ပရီးမီးယားလိဂ်ပွဲစဉ် (၈) အဖြစ် ချယ်လ်ဆီးအသင်းက နော့တင်ဟမ် ဖောရက်စ်အသင်းအား အဝေးကွင်းတွင် ၃ဂိုး- ဂိုးမရှိဖြင့် အနိုင်ရရှိခဲ့သည့်ပွဲစဉ်မှ ချယ်လ်ဆီးအသင်း၏ခြေစွမ်းအပေါ် ဒုတိယအနိုင်ဂိုးသွင်းပြီး ခြေစွမ်းပြနိုင်ခဲ့သည့် တောင်ပံ ကစားသမား ပီဒရို နက်တို၊ ချယ်လ်ဆီးအသင်းနည်းပြဟောင်း ဂလင်း ဟော်ဒယ်လ် နှင့် လီဗာပူးလ်အသင်း တိုက်စစ်မှူးဟောင်း ပီတာ ခရောက်ချ် တို့က TNT Sports သတင်းဌာန၏ ပွဲပြီးစကားဝိုင်း အစီအစဉ်တွင် အောက်ပါအတိုင်း သုံးသပ်၊ ပြောကြားခဲ့ပါသည်..။

လင်းဆေး ဟစ်ပ်ဂရေ့စ် - ဂလင်း ရေ… ဒီနေ့ပွဲ ပထမပိုင်းအပြီးမှာ ချယ်လ်ဆီးအသင်းဟာ အိပ်ငိုက်နေရာကနေ နိုးထသင့်ပြီလို့ ရှင်ပြောခဲ့တယ်နော်..။ သူတို့ရဲ့ဒုတိယပိုင်းမှာ ပြောင်းလဲသွားခဲ့တဲ့ ကစားပုံနဲ့ နည်းပြအင်ဇို မာရက်စ်ကာ ရဲ့ ထိရောက်တဲ့ လူအပြောင်းအလဲတွေအ‌ပေါ် ထပ်ပြီးချီးကျူးဖို့ရော မရှိဘူးလား..?

ဂလင်း ဟော်ဒယ်လ် - မှန်ပါတယ်..။ နည်းပြအင်ဇို မာရက်စ်ကာ ဟာ လီဗာပူးလ်နဲ့ပွဲက အနီကတ်ဒ်ကြောင့် ပွဲပယ်ပြစ်ဒဏ် ကျခံနေတဲ့အတွက် ဒီနေ့ပွဲမှာ ကြီးကြပ်ခွင့်မရခဲ့ပါဘူး..။ ဒါပေမယ့် တခါတလေကျရင် ပွဲကြည့်စင်ပေါ်က ကြည့်ရတဲ့အခါ အသင်းရဲ့ကစားကွက် အခင်းအကျင်းကို ပိုပြီးရှင်းရှင်းလင်းလင်း မြင်လိုက်ရတာတွေ ရှိတတ်ပါတယ်..။ ဒုတိယပိုင်းမှာ အဝတ်လဲခန်းထဲကို သွားရောက်ပြီး မန်နေဂျာ တစ်ယောက်ရဲ့ ထိရောက်တဲ့ မှာကြားမှုတွေ ညွှန်ကြားပေးနိုင်ခဲ့သလို မှန်ကန်တဲ့ လူစားလဲမှုတွေကိုလည်း စီစဉ်ပေးနိုင်ခဲ့ပါတယ်..။ အထူးသဖြင့် မွိုက်စ် ကိုင်ဆီဒို ကို လူစားသွင်းခဲ့တာဟာ အရေးကြီးတဲ့ အပြောင်းအလဲ ဖြစ်ခဲ့ပါတယ်..။ 

ချယ်လ်ဆီးအသင်းမှာ ဘောလုံးရတာနဲ့ ကစားသမားအားလုံးဟာ သူ့ကိုရှာပြီး ဘောလုံးပေးနေကြပါတယ်..။ ဘာဖြစ်လို့လည်းဆိုတော့ သူ့ကိုဘောလုံးပေးလိုက်ရင် ယုံကြည်၊ စိတ်ချရတယ်လို့ နားလည်ထားကြတာကိုးဗျ..။ ပထမပိုင်းမှာတုန်းက အဲဒီလိုယုံကြည်မှု ပြည့်ဝတဲ့ ကစားပုံကို မတွေ့ခဲ့ရပါဘူး..။ ဘောလုံးတွေ အဆုံးအရှုံးများခဲ့ပါတယ်..။ လူပေးမှားတာတွေ၊ အမှားအယွင်းတွေ ပြုလုပ်ခဲ့ပေမယ့် ဖောရက်စ်အသင်းဘက်က အသုံးမချနိုင်ခဲ့တာကြောင့် ကံကောင်းသွားခဲ့ပါတယ်..။ ဒါ့ကြောင့်အသင်းသားတွေကို စိုးရိမ်စိတ်တွေ လျော့ပါးသွားအောင်၊ တည်ငြိမ်သွားအောင် လုပ်ပေးနိုင်ဖို့ လိုအပ်ခဲ့ပါတယ်..။

