ပရီးမီးယားလိဂ်၊ ပွဲစဉ် (၁၂) အဖြစ် ဘန်လေအသင်း၏ Turf Moor ကစားကွင်း၌ ဘန်လေအသင်းနှင့် ချယ်လ်ဆီးအသင်းတို့ ယှဉ်ပြိုင်ကစားခဲ့ကြရာ ချယ်လ်ဆီးအသင်းက ၂ဂိုး- ဂိုးမရှိဖြင့် အနိုင်ရခဲ့သည်..။ အဆိုပါပွဲစဉ်မှ ချယ်လ်ဆီးအသင်း၏ သွင်းဂိုးများ၊  ထရေဗာ ချာလိုဘာ ၏ ဂိုးလွန်ဘောကို လက်ထိခဲ့သည့်အပေါ် သူတို့၏အမြင်များနှင့် လာမယ့်အပါတ်တွင် ပွဲကြီးပွဲကောင်းများ ရင်ဆိုင်ရမည့် ချယ်လ်ဆီးအသင်းအပေါ် ချယ်လ်ဆီးအသင်း ဂန္ထဝင်နောက်ခံလူဟောင်း ဂယ်ရီ ကာဟေးလ် နှင့် လီဗာပူးလ်အသင်း တိုက်စစ်မှူးဟောင်း မိုက်ကယ် အိုဝင် တို့က Premier League Production မှတင်ဆက်သည့် ပွဲပြီးစကားဝိုင်း အစီအစဉ်တွင် အောက်ပါအတိုင်း ဆွေးနွေးခဲ့ကြပါသည်..။

ဂျူလီယာ စတူးဝပ် - ဒီနေ့ပွဲအပြီး သတင်းထောက်တွေနဲ့ တွေ့ဆုံတဲ့အချိန်မှာ ပီဒရို နက်တို က မနေ့ကလေ့ကျင့်ခန်းမှာ ခေါင်းတိုက်ပြီးဂိုးသွင်းဖို့ အခွင့်အရေး ရခဲ့ပေမယ့် လွဲချော်ခဲ့တယ်..၊ ဒီနေ့တကယ့်ပွဲကြီးကျမှ ဂိုးဝင်သွားခဲ့တယ်.. လို့ ပြောခဲ့တာ စိတ်ဝင်စားစရာပဲရှင့်..။

မိုက်ကယ် အိုဝင် - ဟုတ်ပါပြီ..။ လေ့ကျင့်ကွင်းမှာ သူတို့တွေ ဘယ်လိုကစားနေတယ်.. ဆိုတာ ဘယ်သူကမှ မမြင်ကြရတာဗျာ..။ လေ့ကျင့်ကွင်းဆိုတာ ကိုယ့်ရဲ့နည်းစနစ်တွေ၊ ကျွမ်းကျင်မှုတွေကို ကောင်းသထက် ပိုပြီးကောင်းမွန်လာအောင် အထပ်ထပ်အခါခါ ကြိုးစား၊ လေ့ကျင့်ရတဲ့နေရာ ဖြစ်ပါတယ်..။ ဒါပေမယ့် ပီဒရို နက်တို ရဲ့ အဲဒီခေါင်းတိုက်ဘောဟာ အရမ်းကြီးခက်ခဲတဲ့ ခေါင်းတိုက်ချက်တော့ မဟုတ်ဘူးဗျ..။ ဘာဖြစ်လို့လည်းဆိုတော့ ဖြတ်တင်ဘောက အရမ်းကောင်းလွန်းခဲ့တာကိုး..။ 

သူ့အနေနဲ့ ဂိုးပေါက်ဘက်ကိုဝှေ့ပြီး ကျလာတဲ့ဘောလုံးကို ဖြတ်တိုက်ရတာ ဖြစ်တဲ့အတွက် ဘောလုံးကို ကိုယ်သွားစေချင်တဲ့ဘက်ရောက်အောင် တိုက်ရတာ လွယ်ကူသွားတဲ့သဘော ရှိပါတယ်..။ ဂျေမီ ဂစ်တန်စ် ရဲ့  ဖြတ်တင်ဘောဟာ သိပ်ကိုကောင်းမွန်ခဲ့သလို ပီဒရို နက်တို ရဲ့ ခေါင်းတိုက်ချက်ကလည်း လှပပါတယ်..။ အဖွင့်ဂိုးရပြီးနောက်ပိုင်း ချယ်လ်ဆီးအသင်းဟာ ယုံကြည်မှုပိုပြီး ကောင်းမွန်သွားခဲ့တာကို မြင်တွေ့ခဲ့ရပါတယ်..။ ဒါ့ကြောင့်အနိုင်ရဖို့ သေချာသွားတယ်လို့ ပြောရမှာပါပဲ..။

