ပရီးမီးယားလိဂ်၊ ပွဲစဉ် (၁၁) အဖြစ် ချယ်လ်ဆီးအသင်းနှင့် ဝုလ်ဖ်အသင်းတို့ စတန်းဖို့ဒ် ဘရစ်ချ်ကွင်း၌ စနေနေ့က ယှဉ်ပြိုင်ကစားခဲ့ကြရာ ချယ်လ်ဆီးအသင်းက ၃ဂိုး- ဂိုးမရှိဖြင့် အနိုင်ရခဲ့သည်..။ အဆိုပါပွဲစဉ်မှ ချယ်လ်ဆီးအသင်း၏ သွင်းဂိုးများ၊ အလီဂျန်ဒရို ဂါနာချို၊ အက်စ်တီဗာအို တို့၏ ခြေစွမ်းများနှင့် ချယ်လ်ဆီးအသင်း၏ ပရီးမီးယားလိဂ်ပြိုင်ပွဲ၊ ချန်ပီယံဆု စိန်ခေါ်ခွင့်အလားအလာများအပေါ် ချယ်လ်ဆီးအသင်း ဂန္ထဝင်နောက်ခံလူဟောင်း ဂယ်ရီ ကာဟေးလ် နှင့် အာဆယ်နယ်အသင်း ဂိုးသမားဟောင်း ဒေးဗစ် ဆီးမင်း တို့က Premier League Production မှတင်ဆက်သည့် ပွဲပြီးစကားဝိုင်း အစီအစဉ်တွင် အောက်ပါအတိုင်း ဆွေးနွေးခဲ့ကြပါသည်..။

ဆီမာ ဂျက်စ်ဝဲလ် - ဒီနေ့ပွဲမှာ မာလို ဂူစ်တို ဟာ အရေးပါခဲ့တဲ့ အဖွင့်ဂိုးကို သွင်းယူပေးခဲ့ပါတယ်..။ ဒါပေမယ့်သူဟာ ချယ်လ်ဆီးအသင်းနဲ့ (၉၈) ပွဲမြောက်မှာမှ ရရှိခဲ့တဲ့ ပထမဆုံးဂိုး ဖြစ်ခဲ့ပါတယ်..။ ဆောရီး.. မာလို ရေ.. ကျွန်မတို့နဲ့အတူရှိနေတဲ့ ဂယ်ရီ ကာဟေးလ် ဟာ ရှင်တို့အသင်းအတွက် သူ့ရဲ့ပထမဆုံးဂိုးကို (၈) ပွဲမြောက်မှာတင် ရရှိခဲ့ပါတယ်ရှင့်.. ဟားဟား..။ ဂယ်ရီ ရေ.. ကစားသမားတိုင်းဟာ ကိုယ့်ရဲ့အသင်းအတွက် ပထမဆုံးဂိုး သွင်းယူပေးနိုင်ခဲ့တဲ့ အခိုက်အတန့်တွေကို အမြဲတမ်းအမှတ်ရနေမှာပဲ..။ ဟုတ်တယ်မလားရှင့်..

ဂယ်ရီ ကာဟေးလ် - Yes.. သေချာတာပေါ့ဗျာ..။ မာလို ကတော့ သူ့ရဲ့ပထမဆုံးဂိုး ရရှိနိုင်ဖို့ အချိန်အတော်ကြာ စောင့်လိုက်ရပါတယ်..။ ဒါပေမယ့် အဲဒီဂိုးဟာ ဒီနေ့ပွဲမှာ အရေးပါတဲ့ အလှည့်အပြောင်း ဖြစ်စေခဲ့တဲ့ဂိုးပါ..။ ချယ်လ်ဆီးအသင်းဟာ ပထမပိုင်းမှာ ဝုလ်ဖ်အသင်းရဲ့ ငါးယောက်တန်း ခံစစ်ကြောင်းကို ထိုးဖောက်နိုင်ဖို့ ခက်ခဲနေခဲ့ပြီး  ဒုတိယပိုင်းရောက်မှသာ ခံစစ်ကြောင်းက နေရာလွတ်တွေကို ရှာဖွေနိုင်ခဲ့ပါတယ်..။ ဒါ့အပြင် သူ့ရဲ့အဖွင့်ဂိုး ရပြီးတဲ့နောက်ပိုင်းမှ ကစားရလွယ်ကူသွားခဲ့တာဗျ..။ 

မာလို အတွက်တော့ အဖွင့်ဂိုးနဲ့အတူ ချယ်လ်ဆီးအသင်းနဲ့ အရေးကြီးတဲ့ မှတ်တိုင်တစ်ခုကို ကျော်ဖြတ်နိုင်ခဲ့ပါတယ်..။ ကစားသမားဘဝ ပြိုင်ပွဲစုံ (၁၅၉) ပွဲမြောက်၊ ချယ်လ်ဆီးအသင်းနဲ့ (၉၈) ပွဲမြောက်ကျမှ ပထမဆုံးဂိုး ရရှိခဲ့တာဆိုတော့ အချိန်အကြာကြီး စောင့်လိုက်ရတာပဲဗျ..။ ဒီနေ့ညမှာ သူအရမ်းကို ပျော်ရွှင်နေပါလိမ့်မယ်..။