မွိုက်စ် ကိုင်ဆီဒို ဟာ ကျန်တဲ့အသင်းဖော်တွေကို ယုံကြည်မှု မြင့်မားစေခဲ့တဲ့ ကစားသမား ဖြစ်ခဲ့ပါတယ်..။ သူဟာဘောလုံးကိုင်ပြီး အစွမ်းပြနေတဲ့ ကစားသမား မဟုတ်ပါဘူး.။ ဒါပေမယ့် ကွင်းထဲမှာ သူရှိနေတာနဲ့ အသင်းဖော်တွေဟာ ပိုပြီးလုံခြုံမှုရှိတယ်..၊ တိုက်စစ်ကို စိတ်ချလက်ချ လိုက်ပါနိုင်မယ်.. ဆိုတဲ့ ခံစားချက်ကို ရရှိစေပါတယ်..။ ဒီလိုနဲ့ ဒုတိယပိုင်းမှာ ချယ်လ်ဆီးအသင်းဟာ ပိုပြီးကောင်းမွန်လာခဲ့တာပါပဲ..။

ပီတာ ခရောက်ချ် - မာ့စ် ဂီယူ ရဲ့ ပံ့ပိုးမှုအကြောင်းကိုလည်း ထည့်ပြောသင့်တယ်ဗျ..။ ဂီယူ ဝင်လာပြီးနောက်ပိုင်း ဂျာအို ပီဒရို ဟာ နောက်ကိုဆင်းပြီး ဘောလုံးယူနိုင်တယ်..၊ ကွင်းလယ်နဲ့တွဲဖက်ပြီး ပွဲကိုထိန်းချုပ်နိုင်ခဲ့ပါတယ်..။ ထိရောက်တဲ့ တိုက်စစ်ထိုးဖောက်မှုတွေ ပိုမိုပြုလုပ်နိုင်လာခဲ့ပါတယ်..။

လင်းဆေး ဟစ်ပ်ဂရေ့စ် - ဒါဆိုရင် သူတို့နဲ့ဆုဖလား ဆွတ်ခူးနိုင်ခွင့် အလားအလာနဲ့ ပတ်သက်ပြီး ရှင့်ရဲ့အမြင်တွေ ပြောင်းလဲလာခဲ့ပြီလား..?

ပီတာ ခရောက်ချ် - No… မပြောင်းလဲပါဘူး..။ လီဗာပူးလ်အသင်းနဲ့ အနိုင်ရလဒ်ဟာ သူတို့အတွက် ကြီးမားတဲ့ အနိုင်ပွဲတစ်ပွဲ ဖြစ်ခဲ့ပါတယ်…။ သူတို့ဟာ အဲဒီပွဲက ရရှိလာတဲ့ ယုံကြည်မှုတွေကို ဆက်လက်သယ်တောင်ပြီး ဒီနေ့မှာလည်း အနိုင်ပွဲရရှိအောင် ဆက်လက်စွမ်းဆောင်နိုင်ခဲ့ပါတယ်..။ အထူးသဖြင့် ဒဏ်ရာရ ကစားသမား အများအပြား ရှိနေတဲ့အထဲကနေ အခုလိုအနိုင်ပွဲတွေ ရရှိအောင် စွမ်းဆောင်နိုင်တာဟာ ချီးကျူးဖို့ကောင်းသလို ဒီနေ့ပွဲမှာ ဗဟိုခံစစ်မှူးအဖြစ် ပါဝင်လာခဲ့တဲ့ လူငယ်နောက်ခံလူ ဂျော့ရှ် အာချီယမ်ပေါင်း ရဲ့ ခြေစွမ်းဟာလည်း အတော်လေးကို အားရဖို့ကောင်းတယ်ဗျ..။ နောက်ပြီးအခုကျွန်တော်တို့အတူ ပူးပေါင်းလာတဲ့ ပီဒရို နက်တို ပေါ့ဗျာ..။

