အိုင်ဗရီကို့စ် နှင့် ချယ်လ်ဆီးအသင်း ဂန္ထဝင်တိုက်စစ်မှူးဟောင်း ဒီဒီယာ ဒရော့ဘာ မှာ Sporty TV သတင်းဌာနနှင့် ပြုလုပ်ခဲ့သော တွေ့ဆုံခန်းတွင် လက်ရှိချယ်လ်ဆီးအသင်းနှင့် ပရီးမီးယားလိဂ်ပြိုင်ပွဲဝင် အသင်းများအပေါ် သူ၏ထင်မြင်သုံးသပ်ချက်များနှင့် ကလပ်အသင်းများ ကမ္ဘာ့ဖလားပြိုင်ပွဲ အောင်မြင်မှုအတွက် သူ၏ပီတိခံစားမှုများ၊ ယခုခေတ်ဘောလုံးလောကမှ တိုက်စစ်မှူးများအပေါ် သူ၏သဘောထားများကို ယခုလိုပြောပြခဲ့ပါသည် ..။ 

မေး - ဒီဒီယာ ရေ.. ခင်ဗျားရဲ့ကစားသမားဘဝ အစပြုခဲ့တဲ့ လီမန်းစ် အသင်းဟာ အခုဒီနှစ်မှာ အသင်းတည်ထောင်ခဲ့တာ နှစ် (၄၀) ပြည့်မြောက်ခဲ့ပါပြီ..။ သူတို့အသင်းဟာ ခင်ဗျားလိုကစားသမား တစ်ယောက်ကို မြေတောင်မြှောက်ပေးနိုင်ခဲ့တဲ့အပေါ် အခုအချိန်အထိ ဂုဏ်ယူ၊ ဝမ်းမြောက်စွာနဲ့ ကိုးကွယ်နေကြဆဲပဲ ဖြစ်ပါတယ်..။

တကယ်တော့ ‘ဒီဒီယာ ဒရော့ဘာ’ ဆိုတဲ့ ကစားသမားဟာ လီမန်းစ် အသင်းက မွေးထုတ်ပေးလိုက်တာပါ..။ ဒီအသင်းကို မရောက်ခင် ကျွန်တော်ဟာ ပဲရစ်စ်မြို့ ဆင်ခြေဖုံးက အပျော်တမ်းအသင်း တစ်သင်းမှာပဲ ကျင်လည်ခဲ့ရပါတယ်..။ လီမန်းစ် အသင်းမှာ ကစားသမား တစ်ယောက်ရဲ့ အပြုအမူ၊ နေထိုင်ကျင့်ကြံမှုတွေ အပါအဝင် အစစအရာရာ သင်ယူခဲ့ရပါတယ်..။ ဒီအသင်းကို ရောက်လာချိန်မှာ ခန္ဓာကိုယ် ဖွဲ့စည်းပုံကအစ ကစားသမားတစ်ယောက်နဲ့ တူညီလာအောင် ပြန်လည်ပြုပြင်ယူခဲ့ရတာကြောင့် အကြာကြီးအချိန်ယူ တည်ဆောက်ခဲ့ရတာပါ..။

နောက်ပြီးကျွန်တော်ဟာ ကစားသမားဘဝ အစပိုင်းမှာ ဒဏ်ရာပြဿနာနဲ့ မကြာခဏ ရင်ဆိုင်ခဲ့ရပါတယ်..။ လီမန်းစ်အသင်းမှာ  ဒဏ်ရာပြဿနာနဲ့ နေ့ရက်ဆိုးတွေကို ကျော်လွှားနိုင်ခဲ့ပြီး ပုံမှန်ကစားခွင့်ရအောင် စွမ်းဆောင်နိုင်ခဲ့ပါတယ်..။ အဲဒီကနေ ပြင်သစ်လီဂူး (၁ )ပထမတန်းအဆင့် ပြိုင်ပွဲတွေဆီ တက်လှမ်းနိုင်ခဲ့တာပေါ့ဗျာ..။ နောက်ထပ်တစ်ဆင့်က မာဆေးလ်..၊ နောက်ပြီး ချယ်လ်ဆီး.. အဲဒီလိုအဆင့်ဆင့် တိုးတက်လာခဲ့တာပါ..။

ဒါပေမယ့်လီမန်းစ်အသင်းဟာ ကျွန်တော့်ကို အောင်မြင်တဲ့ ကစားသမားတစ်ယောက်အဖြစ် သာမက တည်ငြိမ်၊ ရင့်ကျက်တဲ့ လူတစ်ယောက် ဖြစ်လာအောင် ပြုစု၊ ပျိုးထောင် ပုံသွင်းပေးလိုက်တဲ့ မူလအစ ပထမ ဘူမိနက်သန်၊ နေရာမှန် ဖြစ်ခဲ့ပါတယ်..။ ကစားသမားတစ်ယောက်ဟာ မှန်မှန်ကန်ကန်နဲ့ တိုးတက်ချင်တယ်..၊ အဲဒီတိုးတက်မှုကို နှစ်ပေါင်းများစွာ တည်ငြိမ်အောင် ထိန်းသိမ်းထားချင်တယ်ဆိုရင် အခြေခံအုတ်မြစ် ခိုင်မာမှ ရနိုင်ပါမယ်..။ တစ်ရာသီကောင်း.. ဝုန်းကနဲတောက်ပြီး ငြိမ်းသွားတဲ့ မီးတောက်မျိုး မဖြစ်ရဘူးပေါ့ဗျာ..။

