ချန်ပီယံလိဂ်ပြိုင်ပွဲ၊ League Phase ပွဲစဉ် (၅) အဖြစ် ချယ်လ်ဆီးအသင်းနှင့် ဘာစီလိုနာအသင်းတို့ စတန်းဖို့ဒ် ဘရစ်ချ်ကွင်း၌ ယှဉ်ပြိုင်ကစားခဲ့ကြရာ ချယ်လ်ဆီးအသင်းက ၃ဂိုး- ဂိုးမရှိဖြင့် အနိုင်ရခဲ့သည်..။ အဆိုပါပွဲစဉ်မှ ချယ်လ်ဆီးအသင်း၏ သွင်းဂိုးများ၊ ပွဲစဉ်၏အရေးပါခဲ့သော ဖြစ်ရပ်များနှင့် အက်စ်တီဗာအို ၏ လှပသည့် သွင်းဂိုးအပေါ် အာဆင်နယ်အသင်း ဂန္ထဝင်တိုက်စစ်မှူးဟောင်း သီယာရီ အွန်နရီ၊ လီဗာပူးလ်အသင်း နောက်ခံလူဟောင်း ဂျေမီ ကာရေဂါ နှင့် မန်ချက်စတာ စီးတီးအသင်း နောက်ခံလူဟောင်း မီကာ ရစ်ချက် တို့က CBS Sports သတင်းဌာနမှ တင်ဆက်သည့် Champions League Post Match Show စကားဝိုင်း အစီအစဉ်တွင် အောက်ပါအတိုင်း ဆွေးနွေးခဲ့ကြပါသည်..။

ကိတ် အက်ဘ်ဒို - ဒီနေ့ယှဉ်ပြိုင်ခဲ့တဲ့ ချန်ပီယံလိဂ်ပွဲစဉ်တွေမှာ ချယ်လ်ဆီးအသင်းဟာ စပိန်လာလီဂါ ချန်ပီယံ ဘာစီလိုနာအသင်းကို ၃ဂိုးပြတ်နဲ့ ပြတ်ပြတ်သားသား အနိုင်ရရှိခဲ့ပါတယ်..။ ပထမဆုံးအနေနဲ့ အဲဒီပွဲစဉ်ရဲ့ အရေးပါခဲ့တဲ့ ဖြစ်ရပ်တွေ၊ အလှည့်အပြောင်းတွေကို ဆွေးနွေးပေးပါလား..? ဒီနေ့ပွဲမှာ စိတ်ဝင်စားစရာကောင်းတဲ့ အခိုက်အတန့်တွေ၊ သွင်းဂိုးတွေ အများကြီးပဲရှင့်...။ တကယ်လို့ ဖာရင် တောရက်စ် ဟာ ပွဲအစ (၆) မိနစ်မှာ ရရှိခဲ့တဲ့ အပိုင်ဂိုးသွင်းခွင့်ကို အသုံးချနိုင်ခဲ့မယ်ဆိုရင် ဒီနေ့ပွဲအဖြေဟာ တမျိုးတဖုံ ပြောင်းလဲသွားနိုင်တယ်မလား…?

သီယာရီ အွန်နရီ - အဲဒီအခွင့်အရေးဟာ ချယ်လ်ဆီးအသင်းရဲ့ နောက်တန်းကနေ ကစားကွက်စတည်ဖို့ ကြိုးစားတဲ့ play out the back အခြေအနေကနေ ရရှိသွားခဲ့တာပါ..။ ထရေဗာ ချာလိုဘာ နဲ့ ဂိုးသမား ရောဘတ် ဆန်းချက်ဇ် တို့ အပေးအယူလုပ်ပြီး အတွင်းမှာ နေရာယူထားတဲ့ ရိစ် ဂျိမ်းစ် ကို ထိုးပေးပါတယ်..။ ရိစ် ဂျိမ်းစ် က မွိုက်စ် ကိုင်ဆီဒို ဆီကို တစ်ချက်ထိ မနားတမ်းပေးပို့ရာမှာ ဘာစီလိုနာအသင်းက ကြားထဲကနေ ဖြတ်ယူသွားခဲ့ပါတယ်..။ အဲဒီဘောလုံးကို လာမင်း ယာမယ်လ် က ဂိုးဧရိယာထဲမှာဖာရင် တောရက်စ် ကို ထိုးပေးလိုက်ရမှာ လွတ်လွတ်ကျွတ်ကျွတ် ကန်သွင်းခွင့် ရခဲ့ပါတယ်..။

ကျွန်တော်ကတော့ ဂိုးဝင်သွားပြီပဲ ထင်လိုက်တာပါ..။ ဂိုးသမား ဆန်းချက်ဇ် ဟာ သူကန်တဲ့ဘက်ရဲ့ ဆန့်ကျင်ဘက်ကို ဒိုင်ဗင်ပစ်ဖို့ ပြင်ဆင်ပြီး ဖြစ်နေသလို ဂိုးပေါက်ကလည်း ဟောင်းလောင်း.. အပွင့်ကြီးပါ..။ ဒါပေမယ့် အံ့ဩလောက်အောင် လွဲချော်သွားခဲ့တာကြောင့် ချယ်လ်ဆီးအသင်း ကံကောင်းသွားခဲ့တာပေါ့ဗျာ..။ ဘာစီလိုနာအသင်းက ဦးဆောင်ဂိုး စပြီးရရှိသွားနိုင်တဲ့ အခွင့်အရေး ဖြစ်ပါတယ်..။