လင်းဆေး ဟစ်ပ်ဂရေ့စ် - ဟုတ်ကဲ့ပါ.. ပီဒရို ရေ..။ ပီတာ ခရောက်ချ် ကတော့ ပထမပိုင်းအပြီးမှာကတည်းက ရှင့်ရဲ့ခြေစွမ်းကို ချီးမွမ်းခဲ့တာပါ..။ ပထမပိုင်းမှာ ရှင်တို့အသင်းရဲ့ ကစားပုံ မကောင်းခဲ့ပေမယ့် ရှင်ကတော့ ဖောရက်စ် အသင်းရဲ့ ခံစစ်ကြောင်းကို အခြိမ်းခြောက်နိုင်ဆုံး၊ အန္တရာယ် အပေးနိုင်ဆုံး ဖြစ်တယ်လို့ ပြောဆိုခဲ့ပါတယ်..။ ဒုတိယပိုင်းမှာ ရှင်ဟာအသင်းရဲ့ ပထမဂိုးကို ဖန်တီးပေးနိုင်ခဲ့သလို အရေးပါတဲ့ ဒုတိယဂိုးကို သွင်းယူပေးခဲ့ပါတယ်..။ ဒီနေ့ပွဲကရှင့်ရဲ့ခြေစွမ်းနဲ့ ချယ်လ်ဆီးအသင်းရဲ့ ခြေစွမ်းအပေါ် ကိုယ်ပိုင်အမြင်၊ သုံးသပ်ချက်လေးကို သိချင်ပါတယ်..။

ပီဒရို နက်တို - ပွဲအစပိုင်းမှာ ကျွန်တော်တို့အသင်းရဲ့ကစားပုံ ကောင်းမွန်ခဲ့ပေမယ့် အဲဒီနောက်ပိုင်းမှာ အခက်အခဲ ကြုံခဲ့ပါတယ်..။ သူတို့ဘက်က ဂိုးရနိုင်မယ့် အခွင့်အရေးတစ်ချို့ ရရှိခဲ့တာ ခင်ဗျားတို့လည်း တွေ့ခဲ့ကြတာပဲ..။ ပထမပိုင်းရဲ့ ပွဲချိန်နောက်ပိုင်းမှာ ဖောရက်စ်ဘက်က ခြေစွမ်းအသာစီး ရခဲ့ပေမယ့် ကျွန်တော်တို့ဟာ လိုအပ်တဲ့အချိန်မှာ ပွဲအဖြေကို ပြောင်းလဲနိုင်တဲ့ အခိုက်အတန့်တွေကို ဖန်တီးနိုင်ခဲ့ပါတယ်…။ ကျွန်တော်တို့ကတော့ အသင်းအတွက် တတ်စွမ်းတဲ့ဘက်က ကူညီပေးနိုင်ဖို့ အမြဲတမ်းအစွမ်းကုန် ကြိုးစားခဲ့ပါတယ်..။ နောက်ပြီးသူတို့ဟာ ပထမပိုင်းတုန်းက ကစားရှိန်အမြန်နှုန်းအတိုင်း တစ်ပွဲလုံး မကစားနိုင်မှာ မဟုတ်ဘူးဆိုတာ သိထားခဲ့ပါတယ်..။ ဒုတိယပိုင်းမှာ ကျွန်တော်တို့ဟာ ပွဲကိုပိုပြီး ထိန်းချုပ်နိုင်ခဲ့ပါတယ်..။ အဲဒါကြောင့်လည်း ကျွန်တော်ဟာ အခုလိုမျိုး ထိရောက်တဲ့ပံ့ပိုးမှုတွေ ပြုလုပ်နိုင်ခဲ့တာပါ..။

လင်းဆေး ဟစ်ပ်ဂရေ့စ် - ရှင်တို့အနေနဲ့ International break မတိုင်ခင် လီဗာပူးလ်အသင်းကို အနိုင်ရရှိခဲ့ပြီးတဲ့နောက် အခုလက်ရှိ ရရှိထားတဲ့ နိုင်ပွဲအရှိန်အဟုန်နဲ့ ယုံကြည်မှုကောင်းတွေကို ဆက်လက်ထိန်းသိမ်းထားနိုင်ဖို့ ဘယ်လောက်အထိ အရေးပါလဲရှင့်..? 

ပီဒရို နက်တို - အရင်လက International break အပြီး ပြန်ကန်ရတဲ့ပွဲတွေမှာ ကျွန်တော်တို့ရဲ့ ကစားပုံ မကောင်းခဲ့ပဲ ရှုံးပွဲသုံးပွဲတောင် ရှိခဲ့ပါတယ်..။ ဒါ့ကြောင့်အခုတစ်ခေါက် နိုင်ငံတကာပွဲတွေအပြီး ရလဒ်ကောင်းတွေ ပြန်လည်ရရှိအောင် စွမ်းဆောင်နိုင်ဖို့ အထူးအရေးကြီးခဲ့ပါတယ်..။ နောက်ပြီးဖောရက်စ်အသင်းရဲ့ City Ground ဟာ အိမ်ရှင်ပရိသတ်တွေရဲ့ တခဲနက် အားပေးမှုတွေကြောင့် ကစားရခက်ခဲတဲ့ အဝေးကွင်းတစ်ကွင်း ဖြစ်ပါတယ်..။ ဒါ့ကြောင့်အခုလိုခက်ခဲတဲ့ အနေအထားတွေ၊ ခက်ခဲတဲ့ ပတ်ဝန်းကျင်အောက်မှာ အနိုင်ရရှိအောင် စွမ်းဆောင်နိုင်ခဲ့တဲ့အပေါ် အထူးကျေနပ်မိပါတယ်..။

