ချန်ပီယံလိဂ်ပြိုင်ပွဲ၊ League Phase အဆင့်၊ ပွဲစဉ် (၃) အဖြစ် ချယ်လ်ဆီးအသင်းက အိုင်းယက်စ် အမ်စတာဒမ် အသင်းအား စတန်းဖို့ဒ် ဘရစ်ချ်ကွင်းတွင် ၅ဂိုး- ၁ဂိုးဖြင့် အနိုင်ရရှိခဲ့သည့်ပွဲစဉ်မှ ချယ်လ်ဆီးအသင်းနှင့် ပွဲထွက်လာခဲ့သည့် လူငယ်ကစားသမားများ၏ခြေစွမ်း၊ ပွဲစဉ်မှသွင်းဂိုးများနှင့် လူငယ် ကစားသမားများ၏ တောက်ပနေသည့် အနာဂတ်အပေါ် ချယ်လ်ဆီးအသင်း ကစားသမားဟောင်းများဖြစ်ကြသည့် တောင်ပံ ကစားသမား ဂျိုး ကိုးလ် နှင့် တိုက်စစ်မှူး အိုင်ဒါ ဂူဂျွန်ဆင် တို့က TNT Sports သတင်းဌာန၏ ပွဲပြီးစကားဝိုင်း အစီအစဉ်တွင် အောက်ပါအတိုင်း သုံးသပ်၊ ပြောကြားခဲ့ပါသည်..။

လင်းဆေး ဟစ်ပ်ဂရေ့စ် - ချယ်လ်ဆီးအသင်းနည်းပြ အင်ဇို မာရက်စ်ကာ ဟာ ဒီနေ့ပွဲမှာ လူအပြောင်းအလဲတွေ အများကြီးပြုလုပ်ပြီး လူငယ်ကစားသမားတွေနဲ့ ပွဲထုတ်ခဲ့ပါတယ်..။ ဒါပေမယ့် ပွဲရလဒ်နဲ့ ကစားသမားလေးတွေရဲ့  ခြေစွမ်းကြောင့် ဒီနေ့စတန်းဖို့ဒ် ဘရစ်ချ်ကွင်းကြီးရဲ့ ချန်ပီယံလိဂ်ညချမ်းမှာ သူအနေနဲ့ ကျေနပ်စရာတွေ အများကြီးပါ.။ အိုင်ဒါ ရေ.. အသင်းမှာ မြင်ခဲ့ရတဲ့ ဘယ်လိုအရာတွေဟာ နည်းပြအင်ဇို မာရက်စ်ကာ အတွက် အားရဖို့ကောင်းလိမ့်မယ်လို့ ယူဆမိပါလဲ..?  

အိုင်ဒါ ဂူဂျွန်ဆင် - ချန်ပီယံလိဂ်ပြိုင်ပွဲရဲ့ ပွဲစဉ်တိုင်းဟာ ကြီးကျယ်ခမ်းနားတဲ့ အနိုင်ပွဲရလဒ်တွေပါပဲ..။ သွင်းဂိုးတွေ အများကြီးရရှိခဲ့တဲ့အပြင် လူငယ်ကစားသမား အများအပြားကို ချန်ပီယံလိဂ်ပြိုင်ပွဲ၊ ပွဲထွက်ခွင့် ပေးနိုင်ခဲ့တဲ့ အချက်တွေဟာ ကျေနပ်စရာပေါ့ဗျာ..။ အသင်းမှာရှိနေတဲ့ အဓိက ကစားသမားတွေကိုလည်း အလှည့်ကျပွဲထုတ်ပြီး အင်အားတွေ ချွေတာနိုင်ခဲ့ပါတယ်..။ အခုဆိုရင် သူတို့ဟာ ဒဏ်ရာပြဿနာကင်းကင်းနဲ့ လာမယ့်စနေနေ့ ပရီးမီးယားလိဂ်ပွဲစဉ်ကို အာရုံစိုက်နိုင်ခဲ့ပြီပေါ့ဗျာ..။ ဒါ့ကြောင့်ဒီနေ့ညချမ်းပွဲရလဒ်နဲ့ ခြေစွမ်းဟာ နည်းပြအင်ဇို မာရက်စ်ကာ သာမက ချယ်လ်ဆီးပရိသတ်တိုင်းအတွက်ပါ ကျေနပ်စရာတွေပဲလို့ ပြောရမှာပဲ..။

လင်းဆေး ဟစ်ပ်ဂရေ့စ် - အဲဒီအထဲမှာ ရှင်တို့နှစ်ယောက်စလုံး ပါဝင်လိမ့်မယ်ဆိုတာ ကျွန်မသေချာပေါက် ပြောရဲပါတယ်ရှင့်.. ဟားဟား..။ ပွဲထွက်လူစာရင်းကို မြင်လိုက်ရတဲ့အချိန်တုန်းက ကစားသမား (၁၀) ယောက်အထိ အပြောင်းအလဲ ပြုလုပ်ခဲ့တာဆိုတော့ ချန်ပီယံလိဂ်လို ပြိုင်ပွဲမှာ ကိုယ့်ရဲ့ပြိုင်ဘက်အသင်းကို အထင်သေးသလို ဖြစ်သွားနိုင်တယ်.. လို့များ မထင်မိခဲ့ဘူးလား..? ဂျိုး ရေ..

