ပြီးခဲ့တဲ့နွေရာသီမှာ ကျင်းပခဲ့တဲ့ ကလပ်အသင်းများ ကမ္ဘာ့ဖလားပြိုင်ပွဲမှာ ချယ်လ်ဆီးအသင်း ဗိုလ်စွဲခဲ့အပြီး ၂၀၂၅/၂၆ ဘောလုံးရာသီ စတင်ချိန်မှာ ပရီးမီးယားလိဂ်ထိပ်တန်းအသင်းတွေကို စိန်ခေါ်နိုင်တဲ့ အသင်းတစ်သင်းအဖြစ် ပေါ်ထွက်လာလိမ့်မယ်လို့ အများကမျှော်မှန်းခဲ့ကြပါတယ်..။ ဒါပေမယ့် ပရီးမီးယားလိဂ် ပွဲစဉ် (၉) အပြီး ရလဒ်ပိုင်းတွေကို ကြည့်မယ်ဆိုရင် အပြာရောင်တွေဟာ အဲဒီအောင်မြင်မှုအရှိန်ကို ဆက်လက်သယ်ဆောင်နိုင်ခြင်း မရှိခဲ့ပါဘူး..။

အခုဘောလုံးရာသီမှာ ချယ်လ်ဆီးအပါအဝင် အသင်းကြီးတွေရဲ့ အခုအချိန်အထိ အဓိကပြဿနာဟာ ‘ခြေစွမ်းတည်ငြိမ်မှုမရှိတာ (inconsistency)’ ဖြစ်ပါတယ်..။ စတန်းဖို့ဒ် ဘရစ်ချ်အသင်းဟာ လက်ရှိချန်ပီယံ လီဗာပူးလ်အသင်းအပေါ် အနိုင်ရလဒ်နဲ့ အောက်တိုဘာလကို ဖွင့်လှစ်နိုင်ခဲ့ပါတယ်..။ ဒါပေမယ့် တန်းတက်ဆန်းဒါးလန်းအသင်းကို ရှုံးနိမ့်ခဲ့တာကြောင့် နောက်ဆုံးယှဉ်ပြိုင်ခဲ့တဲ့ ပရီးမီးယားလိဂ် (၅) ပွဲမှာ ရမှတ် (၆) မှတ်သာ ရရှိခဲ့ပြီး အဆင့် (၉) နေရာမှာ ရပ်တည်နေခဲ့ပါတယ်..။ ပြီးခဲ့တဲ့ဘောလုံးရာသီတုန်းက ပွဲစဉ် (၉) အပြီး ရမှတ်ချင်း နှိုင်းယှဉ်ကြည့်မယ်ဆိုရင် (၃) မှတ်လျော့နည်းနေခဲ့ပါတယ်..။

ဒါပေမယ့် အပြာရောင်တွေအတွက် အကောင်းမြင်စရာ တိုးတက်မှုတွေလည်း ရှိနေပါတယ်..။ တည်ကန်ဘောနည်းပြ ဘာနာဒို ကျူးဗား ရဲ့ စွမ်းဆောင်ပေးမှုနဲ့အတူ တည်ကန်ဘောတွေကနေ ဂိုးတွေရရှိလာခဲ့ပါတယ်..။ ဒါ့အပြင်အခုလက်ရှိ အမှတ်ပေးဇယားမှာ အဆင့် (၉) နေရာဆိုပေမယ့် ဒုတိယနေရာက အသင်းနဲ့ (၄) မှတ်ပဲ ကွာပါတယ်..။

အခုအချိန်မှာ အင်ဇို မာရက်စ်ကာ ရဲ့အသင်းဟာ မျှော်မှန်းထားသလောက် အစွမ်းပြနိုင်ခြင်းမရှိသေးပါဘူး..။ ဒါ့ကြောင့်ချယ်လ်ဆီးအသင်းကို ဆုဖလားကို ချိန်ရွယ်နိုင်တဲ့ အသင်းတစ်သင်းအဖြစ် တိုးတက်လာဖို့ အီတလီနည်းပြကြီး ဖြေရှင်းပေးရမယ့် နည်းစနစ်ပိုင်းဆိုင်ရာ မေးခွန်း(၅) ခုကို တင်ဆက်လိုက်ပါတယ်..။

စွန့်စားမှုဆန်တဲ့ လူစားလဲမှုတွေနဲ့ ပိုပြီးလျှင်မြန်တဲ့ ကစားပုံကို ပြောင်းလဲသင့်ပြီလား…?