ပီတာ ခရောက်ချ် - ပထမပိုင်းအပြီးမှာ မန်နေဂျာ အင်ဇို မာရက်စ်ကာ က ဘယ်လိုညွှန်ကြားမှုတွေ ပြုလုပ်ခဲ့လဲ..? အထူးသဖြင့် သူဟာဒီနေ့ပွဲကို ကြီးကြပ်ခွင့်မရတာကြောင့် ပွဲကြည့်စင်ကပဲ ကြည့်နေခဲ့ရပါတယ်..။ ဒါပေမယ့် ဒုတိယပိုင်းအစမှာ ပြုလုပ်ခဲ့တဲ့ လူစားလဲမှုသုံးယောက်ဟာ ပွဲအဖြေကို ပြောင်းလဲစေခဲ့တဲ့ အဆုံးအဖြတ် ဖြစ်ခဲ့ပါတယ်..။

ပီဒရို နက်တို - မှန်ပါတယ်..။ ခင်ဗျားပြောခဲ့သလို ကျွန်တော်တို့ဟာ အပြောင်းအလဲတခုခု ပြုလုပ်ဖို့ လိုအပ်လာတဲ့ အနေအထား ဖြစ်လာခဲ့ပါတယ်..။ မန်နေဂျာကတော့ ကျွန်တော်တို့တွေကို တိုက်စစ်ပိုင်းမှာ အာရုံစိုက်ပြီး ကစားဖို့၊ ခံစစ်ပိုင်းမှာ ပိုပြီးလုံခြုံအောင် နေရာယူဖို့၊ ဘောလုံးကိုပိုပြီး ကိုင်ထားနိုင်အောင် ကြိုးစားဖို့ မှာကြားခဲ့ပါတယ်..။ ပထမပိုင်းမှာ ကျွန်တော်တို့ဟာ ဘောလုံးကိုကိုယ့်ရဲ့ခြေထဲမှာ ကောင်းကောင်းမထိန်းထားနိုင်ခဲ့ပါဘူး..။ ဒုတိယပိုင်းမှာ ဘောလုံးကိုပိုပြီး အရယူနိုင်ခဲ့သလို သုံးဂိုးသွင်းနိုင်ခဲ့တာကြောင့် အခုလိုအနိုင်ရလဒ် ရရှိအောင် စွမ်းဆောင်နိုင်ခဲ့တာပါ..။

ဂလင်း ဟော်ဒယ်လ် - ပီဒရို - မင်းဟာညာတောင်ပံမှာ ကစားတဲ့အခါ ဘယ်ခြေနဲ့အတွင်းဘက်ကို (inside) ချိုးဝင်တဲ့ပုံစံနဲ့ ကစားလေ့ရှိပါတယ်..။ ဒါပေမယ့် ဘယ်တောင်ပံမှာကျတော့ ဘယ်ခြေနဲ့တောင်ပံတစ်လျှောက် အပြင်ဘက်ကို (outside) ဆွဲပြေးပြီး မင်းရဲ့အားသန်တဲ့ဘယ်ခြေနဲ့ ဖြတ်တင်ဘောတွေ ပေးပို့ရတာပေါ့..။ အခုလိုဘယ်တောင်ပံမှာ ကစားရတာကိုရော သဘောကျလား..?

ပီဒရို နက်တို - ဘယ်တောင်ပံရော၊ ညာတောင်ပံမှာပါ အဆင်ပြေပြေ ကစားပေးနိုင်ပါတယ်..။ ဘယ်နေရာမှာ ကစားရတာကို ပိုပြီးသဘောကျလဲ..? လို့ မေးလာခဲ့ရင် ညာတောင်ပံ မှာ ကစားရတာ ပိုပြီးနှစ်ခြိုက်ပါတယ်..။ ဒါပေမယ့် အသင်းကိုကူညီပေးနိုင်မယ်ဆိုရင် ဘယ်နေရာမှာဖြစ်ဖြစ် ကစားပေးဖို့ အသင့်ပါပဲ..။ တခါတရံမှာ တိုက်စစ်မှူးအဖြစ်နဲ့ပါ ကစားပေးခဲ့ပါတယ်..။ ဘယ်နောက်ခံလူ၊ ညာနောက်ခံလူ နေရာတွေမှာလည်း ကစားပေးခဲ့တာ ရှိပါတယ်..။ 

ပီတာ ခရောက်ချ် - ဘယ်တောင်ပံမှာ ကစားတာ ပိုပြီးသဘောကျပါတယ်..။ ဘာဖြစ်လို့လည်းဆိုတော့ ပွဲချိန် (၄၉) မိနစ်မှာ ဂျော့ရှ် အာချီယမ်ပေါင်း အတွက် မင်းရဲ့ဖြတ်တင်ဘော ပေးပို့မှုဟာ အရမ်းကိုတိကျ၊ ကောင်းမွန်ခဲ့တာကြောင့်ပါ..။ သူ့ရဲ့သွင်းဂိုးအတွက်လည်း ကျေနပ်မိတယ်မလား..? 

