ပရီးမီးယားလိဂ်ပြိုင်ပွဲ ပွဲစဉ် (၁၀) အဖြစ် ချယ်လ်ဆီးအသင်းက တော့တင်ဟမ်အသင်းအား Tottenham Hotspurs ကစားကွင်းတွင် ၁ဂိုး- ဂိုးမရှိဖြင့် အနိုင်ရရှိခဲ့သည့်ပွဲစဉ်မှ နည်းစနစ်ပိုင်း သုံးသပ်ချက်များ၊ ချယ်လ်ဆီးအသင်းရဲ့ ကစားပုံ၊ ပွဲစဉ်၏အကောင်းဆုံး ကစားသမားဆုရ မွိုက်စ် ကိုင်ဆီဒို၏ပံ့ပိုးမှုနှင့် ဂျာအို ပီဒရို ၏ သွင်းဂိုးအပေါ် တော့တင်ဟမ်အသင်း ကွင်းလယ် ကစားသမားဟောင်း ဂျေမီ ရက်ဒ်နပ် နှင့် လီဗာပူးလ်အသင်းနှင့် ချယ်လ်ဆီးအသင်း တိုက်စစ်မှူး ဒယ်နီရယ် စတားရစ်ချ် တို့က Sky Sports သတင်းဌာန၏ Saturday Night Football စကားဝိုင်း အစီအစဉ်တွင် အောက်ပါအတိုင်း သုံးသပ်၊ ပြောကြားခဲ့ပါသည်..။

ဒေးဗစ် ဂျုံးစ် - ပထမဆုံးအနေနဲ့ အခုဒီနေ့ပွဲစဉ်က နှစ်သင်းစလုံးရဲ့ ကစားပုံ၊ ခြေစွမ်းအပေါ် ခင်ဗျားတို့ရဲ့အမြင်ကို အရင်ဆုံး ပြောပြပါလား..?
ဒယ်နီရယ် စတားရစ်ချ် - ဒီနေ့ပွဲမှာ ချယ်လ်ဆီးအသင်းဟာ အဝေးကွင်းပွဲစဉ် ဆိုပေမယ့် လွယ်လွယ်ကူကူနဲ့ပဲ အနိုင်ရရှိခဲ့ပါတယ်..။ ပွဲစကတည်းက ရှေ့တန်းလူတွေအပါအဝင် တစ်သင်းလုံးရဲ့ pressing ဖိအားပေး ကစားပုံ အထူးကောင်းမွန်ခဲ့တာကြောင့် တော့တင်ဟမ်အသင်းဟာ အခက်အခဲတွေနဲ့ ရင်ဆိုင်ခဲ့ရပါတယ်..။ မွိုက်စ် ကိုင်ဆီဒို ဦးဆောင်တဲ့ ချယ်လ်ဆီးအသင်း ကွင်းလယ်ဟာ အိမ်ရှင်အသင်းကို ထိန်းချုပ် ကစားနိုင်ခဲ့သလို အနိုင်ဂိုး သွင်းယူပေးခဲ့တဲ့ ဂျာအို ပီဒရို ရဲ့ ခြေစွမ်းကတည်း ကောင်းမွန်ခဲ့ပါတယ်..။ ဒီနေ့ပွဲမှာ နည်းပြအင်ဇို မာရက်စ်ကာ ရဲ့ နည်းစနစ်ပိုင်း ချဉ်းကပ်ပုံ၊ ပွဲအတွက် ပြင်ဆင်လာမှုတွေကို ချီးကျူး၊ ဂုဏ်ပြုရပါမယ်..။ 

ဂျေမီ ရက်ဒ်နပ် - တော့တင်ဟမ်အသင်းရဲ့ ကစားပုံ အတော့်ကို ဆိုးရွားပါတယ်..။ ကျွန်တော်ကြည့်ခဲ့ဖူးသမျှ ဒီအသင်းရဲ့ အဆိုးရွားဆုံး စွမ်းဆောင်ရည်ပြသခဲ့တဲ့ ပွဲတွေထဲမှာ ပါဝင်နိုင်ပါတယ်…။ ပြီးခဲ့တဲ့ရာသီတုန်းက ၃ဂိုး- ၄ဂိုးနဲ့ ရှုံးနိမ့်ခဲ့တဲ့ပွဲဟာဆိုရင် နှစ်သင်းစလုံး အပြန်အလှန် တိုက်စစ်ဆင်ကစားခဲ့ကြပြီး သွင်းဂိုးတွေကိုယ်စီနဲ့ သည်းထိပ်ရင်ဖို.. အင်မတန်ကြည့်ကောင်းခဲ့တဲ့ ပွဲစဉ်တစ်ပွဲပါ..။ ဒါပေမယ့် ဒီနေ့ပွဲမှာတော့ဗျာ.. ကျွန်တော်တို့အသင်းဟာ ချယ်လ်ဆီးကို အဘက်ဘက်က ဘယ်လိုမှကို မယှဉ်နိုင်ခဲ့ပါဘူး..။

ကိုယ့်ရဲ့ခံစစ်ဇုန်ထဲကနေ ဘယ်လိုပုံစံနဲ့ ရုန်းထွက်မယ် (play out from the back) ဆိုတဲ့ အကြံအစည်၊ အစီအမံ လုံးဝမရှိခဲ့သလို ကစားပုံ နှေးကွေးနေခဲ့ပြီး ဘောလုံးယှဉ်လုလိုက်တိုင်း ချယ်လ်ဆီးဘက်ကပဲ အရယူနိုင်ခဲ့ပါတယ်..။ ပေးလိုက်ရတဲ့ အနိုင်ဂိုးမှာဆိုရင် ဗဟိုခံစစ်မှူးနှစ်ယောက်ဖြစ်တဲ့ မစ်ကီ ဗန်ဒီ ဗန်း နဲ့ ကီဗင် ဒန်ဆို တို့နှစ်ယောက်စလုံးရဲ့ ဘောလုံးဖျက်ထုတ်မှုတွေ လွဲချော်သွားရာက ခွင့်ပြုလိုက်ရတာပါ..။ အထူးသဖြင့် မွိုက်စ် ကိုင်ဆီဒို ဟာ တခြားကမ္ဘာကနေ လာပြီးကစားနေတဲ့ ကစားသမား တစ်ယောက်အလားပါပဲ..။ တော့တင်ဟမ်အသင်း ကွင်းလယ်က သူ့ကိုလုံးဝမယှဉ်နိုင်ခဲ့ပါဘူး..။

