ချယ်လ်ဆီးအသင်းနှင့် ၂၀၁၄/၁၅ ဘောလုံးရာသီနှင့် ၂၀၁၆/၁၇ ဘောလုံးရာသီများတွင် ပရီးမီးယားလိဂ် ချန်ပီယံဆု ဆွတ်ခူးရရှိခဲ့သည့် ဘယ်လ်ဂျီယမ် တောင်ပံကစားသမား အီဒင် ဟာဇက် မှာ ပရီးမီးယားလိဂ်၏ ‘တစ်သက်တာ အကောင်းဆုံးဂန္ထဝင်များ (Premier League Hall of Fame)’ စာရင်းတွင် (၂၆) ယောက်မြောက် ကစားသမားအဖြစ် ပြီးခဲ့သည့်ဗုဒ္ဓဟူးနေ့က ထည့်သွင်း၊ ချီးမြှောက်ခံခဲ့ရသည်..။ 

အီဒင် ဟာဇက် မှာ ချယ်လ်ဆီးအသင်းသို့ ၂၀၁၂ ခုနှစ်တွင် ရောက်ရှိလာခဲ့ပြီး ပရီးမီးယားလိဂ် (၂၄၅) ပွဲအတွင်း (၈၅) ဂိုးသွင်း၊ (၅၄) ဂိုး ဖန်တီးပေးနိုင်ခဲ့သည်..။ ထိုသို့ Hall of Fame ဂန္ထဝင်ကစားသမားအဖြစ် အသိအမှတ်ပြုခံရသည့် အထိမ်းအမှတ်အဖြစ် တင်ဆက်ခဲ့သော ရုပ်သံမှတ်တမ်းတွင် ဘယ်လ်ဂျီယမ် အသင်းခေါင်းဆောင်ဟောင်းမှာ ချယ်လ်ဆီးအသင်းနှင့်အတူ ထင်ရှားခဲ့သော ပရီးမီးယားလိဂ်ပြိုင်ပွဲ အခိုက်အတန့် အမှတ်တရများအပေါ် သူ၏ခံစားချက်များကို အောက်ပါအတိုင်း ပြောကြားခဲ့ပါသည်..။

(၁) ၂၀၁၂ ခုနှစ်၊ ဩဂုတ်လ (၁၉) ရက်- ဝီဂန် ၀ - ၂ ချယ်လ်ဆီး.. 
အပြာရောင်တို့နှင့် ပရီးမီးယားလိဂ် ပွဲဦးထွက်..

ချယ်လ်ဆီးအသင်းနဲ့ ဇာတ်လမ်းတွေဟာ ဒီပွဲကနေ စခဲ့တာပေါ့ဗျာ..။ အဲဒီနေ့ကပြိုင်ဘက်အသင်းဖြစ်တဲ့ ဝီဂန်အသင်းကို ကိုင်တွယ်ခဲ့တဲ့ မန်နေဂျာက ဘယ်လ်ဂျီယမ်အသင်းမှာ ကျွန်တော်နဲ့ပြန်လည် ဆုံတွေ့ရမယ့် ရော်ဘတ်တို မာတီးနက်ဇ် ဖြစ်ပါတယ်..။ ပရီးမီးယားလိဂ်ကို ရောက်လာတဲ့အချိန်မှာ ပြင်သစ်နိုင်ငံက လီဂူး (၁) ပြိုင်ပွဲမှာ ကြီးပြင်းလာခဲ့ရတဲ့ ကျွန်တော့်လို လူငယ်လေး တစ်ယောက်အတွက် နိုင်ငံသစ်၊ ပြိုင်ပွဲအသစ်၊ အတွေ့အကြုံအသစ်တွေနဲ့ အစစအရာရာ ခြားနားခဲ့ပါတယ်..။
  
အဲဒီပွဲအစပိုင်းမှာ ညာတောင်ပံမှာ စပြီးကစားခဲ့ရပါတယ်..။ သိပ်မကြာခင်မှာပဲ နည်းပြကြီး ရော်ဘတ်တို ဒီမက်တီယို က ဘယ်တောင်ပံကို ပြောင်းလဲ ကစားစေခဲ့ပါတယ်..။ ကျွန်တော့်ရဲ့ ပရီးမီးယားလိဂ် ပွဲဦးထွက်မှာ စိတ်တိုင်းမကျခဲ့တာ.. ဆိုလို့ အိမ်ကွင်းနဲ့ စတင်ခွင့်မရလိုက်ခဲ့တဲ့ တစ်ချက်ပဲရှိပါတယ်..။ ဘာဖြစ်လို့လည်းဆိုတော့ ကိုယ့်အသင်းရဲ့အိမ်ကွင်း၊ ကိုယ့်အသင်းရဲ့ပရိသတ် ရှေ့မှောက်မှာ ပထမဆုံးပွဲကို စတင်ရတဲ့ ခံစားချက်ဟာ ခြားနားပါတယ်..။