ဂျိုး ကိုးလ် - မဟုတ်ပါဘူး..။ အပြောင်းအလဲအများကြီး ရဲရဲဝံ့ဝံ့ ပြုလုပ်ရဲတာကို ကြည့်ခြင်းအားဖြင့် နည်းပြအင်ဇို မာရက်စ်ကာ ဟာ ကစားသမားတွေရဲ့ စွမ်းရည်ကို ကောင်းကောင်းသိထားတယ်လို့ ပြောနိုင်ပါတယ်..။ လူငယ် ကစားသမားလေးတွေဟာ ဒီလိုအဆင့်ပွဲကြီးတွေအတွက် အသင့်ဖြစ်နေပြီ.. ဆိုတာ သိထားလို့လည်း အခုလိုအခွင့်အရေးတွေ ပေးရဲတာပါ..။ ဒါပေမယ့် အဲဒီလိုပွဲထွက်လူစာရင်းမှာ အပြောင်းအလဲတွေ အများကြီးပြုလုပ်ပြီဆိုရင် အချင်းချင်း နားလည်မှုတွေ ကောင်းမှကောင်းပါ့မလား..? နည်းပြလိုချင်တဲ့ ကစားပုံနဲ့ရော အံဝင်ပါ့မလား..? စသဖြင့် စိုးရိမ်ရမယ့်အချက်တွေ အများကြီးရှိပါတယ်..။ 

လူတိုင်းကတော့ တည်ငြိမ်တဲ့ပွဲထွက်လူစာရင်းနဲ့ ကစားပုံကို နှစ်ခြိုက်ကြပါတယ်..။ ဒါပေမယ့် အခုခေတ်မှာ ကစားသမား (၁၃) ယောက်၊ (၁၄) ယောက်လောက်နဲ့ ပြိုင်ပွဲတွေကို အနိုင်ရ၊ ဗိုလ်စွဲနိုင်ဖို့ မဖြစ်နိုင်တော့ပါဘူး..။ ဘာဖြစ်လို့လည်းဆိုတော့ အသင်းတစ်သင်းဟာ ဘောလုံးရာသီအတွင်း ပြိုင်ပွဲတွေမှာ အခြေအနေကောင်းခဲ့ရင် ပွဲပေါင်း (၆၀)၊ (၆၅) ပွဲလောက် ကစားရမှာဆိုတော့ ပွဲထွက်ကစားသမား အနည်းဆုံး (၁၈) ယောက်၊ (၁၉) ယောက်လောက် ရှိနေဖို့ လိုအပ်နေတဲ့သဘော ဖြစ်နေပါတယ်..။ ဒီနေ့မှာတော့ ကစားသမားတွေကို အလှည့်ကျသုံးသွားနိုင်ခဲ့တဲ့အပြင် ခြေစွမ်းကလည်း ကျေနပ်ဖို့ကောင်းခဲ့တယ်..၊ (၅) ဂိုးကို ကစားသမား (၅) ယောက်က သွင်းယူပေးနိုင်ခဲ့တာတွေဟာ တကယ့်ကို ပီတိဖြစ်၊ အားရစရာပါပဲ.။

နောက်ပြီး အက်စ်တီဗာအို ဟာ အပြာရောင်အင်္ကျီကို ဝတ်ဆင်ခဲ့တဲ့အချိန်ကစပြီး တစ်ပွဲထက်တစ်ပွဲ ပိုပြီးကောင်းမွန်လာတဲ့ ခြေစွမ်းကို မြင်တွေ့နေရတာလည်း နောက်ထပ်ကြည်နူးစရာပေါ့ဗျာ..။ အက်စ်တီဗာအို ကို မြင်လိုက်ရတိုင်း ‘နေမာ’ ကို ပြန်ပြီးတွေ့နေရသလို ခံစားခဲ့ရပါတယ်..။ သူဟာဟန်ချက် (balance) ထိန်းညှိတာ အရမ်းကောင်းပြီး အတွင်းဘက်ကို ချိုးဝင်တာရော၊ တောင်ပံအတိုင်း ဆွဲပြေးတာရော.. နှစ်မျိုးစလုံး ကစားပေးနိုင်တဲ့ တောင်ပံကစားသမား ဖြစ်ပါတယ်..။ စတန်းဖို့ဒ် ဘရစ်ချ်ကွင်းမှာ သူ့ရဲ့ပထမဆုံး စတင်ကစားခဲ့တဲ့ ခြေစမ်းပွဲစဉ်မှာကတည်းက တစ်ကွင်းလုံးမှာရှိတဲ့ ပရိသတ်တွေ ထိုင်ခုံတွေပေါ်ကထပြီး မတ်တတ်ရပ် အားပေးဖြစ်အောင် နှစ်ကြိမ်၊ သုံးကြိမ်လောက် စွမ်းဆောင်ပြနိုင်ခဲ့တဲ့ ကစားသမား ဖြစ်ခဲ့ပါတယ်..။ သူတို့လို ကစားသမားလေးတွေရဲ့ ခြေစွမ်း၊ သွင်းဂိုးတွေနဲ့ အနိုင်ပွဲရလဒ်ဟာ ကျွန်တော်တို့အတွက် တကယ့်ကိုပြီးပြည့်စုံခဲ့တဲ့ အပြာရောင်ညချမ်းလေးတစ်ခု ဖြစ်စေခဲ့ပါတယ်..။