 
ဒေးဗစ် ဂျုံးစ် - ပွဲအပြီးမှာ ချယ်လ်ဆီးကစားသမားတွေနဲ့ သူတို့ပရိသတ်တွေ အတူတူအောင်ပွဲခံနေခဲ့တဲ့ပုံစံကို ကြည့်မယ်ဆိုရင် ဒီနေ့ပွဲရလဒ်ဟာ အင်ဇို မာရက်စ်ကာ တို့အတွက် အရေးကြီးတဲ့ပွဲရလဒ်တစ်ခုလို့ မှတ်ယူခဲ့တာ သေချာပါတယ်..။ အခုလိုအရေးပါခဲ့တဲ့ အဝေးကွင်းရလဒ်နဲ့ အမှတ်ပေးဇယား အဆင့် (၃) နေရာမှာရှိနေတဲ့ အသင်းကို ပွဲစပွဲဆုံး ထိန်းချုပ်၊ အနိုင်ယူသွားနိုင်ခဲ့တဲ့ ခြေစွမ်းအရဆိုရင် ဒီအသင်းရဲ့အနာဂတ်ကို စိတ်လှုပ်ရှားစွာနဲ့ စောင့်ကြည့်သင့်တယ်.. မထင်မိဘူလား..? ဒယ်နီ ရေ..

ဒယ်နီရယ် စတားရစ်ချ် - ဒီအသင်းမှာ အင်မတန်မှ စိတ်လှုပ်ရှားဖို့ကောင်းတဲ့ ပါရမီရှင် လူငယ်ကစားသမားလေးတွေ အများကြီးရှိနေပါတယ်..။ သူတို့အချင်းချင်း အတွဲအဖက်မိပြီး အသင်းကောင်း တစ်သင်းအဖြစ် ပေါ်ထွက်လာမယ့်အချိန်ကိုပဲ စောင့်ဆိုင်းနေရတာပါ..။ အခုဒီနေ့ပွဲခြေစွမ်းကတော့ သူတို့တွေရောက်ရှိနိုင်မယ့် အဆင့်အတန်းကို ပြသခဲ့တာလို့ ပြောနိုင်ပါတယ်..။ တကယ်တမ်းဆိုရင် ၃ဂိုး၊ ၄ဂိုးလောက်နဲ့ ဂိုးပြတ်အနိုင်ရသွားသင့်တဲ့ပွဲပါ..။ တော့တင်ဟမ် ဂိုးသမား ဂူလီယမ်မို ဗစ်ကာရီယို ရဲ့ ကာကွယ်မှုတွေ ကောင်းမွန်ခဲ့လိုသာ သက်သာသွားခဲ့ရတာဗျ..။ 

ချယ်လ်ဆီးအသင်းဟာ အနာဂတ်အတွက် ဖြည်းဖြည်းချင်း တည်ဆောက်နေတဲ့ အသင်းသစ်တစ်သင်းဖြစ်ပြီး အခုဆိုရင် အရှိန်အဟုန် ရရှိလာပြီလို့ ပြောလို့ရပါပြီ..။ ပြီးခဲ့တဲ့အပါတ်တုန်းက ဆန်းဒါးလန်းအသင်းကို ရှုံးနိမ့်ခဲ့ရသလို မမျှော်လင့်တဲ့ရလဒ်တွေ ပေါ်ထွက်လာတဲ့ ပွဲစဉ်တွေတော့ ရှိတတ်ပါတယ်..။ အရင်အပါတ်မှာ ကစားသွားခဲ့တဲ့ ခြေစွမ်းဟာ အားရဖို့မကောင်းလှပေမယ့် အခုပွဲမှာတော့ အသင်းသားတွေဟာ ယုံကြည်မှုအပြည့်နဲ့ ဖျော်ဖြေမှုပေးနိုင်ပြီး ဆွဲဆောင်မှုရှိတဲ့ ကစားဟန်နဲ့အတူ ပရိသတ်ကိုပါ ဖမ်းစားနိုင်ခဲ့ပါတယ်..။

ဂျေမီ ရက်ဒ်နပ် - တည်ငြိမ်တဲ့ခြေစွမ်းကို မပြသနိုင်သေးတာဟာ ချယ်လ်ဆီးရော..၊ စပါးအသင်း အပါအဝင် လက်ရှိပရီးမီးယားလိဂ်ပြိုင်ပွဲက အသင်းကြီးတွေ ကြုံတွေ့နေရတဲ့ပြဿနာ ဖြစ်နေပါတယ်..။ ဒီနေ့ပွဲမှာဆိုရင် ချယ်လ်ဆီးအသင်းရဲ့ကစားပုံဟာ ဆွဲဆောင်မှုရှိတယ်..၊ ကြည့်လို့ကောင်းတဲ့အပြင် အက်စ်တီဗာအို တို့လို ပင်ကိုယ်အရည်အသွေး ကောင်းမွန်လှတဲ့ ကစားသမားတွလည်း အသင်းမှာ ရှိနေပါတယ်..။ ဒီနေ့ပွဲမှာ တော့တင်ဟမ်အသင်းကို ကြည့်ရတာ ဘာအရှိန်အဟုန်၊ ဘာရည်မှန်းချက်မှ ရှိနေတဲ့ပုံ မပေါ်ပါဘူး..။ 

အခုလက်ရှိ ပရီးမီးယားလိဂ်ပြိုင်ပွဲမှာ အာဆင်နယ်အသင်းကလွဲရင် ကျန်တဲ့အသင်းတွေအားလုံးဟာ အနည်းနဲ့အများ ရုန်းကန်နေရပြီး အခုအချိန်ထိ တည်ငြိမ်တဲ့ခြေစွမ်းကို ပြသနိုင်ခြင်းမရှိသေးပါဘူး..။ ချယ်လ်ဆီးအသင်းဟာ ကလပ်အသင်းများ ကမ္ဘာ့ဖလားပြိုင်ပွဲ အပါအဝင် ကစားခဲ့ရတဲ့ ပွဲအရေအတွက် များပြားခဲ့တာကြောင့် ပွဲပန်းတဲ့ဒဏ် ခံစားနေရဆဲ ဖြစ်နေတာလည်း ပါဝင်ပါတယ်..။ ဒါ့ကြောင့်နည်းပြ အင်ဇို မာရက်စ်ကာ က ပွဲကြိုသတင်းစာ ရှင်းလင်းပွဲမှာ အနိုင်ဂိုးသွင်းယူသွားတဲ့ ဂျာအို ပီဒရို၊ အင်ဇို ဖာနန်ဒက်စ် နဲ့ မွိုက်စ် ကိုင်ဆီဒို တို့လို ကစားသမားတွေကို အတတ်နိုင်ဆုံး ကာကွယ်နေရတဲ့အကြောင်း ပြောဆိုသွားခဲ့တာပါ..။