ပွဲချိန် (၃၇) မိနစ်မှာ ရရှိသွားခဲ့တဲ့ဂိုးဟာ ချယ်လ်ဆီးအသင်း နောက်တန်းကနေ ဘန်လေအသင်းရဲ့ ခံစစ်ကြောင်းရဲ့နောက်ကို ချပေးလိုက်တဲ့ဘောလုံးကို မာ့စ် ကူကူရယ်လာ က အတင်းလိုက် ဆယ်ကူပြီး နောက်ကိုခင်းပေးလိုက်တာကနေ စတင်ပါတယ်..။ မာ့စ် ကူကူရယ်လာ ရဲ့ နောက်တန်းလူတွေကြားထဲကနေ ပါးပါးနပ်နပ် ပြေးထွက်ပုံနဲ့ သူ့ရဲ့နောက်ကို တောက်လျှောက်လိုက်ပါလာတဲ့ အူဂိုချူကူး နဲ့ ဗဟိုနောက်ခံလူ တူရန်ဇဘီ တို့ရဲ့ကြားထဲကနေ ဘောလုံးရအောင် ဆယ်ယူလိုက်တဲ့ hold up play အတော့်ကို ကောင်းပါတယ်..။ ဂျေမီ ဂစ်တန်စ် ရဲ့ ဖြတ်တင်ဘောကလည်း တကယ့်ကို ကောင်းမွန်ခဲ့တယ်..၊ ပီဒရို နက်တို ရဲ့ ခေါင်းတိုက်ချက်ကလည်း လှပ၊ သပ်ရပ်ခဲ့ပါတယ်..။ ဒါပေမယ့် ဘန်လေအသင်းက နောက်ခံလူ ဟာ့တ်မန်း အနေနဲ့ အခုထက်ပိုကောင်းအောင် ဖျက်ထုတ်နိုင်ခဲ့သင့်တယ်.. လို့ ခင်ဗျားမထင်မိဘူးလား..? ဂယ်ရီ ရေ..

ဂယ်ရီ ကာဟေးလ် - ဂစ်တန်စ် ရဲ့ ဖြတ်တင်ဘော ရောက်လာချိန် ဟာ့တ်မန်း ဟာ သူ့ရဲ့နားမှာ ပီဒရို နက်တို နဲ့ အင်ဇို ဖာနန်ဒက်စ် နှစ်ယောက်ရှိနေတော့ တစ်ယောက်ကိုပဲ ရွေးရပါတော့မယ်..။ အဲဒါနဲ့သူဟာ အနီးဆုံးမှာရှိနေတဲ့ အင်ဇို ဖာနန်ဒက်စ် ကိုပဲ လူကပ်လိုက်ဖို့ ရွေးချယ်လိုက်ပုံရတယ်ဗျ..။ ဂိုးဧရိယာထဲကို အင်ဇို ဖာနန်ဒက်စ် နဲ့ ဆက်ပြီးလိုက်ပါဖို့ တကယ်တမ်းတာဝန်ရှိတာက ကွင်းလယ်က ဖလော်ရင်တီနာ ဗျ..(ပုံ- ၁)။ သူသာဆက်ပြီး လိုက်ပါခဲ့မယ်ဆိုရင် ဟာ့တ်မန်း အတွက် အခုထက်ပိုပြီး လွယ်ကူခဲ့ပါလိမ့်မယ်..။ ဒါပေမယ့် ဂစ်တန်စ် ရဲ့ ဖြတ်တင်ဘောကိုတော့ ချီးမွမ်းရမှာပါ..။ ပွဲအဖြေကိုပြောင်းလဲပေးနိုင်တဲ့ ပေးပို့မှုဆိုတာ အခုလိုဖြတ်တင်ဘောတွေကို ညွှန်းဆိုရမှာပါပဲ..။