လင်းဆေး ဟစ်ပ်ဂရေ့စ် - အိုင်းယက်စ်အသင်းဟာ စောစောစီးစီးမှာပဲ လူတစ်ယောက် ထုတ်ခံခဲ့ရတာကြောင့် ရှင်တို့ရဲ့အနိုင်ပွဲရလဒ်ဟာ ပွဲပြီးလွယ်ကူသွားခဲ့ပါတယ်..။ ပွဲချိန် (၁၈) မိနစ်မှာပဲ ကွင်းလယ် ကစားသမား ကဲနက် တေလာ ဟာ ဘိုနာနော့တေး ကို ကြမ်းကြမ်းတမ်းတမ်း ဖျက်ထုတ်ခဲ့တာကြောင့် တိုက်ရိုက်အနီကတ်ဒ်ပြခံခဲ့ရပါတယ်..။ ကွင်းလယ်ဒိုင်လူကြီး ဖဲလစ် ဇွာယာ ဟာ သူ့ရဲ့ဆုံးဖြတ်ချက်ကို အတည်ပြုဖို့ ကွင်းဘေးက မော်နီတာရဲ့ အကူအညီ ရယူခဲ့ပေမယ့် အချိန်အကြာကြီး မယူခဲ့ရပါဘူး..

အိုင်ဒါ ဂူဂျွန်ဆင် - မှန်ကန်တဲ့ဆုံးဖြတ်ချက် ဖြစ်ခဲ့လို့ အချိန်အကြာကြီး မယူခဲ့ရတာပါ..။ အိုင်းယက်စ်အသင်းအတွက် ပိုဆိုးသွားခဲ့တာက အနီကတ်ဒ်အပြခံရပြီး သိပ်မကြာခင်မှာပဲ ချယ်လ်ဆီးအသင်းက ဦးဆောင်ဂိုး ရရှိသွားခဲ့ပါတယ်..။ ပိုပြီးခက်ခဲသွားခဲ့တာပေါ့ဗျာ..။

လင်းဆေး ဟစ်ပ်ဂရေ့စ် - မာ့စ် ဂီယူ ဟာ ရရှိလာခဲ့တဲ့ အခွင့်အရေးကို အမိအရ ဖမ်းဆုတ်နိုင်ခဲ့တယ်လို့ ပြောရမှာပဲ… ဂျိုး ရေ..
ဂျိုး ကိုးလ် - လူကျွံဘောမဖြစ်အောင် နေရာယူသွားပုံကို ကြည့်မယ်ဆိုရင် တကယ့်ကိုပါးနပ်တဲ့ တိုက်စစ်မှူးပဲဗျ..။ ဒါ့အပြင်ဖိုဖားနား ပြန်ပြီးခေါင်းတိုက်ချပေးလိုက်တဲ့ ဘောလုံးဟာ ခုန်နေတဲ့အပြင် အရှိန်မပါတဲ့အတွက် အနီးကပ်ပိတ်သွင်းရတာ အရမ်းကြီးလွယ်ကူနေတဲ့ ကန်ချက်မျိုး မဟုတ်ခဲ့ပါဘူး..။ လူတစ်‌ယောက်အသာ ရခဲ့တဲ့အပြင် အဖွင့်ဂိုးကို ချက်ချင်းရခဲ့တာကြောင့် ချယ်လ်ဆီးအသင်းကပဲ ဂိုးပြတ်အနိုင်ရသွားတော့မယ်.. လို့ အဲဒီအချိန်ကတည်းက တွေးမိခဲ့ပါတယ်..။

ပထမဂိုးရပြီး သိပ်မကြာခင်မှာပဲ အခုလက်ရှိ ကျွန်တော်တို့အင်္ဂလန်မြေပေါ်က အကောင်းဆုံး ကွင်းလယ် ကစားသမားဖြစ်တဲ့ မွိုက်စ် ကိုင်ဆီဒို က ဒုတိယဂိုးကို သွင်းယူပေးခဲ့ပါတယ်..။ သူ့ရဲ့ကန်ချက်ဟာ ပြင်းအားနဲ့ တိကျမှု ကောင်းမွန်ခဲ့တာ မှန်ပေမယ့် နောက်ခံလူ ဂျိုဆစ်ပ် ဆူတာနို နဲ့ထိပြီး လမ်းကြောင်းပြောင်း သွားခဲ့တဲ့အတွက် ဂိုးသမား ရမ်မ်ကို ပက်စ်ဗီးယားစ် ဘာမှမတတ်နိုင်ခဲ့ပါဘူး..။ ဒီနေ့ပွဲမှာ မွိုက်စ် ကိုင်ဆီဒို ဟာ ‘No. 2’ နေရာကနေ ကစားသွားခဲ့ပေမယ့် ပုံမှန်ခြေစွမ်းနဲ့ ကွင်းလယ်ကိုပါ အားဖြည့်ကစားသွားခဲ့ပါတယ်..။ သူဟာတစ်ပွဲထက်တစ်ပွဲ ပိုပြီးကောင်းမွန်လာတာကိုပဲ တွေ့မြင်နေရပါတယ်..။

