မာ့စ် ကူကူရယ်လာ ဟာ ဘာစီလိုနာမြို့တော်ကြီးရဲ့ ဆင်ခြေဖုံးအရပ်မှာ ကြီးပြင်းလာခဲ့သူ ဖြစ်တဲ့အတွက် ဘောလုံးကစားနည်းကို ချစ်မြတ်နိုးစိတ်ဟာ သူ့ရဲ့ပင်ကိုယ်ဗီဇ ကတ်တလန်သွေးတွေနဲ့အတူ ခန္ဓာကိုယ်ထဲ လှည့်ပတ် စီးဆင်းနေခဲ့ပါတယ်..။ နူး ကမ့်ပ် ကစားကွင်းကြီးရဲ့ ကြီးကျယ်ခမ်းနားမှုနဲ့အတူ  ဘာစီလိုနာ အသင်းကြီးရဲ့ အနီ၊ အပြာရောင်တွေနဲ့ ရောစပ်နေတဲ့ လမ်းများတစ်လျှောက်မှာ လူးလာခေါက်ပြန်ရင်း ကြီးပြင်းခဲ့သူပီပီ ကတ်တလူးနား ဒေသခံတွေရဲ့ ပြင်းပြတဲ့စိတ်ဆန္ဒ၊ ဇွဲလုံ့လတွေကလည်း သူ့ရဲ့သွေးသားထဲမှာ အမြစ်တွယ် စွဲမြဲနေပါတော့တယ်..။

ရိုးရိုးလေးပြောရမယ်ဆိုရင် ဘောလုံးကစားနည်း.. ဆိုတာဟာ အက်စ်တယ်လာမြို့မှာ မွေးဖွား၊ ကြီးပြင်းလာခဲ့ရတဲ့ လူငယ်လေး တစ်ယောက်အတွက်တော့ ဘဝတစ်လျှောက်လုံးရဲ့ခရီးလမ်းကို အဆုံးအဖြတ်ပေးမယ့် ကံကြမ္မာတစ်ခုလို့ ညွှန်းဆိုမယ်.. ဆိုရင်လည်း ရပါတယ်..။

ဘာစီလိုနာအသင်းရဲ့ နာမည်ကျော် လာ မာစီယား လေ့ကျင့်ရေး ကစားကွင်းကြိးဟာ သူ့အတွက် ဒုတိယအိမ်လို ဖြစ်နေခဲ့တာကြောင့် ငယ်စဉ်ကတည်းက အသင်းရဲ့ ဘောလုံးဒဿနတွေနဲ့ ဘာစီလိုနာ ကစားသမားတွေရဲ့ DNA တွေကို စုပ်ယူနိုင်ခဲ့ပါတယ်..။ ကူကူရယ်လာ ဟာ ဘာစီလိုနာအသင်းရဲ့ ဂန္ထဝင်နောက်ခံလူ ကားလက်စ် ပူယိုးလ် တို့ရဲ့ ခံစစ်ကစားပုံ၊ ဇာဗီ.. အင်နီယက်စ်တာ တို့ရဲ့ တိုက်စစ်ကစားပုံတွေကို လေ့လာ၊ အတုယူရင်း ကြီးပြင်းလာခဲ့ရတဲ့သူလည်း ဖြစ်ပါတယ်..။ အဲဒီလိုကမ္ဘာ့ဘောလုံးလောကရဲ့ ဂန္ထဝင်ကစားသမားကြီးတွေဆီက အနီးကပ်သင်ကြးမှုတွေကို ထဲထဲဝင်ဝင် လေ့လာခွင့်ရဖို့ဆိုတာ တခြားသူတွေအတွက် အိပ်မက်တစ်ခု ဖြစ်နေပေမယ့် သူ့ရဲ့တိုးတက်မှုအတွက်တော့ တကယ့်ကို အရေးပါခဲ့တဲ့ အထောက်အပံ့တွေ ဖြစ်ခဲ့ပါတယ်..။