မိုက်ကယ် အိုဝင် - ခင်ဗျားက ဟာ့တ်မန်း ဟာ နှစ်ယောက်ထဲက တစ်ယောက်ကို ရွေးရတော့မယ်.. လို့ ပြောလို့ပါ..။ ခင်ဗျားတို့နောက်ခံလူတွေအနေနဲ့ လူကိုအာရုံစိုက်ရမယ့်အစား ဂိုးဧရိယာထဲကို ဝင်လာတဲ့ ဘောလုံးကို အာရုံစိုက်မယ်.. ဆိုရင်ရော မရဘူးလား..? တကယ်လို့ သူသာဘောလုံးကျလာမယ့်နေရာကို ကြိုတင်မှန်းဆနိုင်ခဲ့မယ်ဆိုရင် သူ့နားမှာ ဘယ်သူအနီးဆုံး..၊ ဘယ်သူကအဝေးဆုံး.. ဆိုတာ အရေးမကြီးတော့ဘူးမလား..? ဘောလုံးရနိုင်မယ့်သူဆီပဲ ပြေးကပ်လိုက်ရင် မရနိုင်ဘူးလား?.. တွေးကြည့်တာပါ..။ ကြည့်ရတာ သူ့ရဲ့ရှေ့ကနေ ဖြတ်ပေးသွားခဲ့တဲ့ အင်ဇို ဖာနန်ဒက်စ် ကြောင့် အာရုံပြောင်းသွားပုံ ရပါတယ်..(ပုံ- ၂)။

ဂယ်ရီ ကာဟေးလ် - ဒါပေါ့..။ အဲဒါကြောင့် ကျွန်တော်ဟာ ကိုယ်ကပ်ရမယ့်လူနဲ့ ဆက်ပြီးမလိုက်ပါခဲ့တဲ့ ကွင်းလယ်က ဖလော်ရင်တီနို ကို စိတ်တိုမိတာပါ..။ သူဟာအန္တရာယ်ကို ကြိုတင်၊ မြင်နိုင်ရမှာ ဖြစ်သလို အင်ဇို ဖာနန်ဒက်စ် နဲ့ ဂိုးဧရိယာထဲထိ ဆက်လက် လိုက်ပါရမှာပါ..။ နောက်ခံလူ တစ်ယောက်အမြင်..၊ ရှုထောင့်ကဆိုရင် အတော်လေး စိတ်ပျက်စရာပါ.။ ဒါပေမယ့်ဗျာ.. ဖြစ်ပြီးသွားပြီ..၊ ဘာမှမတတ်နိုင်တော့ဘူး..။ ကျွန်တော်သာ နှစ်ယောက်ထဲက တစ်ယောက်ကို ရွေးရတော့မယ်.. ဆိုရင် ဘောလုံးဝင်လာမယ့် လမ်းကြောင်းကို မှန်းဆနိုင်အောင် ကြိုးစားပြီး လူထက်စာရင် ဘောလုံးကိုဦးစားပေး ရှင်းထုတ်နိုင်ဖို့ကိုပဲ ကြိုးစားရမှာပါ..။

ဒါပေမယ့် ဟာ့တ်မန်း ဟာ ဘယ်နောက်ခံလူ ဖြစ်တာကြောင့် သူ့ရဲ့ရှေ့က ဖြတ်ပြေးသွားတဲ့ အင်ဇို နဲ့ လိုက်ပါဖို့ ဆုံးဖြတ်လိုက်တယ်.. ဆိုတာ သူ့ရဲ့မူလတာဝန် ဖြစ်နေတာကိုး..၊ အဲဒီတော့ လုံးဝကိုမှားယွင်းတယ်လို့ ပြောလို့မရပြန်ပါဘူး..။ သူ့ရဲ့နောက်မှာ တစ်ယောက်ရှိနေခဲ့ရင် အဲဒီတစ်ယောက်က ဘောလုံးကိုရှင်းထုတ်ဖို့ တာဝန်ရှိပါလိမ့်မယ်..။ တကယ်တမ်းသူဟာ နှစ်ယောက်၊ တစ်ယောက် 2 vs 1 အနေအထား မဖြစ်သွားသင့်ဘူးပေါ့ဗျာ..။ ဒီဂိုးမှာအရေးကြီးဆုံးက ဖြတ်တင်ဘောက ကောင်းလွန်းခဲ့တာပါ..။ အဲဒီအချက်က အဓိကအကျဆုံးပါပဲ..။