ဒဏ်ရာကြောင့် အနားယူနေရတဲ့ ကိုးလ် ပါးမား လည်း သိပ်မကြာခင် ပြန်လည်ပါဝင်နိုင်တော့မှာဆိုတော့ အခုထက်ပိုပြီး ကောင်းမွန်တဲ့ အသင်းတစ်သင်းအဖြစ် ပေါ်ထွက်လာဖို့ ရှိနေပါသေးတယ်..။ ဒါ့ကြောင့်ခင်ဗျားတို့ပြောကြသလို ဒီအသင်းရဲ့အနာဂတ်ဟာ အင်မတန်မှ စိတ်လှုပ်ရှားဖို့ကောင်းပြီး စောင့်ကြည့်ရမယ့် အသင်းကောင်းတစ်သင်း ဖြစ်ပါတယ်..။ ဒါပေမယ့် ဒီနေ့ပွဲမှာ ကစားသွားခဲ့တဲ့ တော့တင်ဟမ်အသင်းရဲ့ ခြေစွမ်းဟာ ဘယ်လိုအသင်းကို အနိုင်ယူနိုင်ဖို့မဖြစ်နိုင်ဘူးဆိုတာ ရိုးရိုးသားသား ဝန်ခံပါတယ်..။ ချယ်လ်ဆီးအသင်း အနိုင်ရသွားတာ သိပ်ကိုလွယ်ကူလွန်းခဲ့ပါတယ်..။

ဒေးဗစ် ဂျုံးစ် - ဂျာအို ပီဒရို ဟာ ပြီးခဲ့တဲ့ပွဲတွေမှာ ယုံကြည်မှုပျောက်ဆုံးနေတဲ့ပုံစံ မြင်နေခဲ့ရပါတယ်..။ ဒီနေ့မှာတော့ သူဟာအကောင်းဆုံး ခြေစွမ်းနဲ့အသင်းကို ကူညီပေးနိုင်ခဲ့တာကြောင့် သူ့ရဲ့နဂိုမူလ ယုံကြည်ချက်တွေ ပြန်လည်ရရှိလာပြီလို့ ပြောနိုင်ပြီလား..?

ဒယ်နီရယ် စတားရစ်ချ် - ဒီနေ့ပွဲမှာ သူဟာအပိုင်ဂိုးသွင်းခွင့်တွေ အများကြီးရရှိခဲ့တာကြောင့် တစ်ဂိုးထက်ပိုပြီး ရရှိသင့်ပါတယ်..။ ဒါပေမယ့် သူ့ရဲ့ off the ball movement ရွှေ့လျားမှုတွေ၊ နေရာယူမှုတွေ (positioning) နဲ့ အသင်းဖော်တွေနဲ့ နားလည်မှု အတွဲအဖက်တွေ သိပ်ကိုကောင်းမွန်ခဲ့ပါတယ်..။

ဒေးဗစ် ဂျုံးစ် - စကားမစပ်.. ရောဘတ် ဆန်းချက်ဇ် လည်း အတော်ကောင်းခဲ့တယ်ဗျ..။ ဘောလုံးဖမ်းယူမှုအပြင် နေရာယူမှု၊ အဝင်အထွက်တွေ အဆင်ပြေခဲ့တယ်မလား..
ဒယ်နီရယ် စတားရစ်ချ် - တော့တင်ဟမ်အသင်းဟာ တည်ကန်ဘောတွေကနေ ဂိုးသွင်းနိုင်ဖို့ ပြင်ဆင်လာခဲ့ပါတယ်..။ ဒါပေမယ့် ဆန်းချက်ဇ် ဟာ တော့တင်ဟမ်အသင်းရဲ့ တည်ကန်ဘော၊ ဖြတ်တင်ဘောတွေကို အကောင်းဆုံး ဆွဲဖမ်း၊ ကာကွယ်ပေးနိုင်ခဲ့ပါတယ်..။ အနီးတိုင်.. အဝေးဂိုးတိုင်ဆီ ကန်တင်လိုက်တဲ့ ဘောလုံးတိုင်းကို ရဲရဲဝံ့ဝံ့နဲ့ ဆွဲဖမ်းနိုင်ခဲ့သလို အရင်တုန်းက သူပြေးထွက် ကာကွယ်လေ့မရှိတဲ့ နေရာတွေကိုပါ တက်ရောက်ကာကွယ်ပေးနိုင်ခဲ့တဲ့အပြင် အသင်းရဲ့တန်ပြန် တိုက်စစ်လမ်းကြောင်းတွေ စတင်နိုင်အောင် ကူညီပေးနိုင်ခဲ့ပါတယ်..။

ဂျေမီ ရက်ဒ်နပ် - တော့တင်ဟမ်အသင်းရဲ့ set pieces ထိုးဖောက်မှုတွေကို ချယ်လ်ဆီးအသင်းဟာ ပါးပါးနပ်နပ်နဲ့ ကာကွယ်သွားခဲ့တာဗျ..။ တော့တင်ဟမ်အသင်းဘက်က ကန်တင်လိုက်တာနဲ့ ဂိုးဧရိယာထဲက ကစားသမား (၃) ယောက်ဟာ ရှေ့ကိုပြေးတက်သွားပါတယ်..။ ဘာဖြစ်လို့လည်းဆိုတော့ အရင်ပွဲတွေမှာ ဂိုးဧရိယာထဲကို long throws တွေ ဝင်လာပြီဆိုရင် သူ့လူ၊ ကိုယ့်လူတွေ အများကြီးရှိနေတာနဲ့ ဂိုးသမားလည်း ဘာမှထွက်ပြီးလှုပ်ရှားလို့ မရခဲ့ပါဘူး.။ 