လီမန်းစ်အသင်းမှာ ကျွန်တော်ဟာ အဲဒီလိုမှန်ကန်တဲ့ အခြေခံအုတ်မြစ်ကောင်းတစ်ခု တည်ဆောက်နိုင်ခဲ့သလို လူငယ်.. ကလေးငယ် တစ်ယောက်ဘဝကနေ ရင့်ကျက်တဲ့သူတစ်ယောက်၊ မိသားစုကို တာဝန်ယူနိုင်တဲ့ ဖခင်ကောင်း တစ်ယောက်အဖြစ် အဆင့်ဆင့် တိုးတက်ခွင့် ရရှိခဲ့ပါတယ်..။ ဒီအသင်းဟာ ကျွန်တော့်ရဲ့ဘဝကို ပြောင်းလဲပေးခဲ့တဲ့ အသင်းတစ်သင်း ဖြစ်တာကြောင့် အခုလိုအသင်းရဲ့အနှစ် (၄၀) ပြည့် အခမ်းအနားကို ကြိုဆို၊ ဂုဏ်မပြုပေးလို့ ဘယ်ဖြစ်မလဲဗျာ..။

မေး - ခင်ဗျားဟာ တကယ့်ကို အံ့ဩစရာကောင်းလှတဲ့ ကစားသမားဘဝကို ပိုင်ဆိုင်ခဲ့တဲ့သူ တစ်ယောက်ပါ..။ လီမန်းစ် အသင်းကနေ ချယ်လ်ဆီးအသင်းရဲ့ တစ်သက်တာ အကြီးကျယ်၊ အခမ်းနားဆုံး အာဖရိက ကစားသမား တစ်ယောက်အဖြစ် တက်လှမ်းနိုင်ခဲ့တဲ့အပေါ် ခင်ဗျားရဲ့ခံစားချက်ကို ပြောပြပေးပါလား..? အခုခေတ် ဘောလုံးသမိုင်း၊ ပရီးမီးယားလိဂ်ရဲ့ သမိုင်းကြောင်းကို ပြောမယ်ဆိုရင် ခင်ဗျားရဲ့နာမည်ကို ချန်ထားခဲ့ဖို့ ဘယ်လိုနည်းနဲ့မှ မဖြစ်နိုင်ပါဘူး.။ 

ကစားသမားတစ်ယောက်အဖြစ် အသက်မွေးတော့မယ်ဆိုရင် ခံယူချက်၊ စိတ်ဓါတ်နဲ့ အောင်ပွဲကို ဆာလောင်စိတ်တွေအပြင် ဘောလုံးကစားနည်းကို ချစ်မြတ်နိုးစိတ် (passion) ရှိဖို့လိုပါတယ်..။ ရွံ့ဗွက်တွေနဲ့ မြက်ခင်းတွေ၊ မြို့ကြီးတွေရဲ့ လမ်းကြိုလမ်းကြားတွေထဲမှာ သူငယ်ချင်းတွေနဲ့ ဘောလုံးကစားခဲ့ကြတဲ့ ကလေးသူငယ်တိုင်းမှာ ဘောလုံးကစားနည်းကို ချစ်မြတ်နိုးစိတ်နဲ့ အိပ်မက်တွေကိုယ်စီ ရှိခဲ့ကြပါတယ်..။ သူတို့လေးတွေရဲ့ အိပ်မက်ထဲမှာ ပွဲရဲ့နောက်ဆုံး ပြစ်ဒဏ်ဘောကန်ချက်၊ နောက်ဆုံးပွဲသိမ်း ပင်နယ်တီကန်ချက်၊ နောက်ဆုံးစက္ကန့် ခေါင်းတိုက်အနိုင်ဂိုး.. စတဲ့ အဆုံးအဖြတ် အနိုင်ဂိုးတွေကို သွင်းယူပေးခဲ့တဲ့သူတွေ ဖြစ်ချင်ခဲ့ကြတာပါပဲ..။ အဆုံးအဖြတ် အနိုင်ဂိုးတွေကို သွင်းယူပေးခဲ့ပြီး အောင်ပွဲခံကြတယ်ပေါ့ဗျာ..။ 

ကျွန်တော်ဟာ ကံကောင်း၊ ထောက်မစွာနဲ့ အဲဒီအိပ်မက်တွေကို အမှန်တကယ် ဖမ်းဆုတ်ခွင့်ရခဲ့ပါတယ်..။ ကလေးငယ်တစ်ယောက်အနေနဲ့ တောင့်တခဲ့တဲ့ အိပ်မက်တွေကို ကစားသမား တစ်ယောက်အနေနဲ့ တည်ဆောက်နိုင်ခဲ့တာကြောင့် ကိုယ့်ကိုယ်ကို ‘အိပ်မက်တွေထဲမှာ ရှင်သန်ခွင့် ရခဲ့တယ်..’ လို့ပဲ ခံယူခဲ့ပါတယ်..။ အဲဒီလိုအိပ်မက်တွေကို အမှန်တကယ် အကောင်အထည်ဖော်ခွင့်ရခဲ့တဲ့ လူတစ်ယောက်အနေနဲ့ ဘုရားသခင်ကို ကျေးဇူးတင်ရတဲ့အပြင် ကံကောင်းမှုတွေ ရရှိခဲ့တယ်လို့ပဲ ပြောရမှာပါပဲ..။

မေး - အခုလက်ရှိ ချယ်လ်ဆီးအသင်းအပေါ် ခင်ဗျားရဲ့အမြင်ကို ပြောပြပေးပါလား..?