“အဲဒီမှာ သင်ယူခဲ့ရတာတွေနဲ့ အံ့သြစရာကောင်းလှတဲ့ ထိပ်တန်းကစားသမားကြီးတွေနဲ့ တွဲဖက်ကစားခွင့် ရခဲ့တဲ့အချိန်တွေဟာ ကျွန်တော့်ဘဝအတွက် အကောင်းဆုံးအတွေ့အကြုံတွေထဲက တစ်ခုပေါ့ဗျာ..။ အထူးသဖြင့် ကလေးဘဝမှာ ဒီလိုကောင်းမွန်တဲ့ သင်ကြားမှုတွေ ရရှိခဲ့ရတာဟာ ထူးခြားလှတဲ့ အတွေ့အကြုံတစ်ခု ဖြစ်ခဲ့ပါတယ်..။ အဲဒီကစားသမားကြီးတွေရဲ့ ဘောလုံးဒဿန၊ အယူအဆတွေအပြင် သူတို့ရဲ့ စိတ်နေစိတ်ထား၊ ခံယူချက်.. စတဲ့အရာအားလုံးကိုပါ သင်ကြားခွင့်ရခဲ့ပါတယ်..။အခုကျွန်တော် ဒီကိုရောက်နေတာဟာလည်း အဲဒီမှာ ကစားခဲ့ရလို့ ဖြစ်ပါတယ်..။ လာ မာစီယား မှာ အများကြီး သင်ယူခဲ့ရပါတယ်။” လို့ မာ့စ် ကူကူရယ်လာ က ဘလောဂ်ဂရားနား လူငယ်ကစားသမား ပြုစု၊ ပျိုးထောင်ရေးစနစ်ထဲက သင်ကြားမှုတွေအကြောင်း ပြန်ပြောင်း ပြောပြခဲ့ပါတယ်..။

လာ မာစီယား မှာ နည်းပြတွေနဲ့ ကစားသမားတွေရဲ့ တစ်ခုတည်းသော အာရုံစိုက်မှုမှာ ဘောလုံးကစားခြင်းရဲ့ အရေးအကြီးဆုံး အစိတ်အပိုင်းဖြစ်တဲ့ ဘောလုံးကို ထိထိရောက်ရောက် အသုံးချနိုင်မှု… ကို အခြေခံထားတဲ့ သင်ကြားမှုပဲ ဖြစ်ပါတယ်..။

“ဘောလုံးကို ဘယ်လိုပုံစံ အသုံးချရမလဲ.. ဆိုတာ သင်ယူခဲ့ရပါတယ်။ ကျွန်တော်တို့ကို သင်ကြားပေးခဲ့တဲ့ အရာအားလုံးဟာ ‘ဘောလုံးကို ဘယ်လိုပုံစံနဲ့ အသုံးပြုရမလဲ..’ ဆိုတဲ့ တူညီတဲ့ အတွေးအခေါ် တစ်ခုထဲကို အခြေခံထားပါတယ်..။ ဘာစီလိုနာမှာ ကျွန်တော်ရှိနေတဲ့ အချိန်တုန်းက အသင်းဟာ ထိပ်တန်းကစားသမားကြီးတွေနဲ့ ကြီးမားတဲ့ အောင်မြင်မှုတွေ အများအပြား ရရှိခဲ့ပါတယ်..။ အဲဒီလိုအောင်မြင်မှုတွေ ဆွတ်ခူးနိုင်ဖို့ သူတို့ဆီမှာ ထူးခြားတဲ့ ကစားနည်းစနစ်တစ်ခု ရှိခဲ့ပါတယ်။