 
ဒါပေမယ့် ပရီးမီးယားလိဂ် ပွဲဦးထွက်ပွဲစဉ်မှာ ချယ်လ်ဆီးအသင်း အနိုင်ရခဲ့တယ်၊ ကျွန်တော်လည်း ပွဲစဉ်ရဲ့ အကောင်းဆုံး ကစားသမားဆု ရရှိခဲ့တယ်.. ဆိုတော့ တကယ့်ကို မယုံနိုင်စရာ ကြည်နူးဖို့ ကောင်းခဲ့ပါတယ်..။ ပွဲဦးထွက် ကောင်းခဲ့တယ်လို့ ပြောရမှာပေါ့..။

ဝီဂန်နဲ့ပွဲဦးထွက်မှာ အမှတ်ရနေခဲ့တဲ့ အဖြစ်အပျက်တစ်ခု ရှိနေပါသေးတယ်..။ ပွဲပြီးတဲ့အချိန် အသင်းရဲ့ မီဒီယာအရာရှိ (press officer) က ‘သတင်းဌာနတွေနဲ့ အင်တာဗျူး သွားလုပ်ရမယ်..’ လို့ အသိပေးလာပါတယ်..။ ကျွန်တော်က ‘ဘာဖြစ်လို့ ကျွန်တော့်ကို ပြောခိုင်းရတာလဲ..? နောက်ပြီး အင်္ဂလိပ်လိုလည်း ကောင်းကောင်းမပြောတတ်သေးတော့ ဘာတွေပြောပေးရမှာလဲဗျ..?’ ဆိုပြီး ပြန်မေးလိုက်ပါတယ်..။ သူက ‘သွားသာ.. သွားလိုက်ပါ..။ အဆင်ပြေသွားပါလိမ့်မယ်..။’ ဆိုပြီး အတင်းတွန်းလွှတ်ခဲ့တာဗျ..။ 

ကစားသမား တစ်ယောက်အနေနဲ့ ဒီလိုအရာလေးတွေ၊ ဒီလိုအမှတ်တရလေးတွေကို ဘယ်တော့မှ မေ့နိုင်မှာမဟုတ်ပါဘူး..။ အင်တာဗျူးအတွက် ရောက်သွားရော.. ပွဲစဉ်ရဲ့အကောင်းဆုံး ကစားသမားဆု ချီးမြှင့်ခံရတယ်..၊ ပြီးတော့ ဂန္ထဝင်ကစားသမားကြီး ဖရန့် လမ်းပတ် နဲ့အတူ သတင်းထောက်တွေကို ဖြေကြားရတဲ့ အခိုက်အတန့်၊ အတွေ့အကြုံဟာ အိပ်မက်မက်နေသလိုပါပဲ..။

(၂) ၂၀၁၃ ခုနှစ်၊ ဇန်နဝါရီ (၁၂) ရက်၊ စတုတ် စီးတီး ၀ - ၄ ချယ်လ်ဆီး
စတုတ်အသင်းဘက်သို့ လှပသည့် အဝေးကန်ချက်သွင်းဂိုး

အနိုင်ရလဒ်အတွက် အရမ်းကြီးအရေးပါတဲ့ဂိုး မဟုတ်ပေမယ့် တကယ့်ကိုလှပခဲ့တဲ့ဂိုးပါ..။ စကားမစပ်.. အဲဒီဂိုးကန်သွင်းလိုက်တဲ့အချိန် စတုတ်အသင်းရဲ့ ဂိုးသမားက အက်စ်မီယာ ဘီဂိုဗစ် ဖြစ်ပါတယ်..။ နောက်ပိုင်းချယ်လ်ဆီးအသင်းမှာ ကျွန်တော့်ရဲ့အသင်းဖော် ဖြစ်လာမှာပေါ့..။ ဒီဂိုးမတိုင်ခင် နှစ်နှစ်ကျော်တုန်းက မာဆေးလ်အသင်းကို အဲဒီဂိုးပုံစံအတိုင်း သွင်းယူခဲ့ပါသေးတယ်..။ ပွဲပြီးတဲ့အချိန်မှာ ‘မင်းဘာဖြစ်လို့ ကန်သွင်းလိုက်တာလဲ..?’ ဆိုပြီး လူတိုင်းက လာမေးကြပါတယ်..။