ချယ်လ်ဆီးအသင်းဟာ အခုအချိန်မှာ အကောင်းဆုံးပုံစံနဲ့ လျှောက်လှမ်းနေပါတယ်..။ ‘ကျွန်တော့်ရဲ့ချယ်လ်ဆီးအသင်းကို လုံးဝမမှတ်မိလောက်အောင် ဖြစ်သွားပြီ..(I can’t recognize my club)’ လို့ ပြောခဲ့ဖူးပါတယ်..။ အဲဒီစကား ပြောခဲ့တဲ့အချိန်တုန်းက ကျွန်တော့်ရဲ့စိတ်ထဲက ခံစားချက်အမှန်ကို ပြောခဲ့တာ ဖြစ်ပါတယ်...။ ဒီနေ့မှာတော့ အသင်းဟာာ တိုးတက်နေပါပြီ..။ ဒါ့ကြောင့်အသင်းဟာ ကောင်းမွန်လာပြီ..၊ တိုးတက်လာပြီ.. ဆိုရင်လည်း ချီးကျူးရမှာပေါ့ဗျာ..။ အမြဲတမ်း အပြစ်တွေပဲ ထိုင်ပြောနေလို့ မဖြစ်ပါဘူး..။ ကောင်းလာရင် ကောင်းတဲ့အကြောင်းကို ပြောရပါမယ်..။ 

အခုဒီနှစ်မှာဆိုရင် အသင်းဟာ လမ်းကြောင်းမှန်ပေါ်မှာ လျှောက်လှမ်းနေသလို ရလဒ်ကောင်းတွေ ရရှိနေတာကြောင့် အထူးကျေနပ်မိပါတယ်..။ မန်နေဂျာနဲ့လူငယ်ကစားသမားတွေရဲ့ လက်ရှိစွမ်းဆောင်ရည်တွေကို ကျေနပ်မိသလို သူတို့တွေဟာ ကျွန်တော့်ရဲ့အသင်းအတွက် အစွမ်းကုန်ကြိုးစား၊ ပေးဆပ်နေကြပါတယ်..။ အဲဒီအတွက် ဂုဏ်ယူမိတာပေါ့ဗျာ..။

မေး - လက်ရှိချယ်လ်ဆီးအသင်းအတွက် ဂုဏ်ယူ၊ ပီတိဖြစ်နေရတယ်.. လို့ ခင်ဗျားကပြောလိုက်တဲ့အပေါ် သူတို့တွေလည်း ကျေနပ်ကြပါလိမ့်မယ်..။ ချယ်လ်ဆီးအသင်းရဲ့ တိုက်စစ်မှူးတွေထဲမှာ ခင်ဗျားရဲ့အရှိန်အဝါက တည်ဆောက်ခဲ့တဲ့ အောင်မြင်မှုတွေဟာ အရမ်းကိုကြီးမားခဲ့ပါတယ်..။ အပြာရောင်တွေကို စွန့်ခွာခဲ့ပြီးတဲ့နောက် ခင်ဗျားရဲ့နေရာကို အစားထိုးပြီး ဒီဒီယာ ဒရော့ဘာ ရဲ့ ခြေရာကိုနင်းနိုင်မယ့်သူ မပေါ်ပေါက်လာသေးတဲ့အပေါ် ဘယ်လိုမြင်မိလဲဗျ..?

ကျွန်တော်ဟာ နှိုင်းယှဉ်မှုတွေ (comparison) ပြုလုပ်တာ မကြိုက်ပါဘူး..။ သူတို့ခေတ်နဲ့ ငါတို့ခေတ် (eras)..၊ အရင်တုန်းက တိုက်စစ်မှူးတွေနဲ့ အခုခေတ် တိုက်စစ်မှူးတွေ.. စသဖြင့် နှိုင်းယှဉ်တာတွေကို မကြိုက်ပါဘူး…။ ဥပမာ.. ကျွန်တော်နဲ့ ဂျင်မီ ဖလွိုက် ဟက်ဆယ်လ်ဘိန့်ခ်၊ တိုးရ် အင်ဒရေ ဖလိုး တို့ကို နှိုင်းယှဉ်တာပေါ့ဗျာ..။ သူတို့တွေအပေါ် လေးစားမှုအပြည့်အဝ ထားရှိသလို အခုခေတ် တိုက်စစ်မှူးတွေအကြောင်း ဝေဖန်တာတွေ ပြုလုပ်ဖို့လည်း မရှိပါဘူး..။ ဘာဖြစ်လို့လည်းဆိုတော့ အခုလက်ရှိ တိုက်စစ်မှူးတွေဟာလည်း အရည်အချင်းပြည့်ဝတဲ့ တိုက်စစ်မှူးကောင်းတွေဖြစ်ကြပြီး သူတို့ရဲ့အသင်းတွေအတွက် အစွမ်းကုန်ပေးဆပ်၊ ကြိုးစားနေကြတဲ့သူတွေ ဖြစ်ကြပါတယ်..။      
    
နောက်ပြီးဘောလုံးသမား တစ်ယောက်ဖြစ်ဖို့ မလွယ်ကူသလို တိုက်စစ်မှူးတစ်ယောက်ဖြစ်လာဖို့က ပိုပြီးတော့တောင် ခက်ခဲပါတယ်..။ အထူးသဖြင့် ချယ်လ်ဆီးအသင်းမှာ ကစားခွင့်ရဖို့ဆိုတာ အခက်ခဲဆုံး အရာတွေထဲမှာ ပါဝင်တာပေါ့ဗျာ..။ ဒါ့ကြောင့်အသင်းမှာ ကစားခွင့်ရတဲ့ တိုက်စစ်မှူးတိုင်းကို ချီးကျူး၊ ဂုဏ်ပြုပြီး ထောက်ခံအားပေး ကြရမှာပါ..။ ဒီနေ့တွေ့ဆုံခန်းမှာ ကျွန်တော်ဟာ တခြားကစားသမားတွေ အပါအဝင် ဘယ်သူ့ကိုမှ ဝေဖန်၊ အပြစ်တင်သွားဖို့ မရှိပါဘူး..။

 
မေး - ကလပ်အသင်းများ ကမ္ဘာ့ဖလားကို ချယ်လ်ဆီးအသင်း ကိုင်မြှောက်ခွင့်ရခဲ့တဲ့ အချိန်တုန်းက ဘယ်လောက်အထိ ဂုဏ်ယူ၊ ဝမ်းမြောက်ခဲ့လဲဗျ…။?