ဘောလုံးခြေထဲရှိနေစဉ် (in possession) မှာ ဘာတွေပြုလုပ်ရမလဲ.. ဆိုတာ အများကြီးသင်ယူခဲ့ရပြီး အဲဒါတွေကို အခုအချိန် ကျွန်တော့်ရဲ့ ဘောလုံးသမားဘဝမှာ အသုံးချနိုင်ခဲ့ပါတယ်။ လာ မာစီယား နဲ့ ဘာစီလိုနာမှာ ရှည်လျားတဲ့ခရီးကို ဖြတ်သန်းခဲ့ရတာကို အရမ်းပျော်ရွှင်ခဲ့ပါတယ်..။ ဘာဖြစ်လို့လဲဆိုတော့ သူတို့တွေဟာ ကျွန်တော့်ကို အများကြီး သင်ပေးခဲ့လို့ ဖြစ်ပါတယ်။”

ဒါပေမယ့် သူ့ရဲ့ကစားသမားဘဝ ခရီးစဉ်ဟာ မွေးရပ်မြေရဲ့ ရင်းနှီးကျွမ်းဝင်၊ အဆင်ပြေနေမှုတွေကို ကျော်လွှားပြီး ပြိုင်ဆိုင်မှုပြင်းထန်တဲ့ ပရီးမီးယားလိဂ်စင်မြင့်ထက်ဆီ ရောက်ရှိသွားခဲ့ပါတယ်..။ အခုအချိန်မှာ အသက် (၂၆) နှစ် ရှိနေပြီဖြစ်တဲ့ ကူကူရယ်လာ အင်္ဂလိပ်ဘောလုံးလောကရဲ့ ပွေလီ၊ ရှုပ်ထွေးမှုတွေနဲ့ အသားကျဖို့၊ အံဝင်ခွင်ကျဖြစ်ဖို့ အခက်အခဲတွေနဲ့ ရင်ဆိုင်ခဲ့ရကြောင်း ဝန်ခံခဲ့ပါတယ်..။

 “အင်္ဂလန်က ကစားပွဲတွေရဲ့ ကိုယ်ခန္ဓာကြံ့ခိုင်မှုအပေါ် အသားပေးမှုတွေနဲ့ ကစားပွဲတွေရဲ့ အမြန်နှုန်းဟာ စပိန်နဲ့ လုံးဝခြားနားခဲ့ပါတယ်..။ ဘရန့်တ်ဖို့ဒ် အသင်းနဲ့ အဝေးကွင်းမှာ ယှဉ်ပြိုင်ခဲ့ရတဲ့ ပရီးမီးယားလိဂ် ပထမဆုံးပွဲကို အခုအချိန်ထိ မှတ်မိနေပါသေးတယ်..။ အဲဒီပွဲဟာ ဘရန့်တ်ဖို့ဒ်အသင်းရဲ့ ကွင်းမှာ ယှဉ်ပြိုင်ခဲ့ရတာဖြစ်ပြီး ကျွန်တော့်အတွက် အရမ်းကိုခက်ခဲခဲ့ပါတယ်။ ကျွန်တော်တို့ အနိုင်ရခဲ့ပေမယ့် ပွဲပြီးသွားတဲ့အခါ ကျွန်တော်ဟာ ဝမ်းနည်းပြီး ဒေါသထွက်နေခဲ့ပါတယ်..။ ဘာဖြစ်လို့လဲဆိုတော့ ကျွန်တော့်ရဲ့ကစားပုံ သိပ်ကိုညံ့ဖျင်းခဲ့တယ်လို့ ခံစားခဲ့ရလို့ပါပဲ။

ပရီးမီးယားလိဂ်ပွဲတွေရဲ့ အမြန်နှုန်းကြောင့် မင်းဟာ အရမ်းကိုမြန်မြန်ဆန်ဆန် တွေးနိုင်ရမယ့်အပြင် ပိုပြီးတော့ သန်မာဖို့လည်း လိုအပ်လာပါတယ်။ အဲဒီအချက်ဟာ ပရီးမီးယားလိဂ်နဲ့ လာလီဂါကြားက အဓိက ခြားနားချက် ဖြစ်ပါတယ်။”