ဒေးဗစ် ဆီးမင်း - မှန်ပါတယ်..။ မာလို ဂူစ်တို ရဲ့ အဖွင့်ဂိုးရပြီးတဲ့နောက်ပိုင်း ဝုလ်ဖ်အသင်းဟာ ခံစစ်ထိုင်ပြီး အသေပိတ်ဆို့ ကစားလို့ မရတော့ပါဘူး..။ ပင်နယ်တီဧရိယာထဲမှာပဲ (၁၁) ယောက်လုံး ပိတ်ထိုင်နေလို့ မရတော့ပဲ အပြင်ဘက်ကိုထွက်လာပြီး တိုက်စစ်ဆင်ဖို့ လိုအပ်လာခဲ့ပါပြီ..။ အဲဒါနဲ့ချယ်လ်ဆီးဘက်က နေရာလွတ်တွေ ပိုရလာတာကြောင့် နောက်ထပ်သွင်းဂိုးတွေ ရရှိခဲ့တာပေါ့ဗျာ..။ 

ဆီမာ ဂျက်စ်ဝဲလ် - ဟုတ်ကဲ့ပါရှင့်..။ တစ်ဆက်တည်းမှာပဲ ပွဲချိန် (၅၁) မိနစ်မှာ သွင်းယူခဲ့တဲ့ သူ့ရဲ့သွင်းဂိုးကို ဆွေးနွေးကြည့်ရအောင်ရှင့်..။ ဂယ်ရီ ရေ.. ရှင့်ရဲ့သုံးသပ်ချက်ကို အရင်ပြောပြပါလား..?

ဂယ်ရီ ကာဟေးလ် - မာလို ဂူစ်တို အပြင် ဂါနာချို လည်း ဂိုးဖန်တီးမှုနှစ်ကြိမ် ရရှိခဲ့တာကြောင့် အရမ်းကို ကျေနပ်၊ ပျော်ရွှင်နေပါလိမ့်မယ်..။ သူ့ရဲ့ပထမဂိုးဖန်တီးမှုကိုတော့ ဘယ်တောင်ပံ ဖြတ်တင်ဘောနဲ့ ပြုလုပ်ပေးခဲ့တာပါ....။ မာ့စ် ကူကူရယ်လာ နဲ့ အပေးအယူ ပြုလုပ်ပြီး စပိန်နောက်ခံလူ ပြန်ချပေးလိုက်တဲ့ ဘောလုံးကို ဆွဲပြေးရင်း သူအားသန်တဲ့ ဘယ်ခြေနဲ့ကန်တင်မယ့် ခြေယောင်ပြတယ်..၊ ပြီးမှတစ်ချက်ပြန်ခေါက်ပြီး ညာခြေနဲ့ကန်တင်လိုက်ပါတယ်..။ 

မာလို ဂူစ်တို ကလည်း အဝေးဂိုးတိုင်မှာ အသင့်ရှိနေပြီး လွတ်လွတ်ကျွတ်ကျွတ် အနီးကပ်ခေါင်းတိုက်ခွင့် ရသွားတာဆိုတော့ ဘယ်လိုနည်းနဲ့မှ မလွဲနိုင်တော့ဘူး..။ အဲဒီဂိုးမှာ ဝုလ်ဖ်အသင်းက ဗဟိုခံစစ်မှူးတွေရဲ့ နေရာယူထားတဲ့ အနေအထားကို ပြောချင်ပါတယ်..။ ပထမတစ်ကြိမ် ဂါနာချို က ဘယ်ခြေနဲ့ဖြတ်တင်မယ့်ပုံစံ ပြုလုပ်လိုက်တဲ့အချိန် တော့တီ ဂိုးမက်စ် က ဂူစ်တို နားမှာ ရှိနေပါတယ်..။ ဒါပေမယ့်သူ့ရဲ့ခန္ဓာကိုယ် အနေအထားကို ကြည့်မယ်ဆိုရင် နောက်ကျောဘက်မှာရှိနေတဲ့ တိုက်စစ်မှူးတွေဘက်ကို ပြန်လှည့်နိုင်‌အောင် ပြင်ဆင်ထားတာမရှိပဲ (never body opened) ဘောလုံးကိုပဲ မျက်နှာမူထားပါတယ်.(ပုံ- ၁).။

 
ပွဲပြီးတဲ့အချိန် သုံးသပ်ချက်တွေ ပြန်လုပ်တဲ့အခါ ဂိုးမက်စ် ဟာ ပွဲကြည့်သလို ဖြစ်နေခဲ့တဲ့ သူ့ရဲ့ခန္ဓာကိုယ် အနေအထားကို စိတ်ပျက်သွားပါလိမ့်မယ်..။ ဒုတိယတစ်ကြိမ်.. ဂါနာချို က အတွင်းကိုပြန်ခေါက်ပြီး ညာခြေနဲ့ ဖြတ်တင်မယ့်အချိန်မှာလည်း ဘောလုံးကိုပဲ မျက်နှာမူထားပြီး သူ့ရဲ့နောက်ကျောက မာလို ဂူစ်တို တို့နှစ်ယောက်ကို ကျောပေးထားတုန်းပါ..(ပုံ- ၂)။ သူ့ရဲ့နောက်မှာ ချယ်လ်ဆီးကစားသမား နှစ်ယောက်ရှိနေတာ သိနေတဲ့ပုံ မပေါ်ပါဘူး..။