ပီဒရို နက်တို - ဒါပေါ့..။ သိပ်ကိုကျေနပ်မိတာပေါ့..။ သူဟာသိပ်ကို ကြိုးစား၊ အားထုတ်မှု ကောင်းမွန်လှတဲ့ လူငယ်လေးတစ်ယောက် ဖြစ်သလို လီဗာပူးလ်နဲ့ပွဲမှာလည်း ဒီနေ့ပွဲကအတိုင်း ခြေစွမ်းပြနိုင်ခဲ့ပါတယ်..။ အခုလက်ရှိပုံစံအတိုင်း ကြိုးစားအားထုတ်မှု မလျော့ခဲ့ဘူးဆိုရင် တကယ့်ထိပ်တန်း နောက်ခံလူ တစ်ယောက်အဖြစ် တိုးတက်လာမှာပါ..။ သူ့ကိုအခုထက်ပိုပြီး တွန်းတွန်းတိုက်တိုက်၊ မာမာထန်ထန် (more aggressive) ဖျက်ထုတ်ဖို့ ကျွန်တော်တို့အမြဲတမ်း တိုက်တွန်းလေ့ရှိပါတယ်..။ ဒီနေ့မှာဆိုရင် အသင်းရဲ့အဖွင့်ဂိုကိုပါ သွင်းယူပေးနိုင်ခဲ့တာကြောင့် သူ့ရဲ့ခြေစွမ်းအတွက် သိပ်ကိုကျေနပ်မိတာပေါ့ဗျာ..။

ပီတာ ခရောက်ချ် - ခင်ဗျားတို့ချယ်လ်ဆီးအသင်းဟာ ပရီးမီးယားလိဂ်မှာ ပျမ်းမျှအသက်အငယ်ဆုံးအသင်း ဖြစ်ပါတယ်..။ ဒီအသင်းဟာ ဘယ်လိုအောင်မြင်မှုတွေ ရရှိနိုင်ဖို့ ရှည်မှန်းထားပါလဲ..? ဘာဖြစ်လို့လည်းဆိုတော့ အခုဘောလုံးရာသီမှာ ခင်ဗျားတို့အသင်းဟာ ပရီးမီးယားလိဂ် ချန်ပီယံဆုကို စိန်ခေါ်နိုင်ဖို့ စောလွန်းနေသေးတယ်.. လို့ရော မထင်မိဘူးလား..?

ပီဒရို နက်တို - ရိုးရိုးသားသား ဝန်ခံရမယ်ဆိုရင် ပြီးခဲ့တဲ့ဘောလုံးရာသီက ခြေစွမ်းနဲ့ ရရှိခဲ့တဲ့ အောင်မြင်မှုတွေအပေါ် ကျေနပ်မိပါတယ်…။ အဲဒီဘောလုံးရာသီမှာလည်း တစ်ပွဲချင်း၊ တစ်ရက်ပြီးတစ်ရက် အာရုံစိုက်၊ ပြင်ဆင်ရင်း ကျော်ဖြတ်လာခဲ့တာပါ…။ ဒါ့ကြောင့်အခုအချိန်မှာလည်း ကျွန်တော်တို့ဟာ အဝေးကြီးကို မျှော်မှန်း၊ ကြည့်မနေပဲ မျက်မှောက်၊ ပစ္စုပ္ပန်ကာလကိုပဲ အကောင်းဆုံး ဖြတ်သန်းနိုင်ဖို့ အာရုံစိုက်တာ အသင့်တော်ဆုံး ဖြစ်ပါမယ်..။ အထူးသဖြင့် ကျွန်တော်တို့ဟာ တခြားလူတွေကို သက်သေပြနိုင်ဖို့ မလိုပါဘူး..။ ကိုယ့်ရဲ့ခြေစွမ်းဟာ တစ်ရက်ထက်တစ်ရက် ပိုပြီးတိုးတက်လာတယ်.. ဆိုတာကို ကိုယ်တိုင်သိနေဖို့တော့ လိုအပ်ပါလိမ့်မယ်..။

လင်းဆေး ဟစ်ပ်ဂရေ့စ် - ပထမဂိုးရပြီး သိပ်မကြာခင်မှာပဲ ပြစ်ဒဏ်ဘော ကန်ချက်ကနေတဆင့် ဒုတိယဂိုးကို သွင်းယူပေးနိုင်ခဲ့ပါတယ်..။ အဲဒီနေရာလွတ်ကို ကြိုတင်ပြီး မြင်ထားခဲ့တာလား..?