Aww… အဆုံးစွန်အထိ နည်းမျိုးစုံနဲ့ ဂုဏ်ယူ၊ ဝမ်းမြောက်ခဲ့ပါတယ်..။ ချယ်လ်ဆီးအသင်းကို အစဉ်တစိုက် အားပေးခဲ့တဲ့ အပြာရောင်ပရိသတ် တစ်ယောက်အနေနဲ့ အရင်ဆုံးကြည်နူး၊ ပီတိ ဖြစ်ရတာပေါ့ဗျာ..။ ချယ်လ်ဆီးအသင်းဟာ ဗိုလ်လုပွဲစဉ် တက်ရောက်ခွင့်ရပြီ.. ဆိုတာနဲ့ မထင်မှတ်ထားတွေ လုပ်ဆောင်ပြတတ်တဲ့ အသင်းတစ်သင်း ဖြစ်ပါတယ်..။ တကယ့်ကို ထူးခြားခဲ့တဲ့ စွမ်းဆောင်မှုတွေလည်း လုပ်ပြခဲ့ပါတယ်..။ ဗိုလ်လုပွဲတွေမှာ အနိုင်ရအောင် စွမ်းဆောင်ပြခဲ့တာဟာ ကျွန်တော်တို့တွေရဲ့ အပြာရောင် DNA ဖြစ်ပါတယ်..။

အဓိကပြိုင်ပွဲတွေဆိုရင် ကျွန်တော်တို့တွေဟာ အစောပိုင်းမှာ ရုန်းကန်ခဲ့ရပါတယ်..။ ဒါပေမယ့် ဗိုလ်လုပွဲကိုရောက်ပြီ ဆိုတာနဲ့ အရမ်းကိုခြားနားတဲ့ အသင်းဖြစ်သွားပါတယ်..။ ကျွန်တော်တို့ဟာ စုစည်းမှု၊ အနိုင်မခံ အရှုံးမပေးတဲ့ စိတ်ဓါတ်၊ အောင်ပွဲဆာလောင်စိတ်တွေအပြည့်နဲ့ ဆုဖလားပေါင်းများစွာ အရယူခဲ့ပါတယ်..။ ဖရန့် လမ်းပတ်၊ ဂျွန် တယ်ရီ၊ ပီတာ ချက်၊ ကလော့ဒ် မက်ခလီလီ၊ ဒီယေဂို ကော်စတာ တို့လို ကစားသမားကြီးတွေဟာ အသင်းက လူငယ်ကစားသမားတွေကို ဖေးမတယ်..၊ ကူညီလမ်းပြတယ်..၊ တွန်းအားပေး မောင်းနှင်ရင်း အောင်ပွဲအလီလီ၊ ဆုဖလားတွေ အလီလီ ဆွတ်ခူးနိုင်ခဲ့ပါတယ်..။ 

အခုယှဉ်ပြိုင်ခဲ့တဲ့ ကလပ်အသင်းများ ကမ္ဘာ့ဖလားပြိုင်ပွဲ၊ ဗိုလ်လုပွဲမှာဆိုရင် ချန်ပီယံလိဂ် ဖလားကို ဗိုလ်စွဲခဲ့တဲ့ ပီအက်စ်ဂျီအသင်းကို အနိုင်ယူ၊ ကျော်ဖြတ်ခဲ့တာပါ..။ အဲဒီအောင်မြင်မှုဟာ အပြာရောင်ပရိသတ်တိုင်းအတွက် ဂုဏ်ယူ၊ ဝမ်းမြောက်ရမယ့် အောင်မြင်မှုတစ်ခု ဖြစ်ပါတယ်..။ အဲဒီထက်ပိုပြီး ‘အချိုပေါ်သကာဆင့်’ ရတဲ့ ချိုမြိန်မှုက ကျွန်တော်ဟာ ပဲရစ်စ်အသင်းရဲ့ မဟာပြိုင်ဘက် ‘မာဆေးလ်’ အသင်း ပရိသတ်ပါပဲဗျာ.. ဟားဟား…။ 

မေး - အခုဘောလုံးရာသီမှာ ချယ်လ်ဆီးအသင်း ဘယ်လိုအောင်မြင်မှုတွေ ရရှိမယ်လို့ မျှော်မှန်းထားလဲ..?

သူနဲ့ထိုက်တန်တဲ့ အောင်မြင်မှု ရရှိမှာပါ..။ ဘောလုံးရာသီဟာ အရှည်ကြီးဖြစ်သလို နောက်ထပ်ပွဲတွေအများကြီး၊ အများကြီးယှဉ်ပြိုင်ရဖို့ ရှိနေပါသေးတယ်..။ အခုဆိုရင် ကိုးလ် ပါးမား ဒဏ်ရာရနေတဲ့အပြင် အနားယူဖို့အချိန် ကောင်းကောင်း မရခဲ့တာကြောင့် နောက်ထပ်ဒဏ်ရာရ ကစားသမားတွေ ထပ်ပြီးရှိလာနိုင်ပါသေးတယ်..။ ပွဲကြီးပွဲကောင်းတွေလည်း အများကြီးရှိနေသေးတာဆိုတော့ ခက်ခဲတဲ့ရာသီတစ်ခု ဖြစ်လာဦးမှာပါ..။ မန်နေဂျာ အင်ဇို မာရက်စ်ကာ ဟာ အသင်းကို အကောင်းဆုံး ဦးဆောင်သွားနိုင်မယ်လို့ ယုံကြည်ထားပါတယ်..။

