (၃) ဂိုးပဲ သွင်းယူထားနိုင်ပြီး ပရီးမီးယားလိဂ်မှာ အဝေးဂိုးသွင်းနိုင်မှု အနည်းဆုံးအသင်း ဖြစ်နေပါတယ်..။ အဲဒီလိုအဝေးကွင်းပွဲတွေမှာ စွမ်းဆောင်ရည် ကျဆင်းလာတာဟာ အဓိက ကစားသမားတစ်ချို့ မပါဝင်နိုင်တာကြောင့်လို့ ပြောနိုင်မလား..?

တင်မ် ရှားဂုဒ် - နီကိုလပ်စ် ဂျက်ဆင် ဟာ ဂိုးသွင်းအကောင်းဆုံး တိုက်စစ်မှူးတစ်ယောက် မဟုတ်ပေမယ့် အသင်းဖော်တွေကို အကောင်းဆုံး ကူညီပေးနိုင်တဲ့သူတော့ ဖြစ်တယ်ဗျ..။ သူဟာ hold up play ကောင်းမွန်ပြီး နောက်ခံလူတွေကို အာရုံများစေတာကြောင့် ကိုးလ် ပါးမား၊ ဆန်ချို တို့လို တွဲဖက်တိုက်စစ်မှူးတွေအတွက် နေရာလွတ်တွေ ရရှိစေပါတယ်..။ သူမပါဝင်နိုင်တဲ့အချိန် ခရစ္စတိုဖာ အန်ကွန်းကူ အစားဝင်ရောက်ချိန်မှာ အဲဒီလို ဖြစ်မလာတော့ပါဘူး..။ သူဟာအခုအချိန်ထိ အသင်းနဲ့တွဲဖက် မမိသေးဘူးလို့ ပြောရမှာပါ..။

ပီဒရို နက်တို ရဲ့ ကစားပုံကို ကျွန်တော်နှစ်သက်ပါတယ်..။ ဒါပေမယ့် သူဟာတိုက်စစ်မှူးတစ်ယောက်အနေနဲ့ ဂိုးသွင်းယူနိုင်ဖို့ ထက်စာရင် တောင်ပံကနေ အသင်းဖော်တွေကို ဖန်တီးပေးတဲ့နေရာမှာ ပိုပြီးကောင်းမွန်ပါတယ်..။ ကစားသမားတွေဟာ ကိုယ်အားသန်တဲ့နေရာမှာ ကစားခွင့်မရကြပါဘူး..။ ဒါ့ကြောင့်နည်းပြအင်ဇို မာရက်စ်ကာ ဟာ သူ့အသင်းကစားသမားတွေရဲ့ အကောင်းဆုံး စွမ်းရည်တွေကို အသုံးမချနိုင်ဘူး ဖြစ်နေပါတယ်..။  

ကျွန်တော်ဟာ နောက်ခံလူတစ်ယောက်ဆိုရင် နက်တို လို လျှင်မြန်မှုကောင်းမွန်တဲ့ တောင်ပံ ကစားသမား တစ်ယောက်က ကျွန်တော့်ရဲ့နောက်က နေရာလွတ်တွေဆီ ဆွဲပြေးမှာ၊ အဲဒီနေရာလွတ်တွေဆီ ချိန်သားကိုက် ရောက်ရှိမှာကို (running in behind) ပိုပြီးစိုးရိမ်မိမှာပါ..။ တကယ်တော့ ချယ်လ်ဆီးအသင်းမှာ နက်တို၊ ဆန်ချို တို့လို လျှင်မြန်တဲ့ တောင်ပံ ကစားသမားတွေ ရှိနေတာကြောင့် သူတို့နောက်က နေရာလွတ်တွေဆီ ဘောလုံးပေးပို့နိုင်ဖို့၊ ရှေ့ကိုများများ ပေးပို့နိုင်ဖို့ (passing forward) လိုအပ်ပါတယ်..။