ဒီနေ့ပွဲမှာတော့ ဘောလုံးဟာ ဂိုးဧရိယာထဲ ဝင်လာတာနဲ့ ခံစစ်ကြောင်းလူတံတိုင်းထဲက သုံးယောက်လောက် ရှေ့ကိုပြေးတက်သွားပါတယ်..။ သူတို့ဘက်ကသုံးယောက် တက်သွားရင် တော့တင်ဟမ်ဘက်ကလည်း သုံးယောက်‌လိုက်ပြီး ပြေးတက်ရပါတယ်..။ ဒီလိုနည်းနဲ့ ဂိုးသမား ဆန်းချက်ဇ် အတွက် ဂိုးဧရိယာထဲမှာ လှုပ်ရှားနိုင်ဖို့ နေရာအများကြီး ရလာပါတယ်..။ သူဟာခန္ဓာကိုယ် ကြီးမားတယ်..၊ လက်တံလည်းရှည်တာကြောင့် ဂိုးဧရိယာတစ်ဝိုက်ကို ကောင်းကောင်း ကာကွယ်ပေးနိုင်စွမ်း ရှိပါတယ်..။ သူ့ရဲ့လက်စွမ်းအပေါ် ဝေဖန်မှုတွေ တောက်လျှောက်ရှိနေခဲ့တာ မှန်ပေမယ့် ဒီနေ့မှာတော့ ဂိုးသမားကောင်း တစ်ယောက်ဖြစ်တယ်ဆိုတာ ပြသနိုင်ခဲ့ပါတယ်..။
   
ဒေးဗစ် ဂျုံးစ် - မွိုက်စ် ကိုင်ဆီဒို ဟာ ဒီနေ့ပွဲစဉ်ရဲ့ အကောင်းဆုံး ကစားသမားဆု ရရှိခဲ့တဲ့အပေါ် အငြင်းပွားစရာ ရှိနေသေးလား..? ဂျေမီ..
ဂျေမီ ရက်ဒ်နပ် - Absolutely not.. အငြင်းပွားစရာ မရှိပါဘူး..။ ကမ္ဘာ့အဆင့် ကစားသမား တစ်ယောက် ဖြစ်သလို အခုလက်ရှိအချိန် ‘ကွင်းလယ်အဖျက် ကစားသမား’ တွေထဲမှာ အကောင်းဆုံး… လို့ ပြောလို့ရပါတယ်..။ သူဟာတကွင်းလုံးအနှံ့ ကာကွယ်နိုင်စွမ်းရှိတယ်..၊ ခွန်အားအပြည့်နဲ့ ပွဲချိန်ပြည့် ဘောလုံးရယူ၊ ဖျက်ထုတ်နိုင်စွမ်း ရှိတဲ့အပြင် အသင်းဖော်တွေဆီကို ပေးပို့တဲ့ သူ့ရဲ့ဘောလုံးတွေဟာ အရမ်းကို ကောင်းမွန်ပါတယ်..။ ကိုယ့်အသင်းဘက်က ဆုံးသွားတဲ့ဘောလုံးတိုင်းကို မရမက အတင်းလိုက် အရယူပြီး ကောင်းမွန်တဲ့၊ မှန်ကန်တဲ့ ပေးပို့မှုတွေနဲ့အတူ တိုက်စစ်လမ်းကြောင်းကို အမြန်ဆုံး ပြန်လည်စတင်ပေးနိုင်တဲ့သူလည်း ဖြစ်ပါတယ်..။ သူ့လိုကစားသမားမျိုးနဲ့အတူ တွဲဖက်ကစားခွင့်ရဖို့ နောက်တန်းလူတိုင်း အိပ်မက်မက်ကြပါလိမ့်မယ်..။ 

ဒယ်နီရယ် စတားရစ်ချ် - ချယ်လ်ဆီးအသင်းကို ရောက်လာခါစက ရုန်းကန်ခဲ့ရပေမယ့်  အခုအချိန်မှာ ဘာအတွက်ကြောင့် မြင့်မားတဲ့ပြောင်းရွှေ့ကြေး ပေးခဲ့ရလဲ..? ဆိုတာ သက်သေပြနိုင်ခဲ့ပါပြီ..။ မွိုက်စ် ကိုင်ဆီဒို ဟာ အသက် (၂၃) နှစ်သာ ရှိနေသေးပေမယ့် ကွင်းလယ်အဖျက် ကစားသမား တစ်ယောက်ရဲ့ အမြင့်မားဆုံး ရောက်ရှိနိုင်မယ့် အဆင့်အတန်းကို ရရှိနိုင်ဖို့ အင်မတန်နီးစပ်နေပြီလို့ ကျွန်တော်ယူဆမိပါတယ်..။

 
ဒေးဗစ် ဂျုံးစ် - သူက ဘာများ နောက်ထပ်ဖြည့်ဆည်းစရာ ကျန်နေသေးလို့လဲဗျ..။ တစ်နေကုန် ပြေးခိုင်းရင်တောင် တစ်ကွင်းလုံးအနှံ့ မနားတမ်း ပြေးလွှားနိုင်မှာ ဖြစ်တဲ့အပြင် အရှိန်မြှင့်ပြေးလွှားမှုတွေ အမြဲတမ်း ပြုလုပ်နိုင်တဲ့သူ ဖြစ်ပါတယ်..။ နောက်ထပ်ဘာများ လိုအပ်နေသေးလို့လဲ..?

ဒယ်နီရယ် စတားရစ်ချ် - ကိုယ့်ကိုယ်ကို ယုံကြည်မှု အဆင့်အတန်း (confidence level) ပဲ ဖြစ်ပါလိမ့်မယ်..။ သူ့ကိုပေးလိုက်ရတဲ့ မြင့်မားတဲ့ ပြောင်းရွှေ့ကြေးကြောင့် ရောက်လာတာနဲ့ အသင်းမှာ ချက်ချင်းလက်ငင်း ခြေစွမ်းပြတာကို မြင်ချင်ကြတာပါပဲ..။ ဒါပေမယ့်သူဟာ အသင်းသစ်မှာ အသားကျဖို့ အချိန်ယူလိုက်ရတယ်…၊ အသင်းဖော်သစ်တွေနဲ့ နားလည်မှုတည်ဆောက်ခဲ့ရတဲ့အပြင် ချယ်လ်ဆီးအသင်းမှာ သူ့အပေါ် ထားရှိခဲ့တဲ့ မြင့်မားတဲ့ မျှော်လင့်ချက်တွေကို လိုက်မှီအောင် ကြိုးစားခဲ့ရပါတယ်..။