အခုအချိန်ထိ ချယ်လ်ဆီးအသင်းရဲ့ အကြီးမားဆုံးအနိုင်ပွဲနှစ်ပွဲကိုပြောပါ.. ဆိုရင် ပီအက်စ်ဂျီအသင်းကို အနိုင်ရခဲ့တဲ့ ကလပ်အသင်းများ ကမ္ဘာ့ဖလား ဗိုလ်လုပွဲနဲ့ အောက်တိုဘာလက လီဗာပူးလ်အသင်းကို အနိုင်ရခဲ့တဲ့ ပွဲစဉ်ပဲ ဖြစ်ပါလိမ့်မယ်..။ အဲဒီနှစ်ပွဲမှာ အင်ဇို မာရက်စ်ကာ ရဲ့ ပွဲချဉ်းကပ်ပုံ၊ နည်းစနစ် အခင်းအကျင်း တူညီနေတဲ့အချက်က ထူးခြားနေပါတယ်..။

အဲဒီပွဲတွေမှာ ချယ်လ်ဆီးအသင်းဟာ ပြိုင်ဘက်ကစားသမားတွေကို တစ်ဦးချင်း အတင်းလိုက် ဖိအားပေးကစားတဲ့ပုံစံ (man to man high pressing) နဲ့ အရှိန်တင် ကစားခဲ့ပြီး ပီအက်စ်ဂျီနဲ့ လီဗာပူးလ်အသင်းတို့ရဲ့ ကွင်းလယ်မှာ အမှားတွေကျူးလွန်စေခဲ့ပါတယ်..။ အဲဒီအမှားတွေကတဆင့် ပြန်ရလာတဲ့ ဘောလုံးတွေကို လျှင်မြန်တဲ့ ထိုးဖောက်မှုတွေ (fast breaks) နဲ့ ဂိုးတွေရရှိအောင် စွမ်းဆောင်နိုင်ခဲ့ပါတယ်..။ အဲဒီနည်းစနစ်ပိုင်း ချဉ်းကပ်ပုံဟာ မာရက်စ်ကာ ရဲ့ စစ်တုရင် အခင်းအကျင်းကနေ ဆင့်ပွားခဲ့တဲ့ positional football နဲ့ ဆန့်ကျင်ဘက် ဖြစ်နေပါတယ်..။

အင်ဇို မာရက်စ်ကာ ဟာ ဘောလုံးပိုင်ဆိုင်မှုအသားပေးပြီး ထိုးဖောက်စေတတ်တာကြောင့် အချက်အလက်တွေအရ ချယ်လ်ဆီးအသင်းရဲ့ တိုက်စစ်ထိုးဖောက်မှုအမြန်နှုန်း (direct speed) ဟာ တစ်စက္ကန့်ကို (၁.၅၈) မီတာသာ ရှိနေပြီး ပရီးမီးယားလိဂ်မှာ ပြိုင်ဘက်အသင်း ဂိုးပေါက်ဆီကို ဘောလုံးရွှေ့လျားမှု  အနှေးဆုံးအသင်း ဖြစ်နေပါတယ်..။ 

ဒါ့အပြင် အီတလီနည်းပြကြီးဟာ စွန့်စားမှုမရှိတဲ့ လူစားလဲမှုတွေကိုသာ ပြုလုပ်လေ့ရှိပါတယ်..။ ဆန်းဒါးလန်းအသင်းကို ရှုံးနိမ့်ခဲ့တဲ့ပွဲမှာဆိုရင် အသင်းရဲ့တစ်လုံးတည်းသော ဂိုးကိုသွင်းယူပေးခဲ့တဲ့ အလီဂျန်ဒရို ဂါနာချို နဲ့ အထောင်တိုက်စစ် ကစားပေးနိုင်တဲ့ တစ်ဦးတည်းသော ကစားသမား မာ့စ် ဂီယူ တို့ကို လူစားလဲခဲ့တာကြောင့် ဝေဖန်ခံခဲ့ရပါတယ်..။ မန်ချက်စတာ ယူနိုက်တက်အသင်းကို ရှုံးနိမ့်ခဲ့တဲ့ပွဲမှာ ရောဘတ် ဆန်းချက်ဇ် အထုတ်ခံလိုက်ရတာနဲ့ back five ကို ချက်ချင်းဆိုသလို ပြောင်းလဲခဲ့သလို ဘရိုက်တန်အသင်းနဲ့ပွဲမှာလည်း ဒုတိယပိုင်းမှာ တိုက်စစ်ကစားသမားတွေကို ခံစစ်ကစားသမားတွေနဲ့ လူစားလဲခဲ့ပါတယ်..။