ကျွန်တော်တို့ ပရိသတ်တွေအနေနဲ့ အသင်းနဲ့ကစားသမားတွေရဲ့နောက်ကနေ အားပေး၊ ထောက်ခံသွားကြရမှာပါ..။ အထူးသဖြင့် အခုဘောလုံးရာသီမှာ ကျွန်တော်တို့အသင်းဟာ ချန်ပီယံလိဂ်ပြိုင်ပွဲဝင်ခွင့် ပြန်လည်ရရှိခဲ့တဲ့အတွက် အရမ်းကိုကျေနပ်မိပါတယ်..။ အသင်းနဲ့ပတ်သက်ပြီး ကျေနပ်စရာကောင်းတဲ့အရာတွေ အများကြီးပါပဲ..။

မေး - လက်ရှိချယ်လ်ဆီးအသင်းက အင်ဇို မာရက်စ်ကာ နဲ့ ကိုးလ် ပါးမား တို့နှစ်ယောက်ကို ခင်ဗျားက သေသေချာချာ နာမည်ခေါ်ပြီး ထည့်ပြောသွားပါတယ်..။ ပထမတစ်ယောက်ပေါ့.. အင်ဇို မာရက်စ်ကာ ဟာ ခင်ဗျားရဲ့ချယ်လ်ဆီးအသင်းနဲ့ ထိုက်တန်တဲ့နည်းပြ တစ်ယောက်လို့ မှတ်ယူထားလား..? 

အဲဒါက ကျွန်တော်ဆုံးဖြတ်ရမှာ မဟုတ်ပါဘူး..။ အခုအချိန်မှာ သူဟာချယ်လ်ဆီးအသင်းကို ရောက်ရှိနေပြီး အသင်းနဲ့အတူ အကောင်းဆုံး စွမ်းဆောင်ပြနေပါတယ်..။ ဒါ့ကြောင့်အခုအချိန်မှာ သူဟာအသင်းနဲ့ သင့်တော်သူ ဟုတ်လား..? မဟုတ်လား..? စဉ်းစားနေတာဟာ မှန်ကန်တဲ့အရာ မဟုတ်ပါဘူး..။ အင်ဇို မာရက်စ်ကာ ဟာ ဆုဖလားတွေကို ဆွတ်ခူးပေးတားနိုင်တယ်..၊ မှန်ကန်တဲ့ ဆုံးဖြတ်ချက်တွေ ချမှတ်ပေးနေတဲ့သူလည်း ဖြစ်နေပါတယ်..။ 

အခုဘောလုံးရာသီမှာ သူဟာနိုင်ပွဲတွေအများကြီး ရရှိဦးမှာ ဖြစ်သလို ရှုံးပွဲတစ်ချို့နဲ့လည်း ကြုံတွေ့ရဦးမှာပါ..။ ရှုံးပွဲတွေကနေ သင်ယူရမယ်..၊ ရှုံးပွဲတွေ နည်းနိုင်သမျှ နည်းပါးအောင် ကြိုးစားပြီး နိုင်ပွဲတွေ ရနိုင်သမျှ ရရှိအောင် စွမ်းဆောင်နိုင်ရပါမယ်..။ အင်ဇို မာရက်စ်ကာ ဟာ ချယ်လ်ဆီးအသင်းနဲ့ သင်ယူမှုတွေ၊ လေ့လာမှုတွေ ပြုလုပ်နေပါတယ်..။ သူဟာအခုဆိုရင် အသင်းမှာရှိနေတဲ့ လူငယ်ကစားသမားတွေနည်းတူ ချန်ပီယံလိဂ်ပြိုင်ပွဲအကြောင်း စတင် သင်ယူနေရပါပြီ..။ ဒါဟာတွေဟာ ဖြစ်စဉ်တစ်ခုအတိုင်း လည်ပတ်နေတာပါ..။ ကျွန်တော်တို့တွေ သူတို့ရဲ့စွမ်းဆောင်မှုအပေါ် ယုံကြည်မှုအပြည့်အဝ ထားရှိရပါမယ်..။ It's a process. We have to trust.. ပေါ့ဗျာ..။

မေး - ချယ်လ်ဆီးအသင်းပြီးတော့ ပရီးမီးယားလိဂ် ပြိုင်ပွဲအကြောင်း နည်းနည်းမေးချင်ပါတယ်..။ ချယ်လ်ဆီးအသင်းရဲ့ ဂန္ထဝင်ကစားသမား တစ်ယောက်အနေနဲ့၊ ချယ်လ်ဆီးအသင်းရဲ့ အမာခံပရိသတ် တစ်ယောက်အနေနဲ့ အခုဘောလုံးရာသီ၊ ပရီးမီးယားလိဂ်ပြိုင်ပွဲမှာ ဘယ်အသင်း ဗိုလ်စွဲမယ်လို့ မှန်းဆထားလဲ..?

အတော်ဆိုးတဲ့သူပဲ..။ ချယ်လ်ဆီး ကစားသမားဟောင်း တစ်ယောက်ကို ‘ဘယ်သူဗိုလ်စွဲမလဲ..?’ ဆိုပြီး လာမေးတယ်ဗျာ.. ဟားဟား..။ ကဲ.. ကျွန်တော်က ခင်ဗျားကိုပြန်မေးမယ်..။ အခုဘောလုံးရာသီ၊ ပရီးမီးယားလိဂ် ပြိုင်ပွဲမှာ ဘယ်အသင်း ဗိုလ်စွဲမယ်လို့ ခင်ဗျားထင်ထားလဲ..? ချယ်လ်ဆီးအသင်းတော့ မပါဘူးမလား...? ဟားဟား..