  
  လင်းဆေး ဟစ်ပ်ဂရေ့စ် - ဒါ့အပြင်ပွဲချိန် (၄၉) မိနစ်မှာတင် ရိုမီယို လားဗီးယား နဲ့ လူစားလဲပြီး အနားပေးနိုင်ခဲ့တာကြောင့် နည်းပြအင်ဇို မာရက်စ်ကာ အတွက် ပိုပြီးအကျိုးဖြစ်ထွန်းခဲ့တာပေါ့ရှင့်..
အိုင်ဒါ ဂူဂျွန်ဆင် - မှန်ပါတယ်..။ နည်းပြအင်ဇို မာရက်စ်ကာ ဟာ လာမယ့်စနေနေ့မှာ ဆန်းဒါးလန်းအသင်းနဲ့ ပရီးမီးယားလိဂ်ပွဲစဉ်အတွက် အဓိက ကစားသမားတွေကို စောစောစီးစီး အနားပေးနိုင်ခဲ့ပါတယ်..။ ဒီနေ့ပွဲတစ်ပွဲလုံးမှာ အားမရမိတာဆိုလို့ ဒုတိယဂိုးရပြီး သိပ်မကြာခင်မှာပဲ ပင်နယ်တီပြန်ပေးလိုက်တဲ့ တစ်ချက်ပဲ ရှိပါတယ်..။

လင်းဆေး ဟစ်ပ်ဂရေ့စ် - ဟုတ်ပါတယ်..။ ပွဲချိန် (၃၃) မိနစ်မှာ နောက်ခံလူ တိုစင် အဒါယာဘိုင်ယိုရို ကြောင့် ခွင့်ပြုလိုက်ရတဲ့ ပင်နယ်တီပြစ်ဒဏ်ကနေ တိုက်စစ်မှူး ဝေါက် ဝိုက်ဟော့စ် ရဲ့ ချေပဂိုးအပါအဝင် (၃) ဂိုးစလုံးဟာ ပင်နယ်တီကန်ချက်တွေကနေပဲ ဂိုးတွေရသွားခဲ့တာပါ..။ 

အိုင်ဒါ ဂူဂျွန်ဆင် - တကယ်တော့ လူတစ်ယောက်အသာရနေတဲ့အချိန် ဂိုးမပေးရဖို့ ဂရုစိုက်ရမှာပါ..။ ဂိုးဧရိယာထဲ ချိုးဝင်လာခဲ့တဲ့ တိုက်စစ်မှူး ရာအူးလ် မိုရို ကို တိုစင် ရဲ့ ဖျက်ထုတ်မှုဟာ ပေါ့လျော့လွန်းခဲ့တယ်လို့ ပြောရမှာပဲဗျ..။ သူ့ရဲ့နေရာမှာပဲ ရပ်နေတာနဲ့တင် ရနေပါပြီ..။ ဒါ့ကြောင့်မလိုအပ်ပဲ ခွင့်ပြုလိုက်ရတဲ့ ဂိုးတစ်ဂိုးပါ..။ 

လင်းဆေး ဟစ်ပ်ဂရေ့စ် - ဝိုက်ဟောက်စ် ရဲ့ ပင်နယ်တီကန်ချက်ကို ဂိုးသမား ဂျော်ဂျင်ဆင် ကာကွယ်နိုင်ခဲ့သင့်တယ်လို့ မထင်မိဘူးလား?
ဂျိုး ကိုးလ် - ဂိုးသမားတွေကို ပင်နယ်တီကန်ချက်တွေ ကာကွယ်နိုင်သင့်တယ်.. လို့ မပြောသင့်ပါဘူး..။ အခုထက်ပိုကောင်းမွန်အောင် စွမ်းဆောင်နိုင်ခဲ့သင့်တယ်.. လို့တော့ ပြောရပါမယ်..။ ဝိုက်ဟောက်စ် ကန်သွားတာ အလယ်မကျတကျပါ..။ ဒါပေမယ့် ကာကွယ်နိုင်သင့်တယ်.. လို့တော့ မပြောချင်ဘူး.. ဟားဟား..။