အခုဘောလုံးရာသီမှာ သူဟာအဲဒီလိုမြင့်မားတဲ့ မျှော်လင့်ချက်တွေကို ရင်ဆိုင်၊ ထမ်းပိုးရဲတဲ့ ယုံကြည်မှုပြည့်ဝသူ တစ်ယောက်အဖြစ်  ရပ်တည်လာနိုင်ခဲ့ပါပြီ..။ နည်းစနစ်ပိုင်းအရဆိုရင် သူ့ရဲ့လိုအပ်ချက်ကို ထောက်ပြနိုင်ဖို့ မဖြစ်နိုင်သလောက်ပါပဲ..။ ကစားသမား တစ်ယောက်အနေနဲ့ အသင်းကို ခေါင်းဆောင်နိုင်တဲ့သူ တစ်ယောက်အနေနဲ့ ရှိသင့်တဲ့အစွမ်းအစ အကုန်အစင် ပြသနိုင်ခဲ့ပြီလို့ပဲ ပြောချင်ပါတယ်..။

ဂျေမီ ရက်ဒ်နပ် - ကစားသမား အများစုဟာ ကိုယ့်ဆီကို ဘောလုံးရမှ ကစားချင်ကြတာဗျ..။ သူကတစ်ဖက်အသင်းရဲ့ ခြေထဲကဘောလုံးကို မရမက သဲကြီးမဲကြီး အရယူနိုင်အောင် ကြိုးစားတဲ့သူ ဖြစ်ပါတယ်..။ ချယ်လ်ဆီးအသင်း ဘောလုံးဆုံးသွားတာနဲ့ ကိုယ့်ရဲ့ခြေထဲကို ဘောလုံးပြန်ရောက်အောင် ပထမဆုံး ကြိုးစားတဲ့သူဟာ ‘မွို    က်စ် ကိုင်ဆီဒို’ ပဲဗျ..။ ဒီနေ့ပွဲမှာ ချယ်လ်ဆီးအသင်း ရရှိခဲ့တဲ့ အနိုင်ဂိုးမှာဆိုရင် အင်မတန်မှ အရေးကြီးတဲ့ ဘောလုံးဖျက်ထုတ်မှုသုံးကြိမ် ပြုလုပ်ခဲ့ပြီး သူ့ရဲ့ကြိုးစားအားထုတ်မှုနဲ့ ဘောလုံးအရယူနိုင်စွမ်းကို အကောင်းဆုံး ပြသနိုင်ခဲ့ပါတယ်..။

အခုအပေါ်မှာ ပြသထားတဲ့ပုံ (ပုံ- ၁) မှာဆိုရင် တော့တင်ဟမ်အသင်း နောက်တန်းက ဂျက်ဒ် စပင့်စ် ဘောလုံးပေးပို့မယ့်အချိန် ကိုင်ဆီဒို ဟာ သူတို့ဘက်က တိုက်စစ်လမ်းကြောင်းကို စတင်မယ့် မိုဟာမက် ကူဒူးစ် ရဲ့ အနားမှာ အသင့်စောင့်နေပါတယ်..။ တစ်ချက်ထိနဲ့ ဆွဲထွက်လာတဲ့ ဂျက်ဒ် စပင့်စ် ဆီကနေ ဘောလုံးအရ ပြန်ယူခဲ့ပါတယ်..။ 

အဲဒီဘောလုံးကို သူ့ရဲ့အနားမှာရှိနေတဲ့ ပီဒရို နက်တို က ဂျာအို ပီဒရို ရဲ့ ပြေးလမ်းကြောင်းထဲကို ချပေးပါမယ်..(ပုံ- ၂)။ ဒါပေမယ့် ဂျာအို ပီဒရို ရဲ့ ခန္ဓာကိုယ်အနေအထားကို ကြည့်မယ်ဆိုရင် သူ့ရဲ့ပြေးလမ်းထဲ ဘောလုံးရောက်လာမှာကို မျှော်လင့်ထားပုံ မရပါဘူး..။

အိုကေ… ဂျာအို ပီဒရို ပြေးလိုက်မသွားလဲ.. ငါပဲလိုက်မယ်.. ဆိုပြီး ရှေ့ကိုဆက်လက် လိုက်ပါသွားပါတယ်..။ ပီဒရို နက်တို ဆီက လျှံထွက်လာတဲ့ ဘောလုံးဟာ နစ်ကီ ဗန်ဒီ ဗန်း ဆီ ရောက်သွားတယ်..၊ ကိုင်ဆီဒို ဟာ ချက်ချင်းပဲ အရပြန်ယူနိုင်ခဲ့ပါတယ်..(ပုံ- ၃)။ ကံကောင်းချင်တော့ အဲဒီဘောလုံးဟာ သူနဲ့အတူ ဂိုးဧရိယာထဲမှာ ရှိနေခဲ့တဲ့အတွက် မြန်မြန်ဆန်ဆန်ပဲ လျောထိုးပြီး ဂျာအို ပီဒရို ကို တည်ပေးခဲ့ပါတယ်..။ တကယ့်ကို ကမ္ဘာ့အဆင့် ကစားပုံပါပဲ..။

ဒယ်နီရယ် စတားရစ်ချ် - ခင်ဗျားက ဂျာအို ပီဒရို ကို ပြေးထွက်မှု မလုပ်ခဲ့လို့ အပြစ်တင်ချင်တာပေါ့..။ ဒါပေမယ့် ကိုင်ဆီဒို လို ကစားသမားနဲ့ တွဲဖက်ကစားရပြီဆိုရင် သူဟာ အဲဒီလို 50- 50 ဘောလုံးတွေကို မရမက အရယူနိုင်စွမ်းရှိတယ်ဆိုတာ သိပြီးသားပါ..။ ဒါ့ကြောင့်သူ့အနေနဲ့ ဘောလုံးလာနိုင်မယ့်နေရာမှာ အသင့်စောင့်နေရုံပါပဲ..။ ဂျာအို ပီဒရို ဟာ အဲဒီသွင်းဂိုးအတွက် ချီးမွမ်းခံရပါလိမ့်မယ်..။ ဒါပေမယ့် မွိုက်စ် ကိုင်ဆီဒို ရဲ့ မရမက သဲကြီးမဲကြီး ဖျက်ထုတ်မှုတွေကို အချက်အလက်တွေနဲ့ ပြသနိုင်ဖို့ မဖြစ်နိုင်ဘူးဗျ..။