အခုအချိန်မှာ နီကိုလပ်စ် ဂျက်ဆင် လို ကိုယ့်ဆီပေးပို့လာတဲ့ ဘောလုံးတွေကို နောက်ခံလူတွေကြားကနေ ထိန်းထားနိုင်မယ့် တိုက်စစ်မှူး ရှိမနေပါဘူး..။ ဒါ့ကြောင့် လျှင်မြန်မှုကောင်းမွန်တဲ့ တောင်ပံကစားသမားတွေရဲ့နောက်က ပြေးလမ်းထဲကို ဘောလုံးတွေပေးပို့နိုင်အောင် ကြိုးစားရပါမယ်..။ အထူးသဖြင့် အာဆင်နယ်အသင်းဟာ ခံစစ်ကြောင်းကို ရှေ့အထိတက်ပြီး ခံစစ်ဆင်တဲ့အသင်း (defend high) ဖြစ်တာကြောင့် သူတို့ခံစစ်ကြောင်းရဲ့နောက်က နေရာလွတ်တွေကို အသုံးချနိုင်ဖို့ ပြင်ဆင်လာသင့်တာပေါ့..။

လီယွန် အော့စ်မန်း - ကျွန်တော်ပြောချင်တာလည်း အဲဒီအချက်ပဲဗျ..။ ချယ်လ်ဆီးအသင်းဟာ တန်ပြန်တိုက်စစ်ကနေ ထိထိရောက်ရောက် ထိုးဖောက်နိုင်မယ့် အခွင့်အရေးတွေ ရခဲ့ပါတယ်..။ ဘောလုံးကိုရှေ့ရောက်အောင် ရဲရဲရင့်ရင့် ပေးပို့ရဲဖို့ လိုအပ်တာပေါ့..။ အခုကျွန်တော်ပြထားပုံ (ပုံ- ၇) က အခိုက်အတန့်မှာဆိုရင် အာဆင်နယ်အသင်းရဲ့တိုက်စစ်ကို ဖျက်ထုတ်ရင်း ချယ်လ်ဆီးအသင်းရဲ့ ပင်နယ်တီဧရိယာထိပ်မှာ ဖိုဖားနား က ဘောလုံးရတယ်ဗျာ..။ အဲဒီအနေအထားမှာ ပီဒရို နက်တို က အာဆင်နယ်အသင်းရဲ့ ခံစစ်ကြောင်းရဲ့ နောက်ထဲကို ပြေးထွက်သွားဖို့ အသင့်ဖြစ်နေပါပြီ..။

အဲဒီအချိန်မှာ အာဆင်နယ်အသင်းရဲ့ နောက်အကျဆုံး ခံစစ်ကစားသမားက ဝီလီယံ ဆာလီးဘား ဖြစ်ပါတယ်..။ အခုပြထားတဲ့ အနေအထားမှာ ဖိုဖားနား အနေနဲ့ နက်တို ရဲ့ ပြေးလမ်းထဲကို ပေးပို့နိုင်ဖို့ အင်မတန်တိကျတဲ့ ဘောလုံးတွေ ဖြစ်နေစရာ မလိုပါဘူး..။ ရှေ့ကိုရောက်အောင် ကန်တင်လိုက်ရင်ကို နက်တို အနေနဲ့ အာဆင်နယ်အသင်းရဲ့ high line ခံစစ်ကြောင်းကို လွတ်သွားအောင် ပြေးထွက်နိုင်စွမ်းရှိပါလိမ့်မယ်..။

တင်မ် ရှားဝုဒ် - မှန်တာပေါ့ဗျာ..။ အဲဒီလိုပေးပို့နိုင်ဖို့ဆိုတာ ပရီးမီးယားလိဂ်အဆင့် ကစားသမားတိုင်းအတွက် ဌက်ပျောသီး အခွံနွှာသလောက် ခက်ခဲတဲ့ လုပ်ဆောင်ချက်တွေ မဟုတ်ပါဘူး..။ ဒါပေမယ့် ချယ်လ်ဆီးအသင်း ကစားသမားတွေရဲ့ စိတ်ထဲမှာ အဲဒီလိုစွန့်စားမှုပါတဲ့ ပေးပို့မှုတွေ ပြုလုပ်မယ့်အစား ဘေးတိုက်ပေး..၊ (၅) ကိုက်.. (၁၀) ကိုက်.. အတိုပေးလေးတွေနဲ့ပဲ ဖြည်းဖြည်းချင်း ရှေ့တက်သွားဖို့ပဲ ရှိနေပါတယ်..။ ခုနကခင်ဗျားပြသွားတဲ့ ပုံမှာဆိုရင် သူတို့ဟာ တန်ပြန်တိုက်စစ်နဲ့ အမြန်ဆုံးတိုက်စစ်ဆင်နိုင်မယ့် အခွင့်အရေးကို လက်လွှတ်လိုက်ရပါတယ်..။