ကစားသမားတွေမှာ တခါတလေကျရင် မစဉ်းစားပဲ ကိုယ့်ရဲ့အသိစိတ်ထဲက အလိုအလျောက် ပြုလုပ်မိခဲ့တဲ့ အခိုက်အတန့်လေးတွေ ရှိတတ်ပါတယ်..။ အထူးသဖြင့် ကိုယ့်ကိုယ်ကို ယုံကြည်မှု ပြည့်ဝနေတဲ့အချိန်မှာ ‘ငါသာကန်သွင်းလိုက်ရင် ဂိုးရမှာပဲ..’ ဆိုတဲ့ ခံစားချက် ရရှိတတ်ပါတယ်..။ စတုတ် စီးတီးနဲ့ပွဲကစားနေတဲ့ အချိန်တုန်းကလည်း အဲဒီလိုယုံကြည်မှုအပြည့်နဲ့ ခံစားချက်ကို ရရှိခဲ့ပါတယ်..။

ကျွန်တော်တို့ ကစားသမားတွေဟာ တခါတလေမှာ ကိုယ့်ရဲ့စိတ်ထဲမှာ ပေါ်လာတဲ့အတိုင်း ပြုလုပ်လိုက်ခဲ့တဲ့ အရာတွေ ရှိတတ်ပါတယ်..။ ကောင်းတဲ့ရလဒ်တွေ ရရှိတတ်သလို အဆိုးတွေနဲ့လည်း ကြုံရတတ်ပါတယ်..။ ဒီတစ်ကြိမ်မှာတော့ ကောင်းသွားခဲ့တာပေါ့ဗျာ..။

(၃) ၂၀၁၅ ခုနှစ်၊ မေလ (၃) ရက်၊ ချယ်လ်ဆီး ၁ - ၀ ခရစ်စ်တယ် ပဲလေ့စ်
စတန်းဖို့ဒ် ဘရစ်ချ်သို့ ပရီးမီးယားလိဂ် ချန်ပီယံဆု ယူဆောင်ပေးခဲ့သည့်ဂိုး..

အဲဒီပွဲရဲ့ တစ်လုံးတည်းသော အဆုံးအဖြတ် ပင်နယ်တီသွင်းဂိုးကို ပထမပိုင်းမှာ ကျွန်တော်သွင်းယူခဲ့ပါတယ်..။ တကယ့်ကို ဆိုးရွားခဲ့တဲ့ ပင်နယ်တီကန်ချက်ပါ..။ ဒါပေမယ့် ဂိုးသမားပုတ်ထုတ်လိုက်တဲ့ ဘောလုံးက ကျွန်တော့်ဆီ ပြန်ရောက်လာတာကြောင့် အသာလေး ခေါင်းတိုက်ပြီး ပိတ်သွင်းနိုင်ခဲ့ပါတယ်..။ ကစားသမားတစ်ယောက်ဟာ ခြေမြူးနေတဲ့နေ့..၊ ကံတက်နေတဲ့နေ့ဆိုရင် ဘယ်လိုလုပ်လုပ် တင့်တယ်နေတာပါပဲ..။ ဂိုးရမယ်.. ဆိုရင် ဘယ်လိုကန်ကန် ဂိုးတာပဲဗျ..။ 