ဂျေမီ ကာရေဂါ - ပွဲချိန်ကြာလာတာနဲ့အမျှ ခြေစွမ်းအသာစီး ရရှိလာခဲ့တဲ့ ချယ်လ်ဆီးအသင်းဟာ ပွဲချိန် (၂၇) မိနစ်မှာ ဦးဆောင်ဂိုး စတင်ရရှိခဲ့ပါတယ်..။ အဲဒီဂိုးမတိုင်ခင် အခွင့်အရေး နှစ်ကြိမ်လောက် ရခဲ့သေးပေမယ့် လူကျွံဘောတွေနဲ့ ပယ်ဖျက်ခံခဲ့ရတာကြောင့် ကပ်သီလေး လွဲနေခဲ့တာဗျ..။ ချယ်လ်ဆီးအသင်း ရရှိခဲ့တဲ့ ထောင့်ကန်ဘောကို အက်စ်တီဗာအို၊ ဂါနာချို နဲ့ မာ့စ် ကူကူရယ်လာ တို့ တြိဂံတွဲလုံး အနီးကပ် အပေးအယူလုပ်ပြီး ဖောက်ထွက်လာခဲ့ပါတယ်..။

ဒီနေ့ပွဲမှာ ချယ်လ်ဆီးအသင်းရဲ့ ထောင့်ကန်ဘောတွေမှာ နေရာယူ၊ ရွှေ့လျားပုံ routines တွေ ကောင်းမွန်ခဲ့ပြီး အဲဒီလို အသေးစိတ်လေးတွေက ပွဲကိုအဆုံးအဖြတ် ပေးသွားစေခဲ့ပါတယ်..။ ချယ်လ်ဆီးအသင်းဟာ ဘာစီလိုနာအသင်းရဲ့ ထောင့်ကန်ဘော၊ တည်ကန်ဘော ကာကွယ်ပုံတွေကို သေသေချာချာ လေ့လာပြီး အိမ်စာလုပ်လာခဲ့ပါတယ်..။ အက်စ်တီဗာအို စပေးလိုက်တဲ့ ထောင့်ကန်ဘောကနေတဆင့် ဂါနာချို ဟာ စပိန်အသင်း နောက်တန်းလူကြားထဲ နေရာယူထားတဲ့ မာ့စ် ကူကူရယ်လာ ဆီကို ထိုးပေးလိုက်ပါတယ်..။ အဲဒီတဒင်္ဂမှာတော့ လူကျွံဘော ဖြစ်သွားပြီလို့ပဲ ထင်မိခဲ့ပါတယ်..။

ဒါပေမယ့် ကူကူရယ်လာ ဟာ ဘာစီလိုနာအသင်း ဂိုးဧရိယာထဲထိ ဆွဲဝင်ရင်း ပေးပို့လိုက်တဲ့ ဘောလုံးကို ဖာရင် တောရက်စ် နဲ့ ဂျူလက်စ် ခွန်ဒီ တို့ ရှင်းထုတ်ဖို့ ကြိုးစားရင်း ခွန်ဒီ က ကိုယ့်ဂိုးကို သွင်းမိခဲ့ပါတယ်..။  own goal ဆိုပေမယ့် အိမ်ရှင်အသင်းရဲ့ ခြေစွမ်းဟာ ဦးဆောင်ဂိုးရဖို့ ထိုက်တန်ပါတယ်..။ အစောက သီယာရီ ပြောခဲ့တဲ့ အပိုင်အခွင့်အရေး တစ်ကြိမ်ကလွဲရင် နောက်ပိုင်းမှာ ချယ်လ်ဆီးအသင်းကပဲ ပွဲကိုထိန်းချုပ်၊ လွှမ်းမိုးသွားခဲ့တာဗျ..။

ကိတ် အက်ဘ်ဒို - ချယ်လ်ဆီးရသွားတဲ့ ပထမဂိုးနဲ့ တတိယဂိုးတွေဟာ လူကျွံဘော ဖြစ်သလိုလို၊ မဖြစ်သလိုလို on the margin အခြေအနေတွေပဲရှင့်..။ အခုအပေါ်မှာ ပြထားတဲ့ပုံ (ပုံ- ၁) ကတော့ VAR အဖွဲ့က ထုတ်ပြန်တဲ့ ရှုထောင့်ကပုံ ဖြစ်ပါတယ်..။ လူကျွံဘောဖြစ်၊ မဖြစ် VAR ရဲ့ အဆုံးအဖြတ်တွေဟာ အနည်းနဲ့အများ ဒွိဟဖြစ်စရာတွေ (subjective) ရှိနေတယ်လို့ ထင်ရသလိုပါပဲ..။ ကဲပါ.. အချိန်ကိုငဲ့ညှာသောအားဖြင့် အဲဒီအကြောင်းကို ခဏနေမှ သီးခြားဆွေးနွေးပါမယ်..။ ကျွန်မတို့ ဒုတိယဂိုး… အဲ… ရော်နယ် အရူဂျို ရဲ့ အနီကတ်ဒ် ကို အရင်သုံးသပ်ပေးကြပါဦး…