အဲဒီဂိုးအတွက် သူဟာဂိုးဖန်တီးမှု (assist) ရခဲ့တယ်ဆိုပေမယ့် အဲဒီအချက်အလက် တစ်ခုတည်းနဲ့ လုံလောက်မှု မရှိပါဘူး.။ ခုနကဂျေမီ ပြခဲ့တဲ့ ကူဒူးစ် အနားက ပါးနပ်တဲ့ နေရာယူမှုကနေစတင်ပြီး လျောထိုးမှုနဲ့ ဂိုးဖန်တီးပေးမှု.. အဆုံးသတ်အထိ ဘယ်လိုတွေ လုပ်ဆောင်လဲ..? ဆိုတာတွေကို အချက်အလက်တွေနဲ့ ပေါ်လွင်အောင် ပြသဖို့ မဖြစ်နိုင်ပါဘူး..။ ပရီးမီးယားလိဂ် ကစားသမားတွေရဲ့ (၉၀ %) ရာခိုင်နှုန်းကျော်မှာ အဲဒီလို pressing လိုက်ပေးပြီး ဘောလုံးအရယူမယ်..၊ ကိုယ့်အသင်းဖော်ဆီရောက်အောင် ပေးနိုင်စွမ်းရှိကြပါတယ်..။ ဒါပေမယ့် ကစားသမားအများစုဟာ တစ်ကြိမ်ဖျက်ထုတ်ပြီးတာနဲ့ နောက်ပြန်ဆုတ်သွားကြတာပဲ..။ သူကတော့ ဘောလုံးကိုမရမချင်း ဆက်ခါဆက်ခါ သဲကြီးမဲကြီး အတင်းလိုက်ပြီး ဖျက်ထုတ်နေတော့တာပဲဗျ..။ အားအင်ကုန်ခမ်းသွားတယ်.. ဆိုတာ တခါမှလည်း မတွေ့ဖူးခဲ့ပါဘူး.။ 

ဂျေမီ ရက်ဒ်နပ် - အန်ဂိုလို ကန်တေး လည်း အတူတူပဲဗျ..။ သူတို့ဆီမှာ မကုန်နိုင်၊ မခမ်းနိုင်တဲ့ ခွန်အားတွေ.. ဆိုတဲ့ ဘုရားသခင်ရဲ့ လက်ဆောင်ကောင်းတွေ ရှိနေပါတယ်..။ အဲဒီလိုစွမ်းရည်တွေ၊ မဆုတ်မနစ်တဲ့ ဇွဲလုံ့လတွေ.. ဆိုတာဟာ သင်ကြားပေးလို့၊ လွှဲပြောင်းပေးလို့ မရပါဘူး..။

ဒေးဗစ် ဂျုံးစ် - ဒီနေ့ပွဲမှာ ချယ်လ်ဆီးအသင်းဟာ အပိုင်ဂိုးသွင်းခွင့် (big chances) (၆) ကြိမ် ရရှိခဲ့ပါတယ်..။ ဒါ့ကြောင့်၁ဂိုး- ဂိုးမရှိဆိုတဲ့ ရလဒ်ဟာ နှစ်သင်းစလုံးရဲ့ခြေစွမ်းကို ကိုယ်စားမပြုခဲ့ပါဘူး..။ အဲဒီအကြောင်းကို ကျွန်တော်တို့ ခုနကလည်း ပြောခဲ့ပါသေးတယ်..။ 

ဂျေမီ ရက်ဒ်နပ် - ဂိုးသမား ဗစ်ကာရီယို လက်စွမ်းပြနိုင်ခဲ့တာကြောင့်လည်း ပါဝင်ပါတယ်..။ ဒီလိုမှမဟုတ်ရင် ၄ဂိုး၊ ၅ဂိုး ပြတ်သွားမလားပဲဗျ..။ ဂျာအို ပီဒရို တစ်ယောက်တည်းနဲ့ hattrick ရနိုင်မယ့် အခွင့်အရေးကောင်းတွေ ရရှိခဲ့သလို ဂျေမီ ဂစ်တန်စ် ဟာလည်း ဘယ်ခြေနဲ့ကန်သွင်းရမယ့် အခွင့်အရေးကို ညာခြေနဲ့ကန်သွင်းလိုက်တဲ့အချိန် သူ့ရဲ့ခန္ဓာကိုယ်အနေအထားက နောက်ကိုနည်းနည်းလန်နေတယ်ဗျ..။ ဒါပေမယ့် ဂျာအို ပီဒရို ဟာ လီယန် ဒီလပ် ရဲ့ ဒဏ်ရာပြဿနာကြောင့် လေ့ကျင့်ခန်းကောင်းကောင်း မပြုလုပ်နိုင်ပဲ အသေးစားဒဏ်ရာနဲ့ မဖြစ်မနေဝင်ကန်နေရတဲ့အကြောင်း အင်ဇို မာရက်စ်ကာ ကလည်း ပြောခဲ့ပါသေးတယ်..။

 
ဒယ်နီရယ် စတားရစ်ချ် - အင်းဗျ..။ ဂျာအို ပီဒရို ရရှိခဲ့တဲ့ အခွင့်အရေးတစ်ချို့ကို ကြည့်နေရင်း ‘ငါဆိုရင် အခုထက်ပိုပြီး ကောင်းမွန်အောင် အဆုံးသတ်နိုင်လိမ့်မယ်..’ လို့ တွေးနေမိတာ အမှန်ပဲဗျ..။ ဒါပေမယ့် အခုလိုအခွင့်အရေးတွေ ရရှိနေတယ်.. ဆိုတာ သူ့ရဲ့နေရာယူမှု မှန်ကန်တာကို ပြသနေပါတယ်..။ လိုအပ်ချက်အနေနဲ့ဆိုရင် သူဟာသွင်းဂိုးတွေ၊ ဂိုးဖန်တီးမှုတွေဟာ အခုထက်ပိုပြီး အသင်းကိုပံ့ပိုးပေးနိုင်အောင် ကြိုးစားရပါလိမ့်မယ်..။ အခုလည်းဂိုးတွေသွင်းပေးနေတာပဲ.. ဆိုပေမယ့် သူဟာအရင်ပွဲတွေမှာ ဂိုးကန်သွင်းခွင့်ရဖို့ အတော်လေးကို ရုန်းကန်ခဲ့ရပါတယ်..။