ဝိုက်ဟောက်စ် အတွက် အတော့်ကို ဆိုးရွားတဲ့ညတစ်ညပဲဗျ..။ ပွဲချိန် (၄၄) မိနစ်မှာတင် ခံစစ်ကိုဆင်းကူရင်း အသင်းခေါင်းဆောင် အင်ဇို ဖာနန်ဒက်စ် ကို ဂိုးဧရိယာထဲမှာ လျောထိုး၊ ဖျက်ထုတ်မိတာကြောင့် ပင်နယ်တီပေးလိုက်ရပြန်ပါတယ်..။ ဘာမှအငြင်းပွားစရာမရှိတဲ့ ဖျက်ထုတ်မှုပါ..။ အင်ဇို ရဲ့ကန်ချက် အတော်ကောင်းပါတယ်..။

အဲဒီဂိုးရပြီး သိပ်မကြာခင်မှာပဲ ဂိုးဧရိယာထဲကို ဆွဲဝင်လာခဲ့တဲ့ အက်စ်တီဗာအို ကို အိုင်းယက်စ်အသင်း ဘယ်နောက်ခံလူ ယူရီ ဘက်စ် က နှစ်ကြိမ်ဖျက်ထုတ်ရာမှာ ပင်နယ်တီထပ်ပေးလိုက်ရပြန်ပါတယ်..။  ဘက်စ် ရဲ့ ဖျက်ထုတ်မှုဟာလည်း တိုစင် ရဲ့ ဖျက်ထုတ်မှုနဲ့ ဆင်တူတယ်ဗျ..။ နောက်ခံလူတွေဟာ ပင်နယ်တီဧရိယာထဲ ရောက်ပြီဆိုရင် ခြေထောက်တွေကို စိတ်ထဲရှိတဲ့အတိုင်း လွှဲပြီးကန်လို့ (dangling the legs) မရဘူးလေ…။ အထူးသဖြင့် အက်စ်တီဗာအို တို့လို ခြေနှုတ်ခြေသိမ်း မြန်ဆန်တဲ့သူတွေနဲ့တွေ့ရင် သေချာပေါက် ပင်နယ်တီ ပေးရမှာပဲ..။

အခုခေတ်ဘောလုံးပွဲတွေမှာ ကစားသမားတွေဟာ ကိုယ့်ရဲ့ခြေထောက်ကို တစ်ခုခုထိမိတာနဲ့ အလွယ်တကူ လှဲချလိုက်ကြတာပဲဗျ..။ VAR ရှိနေတယ်လေ..။ ပင်နယ်တီရခဲ့ရင် အမြတ်ပေါ့ဗျာ..။ အဲဒီဖျက်ထုတ်မှုဟာလည်း ပင်နယ်တီပေးရမယ့် ဖျက်ထုတ်မှုပါ..။ အက်စ်တီဗာအို ရဲ့ ကန်ချက်ဟာ ပြင်းအားလည်း ကောင်းမွန်တဲ့အပြင် ဘေးပိုက်ကို ကန်တာဆိုတော့ ဂိုးသမားကာကွယ်ဖို့ ဘယ်လိုမှ မဖြစ်နိုင်ပါဘူး..။

လင်းဆေး ဟစ်ပ်ဂရေ့စ် - အိုင်ဒါ ရေ.. အသင်းခေါင်းဆောင်က အက်စ်တီဗာအို ကို ပင်နယ်တီပေးကန်ခဲ့တဲ့ အပြုအမူကို သဘောကျတဲ့အကြောင်း ပထမပိုင်းအပြီးမှာတုန်းက ရှင်ပြောခဲ့သေးတယ်နော…။ အဲဒီအခိုက်အတန့်ဟာ ဒီနေ့ညချမ်းရဲ့ ကြည်နူးဖို့ကောင်းတဲ့ အချိန်ကာလတစ်ခုလို့ ပြောရမှာပဲရှင့်..

အိုင်ဒါ ဂူဂျွန်ဆင် - တကယ့်ကို ကြည်နူးဖို့ကောင်းတဲ့ အပြုအမူကောင်းတစ်ခုပါ..။ ဒါပေမယ့် အက်စ်တီဗာအို ရဲ့ ခြေစွမ်းဟာ အဲဒီပင်နယ်တီကန်သွင်းခွင့်ရဖို့ ထိုက်တန်ပါတယ်..။ သူ့ရဲ့ထိုးဖောက်မှုကြောင့်ရရှိခဲ့တဲ့ ပင်နယ်တီလည်း ဖြစ်ခဲ့တယ်လေ..။ သူဟာအသက် (၁၈) နှစ်သားလေး ဆိုပေမယ့် တကယ့်ကို ယုံကြည်မှုအပြည့်နဲ့ ကစားနေခဲ့တာပါ..။ ဒါ့ကြောင့်အခုလိုချန်ပီယံလိဂ်ပြိုင်ပွဲမှာ ပထမဆုံးဂိုးနဲ့အတူ ပထမပိုင်းကို အဆုံးသတ်နိုင်ခဲ့တာ သိပ်ကိုကျေနပ်ဖို့ကောင်းခဲ့တာပေါ့..။

လင်းဆေး ဟစ်ပ်ဂရေ့စ် - ဒုတိယပိုင်းမှာ လူစားဝင်လာတဲ့ တိုင်ရစ်ခ် ဂျော့ချ် ကလည်း ရှင်တို့ရဲ့အနိုင်ပွဲရလဒ်နဲ့ ကြည်နူးမှုတွေကို ပိုပြီးပြည့်စုံစေခဲ့တယ်.. မဟုတ်လားရှင့်..?