မေး - wait.. wait.. ခဏလေး.. ကလပ်အသင်းများ ကမ္ဘာ့ဖလားပြိုင်ပွဲတုန်းက ချယ်လ်ဆီးအသင်း ဗိုလ်စွဲမယ်လို့ ကြိုတင်မှန်းဆခဲ့တဲ့ တစ်ဦးတည်းသောသူက ကျွန်တော်ပဲဗျ..။ ပြီးခဲ့တဲ့လီဗာပူးလ်နဲ့ပွဲမှာ ချယ်လ်ဆီးက ၂ဂိုးသွင်းပြီး အနိုင်ရလိမ့်မယ်လို့ ကျွန်တော်မှန်းခဲ့ပါသေးတယ်..။ အဲဒီတော့ ကျွန်တော်ဟာ ခင်ဗျားတို့ချယ်လ်ဆီး အုပ်စုထဲမှာ ပါဝင်တယ်လို့ ပြောလို့ရတယ် မဟုတ်ဘူးလား.. ဟားဟား..
အဲဒါက ကမ္ဘာ့ဖလားလေ…။ ဒါဆိုရင် ခင်ဗျားရဲ့အသင်းက ဘာလဲ..?

မေး - အင်း… ကျွန်တော့်ရဲ့အသင်းက ….. ‘မန်ချက်စတာ ယူနိုက်တက်’ ပါ..။ 
အင်းပါ..။ အတော်ဆိုးဆိုးရွားရွားပါပဲ..။ ထားလိုက်ပါတော့..။ ဘဝမှာအရာရာတိုင်း ပြီးပြည့်စုံနေတဲ့သူ… ဆိုတာ ဘယ်ရှိပါ့မလဲ..? ဟားဟား..

မေး - ကျွန်တော်အားပေးတဲ့အသင်းကို တခုတ်တရနဲ့ ပြန်လည်မေးမြန်းပေးတာ ကျေးဇူးပဲဗျာ..။ အရမ်းလည်း ကျေနပ်မိပါတယ်..။ အခုမျက်မှောက် ကျွန်တော်တို့ရဲ့ မန်ချက်စတာ ယူနိုက်တက် ဟာ ခင်ဗျားတို့ရင်ဆိုင်ခဲ့ရတဲ့ မန်ချက်စတာ ယူနိုက်တက် မဟုတ်တော့ပါဘူး..။ ဒါ့ကြောင့်ချယ်လ်ဆီးပရိသတ် တစ်ယောက်အနေနဲ့ အခုလက်ရှိ မန်ချက်စတာ ယူနိုက်တက်အသင်းနဲ့ ပတ်သက်ပြီး မြင်မိတဲ့အချက်တွေရှိခဲ့ရင် ပြောပြပေးပါလား..? 

အသင်းတိုင်းမှာ ပြဿနာကိုယ်စီ ရှိကြပါတယ်..။ ကြီးတာနဲ့ သေးတာ..၊ နည်းတာနဲ့ များတာပဲ ကွာတာ..။ အပြင်လူတွေသိတဲ့ အကြောင်းကိစ္စတွေ ရှိကြသလို အပြင်လူတွေ မသိလိုက်ကြတဲ့ အရာတွေလည်း အများကြီးပါပဲ..။ အသင်းတွေရဲ့ နာမည်တွေ၊ တံဆိပ်တွေဟာ အရမ်းကိုလှပတယ်..၊ ဆွဲဆောင်မှု ရှိကြပါတယ်..။ အဲဒီနာမည်တွေရဲ့နောက်မှာ အသင်းကို မောင်းနှင်နေကြတဲ့ လူပုဂ္ဂိုလ်တွေ ရှိကြပါတယ်..။ လူတွေဆိုတော့ အမှားတွေ ကျူးလွန်မိကြမှာပဲ..။ 

အသင်းတွေဟာ ‘အတက်၊ အကျ’.. စက်ဝိုင်းတွေလို လည်ပတ်နေတာပါ..။ ကျွန်တော်တို့ ချယ်လ်ဆီးအသင်းလည်း အဲဒီလိုစက်ဝိုင်းထဲမှာ မွတ်မွတ်လည်ထွက်သွားခဲ့သေးတာပါပဲ..။ ကျွန်တော်တို့ကတော့ ခက်ခဲတဲ့နေ့ရက်တွေကို ကျော်ဖြတ်ခဲ့ပြီး ရောင်နီသာတဲ့ နေ့ရက်တွေကို မြင်တွေ့နေခဲ့ရပြီပေါ့ဗျာ..။ ဒါ့ကြောင့်ခင်ဗျားတို့အနေနဲ့ ကိုယ့်ရဲ့အသင်းအပေါ် စိတ်ရှည်သည်းခံမှု ပေးရပါမယ်..။ အားလုံးအတူတကွ စုစုစည်းစည်းနဲ့ တိုက်ခတ်လာတဲ့ မုန်တိုင်းတွေကို ရင်ဆိုင်၊ ကျော်ဖြတ်ကြရမှာပဲ..။

ဒါပေမယ့် အဲဒီလိုမုန်တိုင်းတွေကို ရင်ဆိုင်၊ ကျော်ဖြတ်နိုင်ဖို့ဆိုတာ အသင်းငယ်တွေအတွက် ပိုပြီးလွယ်ကူပါတယ်..။ မန်ချက်စတာ ယူနိုက်တက် တို့လို အသင်းကြီးတွေကျတော့ ချက်ချင်းလက်ငင်း ရလဒ်ကောင်းတွေ မျှော်လင့်ထားကြတာကိုးဗျ..။ တောင်းဆိုမှုကြီးမားတယ်..၊ ဖိအားများတယ်..၊ အဲဒီအရာတွေဟာ အသင်းနဲ့အတူ အမြဲတမ်းတည်ရှိနေတဲ့ ဂုဏ်ကျက်သရေ (legacy) လို့လည်း သမုတ်ကြတာပေါ့ဗျာ..။ နောက်ဆုံးမှာတော့ အချိန်တစ်ခု ကျော်ဖြတ်ပြီးရင် ကောင်းမွန်တဲ့ နေ့ရက်တွေ ပြန်လည်ရောက်ရှိလာမှာပါ..။