အဲဒီပွဲဟာ စပိန်လူငယ် ကစားသမား တစ်ယောက်ရဲ့ ကြံ့ခိုင်မှု၊ စိတ်ဓာတ်နဲ့ ခံယူချက်တွေကို စမ်းသပ်မှုတစ်ခု ဖြစ်ခဲ့ပါတယ်..။ အဲဒီလိုစိန်ခေါ်မှုတွေကို တုံ့ပြန်တဲ့အနေနဲ့ မာ့စ် ဟာ သူ့ရဲ့ ခန္ဓာကိုယ်ကြံ့ခိုင်မှုကို ပိုမိုတိုးတက်အောင် ကြိုးစား၊ လေ့ကျင့်ခဲ့သလို အခြားတစ်ဘက်ကလည်း ဆုံးဖြတ်ချက်တွေကို လျှင်လျှင်မြန်မြန် ချမှတ်နိုင်စွမ်းရှိလာအောင် အထူးအာရုံစိုက် ပြင်ဆင်ခဲ့ပါတယ်..။ ဒီလိုနဲ့သူဟာ အင်္ဂလန်ရဲ့အမြင့်ဆုံး လိဂ်ပြိုင်ပွဲမှာ တဖြည်းဖြည်းနဲ့ အသားကျလာခဲ့ပြီး ကိုယ့်ကိုယ်ကိုယုံကြည်မှုလည်း ပိုမိုမြင့်မားလာပါတော့တယ်..။

 “ကျွန်တော်ဟာ ပိုပြီးကြိုးစား လေ့ကျင့်ဖို့ လိုအပ်လာခဲ့ပါတယ်..။ Gym လေ့ကျင့်ခန်းတွေ အများကြီး လေ့ကျင့်ခဲ့ရသလို အဲဒီလိုခက်ခဲတဲ့ အချိန်တွေကနေ အများကြီး သင်ယူခဲ့ရပါတယ်။ အဲဒီအချိန်မှာ သင်ကြားခဲ့ရတဲ့ အရာတစ်ခုကတော့ ‘မင်းဟာ ကောင်းကောင်းကစားနိုင်သည်ဖြစ်စေ.. ဒါမှမဟုတ် ဆိုးဆိုးရွားရွား ကစားသည်ဖြစ်စေ.. မင်းဟာတူညီတဲ့ ကစားသမား တစ်ယောက်အဖြစ် ဆက်လက်ရှိနေမယ်.. ဆိုတဲ့အချက်ပါပဲ။ ကျွန်တော်ဟာ အခုအချိန်ထိ အဲဒီအယူအဆအတိုင်း ခံယူ၊ ကျင့်သုံးနေဆဲပါ။ မင်းဟာ ဘယ်တော့မှ အညံ့ဆုံး ကစားသမား မဟုတ်ခဲ့သလို၊ ဘယ်တော့မှ အကောင်းဆုံး ကစားသမား ဖြစ်လာမှာလည်း မဟုတ်ပါဘူး။”

မာ့စ် ဟာ ‘ဘယ်တော့မှ လက်မလျှော့၊ အရှုံးမပေးတတ်တဲ့’ သူ့ရဲ့ ဇွဲ၊ စိတ်ဓါတ်ကြောင့် အံ့သြစရာကောင်းလှတဲ့ အသိအမှတ်ပြုမှုကို ပြန်လည်ရရှိခဲ့ပါတယ်..။ အဲဒါကတော့ သူဟာအပြာရောင် ချယ်လ်ဆီးအသင်းကို ပြောင်းရွှေ့ခွင့်ရခဲ့ပြီး သူ့ရဲ့ အိပ်မက်တစ်ခုကို အကောင်အထည်ဖော်နိုင်ခွင့် ရရှိခဲ့ခြင်း ဖြစ်ခဲ့ပါတယ်..။ အခုဆိုရင် သူဟာ စတန်းဖို့ဒ် ဘရစ်ချ်ကွင်းမှာ နှစ်နှစ်ခွဲကြာ ဖြတ်သန်းခဲ့ပြီး သူ့အတွေ့အကြုံတွေကို ပြန်လည်သုံးသပ်ရာမှာ မှတ်မှတ်ထင်ထင် ဖြစ်နေခဲ့တဲ့ အခိုက်အတန့်နှစ်ခုကို ပြန်လည်ပြောပြခဲ့ပါတယ်..။