အိုင်ဒါ ဂူဂျွန်ဆင် - ဒါပေါ့ဗျာ..။ သူတို့ကန်နေတာ ကြည့်နေရင်း ဂျိုး ကိုးလ် ကို ကျွန်တော်ပြောမိပါသေးတယ်..။ ချယ်လ်ဆီးအသင်းနဲ့ ချန်ပီယံလိဂ်ပြိုင်ပွဲမှာ ပထမဆုံးသွင်းဂိုး ရတဲ့အချိန် ကျွန်တော်ဟာ အသက် (၂၅) နှစ်၊ (၂၆) နှစ် ရှိနေပါပြီ..။ အဲဒီတုန်းကလည်း ဂိုးဝင်ပြီးတဲ့အချိန် အိပ်မက်မက်နေသလို လပေါ်မှာ လမ်းလျှောက်နေရသလို မြောက်ကြွ.. မြောက်ကြွနဲ့ အရမ်းကိုပျော်ခဲ့တာပေါ့ဗျာ..။ ဒါ့ကြောင့်သူတို့လေးတွေဟာ အခုလိုအသက်အရွယ်နဲ့ ချန်ပီယံလိဂ်လို ပြိုင်ပွဲကြီးမှာ ဂိုးတွေသွင်းပေးနိုင်ခဲ့တဲ့အပေါ် ဘယ်လောက်တောင် ပျော်ရွှင်နေကြမလဲ.. ။ 

သူတို့လေးတွေဟာ ချာတိတ်လေးတွေပါပဲ..။ ဒါပေမယ့်အခုဆိုရင် ကစားသမားတိုင်း တောင့်တခဲ့ကြတဲ့ အိပ်မက်တွေကို အကောင်အထည်ပေါ်နိုင်ခဲ့တဲ့ အနည်းစုသော ကစားသမားတွေထဲမှာ ပါဝင်သွားကြပါပြီ..။ ‘အိပ်မက်ထဲမှာ နေထိုင်နိုင်သူများ.. (living in the dreams)’ ပေါ့ဗျာ..။ တိုင်ရစ်ခ် ဂျော့ချ် ဟာ ချန်ပီယံလိဂ်ပြိုင်ပွဲကြီးမှာ လူစားဝင်လာပြီး (၂) မိနစ်အတွင်း ဂိုးသွင်းပေးနိုင်ခဲ့ပါတယ်..။

လင်းဆေး ဟစ်ပ်ဂရေ့စ် - သူတို့လို လူငယ်ကစားသမားလေးတွေရဲ့ တိုးတက်မှုဖြစ်စဉ်မှာ အခုလိုညချမ်းတွေဟာ ဘယ်လောက်အထိ အရေးပါနိုင်မလဲ..?

ဂျိုး ကိုးလ် - နောက်ထပ်တစ်ဆင့်မြင့်ကို တက်လှမ်းစေနိုင်တဲ့ ခြေလှမ်း၊ အုတ်မြစ်တွေပေါ့ဗျာ..။ ကစားသမားတွေအတွက် အရေးအကြီးဆုံးဟာ ‘ယုံကြည်မှုအပြည့်အဝ ရှိနေဖို့ (confidence)’ ဖြစ်ပါတယ်..။ ဒီလိုပြိုင်ပွဲကြီးတွေမှာ ကစားခွင့်ရခဲ့တဲ့ အတွေ့အကြုံဟာ ကစားသမားတွေရဲ့ ယုံကြည်မှုတွေကို ပိုမိုမြင့်မားလာစေပါတယ်..။ ဗိုလ်ကြီးတွေ အပွင့်၊ အခက်တင်သလိုပေါ့ဗျာ..။ အခုလက်ရှိအချိန်မှာ ချယ်လ်ဆီးအသင်းမှာသာမက ကမ္ဘာတစ်ဝန်းမှာရှိနေတဲ့ ထိပ်တန်းအသင်းကြီးတွေမှာပါ လူငယ်ကစားသမားလေးတွေ နောက်ထပ်တစ်ခေတ်ဆန်းဖို့ အသင့်.. တာဆူနေကြပါပြီ..။ လာမိုင်း ယာမဲလ်၊ ဒီဇိုင်းရား ဒိုရေး.. တို့လို လူငယ်သွေးသစ်လေးတွေပေါ့ဗျာ..။