တကယ်လို့ အဲဒီလိုကျောပေးထားတာ မဟုတ်ပဲ ခံစစ်ကြောင်းနဲ့အတူ အတန်းလိုက်ရှိနေမယ့် အနေအထား (opening the body) ဆိုရင် မာလို ဂူစ်တို ပြေးတက်လာတာ မြင်နိုင်ပါမယ်..။ အနည်းဆုံး ဖြတ်တင်ဘောကို ကာကွယ်ပေးဖို့ သူ့ရဲ့အနားမှာရှိနေတဲ့ ဟူဂို ဘူနို ကို သတိပေးနိုင်ပါလိမ့်မယ်..။ အမှန်တော့ ဂါနာချို ရဲ့ ဖြတ်တင်ဘော အဝေးဂိုးတိုင်မှာ ကျလာတဲ့အချိန် ဂူစ်တို ရဲ့နားမှာ သူတို့နှစ်ယောက်ထဲက တစ်ယောက်ယောက်ရှိနေရင် အလွယ်တကူ ရှင်းထုတ်နိုင်မယ့် အခြေအနေရှိပါတယ်..။ ဒါကတော့ ဗဟိုနောက်ခံလူ တစ်ယောက်ရဲ့ ရှုထောင့်ကနေ သုံးသပ်မိတာပါ..။ ကျွန်တော်တို့ ဗဟိုနောက်ခံလူတွေဟာ ကိုယ့်နောက်ကွယ်မှာရှိနေတဲ့ တောင်ပံကစားသမားတွေရဲ့ ပိတ်သွင်း၊ အဆုံးသတ်သွားတာကို ကာကွယ်နိုင်ဖို့ ခန္ဓာကိုယ်အနေထားကို ပုံသေဖြစ်သွားအောင် နေရာယူထားလို့ မရပါဘူး..။

ဆီမာ ဂျက်စ်ဝဲလ် - အဲဒီအခြေအနေမှာ ဝုလ်ဖ်အသင်းရဲ့ ဘယ်တောင်ပံ ခံစစ်မှူး ဟူဂို ဘူနို ကရော ‘မင်းရဲ့နောက်မှာ ချယ်လ်ဆီးကစားသမား နှစ်ယောက်ရှိနေတယ်..၊ သတိထားဦး..’ ဆိုပြီး သတိလှမ်းပေးလို့ မရဘူးလား..? ကစားသမားတွေအချင်းချင်း ကွင်းထဲမှာ အမြဲတမ်းမပြတ် စကားပြောနေဖို့ (communication) ကလည်း အရေးကြီးမလားရှင့်..

ဒေးဗစ် ဆီးမင်း - Yes.. မှန်တာပေါ့..။ ဂါနာချို ဘက်က ပထမတစ်ကြိမ် ဖြတ်တင်မယ့် အချိန်ကတည်းက ဘူနို ဟာ လှမ်းပြီးသတိပေးရမှာပါ..။ ဘာဖြစ်လို့လည်းဆိုတော့ ဘူနို ဟာ သူတို့ခံစစ်ကြောင်းရဲ့ အစွန်ဆုံးမှာ ရှိနေတာကြောင့် နှစ်ဘက်ကစားသမားတွေရဲ့ နေရာယူထားပုံတွေကို အကုန်လုံးမြင်နေရပါတယ်..။ ဘူနို ဟာ သူတာဝန်ယူရမယ့် ပီဒရို နက်တို ကိုပဲ အာရုံစိုက်ထားပါတယ်..။ ဒါ့ကြောင့် နက်တို ရဲ့ရှေ့က ဖြတ်ပြေးသွားတဲ့ ဂူစ်တို နဲ့ ဆက်ပြီးမလိုက်သွားနိုင်ဘူး.. ဆိုပေမယ့် အလယ်မှာရှိနေတဲ့ ဗဟိုနောက်ခံလူတွေကို လှမ်းပြီးသတိပေးရမှာပဲ..။ တကယ့်ကို နောက်ခံလူအချင်းချင်းကြားမှာ ဆက်သွယ်မှုကင်းမဲ့ခဲ့တဲ့ သာဓကတစ်ခုပါ..။

ဂယ်ရီ ကာဟေးလ် - မှန်ပါတယ်..။ နောက်ခံလူ တစ်ယောက်အနေနဲ့ဆိုရင် တောင်ပံဘက်ကနေ ဘောလုံးဖြတ်တင်တော့မယ့်အချိန်မှာ ကိုယ့်ရဲ့ခန္ဓာကိုယ် အနေအထားကို ပြင်ဆင်ရမယ်..၊ ပြိုင်ဘက်အသင်း ကစားသမားတွေ ဘယ်နေရာမှာ ရှိနေတယ်.. ဆိုတာ သိနေအောင်ပြုလုပ် (scan) ထားရပါမယ်..။ ပေးလိုက်ရတဲ့ဂိုးမှာဆိုရင် တော့တီ ဂိုးမက်စ် အတွက် ပြိုင်ဘက်ကစားသမားတွေရဲ့ နေရာယူထားပုံတွေကို သိရှိအောင် scan လုပ်နိုင်မယ့် အခွင့်အရေးနှစ်ကြိမ် ရခဲ့ပေမယ့် ပျက်ကွက်ခဲ့တယ်ဗျ..။ ပွဲနဲ့ပတ်သက်ပြီး ပြန်လည်သုံးသပ်မှုတွေ ပြုလုပ်တဲ့အချိန်ကျ အတော်လေး သူစိတ်ပျက်မိပါလိမ့်မယ်..။

ဒါပေမယ့် အဲဒီဂိုးမှာ ဂါနာချို ရဲ့ ဖြတ်တင်ဘော သိပ်ကိုကောင်းမွန်ခဲ့သလို မာလို ဂူစ်တို ကလည်း အဝေးဂိုးတိုင်မှာ ချိန်သားကိုက် အတိအကျ ရောက်ရှိခဲ့တာဆိုတော့ သပ်ရပ်တဲ့ သွင်းဂိုး..၊ ကျွန်တော်တို့ အပြာရောင်တွေအတွက် (၉၈) ပွဲမြောက်မှာမှ ရရှိခဲ့တဲ့ဂိုးပေါ့ဗျာ.. ဟားဟား..။

