ချယ်လ်ဆီးအသင်းမှာ မန်ချက်စတာ ယူနိုက်တက်အသင်းမှ အာဂျင်တီးနား တောင်ပံ ကစားသမား အလီဂျန်ဒရို ဂါနာချို အား ၂၀၃၂ ခုနှစ်၊ ဇွန်လအထိ (၆) နှစ်သက်တမ်း စာချုပ်ဖြင့် ခေါ်ယူနိုင်ခဲ့သည်..။ ဖူးလ်ဟမ်းအသင်းအား အနိုင်ရရှိခဲ့သည့်ပွဲစဉ်တွင် စတန်းဖို့ဒ် ဘရစ်ချ်ကွင်းသို့ ရောက်ရှိလာပြီး အသင်းဖော်သစ်များကို အားပေးခဲ့သည့် အသက် (၂၁) နှစ်အရွယ် တောင်ပံ ကစားသမားလေးမှာ စတန်းဖို့ဒ် ဘရစ်ချ်ကွင်းတွင် ကစားခဲ့ရသည့် အတွေ့အကြုံများနှင့် အီဒင် ဟာဇက် ကို အတုယူ၊ အားကျခဲ့သည့် ငယ်ဘဝ ဖြတ်သန်းမှုများအကြောင်းကို ချယ်လ်ဆီးအသင်း official website နှင့် တွေ့ဆုံခန်းတွင် ယခုလိုပြောပြခဲ့ပါသည်..။ 

မေး - အလီဂျန်ဒရို ရေ.. ချယ်လ်ဆီးအသင်းကနေ လှိုက်လှဲစွာနဲ့ ကြိုဆိုလိုက်ရပါတယ်..။ ဒီအသင်းကို ပြောင်းရွှေ့ခွင့်ရလာတာတဲ့အပေါ် ခင်ဗျားရဲ့ခံစားချက်ကို အရင်ဆုံးပြောပြပေးပါလား..?

အခုလိုပြောင်းရွှေ့ခွင့်ရလာတာကြောင့် သက်ဆိုင်တဲ့သူအားလုံးကို အထူးကျေးဇူးတင်မိပါတယ်..။ ချယ်လ်ဆီးအသင်းလို ထိပ်တန်းအသင်းကြီးတစ်သင်းဆီ ပြောင်းရွှေ့ခွင့်ရခဲ့တာဟာ သိပ်ကိုကျေနပ်ဖို့ ကောင်းပါတယ်..။ အသင်းနဲ့အတူ ပွဲထွက်ခွင့်ရမယ့်အချိန်ကို မစောင့်နိုင်အောင် ဖြစ်နေရပါတယ်..။

မေး - အခုအပြောင်းအရွှေ့ဟာ ခင်ဗျားရဲ့ ကစားသမားဘဝမှာ ဘယ်လောက်အထိ အရေးပါနိုင်ခဲ့လဲ..?

Yeah.! တကယ့်ကို ကြီးမားတဲ့ ခြေလှမ်းသစ်တစ်ခု လျှောက်လှမ်းခဲ့တာ ဖြစ်ပါတယ်..။ နောက်ပြီးဒီအသင်းရဲ့ လက်ရှိအခြေအနေနဲ့ဆိုရင် ကျွန်တော့်အတွက် ကောင်းမွန်တဲ့ခြေလှမ်း၊ ကစားသမားဘဝမှာ နောက်ထပ်တိုးတက်မှု အလားအလာကောင်းတွေ ရှိနေတဲ့ခြေလှမ်းလို့ မှတ်ယူရပါမယ်..။ ဒါ့ကြောင့်ဒီအသင်းမှာ အစစအရာရာ အဆင်ပြေ၊ ချောမွေ့သွားလိမ့်မယ်လို့ မျှော်လင့်ထားပါတယ်..။

မေး - ကလေးဘဝတုန်းက ချယ်လ်ဆီးအသင်း လေ့ကျင့်ရေးဝတ်စုံ ဝတ်ဆင်ထားတဲ့ ခင်ဗျားရဲ့ဓါတ်ပုံတွေ online ပေါ်မှာ မြင်တွေ့မိပါတယ်..။ ခင်ဗျားရဲ့ငယ်ဘဝမှာ ချယ်လ်ဆီးအသင်းနဲ့ ဘယ်လိုပတ်သတ်မှုတွေ ရှိခဲ့လဲ.. ပြောပြနိုင်မလား..?