ဒီနေ့ပွဲကျမှသာ ဂိုးကန်သွင်းခွင့်တွေ အများကြီးရရှိခဲ့တာပါ..။ တိုက်စစ်မှူးတစ်ယောက်အတွက် အသင်းဖော်တွေရဲ့ ဖန်တီးပေးမှုတွေကို အမြဲတမ်းရရှိနေဖို့ အရေးကြီးပါတယ်..။ ဘာဖြစ်လို့လည်းဆိုတော့ အသင်းဖော်တွေဟာ ကိုယ့်ရဲ့အစွမ်းအစ.. ကိုယ့်ရဲ့ဂိုးသွင်းအဆုံးသတ် စွမ်းရည်ကို ယုံကြည်မှုရှိမှသာ အခွင့်အရေးတွေ ဖန်တီးပေးကြမှာပေါ့..။

အခုအချိန်မှာ ဂျာအို ပီဒရို ဟာချယ်လ်ဆီးအသင်းရဲ့ အငြင်းပွားဖွယ်မရှိ အဓိကတိုက်စစ်မှူးပါပဲ..။ လီယန် ဒီလပ် ပြန်ကစားနိုင်တဲ့ အချိန်ကျရင် သူတို့နှစ်ယောက်စလုံးကို တိုက်စစ်မှာတင်ပြီး ကစားမလား..? ဒါမှမဟုတ် ဂျာအို ပီဒရို ကို နောက်ချန်တိုက်စစ်မှူးအဖြစ် ကစားခိုင်းမလား..? စောင့်ကြည့်ရပါဦးမယ်..။ ဂျာအို ပီဒရို ဟာ တိုက်စစ်မှာ နေရာစုံကစားပေးနိုင်တဲ့သူလည်း ဖြစ်ပါတယ်..။ 

ဂျေမီ ရက်ဒ်နပ် - နောက်ပိုင်းပွဲတွေကျရင် အခွင့်အရေးတွေ အများကြီးရရှိဦးမှာပါ..။ အင်ဇို ဖာနန်ဒက်စ် ဟာ နေရာလွတ်တွေရှာဖွေနိုင်တယ်..၊ ဂိုးသွင်းခွင့်တွေ ဖန်တီးပေးနိုင်တဲ့သူ ဖြစ်သလို ကိုးလ် ပါးမား လည်း မကြာခင်မှာ ပြန်ပြီးပါဝင်လာနိုင်တော့မှာပါ..။ ပါးမား ပြန်ကစားနိုင်တဲ့အချိန်ကျရင် အသင်းရဲ့ကစားပုံဟာ လုံးဝပြောင်းလဲသွားဦးမှာပါ..။ သူဟာမှန်ကန်တဲ့ ပေးပို့မှုတွေကို အချိန်ကိုက်၊ နေရာကိုက် ဖန်တီးပေးနိုင်တဲ့သူ ဖြစ်ပါတယ်..။ ဒါ့အပြင်အက်စ်တီဗာအို တို့လို ခြေစွမ်းတက်လာဦးမယ့် လူငယ်သွေးသစ်တွေလည်း ရှိနေပါသေးတယ်..။

 
အလီဂျန်ဒရို ဂါနာချို ရဲ့ လက်ရှိခြေစွမ်းအပေါ် ဝေဖန်မှုတွေ ရှိနေခဲ့ပေမယ့် ဒီနေ့ပွဲမှာတော့ ကျေနပ်ဖို့ကောင်းလောက်တဲ့ ခြေစွမ်းမျိုးကို ပြသသွားနိုင်ခဲ့ပါတယ်..။ ဒါ့ကြောင့်ချယ်လ်ဆီးအသင်းရဲ့ ရှုထောင့်ကနေ ကြည့်မယ်ဆိုရင် ဒီနေ့ပွဲမှာရရှိခဲ့တဲ့ သုံးမှတ်ဟာ အဖက်ဖက်က ကျေနပ်ဖို့ကောင်းတဲ့ ရမှတ်တွေလို့ သတ်မှတ်နိုင်ပါတယ်..။

ဒယ်နီရယ် စတားရစ်ချ် - နောက်ဆုံးတစ်ချက်က ပေးဂိုးမရှိ ‘clean sheet’ ရခဲ့တာပဲဗျ..။ ပြီးခဲ့တဲ့အပါတ်က ဆန်းဒါးလန်းနဲ့ပွဲမှာ ချယ်လ်ဆီးအသင်းရဲ့ ခံစစ်ကြောင်းကစားပုံအပေါ် မေးခွန်းထုတ်စရာတွေ များပြားခဲ့တဲ့အပြင် ပွဲပြီးခါနီးမှာ အနိုင်ဂိုးခွင့်ပြုလိုက်ရပါတယ်..။ ဒီနေ့ပွဲမှာတော့ ခံစစ်ကစားသမားတွေရဲ့ ကာကွယ်၊ ဖျက်ထုတ်မှုတွေ၊ နေရာယူမှုတွေ သေသပ်မှုရှိခဲ့သလို စုစည်းမှု၊ ကျစ်လျစ်မာကျောမှုတွေနဲ့လည်း ပြည့်စုံခဲ့ပါတယ်..။ ဒီနေ့ပွဲမှာ ပွဲထွက်ခဲ့တဲ့ နောက်ခံလူလေးယောက်ဟာ အတွေ့အကြုံရင့် ဝါရင့်ကစားသမားတွေ ဖြစ်ကြပြီး အချင်းချင်းကြားမှာ နားလည်မှု၊ ဆက်သွယ်မှုတွေ ကောင်းမွန်ခဲ့တာကို သတိပြုမိခဲ့ပါတယ်..။

ပွဲပြီးခါနီးမှာ အိမ်ရှင်အသင်းက ဂိုးရလာဖို့ ကစားအား တင်လာခဲ့တာကြောင့် ပွဲရဲ့အနေအထား နည်းနည်းလေး ပြောင်းသွားသလို ဖြစ်ခဲ့ပါတယ်..။ ဒါပေမယ့် တစ်ပွဲလုံးအနေနဲ့ ခြုံငုံကြည့်မယ်ဆိုရင် အခုပွဲစဉ်က ချယ်လ်ဆီးအသင်းရဲ့ ခံစစ်ကြောင်းဟာ တည်တည်ငြိမ်ငြိမ်နဲ့ ကျေနပ်စရာခြေစွမ်း ပြသနိုင်ခဲ့ပါတယ်..။ ဒါ့ကြောင့်သူတို့အနေနဲ့ ဒီနေ့ပွဲမှာ clean sheet ရရှိခဲ့တဲ့ ခံစစ်ကြောင်းကို အခြေခံပြီး ဆက်လက်တိုးတက်အောင် ဖြည့်ဆည်း၊ ကြိုးပမ်းသွားသင့်ပါတယ်..။