ပွဲပြီးတဲ့အချိန် အားလုံးပျော်ကြတာပေါ့ဗျာ..။ ပရိသတ်တွေလည်း ပျော်ရွှင်ကြတယ်..၊ ဟိုဆေး မော်ရင်ဟို လည်း ပျော်ရွှင်တယ်..၊ ကစားသမားတွေအားလုံး ပျော်ရွှင်ကြပါတယ်..။ ‘ဆုဖလားတွေ ဆွတ်ခူးဖို့ ရည်ရွယ်ပြီး ဘယ်တော့မှ မကစားခဲ့ဖူးဘူး..၊ ဂိုးတွေသွင်းပေးနိုင်ဖို့ ရည်ရွယ်ပြီး မကစားခဲ့ဖူးဘူး..’ လို့ ကျွန်တော်အမြဲတမ်း ပြောလေ့ရှိပါတယ်..။ ဒါပေမယ့် ဆုဖလားကြီးတွေ ကိုင်မြှောက်ရတဲ့အခါ ကိုယ်ဟာဘာအတွက်ကြောင့် ချယ်လ်ဆီး လို ထိပ်တန်းအသင်းကြီးမှာ ကစားရတယ်.. ဆိုတာ နားလည်လာရပါတယ်..။

ပရိသတ်တွေဟာ ဆုဖလားတွေ ဆွတ်ခူးပေးဖို့ အမြဲတမ်း တောင်းဆိုကြပါတယ်..။ အသင်းကလည်း ဆုဖလားတွေ ဆွတ်ခူးချင်တယ်..၊ ကစားသမားတွေဟာလည်း ဆုဖလားတွေ ရချင်တာပါပဲ..။ ဒါ့ကြောင့်ဖျော်ဖြေမှုပေးနိုင်ဖို့ ကစားတယ်..၊ ပျော်ရွှင်မှုအတွက် ကစားတယ်.. ဆိုပေမယ့် ဆုဖလားကြီးတွေကို ကိုင်မြှောက်ခွင့်ရတဲ့အခါမှာ ‘အချိုပေါ် သကာဆင့်’ သလို အတိုင်းထက်အလွန် ပျော်ရွှင်ရတာပေါ့ဗျာ..။ စတန်းဖို့ဒ် ဘရစ်ချ်ကွင်းရဲ့ မြက်ခင်းစိမ်းထက်မှာ အသင်းဖော်တွေ၊ မိသားစုဝင်တွေနဲ့အတူ အောင်ပွဲခံရတာဟာ သိပ်ကိုကြည်နူးဖို့ ကောင်းပါတယ်..။ အဲ.. ညပိုင်းကျ အမူးလွန်ပြီး နောက်ရက်ကျ မထနိုင်တာလည်း ရှိတာပေါ့.. ဟားဟား..။ အဲဒီအတွေ့အကြုံတွေဟာ ကြီးမားတဲ့အောင်မြင်မှုတွေကို ပျော်ရွှင်ခံစားခြင်းရဲ့ တစိတ်တပိုင်း ဖြစ်ပါတယ်..။

(၄) ၂၀၁၆ ခုနှစ်၊ မေလ (၂) ရက်၊ ချယ်လ်ဆီး ၂ - ၂ တော့တင်ဟမ်
Battle of the Bridge မှ အဆုံးအဖြတ်သွင်းဂိုး 

အဲဒီပွဲမှာ ကျွန်တော်ဟာ အရန်ခုံမှာပဲ ထိုင်ခဲ့ရပါတယ်..။ ဒါ့ကြောင့်ပထမပိုင်းမှာ နှစ်ဂိုးရှုံးနေတုန်းက ကျွန်တော်မပါဝင်ခဲ့ရပါဘူး..။ တော့တင်ဟမ်အသင်းဟာ စတန်းဖို့ဒ် ဘရစ်ချ်ကွင်းမှာ အနိုင်မရခဲ့တာ နှစ်ပေါင်း (၂၆) နှစ်ဆိုလား..? ကျွန်တော်သေချာ မမှတ်မိတော့ပါဘူး..။ ပွဲကြည့်နေရင်း စိတ်ထဲမှာ အားမလို၊ အားမရနဲ့.. ‘ကဲ... ငါ့ကောင်တွေရေ.. တခုခုတော့ လုပ်ကြဦး..’ ဆိုပြီး ရေရွတ်မိနေပါတယ်..။ ဂယ်ရီ ကာဟေးလ် က ဒုတိယပိုင်းမှာ တစ်ဂိုးပြန်လည် ချေပခဲ့ပြီး ကျွန်တော်က ဒီယေဂို ကော်စတာ နဲ့ တွဲလုံးကတဆင့် ပွဲပြီးဖို့ (၇) မိနစ်အလိုမှာ အရေးပါတဲ့ အဆုံးအဖြတ်ဂိုး သွင်းယူပေးနိုင်ခဲ့ပါတယ်..။