ဆီမာ ဂျက်စ်ဝဲလ် - ဘရာဇီးလ် တိုက်စစ်မှူး ဂျာအို ပီဒရို ဟာ ဒီနေ့မှာပရီးမီးယားလိဂ် ပွဲပေါင်း (၁၀၀) ပြည့်မြောက်ခဲ့တာဆိုတော့ ပွဲချိန် (၆၅) မိနစ်မှာ ရရှိခဲ့တဲ့ ဒုတိယဂိုးဟာ သူ့အတွက် ထူးခြားခဲ့တဲ့ မှတ်တိုင်တစ်ခု ဖြစ်ခဲ့ပါတယ်..။ 

ဒေးဗစ် ဆီးမင်း - ညာတောင်ပံကနေ အက်စ်တီဗာအို ဖြတ်တင်လိုက်တဲ့ဘောလုံးကို အဆုံးသတ်လိုက်တဲ့ သူ့ရဲ့ကန်ချက်ဟာ တကယ့်ကို တိကျကောင်းမွန်ခဲ့ပါတယ်..။ ဝုလ်ဖ်အသင်း နောက်ခံလူနဲ့ထိပြီး လမ်းကြောင်းပြောင်းသွားခဲ့တာကြောင့်လည်း ကံကောင်းသွားတာပေါ့ဗျာ..။ လူစားဝင်လာချင်းမှာ နောက်ခံလူကို ကျော်ဖြတ်ပြီး ဖြတ်တင်ပေးလိုက်တဲ့ အက်စ်တီဗာအို ကလည်း ဂိုးဖန်တီးမှုရရှိဖို့ ထိုက်တန်ခဲ့ပါတယ်..။ 

အက်စ်တီဗာအို ဖြတ်တင်လိုက်တဲ့အချိန် ပီဒရို နက်တို ဟာ အနီးဂိုးတိုင်ဘက်ကို ဖြတ်ပြေးပြီး နောက်ခံလူ ဂိုးမက်စ် ကို ဆွဲထုတ်သွားခဲ့တာကြောင့် ဂျာအို ပီဒရို အတွက် နေရာလွတ် ရလာခဲ့ပါတယ်...။ နောက်ပြီးဂျာအို ပီဒရို ဟာ ဂိုးသမားဆီကို ပြေးသွားမယ့်အယောင်ပြပြီး နောက်ခံလူကို အသာလေး တွန်းလိုက်တာကြောင့် ကန်သွင်းနိုင်မယ့် အနေအထားကို ပါးပါနပ်နပ် ဖန်တီးနိုင်ခဲ့ပါတယ်..(ပုံ - ၃)။

ဂိုးသမား ဆမ် ဂျွန်စတုံး ရှိနေတဲ့ အလယ်တည့်တည့် ကန်သွင်းလိုက်တာကတော့ နည်းနည်းထူးဆန်း နေသလိုပဲဗျ..။ ဘယ်လိုပဲဖြစ်ဖြစ် ဂိုးရဖို့အဓိကပါပဲ..။

ဆီမာ ဂျက်စ်ဝဲလ် - အက်စ်တီဗာအို အကြောင်း နည်းနည်းဆွေးနွေးပေးပါဦး..။ သူဟာချယ်လ်ဆီးအသင်းကို ရောက်လာခဲ့ပြီး မြန်မြန်ဆန်ဆန် အထိုင်ကျခဲ့ပါတယ်..။ ဒီနေ့ပွဲပထမပိုင်းအပြီးမှာ အသင်းရဲ့ကစားပုံကို အားမရတာကြောင့် ပရိသတ်တွေက Booo..!! လုပ်ပြီး လှောင်ပြောင်ခဲ့ပါသေးတယ်..။ ဒါပေမယ့် အက်စ်တီဗာအို လူစားဝင်မယ့်အချိန် ပရိသတ်ကြီးက ‘ဝေး’ ကနဲ စိတ်ဓါတ်တွေ တက်ကြွလာပြီး သည်းသည်းလှုပ်လှုပ် အားပေးကြတာတွေ့လိုက်ရပါတယ်..။ သူဟာအခုကတည်းက ပရိသတ်တွေရဲ့ သည်းခြေကြိုက် ကစားသမားတစ်ယောက် ဖြစ်နေပြီမလား.. ဂယ်ရီ ရေ..?

ဂယ်ရီ ကာဟေးလ် - ဟုတ်ပါတယ်..။ အဲဒီအကြောင်း ပထမပိုင်းအပြီးမှာ ကျွန်တော်တို့ ဆွေးနွေးခဲ့ကြပါသေးတယ်..။ သူဟာပရိသတ်တွေရဲ့ အနာဂတ် မျှော်လင့်ချက်.. သည်းခြေကြိုက် ကစားသမား တစ်ယောက်အဖြစ် ရောက်ရှိနေပါပြီ..။ စတန်းဖို့ဒ် ဘရစ်ချ် ပရိသတ်က သူ့ကိုချစ်မြတ်နိုးကြသလို အက်စ်တီဗာအို လေးဟာ ပရိသတ်အကြိုက် ဆွဲဆောင်မှုရှိတဲ့ ကစားဟန်ကို ပြသနိုင်တဲ့ ရှားရှားပါးပါး ကစားသမားတွေထဲမှာ ပါဝင်ပါတယ်..။ ဘောလုံးပွဲကြည့်ဖို့ လက်မှတ်ဝယ်ပြီး ကွင်းထဲမှာ လာရောက်အားပေးတယ်.. ဆိုတာဟာ သူတို့လို ကစားသမားတွေရဲ့ ကစားပုံကို ကြည့်ချင်၊ မြင်တွေ့ချင်ကြလို့ပါပဲ..။