ငယ်စဉ်ကတည်းက ပရီးမီးယားလိဂ် ပြိုင်ပွဲတွေကို အစဉ်တစိုက် ကြည့်ဖြစ်ခဲ့ပါတယ်..။ အီဒင် ဟာဇက် ကို အရမ်းသဘောကျမိတာကြောင့် ချယ်လ်ဆီးအသင်းရဲ့ပွဲစဉ်တွေကို ကြည့်ဖြစ်ခဲ့တာပေါ့ဗျာ…။ အဲဒါနဲ့တဆက်တည်း ချယ်လ်ဆီးအသင်းကို အားပေးဖြစ်ခဲ့ပါတယ်..။ ချယ်လ်ဆီးအသင်း လေ့ကျင့်ရေး ဝတ်စုံကိုတော့ ဒီဇိုင်းကြိုက်လို့ ဝယ်မိတာပါ..။

မေး - ဒါဆိုရင် အီဒင် ဟာဇက် ရဲ့ ခင်ဗျားရဲ့ကစားပုံအပေါ် လွှမ်းမိုးမှုရှိခဲ့တာပေါ့…

Yes.. မှန်တာပေါ့..။ သူဟာကျွန်တော်အတုယူ၊ အားကျခဲ့ရတဲ့ ကစားသမား တစ်ယောက် ဖြစ်ခဲ့ပါတယ်..။ ဒါ့ကြောင့် သူဘယ်လိုပုံစံ ကစားတယ်..၊ ဘယ်လိုနေရာယူတယ်.. စတာတွေကို အသေအချာ လေ့လာဖြစ်ခဲ့ပါတယ်..။ ပြီးတော့ ကျွန်တော်တို့ ကစားရတဲ့နေရာချင်းလည်း တူညီပါတယ်..။ ဒါ့ကြောင့်အစစအရာရာမှာ အတုယူခဲ့ရပါတယ်..။

မေး - အခုဆိုရင် ခင်ဗျားဟာ ကမ္ဘာ့ချန်ပီယံအသင်းကို ရောက်ရှိလာခဲ့ပါပြီ..။ အသင်းဖော်သစ်တွေနဲ့ စကားပြောဖြစ်ခဲ့သေးလား..?

အင်ဇို ဖာနန်ဒက်စ် နဲ့ အမြဲတမ်း အဆက်အသွယ် ရှိပါတယ်..။ သူဟာအာဂျင်တီးနား လက်ရွေးစင်အသင်းမှာ ရင်းနှီးခဲ့တဲ့ သူငယ်ချင်းလည်း ဖြစ်ပါတယ်..။ အသင်းရဲ့အဝတ်လဲခန်းမှာ သူတို့တွေနဲ့အတူ လေ့ကျင့်ခွင့်ရမယ့်အချိန်ကို မစောင့်နိုင်အောင် ဖြစ်နေရပါတယ်..။

မေး - ခင်ဗျားဟာ အကြောက်အရွံ့မရှိ ကစားတတ်တယ်..၊ စိတ်လှုပ်ရှားတာလည်း မရှိဘူး..၊ စိတ်လှုပ်ရှားတဲ့ အမူအရာတွေကိုလည်း ပြသလေ့မရှိဘူး.. လို့ သိထားပါတယ်..။ အဲဒီပင်ကိုယ်အကျင့်စရိုက်တွေဟာ တောင်ပံ ကစားသမားကောင်း တစ်ယောက် ဖြစ်လာဖို့ အထောက်အကူ ဖြစ်စေခဲ့လား..?

မြက်ခင်းစိမ်းပေါ်မှာ ခြေချရတဲ့ပွဲစဉ်တိုင်းမှာ စိတ်လှုပ်ရှားရတယ်.. ဆိုတာ ဘယ်တုန်းကမှ မရှိခဲ့ပါဘူး..။ ကစားသမား တစ်ယောက် ဖြစ်တာနဲ့အညီ ခြေစွမ်းကောင်းတဲ့ပွဲတွေရှိတယ်..၊ ခြေစွမ်းဆိုးရွားတဲ့ပွဲတွေလည်း ရှိခဲ့ပါတယ်..။ ဒါပေမယ့် ကိုယ့်ရဲ့ခြေစွမ်းကြောင့် ပျော်ရွှင်တာ..၊ စိတ်ညစ်တာ..၊ ဒေါသထွက်တာတွေ မရှိခဲ့ဖူးပါဘူး..။

မေး - အဲဒါကြောင့် ခုလိုအသက်အရွယ်နဲ့ ခင်ဗျားဟာ ပရီးမီးယားလိဂ်ပွဲ (၁၅၀) ပြည့်မြောက်ခဲ့ပါပြီ..။ ခင်ဗျားရဲ့ မတုန်မလှုပ်၊ မကြောက်ရွံ့တတ်တဲ့ စိတ်နေစိတ်ထားဟာ အခုလိုအခြေအနေ ရောက်ရှိလာအောင် တွန်းတင်ပေးနိုင်ခဲ့တဲ့ အကြောင်းရင်းတစ်ခု ဖြစ်နိုင်ပါတယ်..။ 

အင်း.. ဖြစ်နိုင်ပါတယ်..။ ကျွန်တော့်ရဲ့ပင်ကိုယ်စိတ်ဓါတ်ကြောင့် အသင်းကိုအပြောင်းအလဲ ဖြစ်လာအောင် တွန်းတင်ပေးနိုင်စွမ်းရှိတယ်..၊ အသင်းအတွက် ထိရောက်တဲ့ အကူအညီ ပေးနိုင်စွမ်း ရှိတယ်လို့လည်း ယူဆမိပါတယ်..။ ချယ်လ်ဆီးအသင်းကို ရောက်ရှိလာခဲ့တာဟာလည်း အဆုံးအဖြတ် အခိုက်အတန့်တွေ ဖန်တီးပေးနိုင်ပြီး အသင်းကို အကောင်းဆုံး ကူညီပေးနိုင်ဖို့ ဖြစ်ပါတယ်…။