ပီဒရို နက်တို - လီဗာပူးလ်နဲ့ပွဲမတိုင်ခင် ပြစ်ဒဏ်ဘောကန်သွင်းတဲ့ လေ့ကျင့်ခန်း အစီအစဉ်တစ်ခုမှာ ရိစ် ဂျိမ်းစ် နဲ့ ကျွန်တော်ဟာ အခုလိုကန်သွင်းပုံမျိုးကို ဇာတ်တိုက်၊ လေ့ကျင့်ခဲ့ဖူးပါတယ်..။ အခုပွဲမှာ ပြစ်ဒဏ်ဘောကန်ဖို့ ဘောလုံးတည်ထားတဲ့အချိန် ရိစ် ဂျိမ်းစ် ကို ဂိုးသမားရဲ့ဘယ်ဘက်ဘေးကို ကန်သွင်းရမလား..? လို့ မေးလိုက်ပါတယ်..။ သူက ‘No.. မင်းအရင်ကန်သွင်းနေကျအတိုင်း ညာဘက်ကိုပဲ ထပ်ပြီးကန်သွင်း..’ လို့ အကြံပေးပြီး ဘောလုံးကို အသာလေး 'တို့' ပေးလိုက်တာဗျ..။

ဂလင်း ဟော်ဒယ်လ် - ရိစ် ဂျိမ်းစ် က ဘောလုံးကို 'တို့' ပေးလိုက်တာနဲ့ အီဂေါ် ဂျေဇူး က လူတံတိုင်းကနေ အပြင်ထွက်လာခဲ့ပါတယ်..။ အဲဒီမှာ နေရာလွတ်ပေါ်လာတာပဲ..။ ခင်ဗျားဟာ အဲဒီနေရာလွတ်ထဲကို အတိအကျ ကန်သွင်းနိုင်ခဲ့တာ..

ပီဒရို နက်တို - Yeah…! ကျွန်တော်တို့ဟာ သူတို့အသင်းရဲ့ လူတံတိုင်းကာပုံ၊ နေရာယူပုံ video clips တွေကို ကြည့်ထားပြီးသားပါ..။ ဖောရက်စ်ဂိုးသမား မက်ဇ် ဆဲလ် ဟာ ညာဘက်ကိုခြေတစ်လှမ်းလှမ်းပြီး လူတံတိုင်းဘေးကနေ ဘောလုံးလမ်းကြောင်းကို ကြည့်လေ့ရှိတဲ့ အကျင့်ရှိတယ်ဆိုတာ သိထားပါတယ်…။ နောက်ပြီးသူ့ရဲ့ညာဘက်ကို ကန်သွင်းမယ်ဆိုရင် လွယ်လွယ်ကူကူ ကာကွယ်နိုင်ဖို့ ခြေတစ်လှမ်းကြိုပြီး ယူထားတာလည်း ဖြစ်နိုင်ပါတယ်..။ အဲဒါနဲ့ ရိစ် ဂျိမ်းစ် က ‘No.. no.. သူ့ရဲ့ဘယ်ဘက်ကိုသာ ကန်သွင်းလိုက်၊ ဂိုးပေါက်တည့်ရင် ဂိုးရမှာပဲ..’ လို့ ပြောပါတယ်..။ သူ့ရဲ့အကြံပေးချက်အတိုင်း ဂိုးရသွားတာတော့ အရမ်းကိုပျော်ရွှင်မိတာပေါ့ဗျာ..။

လင်းဆေး ဟစ်ပ်ဂရေ့စ် - ပီဒရို ရေ.. ရှင်ဟာ အခုဘောလုံးရာသီမှာ ပရီးမီးယားလိဂ် ပွဲစဉ်တိုင်း၊ ချန်ပီယံလိဂ် ပွဲစဉ်တိုင်းမှာ ပွဲထွက်ခွင့်ရထားပါတယ်..။ ဒါ့ကြောင့်အခုဆိုရင် ပုံမှန်ပွဲထွက်ခွင့်တစ်နေရာကို အာမခံချက်ရထားတယ်လို့ ပြောနိုင်တာပေါ့..။ အခုလိုတည်ငြိမ်တဲ့ ခြေစွမ်းရရှိနိုင်ဖို့ အရေးအကြီးဆုံးအချက်က ဘာအရာဖြစ်နိုင်မလဲရှင့်..?