 
ဒေးဗစ် ဂျုံးစ် - ဟုတ်ကဲ့ပါ..။ အခုဆိုရင် ပရီးမီးယားလိဂ် ပွဲစဉ် (၁၀) အပြီး ခြေစွမ်းအရ ချယ်လ်ဆီးအသင်းဟာ ပြီးခဲ့တဲ့ရာသီကထက် ပိုပြီးကောင်းလာသလား..? ဒါမှမဟုတ် ပိုပြီးဆိုးရွားသွားသလား..? ဒါပေမယ့် သူတို့အသင်းမှာ လီဗိုင်း ကိုဝဲလ် နဲ့ ကိုးလ် ပါးမား တို့လို အဓိကကစားသမားတစ်ချို့ ပြန်မပါနိုင်သေးပါဘူး..။

ဂျေမီ ရက်ဒ်နပ် - ချယ်လ်ဆီးအသင်းရဲ့ ရာသီအစအ‌ခြေအနေကို ပြန်စဉ်းစားကြည့်ရအောင်..။ ကလပ်အသင်းများ ကမ္ဘာ့ဖလားပြိုင်ပွဲကို ဗိုလ်စွဲခဲ့တာကတော့ ကောင်းတာပေါ့ဗျာ..။ ဒါပေမယ့် အင်ဇို မာရက်စ်ကာ ရဲ့ အကောင်းဆုံး (၁၁) ယောက်က ဘယ်သူတွေလဲ..? မပြောနိုင်ပါဘူး..။ ရာသီပြန်စမယ်လဲဆိုရော သူ့ရဲ့အကောင်းဆုံး နောက်ခံလူ လီဗိုင်း ကိုဝဲလ် ဟာ ဒူးအရွတ်ကြောဒဏ်ရာကြောင့် အနားယူရပါမယ်..။ နည်းပြမာရက်စ်ကာ ဟာ အဲဒီအခက်အခဲနဲ့ ပတ်သက်ပြီး တခါမှ စောဒကမတက်ခဲ့ဖူးပါဘူး..။ နောက်ပြီးလီယန် ဒီလပ်၊ ကိုးလ် ပါးမား တို့တွေ ဒဏ်ရာရပြန်ပါတယ်..။ 

အခုဆိုရင် မွိုက်စ် ကိုင်ဆီဒို၊ အင်ဇို ဖာနန်ဒက်စ်၊ ဂျာအို ပီဒရို တို့ကို ထပ်ပြီးဒဏ်ရာမရအောင် ဂရုတစိုက် စီစဉ်နေရပါတယ်..။ ဗဟိုနောက်ခံလူနှစ်ယောက်ကိုလည်း အလျဉ်းသင့်သလို ပြောင်းလဲ၊ သုံးစွဲခဲ့ရပါတယ်..။ ဒီနေ့ပွဲမှာ တွဲဖက်သွားခဲ့တဲ့ ဝက်စ်လေ ဖိုဖားနား နဲ့ ထရေဗာ ချာလိုဘာ တို့ဟာ အကောင်းဆုံး ဗဟိုနောက်ခံလူ အတွဲအစပ် ဆိုပေမယ့် ဖိုဖားနား ရဲ့ ကြံ့ခိုင်မှုအနေအထားအရ သူတို့နှစ်ယောက်ကို ပွဲတိုင်းကစားဖို့ မဖြစ်နိုင်သေးပါဘူး..။

 
အသင်းတစ်သင်းမှာ စီစဉ်မထားတဲ့ အပြောင်းအလဲတွေ ဖြစ်လာတတ်တယ်ဆိုတာ ထရေဗာ ချာလိုဘာ က အကောင်းဆုံး ဥပမာပဲပေါ့ဗျာ..။ သူဟာအသင်းမှာ နေရာရဖို့ မရှိတော့တာကြောင့် ခရစ်စ်တယ် ပဲလေ့စ်ကို အဌားထွက်ရပါတယ်..။ ဒါ့အပြင်သူ့အတွက် နေရာမရှိတော့တာကြောင့် ချယ်လ်ဆီးကနေ ထွက်ရမလိုတောင် ဖြစ်ခဲ့ပါသေးတယ်..။ အခုကျတော့ အသင်းရဲ့နံပါတ်တစ် ဦးစားပေး ဗဟိုနောက်ခံလူဖြစ်နေပြီး သူနဲ့ဘယ်သူနဲ့ တွဲရမလဲ..? လို့ အရင်ဆုံးစဉ်းစား‌နေရပါပြီ..။

ကစားသမား တစ်ယောက်ဟာ မှန်ကန်တဲ့ ခံယူချက်၊ စိတ်ဓါတ်နဲ့ ကြိုးစားအားထုတ်မှု အပြည့်ရှိနေမယ်ဆိုရင် အချိန်တန်ရင် ထိုက်တန်တဲ့နေရာရမှာပဲ.. ဆိုတာ အကောင်းဆုံးသက်သေပြနေပါတယ်..။ ချာလိုဘာ ဟာ ချယ်လ်ဆီးအသင်းကို အသက် (၆) နှစ်၊ (၇) နှစ်အရွယ်ကနေ စတင်ရောက်ရှိလာခဲ့တာဖြစ်ပြီး အသင်းတစ်သင်းမှာ သူတို့လိုငယ်မွေးခြံပေါက်.. ဘာပဲဖြစ်နေဖြစ်နေ.. အသင်းအတွက် အသက်ပေးသွားမယ့် ကစားသမားတွေ ရှိနေသင့်ပါတယ်..။

ချယ်လ်ဆီးအသင်းဟာ လက်ရှိအချိန်မှာ ပရီးမီးယားလိဂ် ချန်ပီယံဆု ဆွတ်ခူးနိုင်ဖို့ အချိန်လိုအပ်နေပါသေးတယ်..။ ဒါပေမယ့် သူတို့ဟာ မှန်ကန်တဲ့လမ်းကြောင်းပေါ်မှာ လျှောက်လှမ်းနေတယ်.. ဆိုတာ အသေအချာတတ်အပ် ပြောနိုင်ပါတယ်..။