လက်ရှိချယ်လ်ဆီးအသင်းဟာ အခုထက်ပိုပြီး လျှင်မြန်တဲ့ ထိုးဖောက်မှုတွေ ပြုလုပ်နိုင်ဖို့ လိုအပ်နေသလို ပြိုင်ဘက်တွေက ကိုယ့်အသင်းဘက်ကို ဖိကစားလာတဲ့ ဒုတိယပိုင်းတွေမှာ အဲဒီဖိအားတွေကို ပြန်လှန်နိုင်ဖို့ မှန်ကန်တဲ့ လူစားလဲမှုတွေနဲ့ နည်းစနစ်အပြောင်းအလဲတွေ ဖော်ဆောင်နိုင်ဖို့ လိုအပ်နေဆဲပါပဲ..။

တည်ငြိမ်နောက်ခံလူ လေးယောက်နဲ့ ခိုင်မာတဲ့ကျောရိုး တည်ဆောက်ချိန် ရောက်လာပြီလား..?  

ချယ်လ်ဆီးအသင်းဟာ တိုက်စစ်ပိုင်းမှာ လိုအပ်ချက်တွေ ရှိနေပေမယ့် ခံစစ်ပိုင်းမှာ ဖြစ်ပျက်နေတဲ့ အရာတွေက ပိုပြီးအရေးကြီးတဲ့သဘော ဖြစ်နေပါတယ်..။

အခုဘောလုံးရာသီမှာ အသင်းရဲ့ခံစစ်ပိုင်း စွမ်းဆောင်ရည် အချက်အလက်တွေအရ ကိုယ့်အသင်းရဲ့ အမှားကနေ ဂိုးကန်သွင်းခွင့်ပေးလိုက်ရတာ (၉) ကြိမ်ရှိနေပြီး ပရီးမီးယားလိဂ်အသင်းတွေထဲမှာ စတုတ္ထမြောက် အမှားအများဆုံး ပြုလုပ်ထားတဲ့အသင်း ဖြစ်နေပါတယ်..။ လီဗိုင်း ကိုဝဲလ်၊ ဝက်စ်လေ ဖိုဖားနား တို့လို နောက်ခံလူတွေ ဒဏ်ရာရနေပြီး ခံစစ်ကစားသမားတွေရဲ့ အတွေ့အကြုံနည်းပါးမှုဟာ အဲဒီပြဿနာတွေရဲ့ အရင်းအမြစ်လို ဖြစ်နေပါတယ်..။ 

အင်ဇို မာရက်စ်ကာ အနေနဲ့ သူ့ရဲ့အကောင်းဆုံး နောက်ခံလူလေးယောက်ကို ရွေးထုတ်ပြီး ခံစစ်ကစားသမားတွေကြားမှာ နားလည်မှုပိုကောင်းလာအောင် လုပ်ဆောင်သင့်ပြီလို့ ယူဆစရာ ရှိပါတယ်..။ အခုဘောလုံးရာသီ၊ ပရီးမီးယားလိဂ် ပြိုင်ပွဲတွေမှာ နောက်ခံလူလေးယောက်ထဲမှာ အနည်းဆုံးတစ်ယောက် အပြောင်းအလဲ ပြုလုပ်ခဲ့တာ (၆) ကြိမ်ရှိခဲ့ပြီး နောက်တန်းလေးယောက်စလုံးကို မတူညီတဲ့ ကစားသမားတွေနဲ့ ပွဲထုတ်ခဲ့တဲ့ပွဲစဉ် (၈) ပွဲရှိခဲ့ပါတယ်..။ အဲဒီပွဲအရေအတွက်ဟာ ကန်ခဲ့တဲ့ပွဲတွေရဲ့ တစ်ဝက်ဖြစ်နေပြီး တူညီတဲ့နောက်ခံလူ လေးယောက်နဲ့ နှစ်ပွဲဆက်တိုက် ကစားခဲ့တာ နှစ်ကြိမ်ပဲ ရှိခဲ့ပါတယ်..။