ပီဒရို နက်တို - နေ့စဉ်နေ့တိုင်း အစွမ်းကုန် ကြိုးစား၊ လေ့ကျင့်နေဖို့ ဖြစ်ပါလိမ့်မယ်..။ ကျွန်တော်ဟာ နေ့စဉ်နေ့တိုင်းမှာ အကောင်းဆုံးခြေစွမ်း ရရှိနိုင်ဖို့ အမြဲတမ်းအစွမ်းကုန် လေ့ကျင့်နေပါတယ်.. လို့ ပြောလေ့ရှိပါတယ်..။ အဲဒီအတိုင်းပဲ ဆက်လက်ကြိုးစားသွားပါမယ်..။

လင်းဆေး ဟစ်ပ်ဂရေ့စ် - ရှင့်ရဲ့နေရာကို လူစားဝင်လာတဲ့ လူငယ်တောင်ပံ ကစားသမား အက်စ်တီဗာအို နဲ့ ပတ်သက်ပြီး နည်းနည်းမေးကြည့်ချင်ပါတယ်..။ သူဟာအသက်ငယ်ငယ်လေး ရှိသေးပေမယ့် အသင်းမှာ ထိရောက်တဲ့ ပံ့ပိုးမှုတွေ ပြုလုပ်နိုင်ခဲ့ပြီး ဖြစ်နေတာ တွေ့ခဲ့ရပါတယ်..။ သူ့ရဲ့ခြေစွမ်းအပေါ် ရှင့်ရဲ့အမြင်ကို ပြောပြပေးပါဦးလား..?

ပီဒရို နက်တို - တကယ့်ကို ခြေစွမ်းထက်မြက်တဲ့ လူငယ်ကစားသမားလေး တစ်ယောက်ဖြစ်ပါတယ်..။ နောက်ပြီးသူ့ဆီမှာ သင်ယူချင်စိတ်အပြည့်ရှိနေပါတယ်..။ အသင်းဖော်တွေဆီကနေ အမြဲတမ်းပဲ လေ့လာ၊ သင်ယူနေလေ့ရှိပြီး ဖျော်ဖြေမှုအပြည့်နဲ့ ပျော်ပျော်ရွှင်ရွှင် ကစားတတ်တဲ့သူတစ်ယောက် ဖြစ်ပါတယ်..။ သူဟာကျွန်တော်တို့အသင်းရဲ့ အရေးပါတဲ့ ကစားသမားတစ်ယောက် ဖြစ်ပါတယ်..။ အက်စ်တီဗာအို၊ ဂျာအို ပီဒရို တို့လို ထိပ်တန်းအဆင့် လူငယ်ကစားသမားလေးတွေ ကျွန်တော်တို့အသင်းမှာရှိနေတာ အထူးကျေနပ်ဖို့ ကောင်းပါတယ်..။

လင်းဆေး ဟစ်ပ်ဂရေ့စ် - ပီဒရို ရေ.. ကျွန်မတို့ရဲ့ မေးမြန်းမှုတွေကို အခုလိုဖြေကြားပေးတာ အထူးကျေးဇူးပါပဲရှင့်…။ ကဲ.. ဂလင်း ရေ.. ချယ်လ်ဆီးအသင်းဟာ ဒီနေ့ပွဲမှာ အနိုင်ရလဒ်ကို ထိုက်ထိုက်တန်တန်နဲ့ ရရှိသွားခဲ့ပါတယ်..။ အခုလက်ရှိ ရရှိထားတဲ့ နိုင်ပွဲအရှိန်အဟုန်တွေကို လာမယ့်ဗုဒ္ဓဟူးနေ့ အိုင်းယက်စ်အသင်းနဲ့ ချန်ပီယံလိဂ်ပွဲစဉ်ဆီကို ဆက်လက်သယ်ဆောင်သွားနိုင်မယ်လို့ ယူဆနိုင်ပြီလား..? 

ဂလင်း ဟော်ဒယ်လ် - Yes.. သေချာတာပေါ့…။ လက်ရှိအချိန်မှာ အဓိကကစားသမားတစ်ချို့ ဒဏ်ရာကြောင့် မပါဝင်နိုင်ပေမယ့် နည်းပြအင်ဇို မာရက်စ်ကာ ဟာ အဲဒီပြဿနာကို အကောင်းဆုံးဖြေရှင်း၊ ကျော်လွှားနိုင်တဲ့ပုံ မြင်တွေ့နေရပါတယ်..။ အထူးသဖြင့် အခုဘောလုံးရာသီမှာ အဝေးကွင်းရလဒ်တွေ သိပ်မကောင်းပေမယ့် ဒီနေ့ဆိုရင် ဖောရက်စ်လို ခက်ခဲတဲ့အဝေးကွင်းမှာ ရလဒ်ကောင်းရရှိနိုင်အောင် စွမ်းဆောင်နိုင်ခဲ့ပါတယ်..။ ပွဲအစပိုင်းမှာ ကစားပုံ မကောင်းခဲ့ပေမယ့် ဒုတိယပိုင်းမှာ သိသိသာသာ ပြောင်းလဲသွားခဲ့သလို ပွဲချိန်ကြာလာတာနဲ့အမျှ ကစားပုံ ပိုပြီးကောင်းမွန်လာခဲ့ပါတယ်..။ 