ဂျူလီယာ စတီးဝပ် - ဟုတ်ကဲ့ပါရှင့်..။ ဒီနေ့ပွဲမှာတော့ အရည်အသွေးကောင်းတဲ့ ဖြတ်တင်ဘောတွေ၊ ဂိုးဖန်တီးမှုတွေအကြောင်း ကျွန်မတို့ဆွေးနွေးကြရမှာပေါ့..။ ပွဲချိန် (၈၈) မှာ ရရှိသွားခဲ့တဲ့ အင်ဇို ဖာနန်ဒက်စ် ရဲ့ သွင်းဂိုးဟာ လူငယ်တိုက်စစ်မှူး မာ့စ် ဂီယူ ရဲ့ ပရီးမီးယားလိဂ်ပြိုင်ပွဲမှာ ပထမဆုံး ဂိုးပါဝင်ပတ်သက်မှု (goal involvement) ဖြစ်ခဲ့ပါတယ်..။ သူ့ရဲ့ဖန်တီးပေးမှုကနေတဆင့် ချယ်လ်ဆီးအသင်းရဲ့ အနိုင်ပွဲဟာ သေချာခဲ့တာပေါ့ရှင့်..။ ၁ - ၀ ဆိုတာ ဘာမဆို ဖြစ်သွားနိုင်ပါတယ်..။ ချယ်လ်ဆီးအသင်းဟာ ပွဲပြီးခါနီးမှ အနိုင်ရလဒ် သေချာသွားခဲ့တယ်လို့ ပြောရမှာပဲ…

မိုက်ကယ် အိုဝင် - မာ့စ် ဂီယူ ရဲ့ နေရာယူ၊ ပြေးထွက်သွားပုံ ကောင်းမွန်သလို အတော်လည်း ကြံ့ခိုင်၊ သန်မာတာပဲဗျ..။ အဲဒီဂိုးဟာ ဘန်လေအသင်းရဲ့ တိုက်စစ်ကို ကာကွယ်ခဲ့ပြီး တန်ပြန်တိုက်စစ်ကနေ ရရှိခဲ့တာပါ..။ ပွဲပြီးခါနီးအချိန် မာလို ဂူစ်တို နဲ့ ဂိုးသမား ဆန်းချက်ဇ် တို့ရဲ့ ကိုယ့်ကိုယ်ကိုယုံကြည်မှု အတော်လေးကို ကောင်းတာပဲဗျ.. ဟားဟား..။ သူတို့နှစ်ယောက် အပေးအယူလုပ်ပြီး မာလို ဂူစ်တို ဟာ ညာတောင်ပံကနေ ဆွဲတက်သွားပါတယ်..။ သူနဲ့ မာ့စ် ဂီယူ… လူစားဝင် ကစားသမား နှစ်ယောက်ဟာ အသင်းရဲ့ဒုတိယဂိုးမှာ အရေးပါတဲ့နေရာကနေ ပါဝင်ခဲ့ပါတယ်..။ 

ပီဒရို နက်တို ရဲ့ ပါးပါးနပ်နပ်နဲ့ ဖြတ်ထွက်သွားပုံ ကောင်းမွန်ခဲ့သလို မာ့စ် ဂီယူ ဟာ သူနဲ့အတူ ကပ်ပါလာတဲ့ နောက်ခံလူ အက်ဆယ်လ် တူရန်ဇဘီ ကို လွတ်အောင်ရုန်းထွက်ခဲ့ရာမှာ ခန္ဓာကိုယ်ကြံ့ခိုင်မှုနဲ့ ခွန်အားသုံး ကစားနိုင်ခဲ့တဲ့အပိုင်းမှာ သိပ်ကိုကောင်းမွန်ခဲ့ပါတယ်..။ အဲဒီဂိုးမှာ အဆုံးသတ်ဂိုးသွင်းပေးလိုက်တဲ့ အင်ဇို ဖာနန်ဒက်စ် က အလွယ်ဆုံးပဲဗျ..။ ကျွန်တော်ပြောချင်တာက ခင်ဗျားတို့ဂိုးဧရိယာအတွင်းမှာ ရဲရဲရင့်ရင့် ဘောလုံးကိုင် ကစားခဲ့တဲ့ ဂူစ်တို နဲ့ ရောဘတ် ဆန်းချက်ဇ် တို့နှစ်ယောက်ကိုပါဗျာ..။ ပွဲချိန် (၈၈) မိနစ်၊.. ကိုယ့်ဘက် တစ်ဂိုးပဲ အသာရနေတာနော်…