သူဟာ လွတ်လွတ်လပ်လပ် ကစားတတ်တဲ့သူဖြစ်ပြီး အသက် (၁၈) နှစ်သား သာ ဆိုပေမယ့် တောင်ပံတွေကနေ ထိရောက်တဲ့ ထိုးဖောက်မှုတွေ ပြုလုပ်နေနိုင်ပါပြီ..။ သူ့ဆီဘောလုံးရောက်သွားတာနဲ့ ခုံမှာထိုင်နေတဲ့ ပရိသတ်တွေ.အကုန်ထပြီး မတ်တပ်ရပ်ကုန်တာပဲဗျ..။ ဒါ့ကြောင့်အခုအချိန်ကတည်းက ပရိသတ်တွေရဲ့ စိတ်နှလုံးကို ဖမ်းစားနိုင်ပြီး ဖြစ်နေတာ အသေအချာပဲဗျို့..။ ဒါ့အပြင် ကွင်းထဲကို ရောက်နေတဲ့ အချိန်တိုင်း ထိရောက်တဲ့ ပံ့ပိုးမှုတွေ၊ ပွဲအဖြေ ပြောင်းလဲနိုင်တဲ့ အခိုက်အတန့်တွေကို ဖန်တီးပေးနိုင်တဲ့သူလည်း ဖြစ်ပါတယ်..။

ဆီမာ ဂျက်စ်ဝဲလ် - တတိယဂိုးကိုတော့ ပွဲချိန် (၇၃) မိနစ်မှာ ပီဒရို နက်တို က သူ့ရဲ့အသင်းဟောင်းကို သွင်းယူခဲ့တာပါ..။ ရှင်တို့ကစားသမားတွေအနေနဲ့ ကိုယ့်ရဲ့အသင်းဟောင်းကို ဂိုးပြန်သွင်းရတဲ့အရသာ ဘယ်လိုရှိလဲ..?

ဒေးဗစ် ဆီးမင်း - Oh..! No…!! ကျွန်တော်က ဂိုးသမား.. ဆိုတော့ အဲဒီမေးခွန်းက ကျွန်တော်နဲ့မဆိုင်ဘူး.. ဟားဟား..
ဂယ်ရီ ကာဟေးလ် - ဂိုးသွင်းပြီဆိုမှတော့ အသင်းသစ်.. အသင်းဟောင်း အတူတူပါပဲ.။ အဲဒီလောက်ပဲ ဖြေပါရစေ… ဟားဟား။ ဒါပေမယ့် ချယ်လ်ဆီးအသင်းက ရရှိသွားတဲ့ တတိယဂိုးက သပ်ရပ်တဲ့ တန်ပြန်တိုက်စစ်ကနေ ရရှိခဲ့တာ ဖြစ်ပါတယ်..။ အထူးသဖြင့် အင်ဇို ဖာနန်ဒက်စ် ဟာ သူ့ဆီရောက်လာတဲ့ ဘောလုံးကို တစ်ချက်ထိန်းပြီး ဂါနာချို ရဲ့ ပြေးလမ်းထဲကို အတိအကျပေးပို့နိုင်ခဲ့ပါတယ်..။ အဲဒီဂိုးမှာ အင်ဇို ရဲ့ ကစားကွက်အမြင် ကောင်းမွန်မှုကို ချီးကျူးရမှာပါ..။ သူဟာ ဂါနာချို ဘယ်နေရာမှာရှိနေတယ်.. ဆိုတာ အတိအကျ သိနေတာကြောင့် ပြေးလမ်းထဲကို မျောပြီးချပေးနိုင်ခဲ့တာပါ..။

ဂါနာချို ကလည်း ဂျက်အင်ဂျင်ကို နှိုးလိုက်တဲ့အတိုင်း အရှိန်မြင့်ပြေးထွက်ပြီး ပီဒရို နက်တို အဆုံးသတ်နိုင်အောင် လှလှပပ ဖန်တီးပေးနိုင်ခဲ့ပါတယ်..။ ဝုလ်ဖ်အသင်းဟာ နှစ်ဂိုးရှုံးနေပြီ ဖြစ်တာကြောင့် ချေပဂိုးပြန်ပြီး ရမလား.. ဆိုပြီး တိုက်စစ်ပြန်ဖွင့်ခဲ့တဲ့အချိန် ဖြစ်နေပါတယ်..။ အဲဒီလိုအပြန်အလှန် တိုက်စစ်ဖွင့် ကစားတဲ့အချိန်မှာ ပင်ကိုယ်အရည်အသွေးကောင်းမွန်တဲ့ အသင်းက တစ်ပန်းသာတာပါပဲ..။

အခုပြထားတဲ့ပုံ (ပုံ- ၄) မှာဆိုရင် အင်ဇို ဖာနန်ဒက်စ် ဟာ ဘောလုံးလက်ခံယူမယ့် အချိန်ကတည်းက ရှေ့မှာရှိနေတဲ့ ဂါနာချို ရဲ့ ပြေးလမ်းကို ကြိုတင်ကြည့်ရှု (checking shoulder) ထားပါတယ်..။ လက်ခံရရှိတဲ့ ဘောလုံးကို တိုက်စစ်ကစားသမားရှေ့.. ပြေးလမ်းထဲကို အတိအကျ အမြန်ဆုံးပေးပို့နိုင်ဖို့ဆိုတာ ပင်ကိုယ်အရည်အချင်း ရှိနေမှသာ ပြုလုပ်နိုင်မှာပါ..။ ဂါနာချို ရဲ့ အားသာချက်က လျှင်မြန်တဲ့အမြန်နှုန်းပေါ့ဗျာ..။ နောက်ခံလူကို ကျော်ဖြတ်နိုင်ခဲ့ပြီ ဆိုမှတော့ ဖြတ်တင်ဘောဟာ သိပ်မခက်ပါဘူး..။