မေး - အခုဘောလုံးရာသီမှာ အာဆင်နယ်အသင်း ဗိုလ်စွဲမယ်.. ဆိုပြီး လူပြောများ၊ ရေပန်းစားနေပါတယ်..။ အထူးသဖြင့် အခုနောက်ဆုံး အပြောင်းအရွှေ့ရာသီမှာ သူတို့ရဲ့အားဖြည့်မှုတွေဟာ အားရဖို့ကောင်းခဲ့ပါတယ်..။ ဒါ့ကြောင့်အခုဘောလုံးရာသီမှာ ပရီးမီးယားလိဂ် ချန်ပီယံဆုဟာ ခင်ဗျားတို့ရဲ့ စတန်းဖို့ဒ် ဘရစ်ချ်.. ခြင်္သေ့လှောင်အိမ်ထဲမှာ ခိုနားဖို့မလွယ်တော့ပဲ အာဆင်နယ်အသင်းရဲ့ အင်းမရိတ်ကွင်းကို ရောက်ရှိသွားလိမ့်မယ်.. လို့ရော မထင်ထားဘူးလား..?

No.. no.. ချယ်လ်ဆီးအသင်းအကြောင်းမပြောခင် အာဆင်နယ်အသင်းဟာ အခုဘောလုံးရာသီမှာ ကစားသမားကောင်းတွေ အများကြီးခေါ်ယူထားပါတယ်..။ ဒါ့ကြောင့်သူတို့အနေနဲ့ ချန်ပီယံဆုကို မျှော်မှန်းတာ ‘မှန်ကန်တယ်’ လို့ ပြောလို့ရပါတယ်..။

ချယ်လ်ဆီး… ကျွန်တော်တို့ရဲ့ ချယ်လ်ဆီးဟာလည်း ဖလားမရခဲ့တာ နှစ်အတော်ကြာခဲ့ပါပြီ ဖြစ်တာကြောင့် ပရီးမီးယားလိဂ် ချန်ပီယံဆု ရချင်ပါတယ်..။ ဘောလုံးရာသီတစ်ခုမှာ ထိပ်တန်းအသင်းကြီးတိုင်းရဲ့ ရည်မှန်းချက်ဟာ ဆုဖလားတွေ ဆွတ်ခူးနိုင်ဖို့ ဖြစ်ပါတယ်..။ ဒုတိယရတယ်..၊ တတိယရတယ်.. ဆိုရင် ဆိုးရွားတဲ့ ဘောလုံးရာသီတစ်ခု ဖြစ်သွားပြီပေါ့ဗျာ..။

အသင်းတိုင်းဟာ ‘ဆုဖလား ဆွတ်ခူးနိုင်ဖို့..’ ဆိုတဲ့ ရည်မှန်းချက် ရှိရပါမယ်..။ ကျွန်တော်တို့ချယ်လ်ဆီးအသင်းမှာ ရှိစဉ်အခါက ဒုတိယရတဲ့နှစ်တွေဆိုရင် ကမ္ဘာပျက်တဲ့အတိုင်း ဇာတ်လမ်းတွေ ပေါ်ထွက်လာခဲ့တာပါပဲ..။ ဘာဖြစ်လို့လည်းဆိုတော့ ကျွန်တော်တို့ ပရီးမီးယားလိဂ် ချန်ပီယံဆု မရခဲ့တာကြောင့်ပါ..။ နောက်ထပ်တစ်နှစ်ကျတော့ ကျွန်တော်တို့ဟာ ချန်ပီယံဆု ဆွတ်ခူးရမယ်.. ဆိုပြီး အရမ်းကိုစိတ်အား ထက်သန်ခဲ့ကြပါတယ်..။ ဒါ့ကြောင့်အသင်းတိုင်းဟာ တစ်ဆင့်ချင်း တိုးတက်အောင် ကြိုးစား၊ လုပ်ဆောင်သွားကြရမှာပါ..။

မေး - အခုလက်ရှိ ပရီးမီးယားလိဂ်မှာ ခင်ဗျားအကြိုက်ဆုံး အာဖရိက ကစားသမား..?

‘မိုဟာမက် ကူဒူးစ်’ ပါ..။ နီကိုလပ်စ် ဂျက်ဆင် ကိုလည်း သဘောကျခဲ့ပါတယ်..။ သူ့ရဲ့ချယ်လ်ဆီးအသင်း ပွဲထွက်ကာလတွေဟာ ကျွန်တော်ဖြတ်သန်းခဲ့ရတာနဲ့ အတော်လေးကို ဆင်တူခဲ့သလို ချယ်လ်ဆီးအသင်းမှာ ကျွန်တော်စတင် ဝတ်ဆင်ခဲ့တဲ့ နံပါတ် (၁၅) ကိုပါ ဝတ်ဆင်ခဲ့တာကိုး..။ ဒါပေမယ့် သူဟာချယ်လ်ဆီးအသင်းမှာ အတော်လေး အခက်တွေ့ခဲ့ပါတယ်..။ အခုတော့ ဘိုင်ယန် မြူးနစ်အသင်းမှာ ပိုပြီးအဆင်ပြေနေတဲ့သဘော မြင်တွေ့နေရပါတယ်..။ Wow.. ဆောရီး.. ‘မိုဟာမက် ဆာလာ..’..။ ကျွန်တော့်ရဲ့ ညီလေး.. King Salah.. ကိုလည်း သဘောကျပါတယ်နော်.. ခုနက ထည့်ပြီးပြောဖို့ မေ့သွားလို့ပါ.. ဟားဟား..

မေး - အခုလက်ရှိ ပရီးမီးယားလိဂ်အသင်းတွေရဲ့ တိုက်စစ်မှူးတွေထဲမှာ ခင်ဗျားထက်ပိုပြီး ကောင်းမွန်နိုင်မယ့် တိုက်စစ်မှူး ဘယ်သူဖြစ်မလဲ..?