အခုလိုလူငယ်လေးတွေ အပြိုင်အဆိုင် ပွင့်လန်းလာကြပြီး ဒီလိုပြိုင်ပွဲကြီးတွေမှာ အကောင်းဆုံး စွမ်းဆောင်နေပြတာ..၊ ဂိုးတွေသွင်းယူပေးနေကြတာဟာ တကယ့်ကို စိတ်လှုပ်ရှားဖို့ကောင်းသလို ကြည်နူးဖို့လည်း ကောင်းလှပါတယ်..။ အခုဆိုရင် ကျွန်တော်တို့ချယ်လ်ဆီးအသင်းက လူငယ်လေးတွေရဲ့ စွမ်းဆောင်ရည်တွေကိုကြည့်ပြီး တခြားနေရာအနှံ့အပြားက လူငယ်လေးတွေဟာ အဲဒီလိုအခွင့်အရေးတွေ ရချင်ကြမယ်..၊ အခုလိုစွမ်းဆောင်မှုတွေ ပြုလုပ်ပြချင်တဲ့ဆန္ဒတွေ တဖွားဖွားပေါ်ထွက်နေပါလိမ့်မယ်..။

အာဆင်နယ်အသင်းမှာဆိုရင်လည်း မက်စ် ဒိုးမန်း ဟာ အသက် (၁၅) နှစ်ထဲနဲ့ ပရီးမီးယားလိဂ်ပြိုင်ပွဲမှာ ခြေစွမ်းပြနေပါပြီ..။ အီသန် နူရန်နယ်ရီ လည်း ရှိနေသေးတယ်..။ အများကြီးပါပဲ..။ ကျွန်တော်တို့ ချယ်လ်ဆီးအသင်းက လူငယ်လေးတွေဆိုရင် အခုလိုပွဲကြီးတွေမှာ အတူတကွ ကြိုးစား၊ စွမ်းဆောင်ပြရင်းနဲ့ သူတို့အတွက် သာမန်ပွဲစဉ်တစ်ပွဲ ကစားသလိုပဲ ထင်မှတ်လာကြပါလိမ့်မယ်..။     
 
အိုင်ဒါ ဂူဂျွန်ဆင် - ဒီလိုချန်ပီယံလိဂ်ညချမ်း၊ ဒီလိုအတွေ့အကြုံတွေကို ငယ်ငယ်ရွယ်ရွယ်နဲ့ အခွင့်အရေးရခဲ့တာကို ကျေးဇူးတင်တတ်ဖို့.. ဆိုတဲ့ အတွေး၊ ခံစားမှုကို သူတို့လေးတွေ ကျွန်တော်တို့၊ ခင်ဗျားတို့ အသက်အရွယ် ရောက်လာတဲ့အချိန်ကျရင် နားလည်လာကြပါလိမ့်မယ်..။ ချန်ပီယံလိဂ်ပြိုင်ပွဲ ညချမ်းတွေမှာ မြက်ခင်းစိမ်းထဲကို ဝင်ရောက်လာတယ်..၊ ပရိသတ်တွေအပြည့်နဲ့ ပွဲကြည့်စင်တွေရှေ့မှာ ရပ်နေရင်း ချန်ပီယံလိဂ်ပြိုင်ပွဲ တေးသွားကို နားဆင်နေရတဲ့ အခိုက်အတန့်တွေဟာ ကစားသမားတိုင်းအတွက် ဘယ်တော့မှ ငြီးငွေ့မသွားနိုင်တဲ့ အကောင်းဆုံး ခံစားချက်တွေ ဖြစ်ပါတယ်..။

 
လင်းဆေး ဟစ်ပ်ဂရေ့စ် - အခုဆိုရင် ချယ်လ်ဆီးအသင်းဟာ ချန်ပီယံလိဂ်ပြိုင်ပွဲ၊ အမှတ်ပေးဇယားမှာ ရမှတ် (၆) မှတ်နဲ့ အဆင့် (၁၁) နေရာရောက်ရှိသွားပါပြီ..။ ရှင်တို့အသင်းဟာ အဖွင့်ပွဲစဉ်မှာ ဘိုင်ယန် မြူးနစ်အသင်းနဲ့ အဝေးကွင်းမှာ ရင်ဆိုင်ခဲ့ရတာဆိုတော့ ခက်ခဲခဲ့ပါတယ်..။ ဒါပေမယ့် နောက်ထပ်နှစ်ပွဲဆက်တိုက် အနိုင်ရရှိခဲ့ပြီး ရှုံးထွက်အဆင့်ကို တက်ရောက်နိုင်ဖို့ အခြေအနေကောင်းလာပြီလို့ ပြောနိုင်ပြီပေါ့..