ဒေးဗစ် ဆီးမင်း - ဖြတ်တင်ဘော မပြုလုပ်ခင် ဂါနာချို ရဲ့ ဘောလုံးကို နှစ်ချက်ထိ ဆွဲထုတ်သွားတာလည်း အတော်ကောင်းပါတယ်..။ ပထမတစ်ချက် ဆွဲထုတ်ကတည်းက ရှေ့မှာရှိနေတဲ့ တိုက်စစ်မှူးရဲ့ နေရာကိုကြည့်ထားပြီး အတိအကျ ဖန်တီးပေးလိုက်တာပါ..။     

ဂယ်ရီ ကာဟေးလ် - ကျွန်တော်ကတော့ အင်ဇို ဖာနန်ဒက်စ် ရဲ့ ကစားကွက်အမြင် ကောင်းမွန်မှုကိုပဲ ပိုပြီးချီးကျူးမိပါတယ်..။ ကိုယ့်အသင်းခံစစ်ကြောင်းက ရှင်းထုတ်လိုက်တဲ့ ဘောလုံးကို တိုက်စစ်အဖြစ် မနားတမ်း ပြောင်းလဲပေးနိုင်ခဲ့ပါတယ်..။ အဲဒီအခိုက်အတန့်က ပိုပြီးအဓိကကျခဲ့တယ်.. မဟုတ်လားဗျ..။ ဂါနာချို ရဲ့ တစ်ချက်ထိ၊ ဒုတိယတစ်ချက်နဲ့ ဖန်တီးပေးတာလည်း ကောင်းပါတယ်..။ ဂိုးရသွားတာနဲ့ ပွဲပြီးသွားပါပြီ.. game over ပါပဲ. ဟားဟား.။

ဆီမာ ဂျက်စ်ဝဲလ် - game over.. ပွဲပြီသွားပြီပေါ့.. ဟားဟား...။ သဘောကျမိပါတယ်..။ ဒါနဲ့ပွဲအပြီးမှာ ဂျာအို ပီဒရို က ‘ကျွန်တော်တို့ဟာ ထိပ်ဆုံးလေးသင်း top four ထဲဝင်ဖို့ ရည်ရွယ်ထားပါတယ်..’ လို့ ပြောသွားပါတယ်..။ အခုဆိုရင် စနေနေ့ပွဲအပြီးမှာ အမှတ်ပေးဇယား ဒုတိယနေရာ ရောက်ရှိလာခဲ့ပါပြီ..။ (၁၁) ပွဲကစားပြီး အဆင့် (၂) နေရာဆိုတာ သူတို့တွေရဲံ လုပ်ဆောင်မှု မှန်ကန်တယ်.. ဆိုတာ ပြသနေတာ မဟုတ်ဘူးလား.? အဲဒီနေရာမှာပဲ ဆက်လက်ရပ်တည်သွားနိုင်မယ်.. လို့ မထင်မိဘူးလား..? ဂယ်ရီ ရေ..

ဂယ်ရီ ကာဟေးလ် - No.. ခင်ဗျားပြောတဲ့ဟာတွေဟာ ချယ်လ်ဆီးအသင်းမှာ ကစားပြီဆိုရင် ကြုံလာရတတ်တဲ့ ဖိအားတွေပဲဗျ..။ ကျွန်တော်တို့လည်း ရင်ဆိုင်ခဲ့ရဖူးပါတယ်..။ အခုလက်ရှိ ချယ်လ်ဆီးအသင်းဟာ လူငယ် ကစားသမားတွေနဲ့ ဖွဲစည်းထားတဲ့အသင်းဖြစ်တယ်..၊ ဆုဖလားတွေ စိန်ခေါ်နိုင်ဖို့ အချိန်ပေးရဦးမယ်လို့ ကျွန်တော်တို့တွေ အကြိမ်ကြိမ်အခါခါ ပြောခဲ့ကြပါတယ်..။ နောက်ပြီးခြေစွမ်းမတည်ငြိမ်တဲ့ (inconsistency) ကာလကို ဖြတ်သန်းရမယ် ဆိုတာ ကြိုတင်၊ ခန့်မှန်းကြပါတယ်..။

သူတို့ခြေစွမ်းကောင်းနေတဲ့ အချိန်ဆိုရင် ဘယ်အသင်းကိုမဆို အနိုင်ရရှိအောင် စွမ်းဆောင်နိုင်ပါတယ်..။ စပါး၊ လီဗာပူးလ်အသင်းတွေနဲ့ပွဲတွေ၊ ဒီနေ့ပွဲ ဒုတိယပိုင်း ခြေစွမ်းလိုပေါ့ဗျာ..။ ဒါပေမယ့် ချယ်လ်ဆီးအသင်းဟာ ဆုဖလားတွေကို စိန်ခေါ်နိုင်တဲ့အသင်း ဖြစ်နေရမယ်..၊ ထိပ်ဆုံးလေးသင်းထဲမှာ ရှိနေရမယ်..၊ ချန်ပီယံလိဂ်ဝင်ခွင့် ရရှိနေရမယ်.. ဆိုတဲ့ တောင်းဆိုမှု အမြဲတမ်းရှိနေပါတယ်..။ အခုဆိုရင် သူတို့ဟာ အသင်းနဲ့ထိုက်တန်တဲ့ ချန်ပီယံလိဂ်ပြိုင်ပွဲဝင်ခွင့် ပြန်လည်ရရှိခဲ့ပါပြီ..။ ဒါပေမယ့် ဖိအားအသစ်တွေဟာ ဆက်ပြီးရှိနေဦးမှာပါ..။