မေး - ခင်ဗျားဟာ အရင်တုန်းကလည်း စတန်းဖို့ဒ် ဘရစ်ချ်ကွင်းမှာ ကစားခဲ့ဖူးပါတယ်..။ အပြာရောင်တွေရဲ့ အားပေးမှု၊ စတန်းဖို့ဒ် ဘရစ်ချ်ကွင်းရဲ့ ပတ်ဝန်းကျင်နဲ့ ဒီကွင်းကြီးမှာ ကစားခဲ့ရတဲ့ အရင်အတွေ့အကြုံ၊ ခံစားချက်တွေကို ပြောပြပေးပါလား..?

စတန်းဖို့ဒ် ဘရစ်ချ်ကွင်းကို လာရောက်ခဲ့ရတဲ့ ပွဲစဉ်တိုင်းကို မှတ်မိနေပါတယ်..။ ပရိသတ်တွေရဲ့ အားပေမှု တကယ့်ကို ကောင်းမွန်ခဲ့ပြီး ရူးရူးသွပ်သွပ် အားပေးခဲ့ကြတဲ့ ကွင်းကြီးတစ်ကွင်း ဖြစ်ပါတယ်..။ ဒီကွင်းကြီးရဲ့ မြက်ခင်းစိမ်းပေါ်မှာ ပြန်လည်ခြေချခွင့်ရမယ့် နေ့ရက်တွေ့အတွက် စိတ်စောနေမိပါတယ်..။ 

မေး - မှန်တာပေါ့..။ ချန်ပီယံလိဂ်ပြိုင်ပွဲ ညချမ်းတွေဟာ တကယ့်ကို ရူးသွပ်စရာပဲဗျ..။ မဟုတ်ဘူးလား…?
ဟား… ချန်ပီယံလိဂ်..!! သေချာတာပေါ့ဗျာ..။
မေး - ချန်ပီယံလိဂ်ပြိုင်ပွဲမှာ ဘယ်ကစားသမားတွေနဲ့ တွေ့ဆုံချင်တဲ့စိတ်ဆန္ဒ ပြင်းပြနေသလဲ..?

ဘာစီလိုနာ နဲ့ ရီးရဲလ် မက်ဒရစ်အသင်းတွေနဲ့ အတွေ့ချင်ဆုံးပါပဲ..။ အထူးသဖြင့် ဘာစီလိုနာအသင်းနဲ့ ယှဉ်ပြိုင်ရမယ်ဆိုရင် သိပ်ကိုကျေနပ်ဖို့ ကောင်းပါလိမ့်မယ်..။

မေး - ချန်ပီယံလိဂ်ပြိုင်ပွဲတွေ မရောက်လာခင် နိုင်ငံတကာပွဲစဉ်တွေကြောင့် အနားပေးထားတဲ့ကာလကို အရင်ဖြတ်သန်းရဦးမှာပါ..။ အဲဒီ International Break ဟာ ခင်ဗျားအတွက် အထောက်အကူ ဖြစ်စေလား..? ဆိုလိုချင်တာက အသင်းနဲ့ နေသားတကျဖြစ်ဖို့ ပိုပြီးအချိန်ရခဲ့တာပေါ့ဗျာ..

Yes.. လာမယ့် International break ဟာ အရေးကြီးပါတယ်..။ ကျွန်တော်ဟာ အသင်းမှာပဲ ဆက်ရှိနေပြီး အသင်းဖော်တစ်ချို့နဲ့ လေ့ကျင့်ခန်းတွေ စတင်ပါမယ်..။ အခုလိုအနားယူတဲ့ ကာလမှာ ကြံ့ခိုင်ရေး ကောင်းမွန်ဖို့ ဦးစားပေး၊ လေ့ကျင့်ပါမယ်..။ 

မေး - ဒါပေါ့..။ ကော့ဘ်ဟမ် လေ့ကျင့်ကွင်းမှာ အထိုင်ကျနိုင်ဖို့ ပိုပြီးအချိန်ရမှာပေါ့..။ နည်းပြအင်ဇို မာရက်စ်ကာ နဲ့လည်း တွေ့ဆုံဖို့ အချိန်ရသွားပါမယ်..။ နောက်ဆုံးအနေနဲ့ မေးချင်တာက ချယ်လ်ဆီးအသင်းနဲ့အတူ ခင်ဗျားရဲ့ ရည်မှန်းချက်တွေက ဘာတွေဖြစ်မလဲ..?

‘ဆုဖလားတွေ ဆွတ်ခူးနိုင်ဖို့..’ ပေါ့ဗျာ..။ ပထမဆုံးအနေနဲ့ ပရီးမီးယားလိဂ် ဆုဖလားကြီးကို ဦးစားပေး တိုက်ပွဲဝင်ပါမယ်..။