သီယာရီ အွန်နရီ - သူဟာပွဲချိန် (၃၁) မိနစ်မှာ ဒိုင်လူကြီးကို စောဒကသွားတက်လို့ ပထမအကြိမ် အဝါကတ်ဒ် အပြခံခဲ့ရတာဗျ..။ လာမင်း ယာမယ်လ် ကို ကူကူရယ်လာ က ပြစ်ဒဏ်ဘောကျူးလွန်ခဲ့တယ်လို့ ယူဆမိလို့ ဒိုင်လူကြီးကို စောဒက သွားပြီးတက်ခဲ့တာပါ..။ နောက်ထပ် (၁၂) မိနစ်အကြာမှာတော့ ကူကူရယ်လာ ကို သူကိုယ်တိုင် ဖြတ်ကန်ဖို့ ကြိုးစားတော့တာပါပဲ..။ အဝါကတ်ဒ် အပြခံထားရမှန်း သိသိကြီးနဲ့ လုပ်တာနော..။ 

အမှန်တော့ အဲဒီလောက် ကြမ်းကြမ်းတမ်းတမ်း ဖျက်ထုတ်စရာ မလိုဘူးလေ..။ ကိုယ့်ရဲ့နေရာမှာ ရပ်နေပြီး ကျော်ဖြတ်ပြေးဖို့ ကြိုးစားမယ့် ကစားသမားကို လက်နဲ့တားရင်တား..၊ ဒါမှမဟုတ် ခန္ဓာကိုယ်နဲ့ တိုက်ထုတ်လိုက်ရင်ကို ရပြီလေ.. မဟုတ်ဘူးလား..

ကိတ် အက်ဘ်ဒို - ချယ်လ်ဆီးအသင်းရဲ့ ဒုတိယဂိုး… အက်စ်တီဗာအို ရဲ့ သွင်းဂိုးကို သုံးသပ်ပေးဖို့ အချိန်ကျရောက်လာပါပြီ…။ ဘယ်သူအလှည့်လဲရှင့်..?

ဂျေမီ ကာရေဂါ - မီကာ ရဲ့ အလှည့် ဖြစ်ပေမယ့် နောက်ထပ်အသစ် ပေါ်ပေါက်လာမယ့် super star ကစားသမားသစ်အကြောင်းကို ပြောချင်လွန်းလို့ ကျွန်တော်ပဲ ကြားဖြတ်ယူလိုက်ပါမယ်... ဆေားရီးနော်.. ဟားဟား.။ ကလပ်အသင်းများ ကမ္ဘာ့ဖလားပြိုင်ပွဲမှာ ချယ်လ်ဆီးဘက်ကို ဂိုးသွင်းလိုက်ချိန်မှာ သူ့ကိုစပြီး သတိထားမိခဲ့ပါတယ်..။ အဲဒီအချိန်မှာ ချယ်လ်ဆီးအသင်းက သူ့ကိုခေါ်ယူဖို့ သဘောတူညီမှု ရရှိပြီးပါပြီ..။

သူ့ရဲ့ခြေစွမ်းကြောင့် ကစားသမားတွေအားလုံးက သဘောကျကြတယ်ဗျာ.။ တကယ့်ကို အသက်အရွယ်နဲ့ မမျှအောင် ထူးချွန်လှတဲ့ ပါရမီရှင် လူငယ်ကစားသမားလေး တစ်ယောက် ဖြစ်ပါတယ်..။ ဒီနေ့ပွဲမှာ သူ့ရဲ့ပြိုင်ဘက်အဖြစ် ဘာစီလိုနာအသင်းမှာ လာမင်း ယာမယ်လ် ပါဝင်လာခဲ့ပေမယ့် အက်စ်တီဗာအို ပဲ ခေါင်းဆောင်မင်းသား အဖြစ်နဲ့ အသုံးတော်ခံသွားခဲ့ပါတယ်..။ အခုဆိုရင် ချန်ပီယံလိဂ်ပြိုင်ပွဲမှာ (၃) ပွဲကစား၊ (၃) ဂိုးသွင်းယူထားနိုင်ခဲ့ပြီး အဲဒီလို စွမ်းဆောင်ရည်မျိုး ပိုင်ဆိုင်ခဲ့တဲ့ ဆယ်ကျော်သက် ကစားသမား.. ဆိုလို့ ကီလီယန် အမ်ဘာပေး ပဲ ရှိသေးတယ်.. ဆိုပြီး ခုနက သိလိုက်ရပါတယ်..။ Wow..!!

ကိတ် အက်ဘ်ဒို - သီယာရီ ရေ.. အက်စ်တီဗာအို ရဲ့ ဆွဲပြေးပုံအပေါ် ရှင့်ရဲ့အသေးစိတ် သုံးသပ်ချက်နဲ့ ဖြည့်စွက်ပေးပါလား..?