လူငယ်ကစားသမားတွေအနေနဲ့ အဲဒီဖိအားတွေအောက်မှာ ဆက်လက်သင်ယူရင်း ကောင်းမွန်တဲ့ တိုးတက်မှုတွေ စဉ်ဆက်မပြတ် ရရှိနေအောင် ကြိုးစားသွားရမှာပါ..။

 
ဆီမာ ဂျက်စ်ဝဲလ် - ဒါဆိုရင် ချန်ပီယံဆုဖလားကို စိန်ခေါ်နိုင်မယ့်အသင်း ဖြစ်လာပြီလား..?
ဒေးဗစ် ဆီးမင်း - ဒီနေ့ပွဲရလဒ်မျိုးတွေ ဆက်လက်ရရှိအောင် စွမ်းဆောင်နိုင်မယ်ဆိုရင် ဆုဖလား စိန်ခေါ်နိုင်မယ့်အသင်း ဖြစ်လာမှာပေါ့..။ အခုဆိုရင် စနေနေ့ပွဲတွေအပြီး အမှတ်ပေးဇယား ဒုတိယနေရာ.. ဆိုတာ ကျေနပ်စရာပါ..။ ဒါပေမယ့် အဲဒီအပေါ် ဂုဏ်ယူ၊ မော်ကြွားနေလို့မရပါဘူး..။ ကျွန်တော်တို့ဟာ ‘ထိပ်ဆုံးလေးသင်းထဲမှာရှိရင် ကျေနပ်ပါပြီ..’ .. အဲဒီလိုပဲ နှိမ့်ချရတာပေါ့..။ အဲဒီစကားကို ကျွန်တော်မယုံပါဘူး..။ သူတို့တွေရဲ့ စိတ်ထဲမှာ ဘယ်လောက်အထိ အမြင့်ပျံနိုင်မလဲ..? ဆိုပြီး ကြိုးစားချင်တဲ့စိတ် ရှိနေမှာ သေချာပါတယ်..။ 

ဆီမာ ဂျက်စ်ဝဲလ် - သူတို့ဟာ ခြေစွမ်းတည်ငြိမ်မှု (consistency) မရှိသေးပါဘူး.. ။ အဲဒီလိုခြေစွမ်း တည်ငြိမ်တဲ့အသင်း ဖြစ်လာအောင် ဘယ်လိုအရာတွေ ဖြည့်ဆည်းပေးဖို့ လိုအပ်နေသေးလဲ..? လေ့ကျင့်ကွင်းက အစီအစဉ်တွေကို ပြောင်းလဲရမှာလား..? ကစားသမားတွေရဲ့ ခံယူချက်၊ စိတ်ဓါတ်ပိုင်းတွေမှာ အားနည်းချက် ရှိနေတာလား..? 

ဂယ်ရီ ကာဟေးလ် - ချယ်လ်ဆီးအသင်းမှာ လောလောဆယ် အဲဒီပြဿနာတစ်ခုတည်း ရှိနေပါတယ်..။ အခုဆိုရင် အသင်းရဲ့နေရာတိုင်းမှာ လုံလောက်တဲ့ အင်အား၊ အရန်အင်အား ရှိနေပြီလို့ ယူဆရပါတယ်..။ 
ဒေးဗစ် ဆီးမင်း - ကိုယ့်ကိုယ်ကို ယုံကြည်မှု (confidence) ပိုပြီးခိုင်မာလာဖို့ လိုအပ်နေသေးလား..?

 
ဂယ်ရီ ကာဟေးလ် - အတွေ့အကြုံ ရင့်ကျက်ဖို့ (experience) လိုအပ်နေသေးတယ်.. လို့ လွယ်လွယ် ပြောလိုက်ရင် ရပါတယ်..။ ဒါပေမယ့် ခင်ဗျားပြောတဲ့ ယုံကြည်မှု၊ အတွေ့အကြုံ.. စတဲ့အချက်တွေဟာ အသင်းရဲ့ လိုအပ်ချက်တွေထဲမှာ အစိတ်အပိုင်း တစ်ခုစီအနေနဲ့ ပါဝင်နေပါတယ်..။ ဘာဖြစ်လို့လည်းဆိုတော့ အခုလက်ရှိ ချယ်လ်ဆီးအသင်းမှာ ရှိနေတဲ့ ကစားသမားတိုင်းကို သေချာကြည့်လိုက်ပါ.. ဆုဖလားကြီးတွေ ရရှိဖူးတဲ့ ကစားသမား တစ်ယောက်မှ ရှိမနေသေးသလို ပရီးမီးယားလိဂ် ချန်ပီံယံဆု လို အောင်မြင်မှုတွေ ရယူနိုင်ဖို့ လိုအပ်ချက်တဲ့ ခြေစွမ်းတည်ငြိမ်မှု (consistency) နဲ့ ပြည့်စုံနေတဲ့သူတွေ မပါဝင်ပါဘူး..။  ဒေးဗစ်.. ခင်ဗျားလည်း သိပါတယ်..။