လီယွန် အော့စ်မန်း - မှန်ပါတယ်..။ အခုပြထားတဲ့ပုံ (ပုံ- ၈) မှာဆိုရင် ရှေ့မှာအသင့်နေရာယူထားတဲ့ ဂျေဒန် ဆန်ချို ရဲ့ ပြေးလမ်းထဲကို ထိုးပေးနိုင်ဖို့ဆိုတာ ဘာမှခက်ခဲတဲ့ ဘောလုံးလည်း မဟုတ်ပါဘူး..။ ဒါပေမယ့် ဘောလုံးကိုင်လွန်းပြီး ပေးသင့်တဲ့အချိန်မှာ မပေးပို့ပဲ အချိန်ဆွဲခဲ့တာကြောင့် တစ်ဖက်အသင်းရဲ့ ကစားသမားတွေ နောက်ကိုပြန်ရောက်လာပါတယ်..။ အခွင့်ကောင်းတစ်ခု ဆုံးရှုံးတာပေါ့ဗျာ..။

တင်မ် ရှားဝုဒ် - ကျွန်တော်တို့ဟာ ကွင်းလယ် ကစားသမားတွေ ဖြစ်တာကြောင့် ခံစစ်ကြောင်းကိုဆွဲထုတ်နိုင်မယ့် ပြေးလမ်းကြောင်းထဲကို ထိုးပေးတဲ့ (through balls) ပေးပို့မှုတွေကို နှစ်သက်ပါတယ်..။ ဒါပေမယ့် သူတို့ဟာ အလျှင်အမြန် ထိုးဖောက်သင့်တဲ့ ဘောလုံးတွေကို ဘေးတိုက်ပေးလိုက်၊ နောက်ပြန်ပေးလိုက် လုပ်နေတာနဲ့ ကစားရှိန်ကျကုန်ပါတယ်..။ အခုလိုကစားတာဟာ ကိုးလ် ပါးမား ရဲ့ အကောင်းဆုံးခြေစွမ်း ရနေတဲ့အချိန်ကလို အသင်းမှာ စိတ်ချရတဲ့ ကစားသမားရှိနေရင် ကောင်းတာပေါ့..။ အခုကျတော့ အာဆင်နယ်အသင်းကို ခံစစ်ပြန်ပြီးထိုင်နိုင်ဖို့ အချိန်ပေးသလို ဖြစ်နေပါတယ်..။

အခုနောက်ပိုင်းပွဲတွေမှာ ချယ်လ်ဆီးအသင်းရဲ့ ကစားပုံဟာ ခန့်မှန်းရ လွယ်ကူ (predictable)ပါတယ်..။ အင်ဇို မာရက်စ်ကာ ဟာ လက်စ်တာအသင်းမှာတုန်းကလည်း အဲဒီလိုကြုံခဲ့ရတာပါပဲ..။ သူ့ရဲ့ကစားဟန်ဟာ တဖြည်းဖြည်းနဲ့ ခန့်မှန်းရတာ လွယ်ကူလာလို့ နောက်ပိုင်းမှာပရိသတ်တွေက မကြိုက်ကြပါဘူး..။ အခုလည်း ချယ်လ်ဆီးပရိသတ်တွေဟာ သူတို့အသင်းရဲ့ ကစားပုံကို မနှစ်ခြိုက်ကြတော့ပါဘူး..။ တကယ်လို့သူတို့အသင်းဟာ အဆင့် (၂) နေရာမှာရှိနေတယ်..၊ ကန်တဲ့ပွဲတွေ အနိုင်ရနေတယ်.. ဆိုရင် ကြိုက်သလို ကစားလို့ရပါတယ်..။ ဒါပေမယ့် အမှတ်တစ်မှတ်တောင်မှ ခဲရာခဲဆစ် ကြိုးစားနေရပြီဆိုရင် ဘယ်သူမဆို ပျင်းစရာကောင်းတယ်.. (boring) လို့ ပြောကြမှာပဲ..။

လီယွန် အော့စ်မန်း - ကစားသမားတွေဘက်က တာဝန်ယူချင်စိတ် (responsibility) မရှိလို့ ဘောလုံးမပေးရဲ..၊ မဆုံးဖြတ်ရဲလို့ အခုလိုဖြစ်နေတာလား..? ကိုးလ် ပါးမား ရှိနေတုန်းက အားလုံးက သူ့ကိုပဲရှာပြီး ဘောလုံးပေးနေကြတာကိုးဗျ..။ သူမရှိတော့တာနဲ့ တစ်သင်းလုံး ဘာလုပ်ရမှန်းမသိ ဖြစ်ကုန်တာလား မသိဘူးဗျ..