သီယာရီ အွန်နရီ - ဟုတ်ကဲ့ပါ..။ ပထမဆုံးအနေနဲ့ ဂျေမီ၊ မီကာ တို့လို နောက်ခံအစွန်လူတွေဟာ ပြိုင်ဘက် တိုက်စစ်မှူး၊ ဒါမှမဟုတ် တောင်ပံ တိုက်စစ်မှူးကို တစ်ယောက်ချင်း 1 vs 1 ရင်ဆိုင်ရာမှာ နံပါတ်တစ်- ဘောလုံးနဲ့ ကျော်ဖြတ်မပြေးခံရအောင် ကာကွယ်မယ်..(defend the ball)၊ နံပါတ်နှစ် - ဂိုးပေါက်ထဲ ဘောလုံးမဝင်သွားအောင် ကာကွယ်ရမယ်.. (defend the goal) ဆိုတဲ့ ရည်ရွယ်ချက်နှစ်ခု ရှိပါတယ်..။ အက်စ်တီဗာအို၊ လာမင်း ယာမယ်လ် တို့အပြင် အရင်တုန်းက အာဂျင် ရော်ဘင်.. တို့လို အတွင်းဘက်ကို ချိုးဝင်တဲ့ တောင်ပံ ကစားသမားတွေ (inverted wingers) ဟာ ဂိုးပေါက်ကိုဦးတည်ပြီး ဘောလုံးဆွဲပြေးကြပါတယ်.။

ဘယ်သူကမှ ထောင့်ကန်ဘောကန်တင်မယ့် အလံတိုင်နားကနေ ဂိုးရအောင် သွင်းနိုင်မှာ မဟုတ်ပါဘူး..။ ဒါ့ကြောင့် ပေါ် ကူဘာဆီ အနေနဲ့ ဘယ်လိုဖျက်ထုတ်သင့်လဲ..? ဆိုတာ အရင်သုံးသပ်ပါမယ်..။ ပြီးရင် မာ့စ် ကူကူရယ်လာ က လာမင်း ယာမယ်လ် ကို ဘယ်လိုပုံစံ တားဆီး၊ ထိန်းချုပ်သွားလဲ..? ရှင်းပြပါမယ်..။

အခုအပေါ်မှာပြထားတဲ့ပုံ (ပုံ- ၂) မှာဆိုရင် အက်စ်တီဗာအို ဟာ ဘောလုံးနဲ့အတူ ထိုးဖောက်ဖို့ အသင့်ဖြစ်နေပါပြီ..။ Rule number (1).. သူတို့ကို ကိုယ့်ရဲ့ညာဘက်.. ဒါမှမဟုတ် သူတို့ရဲ့အတွင်းဘက်ကို ချိုးဝင်ခွင့် လုံးဝမပေးရပါဘူး..။ ဒါ့ကြောင့်ကူဘာဆီ အရင်ဆုံးလုပ်ရမှာက ပြေးနေတဲ့အရှိန်ကို နည်းနည်းလေးလျှော့ပြီး အက်စ်တီဗာအို ကို သူ့ရဲ့ညာဘက်အတိုင်းပဲ တည့်တည့်ဆွဲပြေးသွားအောင် ပါးပါးနပ်နပ်နဲ့ မောင်းသွင်းရမှာပါ..။

ဒါပေမယ့်သူဟာ စိုးရိမ်စိတ် ရှိနေတာကြောင့် အက်စ်တီဗာအို ထက် ရှေ့ကိုရောက်နေပြီး အရှိန်လွန်နေပါတယ်..။ အဲဒါနဲ့ ဘရာဇီးလ် လူငယ်လေးက အတွင်းကိုချိုးဝင်လိုက်ပါပြီ..(ပုံ- ၃)။ အခုအောက်ကပုံ (ပုံ- ၃) အနေအထားနဲ့ဆိုရင် ကူဘာဆီ ဟာ အက်စ်တီဗာအို ကို ကျောပေးထားလိုက်သလို ဖြစ်သွားတာကြောင့် ဘရာဇီးလ် လူငယ်လေး ညာခြေနဲ့ ကန်မသွင်းနိုင်အောင် ဘယ်လိုမှ တားလို့မရနိုင်တော့မယ့်ပုံ ရှိနေပါပြီ..။

ဒါပေမယ့် ချယ်လ်ဆီး ကစားသမားလေးဟာ သူ့ရဲ့အနားကို အလီဂျန်ဒရို ဘော်လ်ဒဲလ် ရောက်လာတာနဲ့ ဘယ်ခြေနဲ့မကန်သွင်းတော့ပဲ ညာဘက်ကို တစ်ချက်ပြန်ခေါက်ပြီး ညာခြေနဲ့ ကန်သွင်းသွားခဲ့ပါတယ်..။ ကူဘာဆီ ဟာ defend the ball, defend the goal ဆိုတဲ့ ဥပဒေသကို ချိုးဖောက်ပြီး ဘောလုံးနဲ့လူ (ball and the man) ကို အာရုံစိုက်လိုက်တာကြောင့် အခုလိုဖြစ်သွားခဲ့တာပါ..။ ညာခြေနဲ့ကန်သွင်းသွားတယ်.. ဆိုပေမယ့် အရေးအကြီးဆုံးအချက်က ဂိုးကန်သွင်းနိုင်မယ့်ထောင့် (scoring angle) ရသွားအောင် ခွင့်ပြုလို့မရဘူး.. ဆိုတာ ဖြစ်ပါတယ်..။