ဂယ်ရီ ကာဟေးလ် - ဂူစ်တို က ရင်ဘတ်နဲ့ထိန်းပြီး ဂိုးသမားဆန်းချက်ဇ် ကို ပြန်ချပေးမယ်လို့ပဲ မှန်းဆထားတာဗျ..။ ဒါပေမယ့် ဆန်းချက်ဇ် ဟာ ပိုပြီးအေးအေးဆေးဆေးနဲ့ ဂူစ်တို ရဲ့ အမှားကို ပြန်ကယ်ပေးလိုက်ပါတယ်..။ အမှားအယွင်း ဖြစ်တော့မလို အနေအထားကနေ တကယ့်ကို လှပခဲ့တဲ့ play out from the back ကစားပုံတစ်ခု ဖြစ်ခဲ့တာပေါ့..။ တစ်မိနစ်အတွင်းမှာ တစ်ဘက်ဂိုးပေါက်ထဲ ဘောလုံးရောက်သွားရော…

မာ့စ် ဂီယူ ဟာ သင့်တော်တဲ့အချိန်မှာ မှန်ကန်တဲ့ ဆုံးဖြတ်ချက်တွေ ပြုလုပ်နိုင်တဲ့ တိုက်စစ်မှူးကောင်းတစ်ယောက် ဖြစ်ပါတယ်..။ သူ့ရဲ့ပြေးထွက်ပုံ၊ ခွန်အားသုံး ကစားပုံတွေဟာ သိပ်ကိုကောင်းပါတယ်..။

ဂျူလီယာ စတီးဝပ် - အခုလက်ရှိ ဘောလုံးရာသီမှာ ချယ်လ်ဆီးအသင်းရဲ့ ဂိုးအများဆုံးသွင်းယူပေးထားတဲ့ ကစားသမားတွေကို ကြည့်မယ်ဆိုရင် အင်ဇို ဖာနန်ဒက်စ် ဟာ ပြိုင်ပွဲစုံသွင်းဂိုး (၅) ဂိုးနဲ့ ဦးဆောင်နေသလို ပီဒရို နက်တို ဟာလည်း ပရီးမီးယားလိဂ်သွင်းဂိုး (၄) ဂိုး ရခဲ့ပါပြီ..။ ဒါပေမယ့်ကျွန်မတို့ဟာ ဂိုးသွင်းပေးနိုင်တဲ့ ကစားသမားတွေကိုပဲ သီးခြားချီးမွမ်းနေသလို ဖြစ်နေပါတယ်..။ ဂယ်ရီ ရေ.. ရှင်တို့အသင်းရဲ့ ခံစစ်ပိုင်းမှာ တိုးတက်၊ ကောင်းမွန်လာမှုကိုလည်း မေ့ထားလို့ မရဘူးနော..။ အခုဆိုရင် နောက်ဆုံးသုံးပွဲဆက်တိုက် ပေးဂိုးမရှိ (clean sheet) ရထားခဲ့ပါပြီ..။

ဂယ်ရီ ကာဟေးလ် - မိနစ် (၂၀) လောက်အထိ သူတို့ရဲ့ခံစစ်ကြောင်း နေရာယူပုံဟာ ရှေ့ကိုရောက်လွန်းတယ်.. (too high) လို့ ထင်မိပါတယ်..။ အဲဒီနောက်ပိုင်းမှာ ကစားတာ ကောင်းပါတယ်..။ အစောပိုင်းမှာ တန်ပြန်တိုက်စစ်တွေကနေ အခွင့်အရေး ပေးရမလို အနေအထားတွေ ရှိခဲ့ပေမယ့် ရှင်းထုတ်ပုံတွေ ကောင်းမွန်ခဲ့ပါတယ်..။ ပွဲချိန်ကြာလာတာနဲ့ အသင်းရဲ့ခံစစ်ကြောင်းဟာ ပိုပြီးကျစ်လျစ်လာခဲ့တယ်ဗျ..။ သုံးပွဲဆက်တိုက် ပေးဂိုးမရှိ (clean sheet) ရခဲ့တာဟာ ပရီးမီးယားလိဂ်မှာ ဂုဏ်ယူဖို့ကောင်းတယ်လို့ ပြောရမှာပါ..။ အထူးသဖြင့် ဝုလ်ဖ်အသင်းနဲ့ပွဲအပြီး နိုင်ငံလက်ရွေးစင်ပွဲတွေ ယှဉ်ပြိုင်ရပါတယ်..။ အခုပြန်စတဲ့အချိန်မှာ အရင်ကခြေစွမ်းကို ဆက်လက်သယ်ဆောင်နိုင်ပြီး ရလဒ်ကောင်းခဲ့တာဟာ ဂုဏ်ယူဖို့ကောင်းတဲ့ ခြေစွမ်းပါ..။ ချန်ပီယံဆုဖလား စိန်ခေါ်နိုင်ဖို့ဆိုရင် အခုလိုတည်ငြိမ်တဲ့ခြေစွမ်းပြသနိုင်ဖို့ လိုအပ်ပါတယ်..။