အခုအချိန်မှာ သူတို့ဟာ အပါတ်စဉ်တိုင်းမှာ တည်ငြိမ်တဲ့ခြေစွမ်းနဲံအတူ ရလဒ်ကောင်းတွေ ဆက်တိုက်ရယူနိုင်အောင် စွမ်းဆောင်နိုင်ဖို့ ဦးတည်၊ ကြိုးပမ်းရပါမယ်..။ ဒါ့အပြင် ထိပ်တန်းအသင်းကြီးတွေကို ယှဉ်ပြိုင်နိုင်စွမ်း ရှိရမယ်..၊ ပွဲကြီးပွဲကောင်းတွေမှာ ရလဒ်ကောင်းတွေ ရယူနိုင်စွမ်းရှိတယ်ဆိုတာ သက်သေပြနိုင်ဖို့.. စတဲ့အချက်တွေ ပါဝင်တာပေါ့..။ ဒီနေ့ပွဲဆိုရင် ပထမပိုင်းမှာ အခက်အခဲတွေနဲ့ ရင်ဆိုင်ရပေမယ့် လိုအပ်တဲ့အနိုင်ရလဒ် ရရှိအောင် စွမ်းဆောင်နိုင်ခဲ့ပါတယ်..။ ဒါဟာထင်ရှားတဲ့ ဥပမာပေါ့ဗျာ..။

ဒေးဗစ် ဆီးမင်း - ကိုးလ် ပါးမား ပြန်လည်ပါဝင်နိုင်ဖို့.. အဲဒီတစ်ချက်လည်း ထည့်သွင်းထားရမယ်ဗျ..။ 
ဆီမာ ဂျက်စ်ဝဲလ် - မှန်တာပေါ့..။ အသင်းတစ်သင်းရဲ့ အရန်အင်အား တောင့်တင်းမှု (squad depth) အကြောင်း ပြောမယ်ဆိုရင် လက်ရှိအချိန်မှာ ချယ်လ်ဆီးအသင်းဟာ အာဆင်နယ်ရဲ့ အရန်အင်အား တောင့်တင်းမှုကို မမှီပါဘူး..။ ဒါပေမယ့် ယုံကြည်မှု (confidence) ပိုင်းမှာတော့ ပြီးခဲ့တဲ့ရာသီကတည်းက ဆုဖလားကြီးတွေ ဆွတ်ခူးခဲ့တာကြောင့် ပြည့်စုံနေပြီ.. လို့ ပြောနိုင်တယ်မလား..?

ဂယ်ရီ ကာဟေးလ် - Yeah…! ချယ်လ်ဆီးအသင်းဟာ ပြီးခဲ့တဲ့ရာသီပန်းဝင်ကာလမှာ ဆုဖလား နှစ်လုံး ဆွတ်ခူးနိုင်ခဲ့ပါတယ်..။ အဲဒီအောင်မြင်မှုတွေဟာ အသင်းရဲ့ ယုံကြည်မှုပိုင်းမှာ ကြီးကြီးမားမား တိုးတက်၊ ပြောင်းလဲစေခဲ့တာ အမှန်ပါပဲ..။ သူတို့တွေဟာ ဆုဖလားကိုင်မြှောက်ခြင်းရဲ့ အရသာကို သိရှိပြီး ဖြစ်တာကြောင့် ဆုဖလားတွေ ဆက်ပြီးရချင်တယ်..၊ အောင်ပွဲဆာလောင်တဲ့စိတ်တွေ အထူးပြင်းပြနေပါလိမ့်မယ်..။ အဲဒီလိုဆုဖလားတွေ ဆွတ်ခူးနိုင်ခဲ့တာဟာ အသင်းသားတွေရဲ့ အတွေ့အကြုံပိုင်းမှာပါ ကြီးမားတဲ့ ဖြည့်ဆည်းမှုတွေ ဖြစ်လာပါမယ်..။ 

ဒီအသင်းဟာ အတွေ့အကြုံ မရှိသေးပါဘူး.. ဆိုပြီး တစ်နှစ်ပြီးတစ်နှစ် ပြောနေလို့ မရပါဘူး..။ သူတို့လေးတွေဟာ ဘောလုံးရာသီ တစ်ရာသီပြီးတစ်ရာသီ ဖြတ်သန်းနေရင်း အတွေ့အကြုံတွေ ရှာမှီး၊ ဖြည့်ဆည်းနေကြပါတယ်..။ အထူးသဖြင့် ပြီးခဲ့တဲ့ရာသီမှာ ကလပ်အသင်းများ ကမ္ဘာ့ဖလားပြိုင်ပွဲ ယှဉ်ပြိုင်ခွင့်ရခဲ့ပြီး အသင်းကြီးတွေကို အနိုင်ယူ၊ အောင်ပွဲခံနိုင်ခဲ့တာဟာ လူငယ်လေးတွေနဲ့ ဖွဲ့စည်းထားတဲ့ ဒီအသင်းအတွက် တကယ့်ကို ကြီးမားတဲ့ အောင်မြင်မှု အခိုက်အတန့်တွေ ဖြစ်ခဲ့ပါတယ်..။

ဒါ့ကြောင့်ချယ်လ်ဆီးအသင်းဟာ ရရှိထားတဲ့ အောင်မြင်မှုတွေအပေါ် အခြေခံပြီး ဆက်လက် တည်ဆောက်ရပါဦးမယ်..။ အခုအချိန်မှာလည်း မှန်ကန်တဲ့လမ်းကြောင်းပေါ်ကနေ တစ်ဆင့်ချင်း တိုးတက်၊ တည်ဆောက်နေကြပါတယ်..။ ဆုဖလားကြီးတွေကို ဆွတ်ခူးနိုင်ဖို့ ‘တည်ငြိမ်တဲ့ခြေစွမ်း (consistency)’ ဆိုတဲ့ လိုအပ်ချက်တစ်ခုကိုပဲ ဖြည့်ဆည်းနိုင်ဖို့ လိုအပ်ပါတော့တယ်..။