အခုကျွန်တော်ရှင်းပြမှာက လာမင်းး ယာမယ်လ် ကို မာ့စ် ကူကူရယ်လာ တားဆီးပုံ ဖြစ်ပါတယ်..။ အခုအောက်မှာပြထားတဲ့ပုံ (ပုံ- ၄) မှာဆိုရင် ညာတောင်ပံကနေ အတွင်းကိုဆွဲဝင်ဖို့ ပြင်ဆင်နေတဲ့ လာမင်း ယာမယ်လ် ကို မာ့စ် ကူကူရယ်လာ တားဆီးပါတော့မယ်..။

ဒီနေရာမှာအရေးကြီးတာက လာမင်း ယာမယ်လ် အတွင်းဘက်ကို ချိုးဝင်လို့မရအောင် မွိုက်စ် ကိုင်ဆီဒို ဟာ မာ့စ် ကူကူရယ်လာ ရဲ့ အနားမှာ အကူအညီပေးဖို့ အသင့်ရှိနေတာ သတိပြုမိမှာပါ..(ပုံ- ၅)။

မာ့စ် ကူကူရယ်လာ နဲ့ မွိုက်စ် ကိုင်ဆီဒို တို့နှစ်ယောက် နှစ်ထပ်ပိတ်ထားတာကြောင့် လာမင်း ယာမယ်လ် ဟာ အတွင်းဘက်ကို ချိုးဝင်လို့ မရတော့ပဲ တောင်ပံတစ်လျှောက်ပဲ ဆွဲထွက်သွားရပါတော့တယ်..။ အခုအောက်ကပုံ (ပုံ- ၆) မှာဆိုရင် ကူကူရယ်လာ ဟာ လျောထိုးဖျက်စရာတောင် မလိုတော့ဘူး..။ လက်ရှိဘောလုံးကမ္ဘာရဲ့ ဘောလုံးသယ်ယူ ဆွဲပြေးရာမှာ (dribbling) အကောင်းဆုံး ကစားသမား တစ်ယောက်ဖြစ်တဲ့ လာမင်း ယာမယ်လ် ကို လက်နဲ့တား၊ ခန္ဓာကိုယ်လေးကာပြီး ကာကွယ်နိုင်ခဲ့ပါပြီ..။ မာ့စ် ကူကူရယ်လာ ဟာ defend the ball, defend the goal ဆိုတဲ့ ဥပဒေသကို လိုက်နာခဲ့ပါတယ်..။ လာမင်း ယာမယ်လ် လို ကစားသမားကို ဘယ်ခြေနဲ့ သယ်ယူ၊ ကျော်ဖြတ်ခွင့်ပေးလို့ မရပါဘူး..။

  
မီကာ ရစ်ချက် - အင်းဗျ..။ ကျွန်တော်ကတော့ တောင်ပံ ကစားသမားတွေနဲ့ 1 vs 1 ရင်ဆိုင်ရပြီဆိုရင် သူစိတ်ကြိုက် ဆွဲမပြေးနိုင်အောင် လက်နဲ့အရင်ဆုံး ကာနိုင်အောင် ကြိုးစားပါတယ်..။ ကဲ.. နောက်ထပ် အခွင့်အရေး တစ်ခုကတော့ ပွဲချိန်မိနစ် (၇၀) မှာ ပီဒရို နက်တို ရရှိခဲ့တဲ့ ဂိုးသွင်းခွင့် ဖြစ်ပါတယ်..။ ပေါ်တူဂီ တိုက်စစ်မှူးဟာ ဂိုးသမား ဆန်းချက်ဇ် အမြန်ချပေးလိုက်တဲ့ ဘောလုံးကို  ဘယ်တောင်ပံတစ်လျှောက် ဆွဲပြေးပြီး တန်ပြန်တိုက်စစ် စတင်ပါတယ်..။ နောက်ခံလူ ပေါ် ကူဘာဆီ တားဆီးဖို့ ကြိုးစားပေမယ့် သူ့ရဲ့ဘောလုံးဆွဲထွက်သွားတဲ့ အမြန်နှုန်းက ကြောက်ခမန်းလိလိဗျာ...။