ဂျူလီယာ စတီးဝပ် - Yeah..! အခုဆိုရင် ရှင်တို့အသင်းဟာ အမှတ်ပေးဇယားကို ဦးဆောင်နေတဲ့ အာဆင်နယ်အသင်းထက် သုံးမှတ်ပဲလျော့နေပြီး မန်ချက်စတာ စီးတီးအသင်းကို ကျော်ဖြတ်လို့ ဒုတိယနေရာ ရောက်ရှိသွားခဲ့ပါပြီ..။ အာဆင်နယ်နဲ့ မန် စီးတီးအသင်းတွေဟာ မနက်ဖြန်ကျရင် ယှဉ်ပြိုင်ရဦးမှာပါ..။ ဒါပေမယ့် လာမယ့်တနင်္ဂနွေနေ့ကျရင် အမှတ်ပေးဇယားထိပ်ဆုံးက အသင်းနှစ်သင်း ထိပ်တိုက်ယှဉ်ပြိုင်ရတဲ့ top of table clash ပွဲစဉ်လည်း ဖြစ်လာနိုင်တာပဲ..။

မိုက်ကယ် အိုဝင် - မှန်တာပေါ့..။ ရုတ်တရက်.. ဆိုသလိုပဲ တကယ့်ပွဲကြီးပွဲကောင်း..၊ အမှတ်ပေးဇယား ထိပ်ဆုံးက အသင်းတွေ ရင်ဆိုင်ရတဲ့ပွဲကြီး ဖြစ်လာမှာပါ..။ ဒါပေမယ့် ချယ်လ်ဆီးနဲ့အာဆင်နယ်.. ပွဲတွေဟာ အမြဲတမ်းပွဲကြီးပွဲကောင်းတွေ ဖြစ်ကြပါတယ်..။ လာမယ့်တနင်္ဂနွေနေ့ပွဲကတော့ အခုလိုအကြောင်းရင်းနဲ့ ပိုပြီးတော့တောင် ကြီးကျယ်၊ ခမ်းနားဦးမယ့်ပွဲတစ်ပွဲ ဖြစ်လာပါလိမ့်မယ်..။

အခုဆိုရင် ချယ်လ်ဆီးအသင်းဟာ အမှတ်ပေးဇယားထိပ်ဆုံးက အာဆင်နယ်အသင်းကို လိုက်လို့မှီနိုင်မယ့် အလားအလာ ရှိလာပြီပေါ့..။ အာဆင်နယ်အသင်းဟာ ချယ်လ်ဆီးနဲ့မတွေ့ခင် လန်ဒန်မြို့ခံပြိုင်ဘက် တော့တင်ဟမ် အသင်းနဲ့ မြောက်လန်ဒန်ဒါဘီပွဲစဉ် ယှဉ်ပြိုင်ရဖို့ ရှိနေပါသေးတယ်..။ အဲဒီပွဲတွေဟာလည်း အမြဲတမ်း ခက်ခဲတဲ့ပွဲတွေပါပဲ..။

ဂယ်ရီ ကာဟေးလ် - စနေနေ့အစောဆုံး (၁၂း၃၀) မှာ ကန်ရတဲ့ ပွဲတွေရဲ့ ဆုလာဘ်ပေါ့ဗျာ..။ ကိုယ့်အသင်းကသာ တာဝန်ကျေကျေနဲ့ လိုချင်တဲ့ရလဒ် ဆောင်ယူနိုင်ခဲ့ပြီဆိုရင် တခြားအသင်းတွေရဲ့ပွဲတွေကို အေးအေးဆေးဆေး ဒူးနှံ့ပြီး ထိုင်ကြည့်နေရုံပါပဲ..။

ဂျူလီယာ စတီးဝပ် - အခုအချိန်မှာတော့ ရှင်တို့အသင်းဟာ တာဝန်ကျေခဲ့ပြီပေါ့..။ ဒါပေမယ့် ပွဲချိန် (၂၇) မိနစ်မှာ ဂိုးတည်ကန်ဘောကို ထရေဗာ ချာလိုဘာ လက်နဲ့ထိမိခဲ့တာ ပင်နယ်တီမပေးခဲ့ရလို့ ရှင်တို့အသင်း ကံကောင်းခဲ့ပါသေးတယ်..။ ကျွန်မအခုလိုပြောတာ ရှင်တို့တွေ သဘောတူကြလိမ့်မယ်လို့ မထင်ပါဘူး.. ဟားဟား..