အဲဒီဂိုးဟာ တကယ့်ကို လှပတဲ့ဂိုးပါ..။ အဲဒီဘောလုံးရာသီဟာ ကျွန်တော်တို့အတွက် မေ့ပျောက်ရမယ့် အဆိုးရွားဆုံး ဘောလုံးရာသီတစ်ခု ဖြစ်ပါတယ်..။ ဒါပေမယ့် အဲဒီဂိုးကတော့ အမြဲတမ်းအမှတ်တရ ဖြစ်နေမယ့် အခိုက်အတန့်တစ်ခုပါပဲ.။

(၅) ၂၀၁၇ ခုနှစ်၊ ဖေဖော်ဝါရီ (၄) ရက်၊ ချယ်လ်ဆီး ၃ - ၁ အာဆင်နယ်
တစ်ကိုယ်တော်အစွမ်းနဲ့ Gunners တွေကို ကျော်ဖြတ်သွင်းယူခဲ့သည့်ဂိုး..

အဲဒီဂိုးရဖို့ ကွင်းလယ်ကနေ အာဆင်နယ် ကစားသမားတွေကို ကျော်ဖြတ်၊ ဆွဲပြေးသွားခဲ့တဲ့ ကစားဟန်ကမှ ကျွန်တော်ကစားနေကျ မူရင်းပုံစံဖြစ်ပါတယ်..။ တချို့ပွဲတွေမှာ ပြိုင်ဘက်တွေကို တစ်ဦးချင်းကျော်ဖြတ်ရတာ အရမ်းကိုခက်ခဲပါတယ်..။ ဘောလုံးပေးပို့တောင် မလွယ်ကူတဲ့ပွဲတွေ ရှိတတ်ပါတယ်..။ အာဆင်နယ်အသင်းနဲ့ စတန်းဖို့ဒ် ဘရစ်ချ်ကွင်းမှာ ရင်ဆိုင်ခဲ့ရတဲ့ပွဲစဉ်တိုင်းဟာ တကယ့်ပွဲကြီးပွဲကောင်း ဖြစ်ပါတယ်..။

လန်ဒန်ဒါဘီ ပွဲစဉ်လည်းဖြစ်ပြီး ဒီလိုပွဲမျိုးမှာ ဘယ်တော့မှမမေ့နိုင်မယ့် အခိုက်အတန့်တွေ ဖန်တီးပေးနိုင်ရမယ်.. ဆိုတဲ့ ပြင်းပြတဲ့စိတ် ရှိခဲ့ပါတယ်..။ ဒီလိုနဲ့ကွင်းလယ်မှာ ဘောလုံးရလာတဲ့အချိန် သူတို့ဂိုးပေါက်ဘက်ကို မျက်နှာမူပြီး ဘောလုံးကိုရအောင် သယ်သွားခဲ့တာပါပဲ.။ ကျွန်တော်ဟာ အာဆင်နယ်အသင်းနဲ့ ယှဉ်ပြိုင်ရတိုင်း ကံကောင်းတတ်ပါတယ်..။ ဒီတစ်ခါမှာ သူတို့ဝိုင်းဖျက်ဖို့ ကြိုးစားခဲ့ပေမယ့် ဘောလုံးဟာ ကျွန်တော့်ရဲ့ခြေထဲမှာပဲ ကပ်ပြီးပါလာခဲ့ပါတယ်..။ တကယ့်ကို လှပတဲ့သွင်းဂိုးပါ..။

(၆) ၂၀၁၉ ခုနှစ်၊ ဧပြီလ (၉) ရက်၊ ချယ်လ်ဆီး ၂ - ၀ ဝက်စ်ဟမ်း
ဝက်စ်ဟမ်အသင်းကို တစ်ကိုယ်တော်အစွမ်းနဲ့ သွင်းယူခဲ့သည့်ဂိုး..
  