ဒါ့အပြင် အဖွင့်ဂိုးရလိုက်တဲ့အချိန်မှာ ယုံကြည်မှုပိုပြီး ရရှိလာခဲ့တာ သတိပြုမိပါတယ်..။ ဂိုးရရှိပြီးတဲ့နောက်ပိုင်း သူတို့ရဲ့ကစားပုံဟာ လုံးဝကိုပြောင်းလဲသွားခဲ့တယ်ဗျ..။ လူငယ်လေးတွေနဲ့ ဖွဲ့စည်းထားတဲ့ လက်ရှိချယ်လ်ဆီးအသင်းကို ကျွန်တော်ကြည့်လိုက်တဲ့အခါ သူတို့ဟာ ကိုယ့်ဘက်က အသာစီး ရနေတဲ့အခါမျိုးတွေမှာ ကစားပုံ ပိုကောင်းလေ့ရှိပါတယ်..။ ပထမပိုင်းမှာဆိုရင် သူတို့ရဲ့ကစားပုံဟာ သက်တောင့်သက်သာ ရှိမနေခဲ့ပါဘူး..။ ဒုတိယပိုင်းမှာ လူစားလဲတွေ ထိရောက်ခဲ့တာလည်း ပါဝင်တာပေါ့ဗျာ..။

 
အဓိက ကစားသမားတွေ ပြန်ပါလာတဲ့အခါ ယုံကြည်မှုပိုပြီး ရလာတဲ့သဘောလည်း ဖြစ်ပါမယ်..။ အဖွင့်ဂိုးစပြီး ရလိုက်တဲ့အခါ အိမ်ရှင်အသင်းဘက်က ဖိအားပိုများသွားတဲ့သဘော ရှိပါတယ်..။ အဲဒီနောက်ပိုင်းမှာ ချယ်လ်ဆီးအသင်းရဲ့ ကစားပုံဟာ တဖြည်းဖြည်းနဲ့ ပိုပြီးကောင်းမွန်လာပါတယ်..။

လင်းဆေး ဟစ်ပ်ဂရေ့စ် - သူတို့အသင်းဟာ လုပ်စရာရှိတဲ့အရာတွေကို သူတို့ရည်မှန်းထားတဲ့ လမ်းကြောင်းအတိုင်း တိတ်တိတ်ဆိတ်ဆိတ်နဲ့ လုပ်ဆောင်နေတယ်လို့ ပြောရမှာပါ..။ သူတို့ကိုလီဗာပူးလ်၊ အာဆင်နယ်အသင်းတွေနဲ့ တန်းတူထည့်သွင်း ဆွေးနွေးမှုမရှိတာကလည်း သူတို့အသင်းရဲ့ အားသာချက်တစ်ခုများ ဖြစ်နေမလားပဲ..။ လက်ရှိချယ်လ်ဆီးအသင်းဟာ ငယ်ရွယ်လွန်းနေပေမယ့် ဆုဖလားတွေကို ဆွတ်ခူးနိုင်စွမ်း ရှိတယ်ဆိုတာ သက်သေပြနိုင်ခဲ့ပြီး မဟုတ်လားရှင့်..?
  
ပီတာ ခရောက်ချ် - မှန်ပါတယ်..။ သူတို့တွေရဲ့ အရည်အသွေးအပေါ် သံသယရှိစရာ မလိုပါဘူး..။ ချယ်လ်ဆီးအသင်းဟာ အနာဂတ်အတွက် ရည်ရွယ်ပြီး တည်ဆောက်နေတဲ့ အသင်းတစ်သင်း ဖြစ်ပါတယ်..။ သူတို့အသင်းမှာ တကယ့်ကိုပင်ကိုယ်ပါရမီ အရည်အသွေးကောင်းမွန်တဲ့ လူငယ်ကစားသမားတွေ ရှိနေပါတယ်..။ နောက်ပြီးဒီနေ့ပွဲမှာဆိုရင် ပွဲထွက်လူစားရင်းရဲ့ ကွင်းလယ်မှာ အဓိကကစားသမားတွေ တစ်ယောက်မှ မပါဝင်ခဲ့ပါဘူး..။ ခံစစ်ပိုင်းမှာလည်း ဒဏ်ရာပြဿနာ ရှိနေခဲ့ပါတယ်..။ အသင်းရဲ့အဓိက ကစားကွက် ဖန်တီးရှင်ဖြစ်တဲ့ ကိုးလ် ပါးမား လည်း မပါဝင်နိုင်ပါဘူး..။ အဲဒီလိုမပြည့်စုံနေတဲ့ အနေအထားမှာတောင် နိုင်ပွဲတွေရအောင် စွမ်းဆောင်နိုင်တာကို ကြည့်မယ်ဆိုရင် သူတို့အသင်းဟာ သတိထား စဉ်းစားရမယ့် အသင်းတစ်သင်း ဖြစ်တယ်ဆိုတာ ပြသနေတာပါ..။