မိုက်ကယ် အိုဝင် - ဟားဟား.. ကွင်းလယ် ဒိုင်လူကြီး ပီတာ ဘန်းကတ်စ် ပင်နယ်တီ မပေးခဲ့တာကို သဘောတူပါတယ်..။ ချန်ပီယံလိဂ်ပြိုင်ပွဲမှာတုန်းက အက်စ်တွန် ဗီလာအသင်းက တိုင်ရာ မင်းဂ် ဟာ အလားတူ ဖြစ်ရပ်မျိုးနဲ့ ပင်နယ်တီပေးခဲ့ရဖူးပါတယ်..။ ဂိုးသမား ရောဘတ် ဆန်းချက်ဇ် ဟာ ထရေဗာ ချာလိုဘာ ကို ဂိုးလွန်ဘောအဖြစ်နဲ့ ပြန်စဖို့ ဘောလုံးကို တည်ထားပေးခဲ့ပြီးပြီလို့ ယူဆစရာ ရှိပါတယ်..။ ဘာဖြစ်လို့လည်းဆိုတော့ သူဟာဘောလုံးရဲ့ အနားကနေ ပြေးထွက်ပြီး ထရေဗာ ချာလိုဘာ လူပေးလို့ရအောင် နေရာယူထားတဲ့ပုံစံ မြင်နေရပါတယ်..။

နောက်တော့ သူကိုယ်တိုင်တောင် ဘာဖြစ်သွားလဲ.. သေချာမသိပဲ ကြောင်တောင်တောင် ဖြစ်သွားသလိုပါပဲ..။ ထရေဗာ ချာလိုဘာ ကျတော့ ဘန်လေအသင်းရဲ့ တိုက်စစ်မှူး ဇီယန် ဖလဲမင်း ဟာ ချယ်လ်ဆီးအသင်းရဲ့ ပင်နယ်တီ ဧရိယာထဲမှာ ရှိနေတယ်လို့ ယူဆမိခဲ့လို့ ဂိုးလွန် သူကိုယ်တိုင်ပဲ ပြန်ပြီးစတင်ဖို့ ဆုံးဖြတ်လိုက်ပုံ ရပါတယ်..(ပုံ- ၃)။ ကျွန်တော်သာ ဒိုင်လူကြီးဆိုရင် နောက်ခံလူဟာ ဘောလုံးကိုလက်နဲ့ ထိမိခဲ့လား..? တစ်ဖက်အသင်း ကစားသမားကရော ဂိုးဧရိယာထဲမှာ ရှိနေခဲ့လား..? သေချာအောင် ပြန်လည်စစ်ဆေးကြည့်ပါမယ်..။ ဂယ်ရီ ရေ.. ဒိုင်လူကြီး ပီတာ ဘန်းကတ်စ် က အခုဖြစ်ရပ်ကို အရေးယူဖို့ မစဉ်းစားခဲ့တာ မှန်ကန်တယ်လို့ ထင်တယ်မလား..?

ဂယ်ရီ ကာဟေးလ် - ဒိုင်လူကြီးအနေနဲ့ ဆုံးဖြတ်ချက်တစ်ခု မချမှတ်ခင် သူ့ဘက်က (၁၀၀ %) ရာခိုင်နှုန်းပြည့် သေချာနေဖို့ လိုအပ်ပါတယ်..။ အဲဒီအချက်က အဓိကပါပဲ..။ အခုဖြစ်ရပ်ကို နှစ်မျိုးအဓိပ္ပါယ် ဖွင့်ဆိုလို့ ရပါတယ်..။ ခုနက မိုက်ကယ် ပြောသလို ဂိုးသမား ဆန်းချက်ဇ် ဟာ ဂိုးလွန်ဘောပြန်စဖို့ တည်ထားခဲ့ပြီး ထွက်သွားခဲ့တာလဲ ဖြစ်နိုင်သလို သူတို့အချင်းချင်းကြားမှာ အမှန်တကယ် နားလည်မှု လွှဲမှားသွားခဲ့တာလည်း ဖြစ်နိုင်တာပါပဲ..။ 