အချက်အလက်တွေအရ ချယ်လ်ဆီးအသင်းဟာ ပရီးမီးယားလိဂ် (၉) ပွဲအတွင်း နောက်တန်းလေးယောက်ကို လူစားလဲမှု (၁၅) ကြိမ် ပြုလုပ်ခဲ့ပါတယ်..။ ခံစစ်ကြောင်းတွေဟာ အတွဲအစပ်မိဖို့ အချိန်ယူရတဲ့သဘော ရှိပါတယ်..။ ဒါ့ကြောင့်ခံစစ်ကစားသမားတွေကို မကြာခဏ အပြောင်းအလဲ ပြုလုပ်နေတာဟာ ခံစစ်ကြောင်းအားနည်းမှုကို ပိုပြီးဆိုးရွားစေတဲ့သဘော ရှိပါတယ်..။ ဒါပေမယ့် ခံစစ်ကစားသမားတွေရဲ့ ဒဏ်ရာပြဿနာကလည်း နည်းပြအင်ဇို မာရက်စ်ကာ ကို ပိုပြီးအခက်တွေ့စေခဲ့ပါတယ်..။

ပရီးမီးယားလိဂ်ရဲ့ ပျမ်းမျှအသက်အငယ်ဆုံးအသင်းကို ဘယ်လိုကိုင်တွယ်သွားဖို့ရှိလဲ..?

လက်ရှိချယ်လ်ဆီးအသင်းရဲ့ ပျမ်းမျှအသက်ဟာ (၂၄) နှစ်၊ (၁၁၂) ရက်သာရှိနေပြီး ပရီးမီးယားလိဂ်ရဲ့ ပျမ်းမျှအသက်အငယ်ဆုံးအသင်း ဖြစ်နေပါတယ်..။ ဒါ့အပြင်အင်ဇို မာရက်စ်ကာ ဟာ အသက် (၃၀) ကျော် ကစားသမားကို တစ်ခါမှထည့်သွင်း မကစားခဲ့ဖူးသေးပါဘူး..။

သုံးသပ်သူတစ်ချို့ကတော့ ‘အသက်ငယ်ရွယ်မှု’ ဟာ ပြဿနာ ဟုတ်၊ မဟုတ်.. ဆိုတဲ့အချက်ဟာ ‘အသင်းရဲ့ ရလဒ်အပေါ်မှာပဲ မူတည်နေပါတယ်..’ လို့ ပြောပါတယ်..။ ပွဲရှုံးနိမ့်ပြီဆိုရင် အတွေ့အကြုံအားနည်းမှု (inexperience) နဲ့ ခေါင်းဆောင်မှု အားနည်းမှု (lack of leadership) အပေါ် အပြစ်ပုံချကြပြီး အနိုင်ရပြီဆိုတာနဲ့ လူငယ်လေးတွေရဲ့ အကြောက်အလန့်မရှိ အင်ပြည့်အားပြည့် ရဲရဲဝံ့ဝံ့ ကစားတတ်တဲ့စိတ်ဓါတ် (fearless energy) နဲ့ အတွေးသစ်၊ အမြင်သစ်ရှိမှု (fresh ideas) အပေါ် ချီးမွမ်းတတ်ကြပါတယ်..။

  
ဒါပေမယ့် လူငယ်ကစားသမားတွေ များပြားလွန်းနေတဲ့အတွက် ရှောင်လွှဲမရတဲ့အချက်ကတော့ ‘ခြေစွမ်းတည်ငြိမ်မှုမရှိခြင်း (inconsistency)’ ပဲ ဖြစ်ပါတယ်..။ အခုလက်ရှိအသင်းမှာ လူငယ် ကစားသမားတွေကို ထိန်းကျောင်းနိုင်မယ့် အတွေ့အကြုံရင့်၊ ဝါရင့်.. သမ္ဘာရင့် ကစားသမား ရှိမနေတာကြောင့် အနည်းဆုံး ဇန်နဝါရီအထိတော့ လက်ရှိအတိုင်း ဆက်လက်ချီတက်ရဦးမှာပါ..။ ဒါပေမယ့် အသင်းရဲ့ လက်ရှိအပြောင်းအရွှေ့ မူဝါဒအရ အတွေ့အကြုံရင့် ကစားသမားတွေကို ဝယ်ယူဖို့ဆန္ဒရှိဦးမှာ မဟုတ်ဘူး.. လို့ သုံးသပ်ရပါတယ်..။

ကိုးလ် ပါးမား ပြန်မလာနိုင်ခင် အသင်းအတွက် ဂိုးတွေပုံမှန်သွင်းပေးမယ့် ကစားသမား ဘယ်သူဖြစ်မလဲ..?