“အပြာရောင်တွေနဲ့ ကျွန်တော့်ရဲ့ ပထမဆုံးပွဲကို အမြဲတမ်းအမှတ်ရနေပါတယ်..။ ကျွန်တော်ဟာ ချယ်လ်ဆီးလို ထိပ်တန်းအသင်းကြီး တစ်သင်းမှာ ကစားခွင့်ရဖို့ အများကြီး ရုန်းကန်ခဲ့ရတာကြောင့် အဲဒီလိုအသင်းကြီးမှာ ပွဲထွက်ခွင့်ရခဲ့တာဟာ အင်မတန်မှ ကြည်နူး၊ ပျော်ရွှင်ခဲ့ရတဲ့ အချိန်တစ်ခုပေါ့ဗျာ..။ ချယ်လ်ဆီးအသင်းက ကျွန်တော့်ကို အဲဒီလိုပျော်ရွှင်မှုကို ခံစား၊ ရရှိနိုင်ဖို့ အခွင့်အရေး ပေးခဲ့ပါတယ်။

ပြီးတော့ ဒေါ့မွန်အသင်းနဲ့ စတန်းဖို့ဒ် ဘရစ်ချ်မှာ ယှဉ်ပြိုင်ခဲ့တဲ့ ချန်ပီယံလိဂ်ပြိုင်ပွဲ၊ ရှုံးထွက်ပွဲစဉ်ကိုလည်း အမှတ်ရနေပါသေးတယ်..။ ကျွန်တော်တို့ ၂ဂိုး- ဂိုးမရှိရလဒ်နဲ့ အနိုင်ရခဲ့ပါတယ်။ အဲဒီပွဲမတိုင်ခင် သုံးပွဲ၊ လေးပွဲလောက်ကစပြီး ကျွန်တော်ဟာ အသင်းမှာ ပါဝင်ခွင့်မရတော့ပါဘူး..။ ဒါပေမယ့်နောက်ပိုင်းမှာ မန်နေဂျာက ကျွန်တော့်ကို အဲဒီပွဲမှာ ထည့်ပြီးကစားခဲ့ပါတယ်..။ ကျွန်တော်အထူး ခြေစွမ်းပြနိုင်ခဲ့သလို အသင်းကလည်း အနိုင်ပွဲရရှိခဲ့ပါတယ်။ ကျွန်တော့်ရဲ့ ကစားသမားဘဝမှာ သိပ်ကိုအမှတ်ရနေဦးမယ့် အခိုက်အတန့်ကောင်း တစ်ခုပေါ့ဗျာ..။”

အခုနှစ်ဘောလုံးရာသီမှာတော့ ကူကူရယ်လာ ဟာ ဆက်လက်တိုးတက်လာဖို့ ကြိုးပမ်းနေရင်း ဂိုးသွင်း၊ အဆုံးသတ်ပိုင်းမှာ ထူးချွန်တဲ့မှတ်တမ်းတွေ စိုက်ထူ၊ ရရှိခဲ့ပြန်ပါတယ်..။ အပြာရောင်ခြင်္သေ့တွေအတွက် သူ့ရဲ့ပရီးမီးယားလိဂ် သွင်းဂိုး (၄) ဂိုးစလုံးကို အခုနှစ်ဘောလုံးရာသီမှာ သွင်းယူနိုင်ခဲ့ပြီး ၂၀၂၁/၂၂ ဘောလုံးရာသီမှာ အသင်းခေါင်းဆောင် ရိစ် ဂျိမ်းစ် နောက်ပိုင်း အဲဒီပရီးမီးယားလိဂ် သွင်းဂိုးအရေအတွက်ကို တစ်ရာသီအတွင်း ရရှိခဲ့တဲ့ နောက်ခံလူအဖြစ် မှတ်တမ်းတင်နိုင်ခဲ့တာပါ..။