No.. no.. ခုနကလည်း ကျွန်တော်ပြောခဲ့ပြီးပါပြီ..။ ဘောလုံးသမား တစ်ယောက်ဟာ တိုက်စစ်မှူးတစ်ယောက် ဖြစ်လာဖို့ ဘယ်လောက်အထိ ပေးဆပ်ခဲ့ရလဲ..၊ ကြိုးစားခဲ့ရလဲ..? ကျွန်တော်သိပါတယ်..။ ဒါ့ကြောင့်ကျေးဇူးပြုပြီး နှိုင်းယှဉ်တာတွေ မလုပ်ကြပါနဲ့..။ သူတို့တွေဟာ ဒီလိုနေရာအသီးသီးကို ရောက်ရှိလာဖို့ အရည်အသွေးကောင်းတွေ အများကြီး ဖြည့်ဆည်းခဲ့ကြပါတယ်..။ တိုက်စစ်မှူးတွေဆိုတာ ခွန်အားဗလ၊ ခန္ဓာကိုယ် ကြံ့ခိုင်မှု ကောင်းမွန်နေရမယ်..၊ လိမ္မာပါးနပ်မှု ရှိရပါမယ်..။ နောက်ပြီးဂိုးရရှိနိုင်မယ့် နေရာကို သိနေရမှာ ဖြစ်သလို ချိန်သားကိုက် (timing) ရောက်ရှိအောင် ဘယ်လိုစွမ်းဆောင်ရမယ်.. ဆိုတာ နားလည်ရပါမယ်..။ 

ဂိုးဆာလောင်စိတ် အပြည့်ရှိနေရမှာ ဖြစ်သလို နိုင်ပွဲရရှိလိုစိတ်၊ အောင်နိုင်ချင်တဲ့ စိတ်ဆန္ဒတွေဟာ အမြဲတမ်းတောက်လောင်၊ လောင်ကျွမ်းနေရပါမယ်..။ အသင်းဖော်တွေကိုလည်း အကူအညီပေးနိုင်၊ ပံ့ပိုးပေးနိုင်တဲ့သူ ဖြစ်ရပါမယ်..။ ဒါဆိုရင် တိုက်စစ်မှူး (striker) ဆိုတာဘာလဲ..? ဂိုးသွင်းပေးနိုင်တဲ့သူ ပါဝင်သလို အသင်းအတွက် အကောင်းဆုံး ကူညီပေးနိုင်တဲ့သူတွေဟာလည်း ‘တိုက်စစ်မှူး’ ထဲမှာ ပါဝင်တာပါပဲ..။ ကျွန်တော်ဆိုရင် တိုက်စစ်ပိုင်းမှာ ဂိုးသွင်းတယ်..၊ ဂိုးဖန်တီးပေးသလို ခံစစ်ပိုင်းမှာလည်း ဆင်းပြီးကူညီပေးပါတယ်..။ 

ဒါ့ကြောင့်ကျွန်တော့်ကို ဖိလစ်ပို အင်ဇာဂီ၊ ဒေးဗစ် ထရာဇီဂေး တို့နဲ့ နှိုင်းယှဉ်မှာလား..? သူတို့တွေဟာ ဂိုးသွင်းဖို့တစ်ခုတည်းပဲ အာရုံစိုက်တဲ့ ‘ဂိုးမုဆိုးတွေ’ ဖြစ်ကြပါတယ်..။ ဒါပေမယ့် ဂိုးသွင်းယူတဲ့အပိုင်း၊ ဂိုးရမယ့်နေရာကို သိရှိနိုင်တဲ့အပိုင်းမှာတော့ သူတို့ထက် ပိုကောင်းတဲ့သူ ရှိမှာမဟုတ်ပါဘူး..။ ကျွန်တော်ဟာ ကိုယ့်ကိုယ်ကို ထရာဇီးဂေး၊ အင်ဇာဂီ တို့နဲ့ နှိုင်းယှဉ်လို့မရသလို တခြားဘယ်သူနဲ့မှလည်း နှိုင်းယှဉ်လို့ ဖြစ်နိုင်မှာ မဟုတ်ပါဘူး..။ တိုက်စစ်မှူးတိုင်းမှာ သူတို့တွေရဲ့ ထူးခြားတဲ့စွမ်းရည် ကိုယ်စီရှိကြပါတယ်..။ ကိုယ်ပိုင်ဟန်ပေါ့ဗျာ..။ 

မေး - ဒါဆိုရင် အခုနောက်ဆုံးမေးချင်တာက အခုလက်ရှိ ကစားနေတဲ့ တိုက်စစ်မှူးတွေထဲမှာ ခင်ဗျားနဲ့ကစားပုံ အဆင်တူဆုံး တိုက်စစ်မှူးက ဘယ်သူဖြစ်မလဲ..?
ဗစ်တာ အိုဆီမန်…

မေး - Wow..!!! တကယ့်ကို အကောင်းဆုံးအဖြေနဲ့ ကျွန်တော်တို့ရဲ့ တွေ့ဆုံခန်းကို အဆုံးသတ်နိုင်ခဲ့တာပဲ..။ ဗစ်တာ ရေ… ကျွန်တော်တို့ရဲ့ နိုက်ဂျီးရီးယား တိုက်စစ်မှူးပေါ့ဗျာ..။ အခုလိုခင်ဗျားရဲ့ဘူမိနက်သန် လီမန်းစ်အသင်းမှာ အသင်းရဲ့နှစ် (၄၀) ပြည့် အထိမ်းအမှတ်အဖြစ်နဲ့ ကျွန်တော်တို့ကို လက်ခံဖြေကြားပေးတဲ့အပေါ် အထူးကျေးဇူးတင်ရှိပါကြောင်း ပြောကြားရင်း ကျွန်တော်တို့ရဲ့ မေးမြန်းခန်းကို အဆုံးသတ်လိုက်ပါစေ…