တင်မ် ရှားဝုဒ် - မဟုတ်ဘူး..။ နည်းပြရဲ့ ညွန်ကြားချက် (instruction) ကြောင့် အဲဒီလိုဖြစ်နေတာဗျ..။ သူ့ရဲ့သတင်းစာ ရှင်းလင်းပွဲတွေ၊ တွေ့ဆုံခန်းတွေကို နားထောင်ကြည့်ရင် ပွဲကိုထိန်းချုပ်နိုင်ဖို့ (control the game) ဆိုတဲ့ စကားကို အမြဲတမ်းပြောလေ့ ရှိပါတယ်..။ အဲဒီစကားလုံးဟာ သူ့ရဲ့ဘောလုံးအယူအဆ၊ ဒဿနကို ကိုယ်စားပြုပါတယ်..။ အဲဒီလိုတစ်ချိန်လုံး ပွဲကိုထိန်းချုပ်နိုင်ဖို့ ဦးတည်ရင်းနဲ့ ကစားပုံဟာ ခန့်မှန်းရလွယ်ကူလာတယ်..၊ တဖြည်းဖြည်းနဲ့ ပျင်းစရာ ကောင်းလာတာပါပဲ..။ အခုဆိုရင် ချယ်လ်ဆီးအသင်းရဲ့ ကစားပုံဟာ ဘေးတိုက်ပေး၊ နောက်ပြန်ပေးတွေ များလွန်းနေပါတယ်..။

 
လီယွန် အော့စ်မန်း - အခုပြထားတဲ့ပုံ (ပုံ- ၉) မှာဆိုရင် နက်တို ဟာ အာဆင်နယ်အသင်း နောက်ခံလူ နှစ်ယောက်ကြားကနေ ပြေးထွက်သွားဖို့ အသင့်ရှိနေပါတယ်..။ အဲဒီအချိန် ညာဘက်အစွန်ဆုံးမှာ ဘောလုံးကိုင်ထားတာက လီဗိုင်း ကိုဝဲလ် ဗျ..။ သူ့အနေနဲ့ နက်တို ရဲ့ ပြေးလမ်းထဲကို ခုတ်တင်ပေးဖို့ဆိုတာ ဘာမှခက်ခဲတဲ့ ပေးပို့မှု မဟုတ်ပါဘူး..။

တင်မ် ရှားဝုဒ် - နေဦးဗျ..။ ကျွန်တော်တစ်ခု ကြားဖြတ်ပြီးပြောဦးမယ်..။ ခင်ဗျားပြထားတဲ့ပုံမှာဆိုရင် ကွင်းလယ် ကစားသမား နှစ်ယောက် နေရာယူထားတာဟာ နောက်ကိုရောက်လွန်းနေပါတယ်..။ သူတို့ရှေ့ကိုနည်းနည်းတက်ပြီး နေရာယူထားသင့်ပါတယ်..။ ဘာဖြစ်လို့လည်းဆိုတော့ ခင်ဗျားပြောသလို လီဗိုင်း က ကန်တင်မယ်..၊ ပြန်ကျလာမယ့် ဘောလုံး.. (second ball) ဒါမှမဟုတ် နက်တို တို့လို တိုက်စစ်ကစားသမားတွေဆီက ပြန်ပြီးတွဲမယ့် ဘောလုံးတွေကို အရင်ဦးအောင် ယူနိုင်ဖို့ဆိုရင် သူတို့နှစ်ယောက်ဟာ အခုထက်နည်းနည်းပိုပြီး ရှေ့မှာရှိနေဖို့ လိုအပ်ပါတယ်..။ အခုသူတို့ရဲ့ နေရာယူထားပုံဟာ အဲဒီ second ball တွေကို ပြန်ပြီးအရယူနိုင်မဘ့် အနေအထားမှာ ရှိမနေပါဘူး..။ တကယ်လို့ အခုအနေအထားမှာ အာဆင်နယ် နောက်တန်းက ဖျက်ထုတ်ဖို့ပဲဖြစ်ဖြစ်၊ သူတို့အသင်းရဲ့ တိုက်စစ်ကစားသမားတွေက ပြန်တွဲဖို့ပဲဖြစ်ဖြစ်.. ပြန်ကျလာမယ့် second ball တွေကို အာဆင်နယ်အသင်း ကွင်းလယ်ကပဲ ရသွားပါလိမ့်မယ်..။