ကျွန်တော်ကတော့ El Classico ပွဲစဉ်မှာတုန်းက ဂါးရတ် ဘေးလ် ရဲ့ ကွင်းဘေးကနေ ပတ်ပြီးကျော်ဖြတ် သွင်းယူသွားခဲ့တဲ့ သွင်းဂိုးကို ပြန်ပြီးအမှတ်ရမိပါတယ်..။ ပီဒရို နက်တို ဟာ ဘေးလ် သွင်းလိုက်တဲ့အတိုင်း ရှေ့တက်ပိတ်ဆို့ဖို့ ကြိုးစားတဲ့ ဂိုးသမား ဂျူအန် ဂါးစီးယား အပေါ် အသာလေး ‘မ’ ပြီး သွင်းလိုက်ရမှာဗျာ..။ ဒီနေ့ပွဲမှာ ပီဒရို နက်တို ရဲ့ ခြေစွမ်းသိပ်ကို ကောင်းမွန်ခဲ့ပါတယ်..။ အဲဒီအခွင့်အရေးရပြီး နောက်သုံးမိနစ်မှာပဲ ခင်ဗျားရဲ့ချာတိတ်.. လီယန် ဒီလပ် က kill the game ပွဲကိုအဆုံးသတ်စေတဲ့ တတိယဂိုးကို သွင်းပေးခဲ့တာပါ..။ သူ့အတွက် ပထမဆုံး ချန်ပီယံလိဂ် သွင်းဂိုးလည်း ဖြစ်ပါတယ်..။ ကဲ.. ဂျေမီ ရေ.. လုပ်ပါဦး..။

ဂျေမီ ကာရေဂါ - လီယန် ဒီလပ် ဟာ အစ်ပ်ဝစ်ချ် ကနေ ပြောင်းလာခဲ့ပြီး ချယ်လ်ဆီးမှာ အရမ်းကြီး အဆင်မပြေသေးပါဘူး..။ ဒါ့အပြင် ဒဏ်ရာရခဲ့တာတွေ၊ ပွဲပယ်ပြစ်ဒဏ်ထိခဲ့တာတွေလည်း ရှိခဲ့ပါသေးတယ်..။  
သီယာရီ အွန်နရီ - ဂျေမီ… မီကာ.. ဆောရီး.. ကြားဖြတ်ပြောလိုက်ပါမယ်..။ ဒီလပ် ဟာ လူကျွံနေပြီးသားဗျ..(ပုံ- ၇)။ ပီဒရို နက်တို က အင်ဇို ဆီကို ခင်းပေးလိုက်ကတည်းက သူဟာ ဘောလုံးရဲ့ရှေ့ကို ရောက်နှင့်နေပြီးသားပါ…။ လှုပ်ရှားမှုမရှိရဘူး.. ဆိုပေမယ့် ဘောလုံးရဲ့နောက်မှာ ရှိနေရပါမယ်..။ အမှန်တော့ 5 vs 4 .. ငါးယောက်၊ လေးယောက် ဖြစ်နေတာကြောင့် အရမ်းကြီးမလွယ်လှဘူးဆိုတာ သိပါတယ်..။

ဂျေမီ ကာရေဂါ - သီယာရီ ရေ.. ကစားသမားဘဝတုန်းက ဂိုးသမားမရှိတော့တဲ့ ဂိုးပေါက်တဲ့ အသာလေး ပိတ်သွင်းတဲ့ tap in goals ပေါင်း ဘယ်လောက်သွင်းခဲ့လဲ..?
သီယာရီ အွန်နရီ - (၂၃) ဂိုး ရှိပါတယ်..။ 
မီကာ ရစ်ချက် - tap in goal ဆိုပေမယ့် လီယန် ဒီလပ် အတွက် တကယ့်ကို အမှတ်ရနေဦးမယ့် အခိုက်အတန့်ပဲဗျ..။

သီယာရီ အွန်နရီ - မှန်တာပေါ့..။ လူစားဝင်လာပြီး သူ့ရဲ့ကစားပုံ ကောင်းမွန်ခဲ့ပါတယ်..။ ဘာစီလိုနာအသင်းနဲ့ ပွဲစဉ်တိုင်းမှာ ရရှိတဲ့ဂိုးတိုင်းဟာ ကြီးကျယ်ခမ်းနားတဲ့ သွင်းဂိုးတွေပါပဲ..။ သူ့အတွက် တကယ့်ကို အမှတ်ရနေမယ့် ချန်ပီယံလိဂ်ညချမ်း ဖြစ်နေမှာ အသေအချာပါပဲ..။

ကိတ် အက်ဘ်ဒို - အဲဒီဂိုးမှာ အင်ဇို ဖာနန်ဒက်စ် ကို VAR ဒိုင်အဖွဲ့က လူကျွံဘောဖြစ်၊ မဖြစ် ကြည့်ထားတဲ့ပုံ (ပုံ- ၈) ကလည်း ပထမဂိုးအတိုင်းပဲမလား..? တကယ့်ကို ဆုံးဖြတ်ရခက်ခဲမယ့် အခြေအနေတွေပါရှင့်..။ သူတို့တွေ ဘယ်လိုဆုံးဖြတ်ကြလဲ.. ဆိုတဲ့အပေါ် ရှင်တို့ရဲ့အမြင်တွေ သိချင်မိပါတယ်..။