ဒါဆိုရင် အကြီးအကျယ် မှားယွင်းခဲ့တာ ဖြစ်သလို နောက်ဆက်တွဲ အကျိုးဆက်တွေဟာ ကြီးမားပါတယ်..။ ဒါ့ကြောင့်ဒိုင်လူကြီးအနေနဲ့ ဆုံးဖြတ်ချက်မချမှတ်ခင် သူ့ဘက်က (၁၀၀ %) သေချာနေဖို့ လိုအပ်တယ်.. ဆိုတာ ပြောချင်ပါတယ်..။ အခုဖြစ်ရပ်မှာတော့ ဒိုင်လူကြီးရဲ့ ဆုံးဖြတ်ချက် မှန်ကန်တယ်လို့ပဲ မြင်မိပါတယ်..။ ဒါပေမယ့် အန္တရာယ် သိပ်ကြီးလွန်းပါတယ်…။ 

ဂျူလီယာ စတူးဝပ် - Ok.. ချယ်လ်ဆီးအသင်း ပင်နယ်တီမပေးရတာကို ရှင်တို့နှစ်ယောက်စလုံး သဘောတူကြပါတယ်..။ ချယ်လ်ဆီးအသင်းဟာ အခုလာမယ့်အပါတ်မှာ ဘာစီလိုနာအသင်းနဲ့ စတန်းဖို့ဒ် ဘရစ်ချ်ကွင်းမှာ ချန်ပီယံလိဂ်ပြိုင်ပွဲ ယှဉ်ပြိုင်ရပါမယ်..။ အဲဒါပြီးရင် အာဆင်နယ်အသင်းနဲ့ ပရီးမီးယားလိဂ်.. ဆိုတော့ တကယ့်ကို အရေးအပါဆုံး ရက်သတ္တပါတ်တစ်ခုပါပဲ..။ ဂယ်ရီ ရေ.. ဘာစီလိုနာ အသင်းနဲ့ စတန်းဖို့ဒ် ဘရစ်ချ်ကွင်းက ချန်ပီယံလိဂ် ညချမ်းတွေကို အမှတ်ရနေဆဲပဲမလား..?

ဂယ်ရီ ကာဟေးလ် - အခုလာမယ့်ပွဲကြီးပွဲကောင်း နှစ်ပွဲဟာ ချယ်လ်ဆီးကစားသမား တစ်ယောက်အတွက် အဓိပ္ပါယ်အရှိဆုံးဖြစ်မယ့် နေ့ရက်တွေပေါ့ဗျာ..။ ကစားသမားဘဝကနေ အနားယူသွားပြီးတဲ့နောက်မှာ ဒီလိုပွဲကြီးတွေကို အမြဲတမ်းသတိရနေခဲ့ပါတယ်..။ ဘာစီလိုနာနဲ့ အိမ်ကွင်း၊ အာဆင်နယ်နဲ့ အိမ်ကွင်း.. တကယ့်ကို ရင်ခုန်.. စိတ်လှုပ်ရှားရတဲ့ ပွဲကြီးပွဲကောင်းတွေပေါ့ဗျာ..။ 

မန်နေဂျာ အင်ဇို မာရက်စ်ကာ ကတော့ ဒီနေ့ပွဲမှာတင် လာမယ့်ပွဲတွေအတွက် ပြင်ဆင်မှုကို အကောင်းဆုံး စတင်နိုင်ခဲ့ပါပြီ..။ မွိုက်စ် ကိုင်ဆီဒို၊ ဝက်စ်လေ ဖိုဖားနား တို့ကို အနားပေးနိုင်ခဲ့သလို သူ့ရဲ့စီမံခန့်ခွဲမှုတွေ အဆင်ပြေ၊ ချောမွေ့ခဲ့ပါတယ်..။ စတန်းဖို့ဒ် ဘရစ်ချ်ကွင်းရဲ့ အမာခံပရိသတ်တွေကတော့ အခုလာမယ့် ပွဲကြီးနှစ်ပွဲကို မစောင့်နိုင်အောင် ဖြစ်နေတော့မှာ အသေအချာပါပဲ..။