အိုင်ဒါ ဂူဂျွန်ဆင် - ကျွန်တော်တို့နဲ့ ထိုက်တန်တဲ့နေရာကို တဖြည်းဖြည်း တက်လှမ်းနိုင်ခဲ့ပြီလို့ ပြောရမလိုပါပဲ..။ ဘိုင်ယန် မြူးနစ်အသင်းနဲ့ပွဲရလဒ်ဟာ ခက်ခဲခဲ့ပါတယ်..။ ဒါပေမယ့် ဘင်ဖီကာအသင်းကို အနိုင်ရအောင် စွမ်းဆောင်နိုင်ခဲ့ပါတယ်..။ ထူခြားတာက ဘင်ဖီကာအသင်းနဲ့ပွဲဟာ ဟိုဆေး မော်ရင်ဟို ရဲ့ စတန်းဖို့ဒ် ဘရစ်ချ် အပြန်ခရီးကိုပဲ ခေါင်းကြီးသတင်းအနေနဲ့ ပိုပြီးစိတ်ဝင်စားခဲ့ကြတာဗျ..။ ဒါ့ကြောင့်အဲဒီလို အာရုံထွေပြားစရာ အကြောင်းရှိနေတဲ့ ပွဲစဉ်တစ်ပွဲမှာ သုံးမှတ်အပြည့် အရယူနိုင်ခဲ့တာဟာလည်း အရေးပါခဲ့တာပါပဲ..။

လင်းဆေး ဟစ်ပ်ဂရေ့စ် - ဟိုဆေး မော်ရင်ဟို ဟာ အဲဒီလောက်တောင် အရှိန်အဝါ ကြီးမားခဲ့တာပေါ့..?
အိုင်ဒါ ဂူဂျွန်ဆင် - သေချာတာပေါ့..။ ချယ်လ်ဆီးအသင်းအပေါ် သူ့ရဲ့အရှိန်အဝါဟာ အမြဲတမ်းလွှမ်းမိုးနေဦးမှာပါ..။ ပြီးတော့ ဒီနေ့ကတော့ တတိယမြောက်ပွဲစဉ်ပေါ့ဗျာ..။ ဒါ့ကြောင့်အခုဆိုရင် အင်ဇို မာရက်စ်ကာ ဟာ အသင်းရဲ့ ချန်ပီယံလိဂ်ပြိုင်ပွဲ အနေအထားအပေါ် ကျေနပ်အားရမှုတွေ ရရှိနေပါလိမ့်မယ်..။

လင်းဆေး ဟစ်ပ်ဂရေ့စ် - ဒါဆိုရင် ရှင်တို့ချယ်လ်ဆီးအသင်းဟာ ဆုဖလားတွေကို စိန်ခေါ်နိုင်မယ့် လမ်းကြောင်းပေါ် ပြန်လည်ရောက်ရှိလာပြီလို့ ပြောနိုင်ပြီလား..? ဘာဖြစ်လို့လည်းဆိုတော့ ရှင်တို့အသင်းရဲ့ လက်ကျန်ပွဲစဉ်တွေအနေအထားဟာ ပွဲချောင်တယ်.. လို့ ပြောလို့ရတယ်မလား..?

ဂျိုး ကိုးလ် - ဒါပေါ့..။ လက်ရှိပရီးမီးယားလိဂ် ချန်ပီယံ လီဗာပူးလ်အသင်းကို အနိုင်ယူခဲ့တဲ့ ခြေစွမ်းရယ်..၊ ဒီနေ့ပွဲမှာ ပြသခဲ့တဲ့ ခြေစွမ်းတွေအရ ချယ်လ်ဆီးအသင်းကို ချန်ပီယံစိန်ခေါ်နိုင်မယ့် လမ်းကြောင်းထဲမှာ ထည့်သွင်းထားသင့်ပါပြီ..။ ချန်ပီယံလိဂ်ပြိုင်ပွဲ League Phase အဆင့် လက်ကျန်ပွဲစဉ်တွေကို ကြည့်မယ်ဆိုရင် PAFOS အသင်းနဲ့ အိမ်ကွင်းပွဲစဉ်ဟာ အရမ်းကိုရှင်းပါတယ်..။ အနိုင်ရရမယ့်ပွဲစဉ်ပါ..။ ဘာစီလိုနာ နဲ့ အိမ်ကွင်းပွဲစဉ်၊ အတ္တလန်တာ အသင်းနဲ့ အဝေးကွင်းပွဲစဉ်တွေကတော့ ခက်ခဲမယ့်ပွဲတွေပေါ့ဗျာ..။ အဲ.. ကွာရာဘတ်အသင်းနဲ့ အဝေးကွင်းလည်း ခက်ခဲမှာပဲ..။ ဒါပေမယ့် အခုလောလောဆယ်မှာ ချယ်လ်ဆီးအသင်းကို ရှုံးထွက်အဆင့် တက်ရောက်ခွင့်ရမယ်လို့ မျှော်လင့်ထားပါတယ်..။

ပရီးမီးယားလိဂ်ပြိုင်ပွဲက ပိုပြီးခက်ခဲပါလိမ့်မယ်..။ အခုလက်ရှိအချိန်မှာ အာဆင်နယ်အသင်းရဲ့ ခြေစွမ်းဟာ တခြားအသင်းတွေထက် ပိုပြီးကောင်းမွန်နေပါတယ်..။ သူပြီးရင် မန်ချက်စတာ စီးတီး..၊ လီဗာပူးလ်နဲ့ ချယ်လ်ဆီးအသင်းတွေပေါ့ဗျာ..။