လီယွန် အော့စ်မန်း - အင်းဗျ..။ ချယ်လ်ဆီးအသင်းရဲ့ ကစားပုံဟာ လုံခြုံမှုရှိဖို့ (safety) ကို အရမ်းဦးစားပေးလွန်းနေပါတယ်..။ သူတို့ဟာ အပေးအယူ သေချာစေဖို့၊ ဘောလုံးဆုံးရှုံးမှု မဖြစ်စေဖို့ ဘေးတိုက်ပေး၊ နောက်ပြန်ပေးတွေနဲ့ ဖြည်းဖြည်းချင်း တိုက်စစ်ဆင်လာတဲ့ ချဉ်းကပ်ပုံနဲ့ဆိုတော့ အာဆင်နယ်အသင်းအတွက် ကာကွယ်ရတာ အရမ်းကိုလွယ်ကူလွန်းခဲ့ပါတယ်..။ အခုနောက်ဆုံး (၇) ပွဲမှာ ရလဒ်တွေ မကောင်းဘူး..၊ တိုက်စစ်ထိုးဖောက်မှုတွေ အားနည်းနေတာဟာ သူတို့အသင်းရဲ့ ကစားပုံနဲ့လည်း ဆက်စပ်မှု ရှိနေပါတယ်..။

တင်မ် ရှားဝုဒ် - နည်းပြက စွန့်စားမှုမယူပဲ လုံခြုံမှုရှိဖို့ပို ပိုပြီးဦးစားပေးဖို့ မှာကြားထားလို့ပါ..။ သူတို့ရဲ့နေရာယူထားပုံကို ကြည့်မယ်ဆိုရင် ဘောလုံးရဲ့နောက်မှာ ကိုယ့်ရဲ့လူတွေ အမြဲရှိနေတာကြောင့် လွယ်လွယ်ကူကူ နောက်ပြန်ပေးပြီး ဘောလုံးပိုင်ဆိုင်မှုကို သေချာအောင် ထိန်းထားလို့ရတဲ့ အနေအထားမှာ ရှိနေပါတယ်..။ ဘောလုံးပိုင်ဆိုင်မှု ထိန်းထားပြီး ပွဲကိုထိန်းချုပ်နိုင်တယ် (control the game) လို့ သူတို့ယူဆမှာပေါ့..။

ဒါပေမယ့် အာဆင်နယ်အသင်းကလည်း အေးအေးဆေးဆေး ခံစစ်ထိုင်ဖို့ အချိန်ရတာကြောင့် ဘာမှပူပင်နေစရာ မရှိဘူးလေဗျာ..။ ဘောလုံးပြန်ပြီး ရတဲ့အချိန်တွေမှာ အာဆင်နယ်ဘက်က ထိုးဖောက်မှုတွေက ပိုပြီးထိရောက်ခဲ့ပါတယ်..။ တကယ်လို့ တနင်္ဂနွေနေ့ပွဲမှာ ဘူကာရို ဆာကာ တို့သာ ပါဝင်နိုင်မယ်ဆိုရင် အခုလိုပွဲရလဒ် ဖြစ်လာမှာ မဟုတ်ပါဘူး..။ ချယ်လ်ဆီးအသင်းရဲ့ ကစားပုံဟာ နှေးကွေးပြီး သူတို့ပုံစံ ချထားတဲ့အတိုင်းပဲ ထပ်ခါထပ်ခါ (repetitive) ထိုးဖောက်နေတော့ တိုက်စစ်လမ်းကြောင်းတွေကို မှန်းဆရတာ လွယ်ကူပါတယ်..။ ဒါ့ကြောင့်အသင်းရဲ့ကစားတဲ့ပွဲတိုင်း ပုံမှန်အားပေးနေတဲ့ တစ်ရာသီစာ လက်မှတ်ဝယ်ယူထားတဲ့ ပရိသတ် တစ်ယောက်အနေနဲ့ဆိုရင် အတော်လေး စိတ်ပျက်မိမှာ အသေအချာပါပဲ..။