သီယာရီ အွန်နရီ - သူတို့ဆွဲထားတဲ့ပုံကို ကြည့်မယ်ဆိုရင်တော့ ok တာပေါ့ဗျာ..။ ဒါပေမယ့် မျဉ်းဆွဲမယ့်ထောင့် (angle) ကို ဘယ်လိုများယူကြလဲ.. သိချင်မိတာပါ..။ ဘာဖြစ်လို့လည်းဆိုတော့ အခုစားပွဲပေါ်မှာ ချထားတဲ့ ကျွန်တော့်ရဲ့ဖုန်းကို ကြည့်မယ်ဆိုရင်တောင် ရှုထောင့်ကွာရင် မြင်တဲ့အမြင် ကွာသွားတာပါပဲ..။ ဒါ့ကြောင့်သူတို့ဆုံးဖြတ်ကြတဲ့ အခြေအနေတိုင်းမှာ ဘယ်လိုထောင့်ကနေ မျဉ်းဆွဲသင့်လဲ..? ဆိုတဲ့အချက်ကို ဘယ်သူကမှ မဆွေးနွေးကြသေးပါဘူး..။ သူတို့ဆွဲပြထားတဲ့အတိုင်း ယုံလိုက်ကြရတာပဲဗျ..။

ကိတ် အက်ဘ်ဒို - သီယာရီ ရေ.. အက်စ်တီဗာအို ရဲ့ ကစားပုံနဲ့ ပတ်သက်ပြီး ရှင့်ရဲ့အမြင်ကို သိချင်မိပါတယ်..။
သီယာရီ အွန်နရီ - ကလပ်အသင်းများ ကမ္ဘာ့ဖလားပြိုင်ပွဲမှာကတည်းက သူ့ကိုသတိထားမိခဲ့ပါတယ်..။ ကျွန်တော်ကတော့ နောက်ခံအစွန်လူတွေကို တစ်ဦးချင်းကျော်ဖြတ်နိုင်စွမ်းရှိတဲ့ တောင်ပံ ကစားသမားတိုင်းကို သဘောကျပါတယ်..။ နောက်ပြီးသူဟာ ဘောလုံးရတာနဲ့ ဂိုးပေါက်ကို မျက်နှာမူပြီး ဆွဲပြေးတော့တာပဲ..။ အပိုတွေ လျှောက်လုပ်မနေဘူးဗျ..။

သူတို့လို ကစားသမားတွေဟာ ဆန်းသစ်လွန်းတဲ့ ပန်းချီဆရာနဲ့ တူပါတယ်..။ ဘယ်လိုဆွဲပါ..၊ စနစ်ကျအောင် စုတ်တံကို ဘယ်လိုကိုင်ပါ.. စသဖြင့် ဆရာသွားလုပ်နေဖို့ မလိုပါဘူး..။ သူတို့ဖာသာ စိတ်လွတ်လက်လွတ် စိတ်ကြိုက် ရေးဆွဲပါစေဗျာ..။ ပြီးတဲ့အချိန်ကျ ခင်ဗျားမြင်တွေ့ရမယ့် ပန်းချီကားဟာ စိတ်တိုင်းကျရလိမ့်မယ်.. ဆိုတာ သေချာပါတယ်..။ သူအားသန်တဲ့ ဘောလုံးဆွဲပြေးတာကို (dribbling) လွတ်လွတ်လပ်လပ် ဆွဲပြေးခိုင်းပြီး ရှုမော၊ ခံစားနေကြတာ ကျွန်တော်တို့အတွက် ပိုပြီးကောင်းပါတယ်..။

ခင်ဗျားတို့နှစ်ယောက်ဟာ နောက်ခံအစွန်လူ နေရာတွေမှာ ကစားခဲ့ကြသူတွေ ဖြစ်ကြပါတယ်..။ အက်စ်တီဗာအို လို ကစားသမားကို ခင်ဗျားတို့လည်း ပြိုင်ဘက်အဖြစ်နဲ့ တစ်ယောက်ချင်း 1 vs 1 ရင်ဆိုင်ချင်မှာ မဟုတ်ဘူး..။ ခင်ဗျားတို့သူ့ကို တားနိုင်မှာ မဟုတ်တဲ့အတွက် သူနဲ့မရင်ဆိုင်ချင်တာ မဟုတ်ပါဘူး..။ သူတို့လို တောင်ပံ ကစားသမားတွေဟာ ခင်ဗျားရှိနေတဲ့ နေရာကို တချိန်လုံးထိုးဖောက်နေမှာပါ.။

ကျွန်တော်တို့ ကစားသမားဘဝ အစောပိုင်းကာလတုန်းက ရိုင်ယန် ဂစ် ပေါ့ဗျာ..။ သူဟာဘောလုံးနဲ့အတူ တောင်ပံမှာ တစ်ချိန်လုံးရှိနေပါတယ်..။ ခြေစွမ်းပြနိုင်တဲ့ပွဲရှိမယ်..၊ တခါတလေ ခြေစွမ်းမပြနိုင်ပဲ ခင်ဗျားတို့ကို မကျော်နိုင်တာတွေလည်း ရှိပါမယ်..။ ဒါပေမယ့် ဘောလုံးရတာနဲ့ ခင်ဗျားတို့ဆီကို တစ်ချိန်လုံးရောက်လာပြီး ထိုးဖောက်ဖို့ ကြိုးစားနေတော့တာပါပဲ..။ အက်စ်တီဗာအို လည်း အဲဒီလို ကစားသမား ဖြစ်ပါတယ်..။