ကိုးလ် ပါးမား ဟာ ပြီးခဲ့တဲ့ဘောလုံးရာသီမှာ (၁၅) ဂိုး သွင်းယူပေးခဲ့ပြီး ချယ်လ်ဆီးအသင်း ကစားသမားတွေထဲမှာ ပရီးမီးယားလိဂ် သွင်းဂိုးအများဆုံး ရရှိခဲ့သူ ဖြစ်ခဲ့ပါတယ်..။ ဒါပေမယ့် သူဟာဒဏ်ရာကြောင့် ဒီဇင်ဘာလအထိ ပြန်ကစားနိုင်ဦးမှာ မဟုတ်သေးပါဘူး..။ ဒုတိယဂိုးအများဆုံး သွင်းယူပေးခဲ့တဲ့သူက (၁၀) ဂိုးသွင်းပေးခဲ့တဲ့ နီကိုလပ်စ် ဂျက်ဆင် ဖြစ်ပြီး ဆီနီဂေါတိုက်စစ်မှူးဟာ အသင်းမှာမရှိတော့ပါဘူး..။

အခုဘောလုံးရာသီ၊ ပရီးမီးယားလိဂ်ပြိုင်ပွဲမှာ ချယ်လ်ဆီးအသင်းဟာ (၁၇) ဂိုးသွင်းယူပေးထားပြီး ဂိုးအများဆုံး သွင်းယူထားတဲ့အသင်းအဖြစ် ပူးတွဲရပ်တည်နေပါတယ်..။ ဒါ့ကြောင့် ဒီအသင်းမှာ တိုက်စစ်ပိုင်းပြဿနာ ရှိနေတယ်.. ဆိုတဲ့အချက်ဟာ ထူးဆန်းနေသလိုပါပဲ..။ ဒါပေမယ့် အဲဒီ (၁၇) ဂိုးကို ကစားသမား (၁၀) ဦးက သွင်းယူပေးထားပြီး ပရီးမီးယားလိဂ်မှာ ဂိုးသွင်းပေးထားတဲ့ ကစားသမား အရေအတွက် အများဆုံးအသင်း ဖြစ်နေပါတယ်..။ 

အင်ဇို ဖာနန်ဒက်စ် နဲ့ မွိုက်စ် ကိုင်ဆီဒို တို့နှစ်ယောက်က (၃) ဂိုးစီနဲ့ ဂိုးအများဆုံး သွင်းယူပေးထားသူများအဖြစ် ဦးဆောင်နေပါတယ်..။ တကယ်လို့ ဂိုးသွင်းကောင်းတဲ့ တိုက်စစ်မှူးတစ်ယောက်သာ ရှိနေခဲ့မယ်ဆိုရင် ခရစ်စ်တယ် ပဲလေ့စ် နဲ့ ဂိုးမရှိသရေကျတဲ့ပွဲ၊ ဆန်းဒါးလန်း.. ဘရိုက်တန်အသင်းတွေကို ရှုံးနိမ့်ခဲ့တဲ့ပွဲတွေမှာ အသင်းကို ကောင်းကောင်း အကူအညီပေးနိုင်မှာ ဖြစ်ပါတယ်..။ ဘာဖြစ်လို့လည်းဆိုတော့ အဲဒီ (၃) ပွဲစလုံးမှာ ချယ်လ်ဆီးအသင်းဟာ ပြိုင်ဘက်အသင်းတွေထက် ဂိုးကန်သွင်းခွင့်ပိုပြီး များပြားခဲ့တာကြောင့်ပါပဲ..။