အဲဒီမှတ်တမ်းကောင်းဟာ သူ့အတွက်လည်း ထူးခြားတဲ့ မှတ်တမ်းကောင်းတစ်ခုဖြစ်ခဲ့ပြီး သူ့ရဲ့တစ်ရာသီအတွင်း အများဆုံးဂိုးသွင်းနိုင်တဲ့ ကိုယ်ပိုင်မှတ်တမ်းကိုလည်း ချိုးဖျက်နိုင်ခဲ့ပါပြီ..။ အဆုံးသတ် ဂိုးသွင်းယူတဲ့ အပိုင်းဟာ သူ့အတွက် နောက်ထပ်ဖြည့်ဆည်းနိုင်ခဲ့တဲ့ ကျွမ်းကျင်မှုတစ်ခုဖြစ်ခဲ့ပြီး အခုလိုသွင်းဂိုးတွေအတွက် ဂုဏ်ယူ၊ ဝမ်းမြောက်ခဲ့ရကြောင်း ကူကူရယ်လာ က အခုလိုပြောပြခဲ့ပါတယ်..။

“ဂိုးသွင်းအဆုံးသတ်တဲ့ အပိုင်းကို ပိုမိုတိုးတက်အောင် လုပ်ဆောင်ရမယ်.. လို့ အမြဲတမ်းခံစားနေရသလို တိုက်စစ်ဇုန်ထဲကို ရောက်လာပြီဆိုရင် ဂိုးတွေပိုသွင်းပေးနိုင်ဖို့၊ ဂိုးဖန်တီးမှုတွေ ပိုမိုပြုလုပ်ပေးဖို့ ပြင်းပြတဲ့ဆန္ဒ အမြဲရှိခဲ့ပါတယ်..။ အခုနှစ်ဘောလုံးရာသီမှာတော့ ကျွန်တော်ဟာ ဂိုးတွေပိုပြီး ရရှိနိုင်ဖို့ အခွင့်အရေးရခဲ့သလို ရတဲ့အခွင့်အရေးတွေကို ထိထိရောက်ရောက် အသုံးချနိုင်ကြောင့် ကိုယ့်ရဲ့ခြေစွမ်း ပိုပြီးတိုးတက်လာတယ်..၊ အသင်းကိုပိုမို အကူအညီပေးနိုင်ခဲ့တယ်လို့ ခံစားခဲ့ရပြီး ကျေနပ်ခဲ့ရပါတယ်..။

ကျွန်တော်ဟာ အသင်းအတွက် အမြဲတမ်း အကောင်းဆုံးပေးဆပ်နိုင်အောင် ကြိုးစားလေ့ရှိပြီး ကွင်းထဲရောက်ချိန်မှာ အစွမ်းရှိသမျှ အသင်းအတွက် ချန်ထားရစ်ခဲ့ဖို့ ကြိုးစားခဲ့ပါတယ်။ ဒါ့အပြင်ကျွန်တော်ဟာ အမြဲတမ်းအနိုင်ရချင်ပါတယ်။ အဲဒီအရာတွေဟာ ကျွန်တော်တို့လို ကစားသမားတစ်ယောက်အတွက် ရရှိနိုင်သမျှ အကောင်းဆုံးအရာတွေလို့ပဲ ထင်မိပါတယ်။ အခုဆိုရင် အသင်းရဲ့အရေးပါတဲ့ သွင်းဂိုးတွေကိုပါ သွင်းယူပေးနိုင်တဲ့သူ ဖြစ်လာပါပြီ..။ နောက်ပိုင်းမှာလည်း နောက်ထပ် ဂိုးတွေအများကြီး သွင်းပေးနိုင်မယ်လို့ မျှော်လင့်ထားရင်း အထူးကျေနပ်၊ ပျော်ရွှင်နေရပါတယ်။”

(Chelsea Official website မှ တင်ဆက်သော “From La Masia to the Bridge: Marc Cucurella's footballing journey” ဆောင်းပါးကို ပြန်ဆိုပါသည်..။)