ဂျေမီ ကာရေဂါ - အခုခေတ်ကစားသမားတွေဟာ ဘောလုံးကွင်းထဲသွားပြီး လက်မှတ်ဝယ် ကြည့်လိုက်ရအောင် ဆွဲဆောင်မှုမရှိဘူး..၊ စိတ်ဝင်စားဖို့ မကောင်းဘူး..’မနှစ်တုန်းက ခင်ဗျားပြောဖူးပါတယ်..။ အက်စ်တီဗာအို ဟာ အခုအချိန်မှာ အသက်ငယ်နေသေးတော့ နည်းပြက လွတ်လွတ်လပ်လပ် ကစားခိုင်းပါဦးမယ်..။ မာရက်စ်ကာ ကို ကျွန်တော်ပြောနေတာ မဟုတ်ပါဘူး..။ ဒါပေမယ့်အခုခေတ်မှာ နည်းပြအတော်များများ ကစားသမားတွေကို သူတို့ရဲ့ကစားကွက် ပုံစံခွက်ကြီးအတိုင်း အတင်းသွတ်သွင်းနေတာဟာ ပြဿနာမဟုတ်ဘူးလား..?

သီယာရီ အွန်နရီ - ကျွန်တော်လည်း စဉ်းစားမိပါတယ်..။ နည်းပြတွေဟာ low block နဲ့ ကစားတတ်တဲ့ ပြိုင်ဘက်တွေနဲ့ ရင်ဆိုင်ရာမှာ သူတို့ဘက်က ခံစစ်ထိုင်နေရာကနေ တိုက်စစ်ကို ချက်ချင်းပြောင်းလဲပြီး transition တွေကနေ ထိုးဖောက်ခံရမှာကို ကြောက်ရွံ့ကြပါတယ်..။ ဒါ့ကြောင့် ကစားသမားတိုင်းကို ‘ဘောလုံးမဆုံးရရေး၊ ဒို့အရေး..’ ဆိုပြီး မှာကြားလေ့ ရှိပါတယ်..။ အကျိုးဆက်အနေနဲ့ လူငယ်လေးတွေဟာ ဘောလုံးနဲ့အတူ ဆွဲမပြေး (not dribbling) ကြတော့ပါဘူး..။

ဘာဖြစ်လို့ ကလေးတွေကို ဘောလုံးနဲ့အတူ မဆွဲပြေးခိုင်းကြတော့တာလဲ..? တစ်ကြိမ် ထိုးဖောက်လို့မရရင် နှစ်ကြိမ်၊ သုံးကြိမ်..။ ခုနှစ်ကြိမ်၊ ရှစ်ကြိမ် ရောက်လာရင် ခင်ဗျားဘက်ကပဲ တောက်လျှောက် အဖောက်ခံနေရရင် မောပန်းလာပါမယ်..။ (၁၀) ကြိမ်၊ (၁၁) ကြိမ်ကျ ပိုပြီးလွယ်လာမယ်..။ ပြီးရင်ဂိုးရမှာပဲ..။ ဘာဖြစ်လို့လည်းဆိုတော့ ခင်ဗျားဟာ အရမ်းကိုပင်ပန်းနေပြီလေဗျာ..။ 

အခုခေတ်မှာ ကျွန်တော်ဟာ တောင်ပံ ကစားသမားအဖြစ်နဲ့ ကစားပါမယ်..။ ဆွဲပြေးဖို့မစဉ်းစားပဲနဲ့ တစ်ချိန်လုံးဘောလုံး အပေးအယူ လုပ်နေမယ်ဆိုရင် ခင်ဗျားတို့လို နောက်ခံအစွန်လူတွေ ချွေးတောင်ထွက်မှာ မဟုတ်ပါဘူး..။ ကောင်လေးတွေကို လွတ်လွတ်လပ်လပ် ကစားခွင့် ပေးလိုက်ကြပါဗျာ..။ ကျွန်တော်တို့တွေဟာ ပင်ကိုယ်အရည်အချင်း ကောင်းမွန်တဲ့ ကစားသမားတွေရဲ့ လွတ်လွတ်လပ်လပ် ကစားနေတာကို ပျော်ရွှင်၊ ကြည်နူးခွင့်ရဖို့ ထိုက်တန်ပါတယ်..။

ဒါ့ကြောင့်ကျွန်တော်ဟာ မိုက်ကယ် အိုလီဆေး၊ ဘူကာရို ဆာကာ တို့နဲ့ တွေ့တဲ့အချိန်တွေမှာ ‘ဘောလုံးရတာနဲ့ အမြန်ဆုံးပေး..၊ ဘောလုံးမဆုံးရှုံးစေနဲ့.. (pass the ball, don’t lose it)’ ဆိုတဲ့ မဲပြာပုဆိုး.. ဇာတ်ညွှန်းကြီးအတိုင်း မကစားကြပါနဲ့ လို့ မှာကြားလေ့ရှိပါတယ်..။