လူငယ်တိုက်စစ်မှူး မာ့စ် ဂီယူ ဟာ ပရီးမီးယားလိဂ်မှာ ဈေးဦးမပေါက်သေးသလို ဂျာအို ပီဒရို ကလည်း နောက်ချန်တိုက်စစ်မှူးနေရာနဲ့ ပိုပြီးအဆင်ပြေနေပါတယ်..။ သူ့ကိုကူညီပေးနိုင်ဖို့ တွဲဖက်တိုက်စစ်မှူးတစ်ဦး လိုအပ်နေပြီး လီယန် ဒီလပ် ဒဏ်ရာကနေ ပြန်လည်ကောင်းမွန်လာတာ စိတ်အားတက်စရာ ဖြစ်ပါတယ်..။ ဒါပေမယ့် သူဟာပွဲပယ်ပြစ်ဒဏ်ကြောင့် လာမယ့်တော့တင်ဟမ်နဲ့ပွဲကို ပါဝင်ဦးမှာ မဟုတ်ပါဘူး..။  

ချယ်လ်ဆီးအသင်းဟာ ဦးဆောင်ဂိုးတွေကို ထိန်းထားနိုင်တဲ့စွမ်းရည် ရှိလာပါ့မလား..?

ဂိုးတွေပုံမှန်သွင်းပေးနိုင်မယ့် တိုက်စစ်မှူး ’No. 9’ ကစားသမားဟာ ၁ - ၀ နဲ့ ဦးဆောင်နေတဲ့ အသင်းကို နောက်ထပ်ဂိုးတွေ ထပ်မံရရှိစေပြီး အနိုင်ရလဒ်ကနေ အမှတ်လျော့သွားမယ့် အခြေအနေကနေ ကာကွယ်ပေးနိုင်ပါလိမ့်မယ်…။ အခုဘောလုံးရာသီမှာ ချယ်လ်ဆီးအသင်းဟာ အနိုင်ရလဒ်ကနေ အမှတ်ပြန်လျော့သွားတာ (၈) မှတ် ရှိနေပြီး (၆) မှတ်က စတန်းဖို့ဒ် ဘရစ်ချ်ကွင်းမှာ လျော့သွားတာပါ..။

အဲဒီလိုအနိုင်ရလဒ်ကို မထိန်းထားနိုင်တဲ့ အဓိကပြဿနာထဲမှာ ‘စည်းကမ်းပိုင်း (discipline)’ ကြောင့်လည်း ပါဝင်နေပြီး ချယ်လ်ဆီးအသင်းဟာ အနီကတ်ဒ် (၃) ကြိမ်နဲ့ ပရီးမီးယားလိဂ် အသင်းတွေထဲမှာ အနီကတ်ဒ်အများဆုံး အပြခံထားရတဲ့ အသင်းဖြစ်နေပါတယ်..။ 

ဒါပေမယ့် အပြာရောင်တွေရဲ့ အနိုင်ရလဒ်ကို မထိန်းထားနိုင်တဲ့ အကြောင်းရင်းတွေကို ဆန်းစစ်လိုက်မယ်ဆိုရင် အထက်မှာ ဖော်ပြခဲ့တဲ့ လိုအပ်ချက်တွေအကုန်လုံး ပြန်လည်ပါဝင်နေတာကို တွေ့ရမှာပါ..။ တည်ငြိမ်တဲ့လူရွေးချယ်မှုနဲ့ တောင့်တင်းတဲ့ ခံစစ်ကြောင်းဟာ ၁ - ၀ ရလဒ်တွေကို အနိုင်ရလဒ်အဖြစ် လုံလောက်စေမှာ ဖြစ်သလို အတွေ့အကြုံ ပိုများတဲ့အသင်းဟာ ခြေစွမ်းတည်ငြိမ်မှုရှိလာမှာပါ..။ တိုက်စစ်အားပေးတဲ့ လူစားလဲမှုတွေနဲ့ ဂိုးသွင်းကောင်းတဲ့ တိုက်စစ်မှူး ‘No. 9’ ကစားသမားဟာ ၁ - ၀ ရလဒ်တွေကို ၂- ဝ၊ ၃ - ၀ ရလဒ်တွေအဖြစ် အနိုင်ရလဒ်တွေကို ပိုမိုသေချာစေမှာ ဖြစ်ပါကြောင်း တင်ဆက်လိုက်ပါတယ်..။    

(Premier League Official Website မှ ဆောင်းပါးရှင် Alex Keble ၏ ‘Analysis: Five KEY questions for Maresca at Chelsea’ ဆောင်းပါးကို ပြန်ဆိုပါသည်..။)