အဲဒီပွဲမှာ အနိုင်ဂိုးနှစ်ဂိုးစလုံးကို ကျွန်တော်ပဲ သွင်းယူပေးနိုင်ခဲ့တာကြောင့် တကယ့်ကို ထူးခြားခဲ့တဲ့ ညချမ်းတစ်ခု ဖြစ်ခဲ့ပါတယ်..။ ပွဲစကတည်းက ယုံကြည်မှုတွေ အထူးကောင်းမွန်နေခဲ့တဲ့အတွက် ဘောလုံးရလာတာနဲ့ ဝက်စ်ဟမ်းအသင်းရဲ့ ဂိုးပေါက်ထဲကို ရအောင်ဆွဲပြေးခဲ့ပါတယ်..။ အဆုံးသတ်ကန်သွင်းခွင့်ရခဲ့တဲ့ အချိန်မှာ လှလှပပ ကန်သွင်းပြီး အမှတ်ရနေမယ့် သွင်းဂိုးတစ်ဂိုး ရခဲ့တယ်ပေါ့ဗျာ..။ တခါတလေမှာ ကိုယ့်ရဲ့စိတ်ထဲမှာ သိပ်မစဉ်းစားပဲ အလိုအလျောက် လုပ်ဆောင်ခဲ့တဲ့အရာတွေ ရှိခဲ့ပါတယ်..။ အဲဒီဂိုးတွေကို အကြိမ်ကြိမ်အခါခါ ပြန်ပြီးကြည့်ရှုဖြစ်ပြီး ကြည့်မိတဲ့အခါတိုင်းမှာလည်း ငါဘယ်လိုများရအောင်သွင်းယူခဲ့တာပါလိမ့်..? ဆိုပြီး အမြဲတမ်း စဉ်းစားခဲ့ရပါတယ်..။

  
(၇) ၂၀၁၉ ခုနှစ်၊ မေလ (၅) ရက်၊ ချယ်လ်ဆီး ၃ - ၀ ဝက်ဒ်ဖို့ဒ် 
စတန်းဖို့ဒ် ဘရစ်ချ်တွင် နှုတ်ဆက်ခွင့်ရခဲ့သည့်ပွဲ…

ချယ်လ်ဆီးအသင်းနဲ့ ကျွန်တော့်ရဲ့အပြာရောင်ဇာတ်လမ်း အဆုံးသတ်ခဲ့တဲ့ပွဲပေါ့ဗျာ..။ အသင်းနဲ့လမ်းခွဲဖြစ်မယ်.. ဆိုတာ ကြိုတင်သိထားခဲ့ပါတယ်..။ ဒါ့ကြောင့်လည်း ကလေးတွေ အပါအဝင် မိသားစုဝင်အားလုံးကို ကျွန်တော်နဲ့အတူ ခေါ်ဆောင်ခဲ့ပြီး ပရိသတ်ကြီးကို နှုတ်ဆက်ခွင့်ရခဲ့ပါတယ်..။ အဲဒီပွဲအပြီး ယူရိုပါလိဂ် ဖလား ဗိုလ်လုပွဲ.. နောက်ထပ်တစ်ပွဲ ယှဉ်ပြိုင်ရဖို့ ကျန်ရှိနေပါသေးတယ်..။ ဒါပေမယ့် ကျွန်တော့်အတွက် စတန်းဖို့ဒ် ဘရစ်ချ်ကွင်းကြီးထဲမှာ နောက်ဆုံးယှဉ်ပြိုင်ခဲ့ရတဲ့ပွဲ ဖြစ်ခဲ့ပါတယ်..။

ပရိသတ်တွေကလည်း ကျွန်တော့်ကို အရမ်းချစ်မြတ်နိုးခဲ့သလို အပြာရောင်ပရိသတ်ကြီးကို ကျွန်တော်အမြဲတမ်း ချစ်ခင်၊ လေးစားခဲ့ပါတယ်..။ စတန်းဖို့ဒ် ဘရစ်ချ်ကွင်းရဲ့ မြက်ခင်းစိမ်းပေါ်မှာ ကျွန်တော်တို့အတူတူ လက်တွဲပြီး (၇) နှစ်ကျော် ဖြတ်သန်းခ့တာ မဟုတ်လားဗျာ..။ အကောင်းတွေ၊ အဆိုးတွေေ ပျော်ရွှင်စရာတွေ၊ ဝမ်းနည်းစရာတွေ၊ အမှတ်တရတွေကို အတူတကွ ရင်ဆိုင်၊ ဖြတ်ကျော်ခဲ့ပါပြီ..။ ဒါပေမယ့် ကျွန်တော်တို့ကြားထဲက ချစ်ခြင်းမေတ္တာ၊ သံယောဇဉ်တွေဟာ အမြဲတမ်းထာစရ တည်ရှိနေမှာ မဟုတ်ပါလားဗျာ..။