ချယ်လ်ဆီးအသင်းနည်းပြ အင်ဇို မာရက်စ်ကာ မှာ Sky Sports သတင်းဌာနနှင့် မကြာသေးမီက ပြုလုပ်ခဲ့သော တွေ့ဆုံခန်းတွင် ပရီးမီးယားလိဂ်၏ ပြောင်းလဲလာသော နည်းစနစ်ပိုင်း အရွေ့များ၊ အဓိကကစားသမားများဖြစ်သော မွိုက်စ် ကိုင်ဆီဒို နှင့် ရိစ် ဂျိမ်းစ် တို့၏ တိုးတက်မှုများနှင့် လူငယ်များဖြင့် ဖွဲ့စည်းထားသော အသင်း၏ အနာဂတ်အလားအလာများကို အောက်ပါအတိုင်း ဆွေးနွေး၊ ပြောကြားခဲ့ပါသည်..။ 

မေး - အင်ဇို ရေ.. အခုလို ကျွန်တော်တို့ကို အချိန်ပေးပြီး ဖြေကြားပေးခဲ့တဲ့အတွက် အထူးကျေးဇူးတင်ရှိပါကြောင်း ပမာဏ ပြောကြားလိုပါတယ်…။ ချယ်လ်ဆီးအသင်း လက်ရှိသွားနေတဲ့ လမ်းကြောင်းအပေါ် ခင်ဗျားရဲ့ထင်မြင်ချက်၊ ယုံကြည်ချက်ကို အရင်ဆုံး ပြောပြပေးပါလား..?

Yes.. အသင်းတစ်ခုလုံးအနေနဲ့ဆိုရင် ကျွန်တော်တို့ဟာ မှန်ကန်တဲ့လမ်းကြောင်းပေါ်မှာ လျှောက်လှမ်းနေတယ်လို့ အပြည့်အဝ ယုံကြည်ထားပါတယ်..။ အသင်းမှာဖြစ်ပေါ်နေတဲ့ ကိစ္စအရပ်ရပ်အတွက် အသံဗလံမျိုးစုံ ထွက်ပေါ်နေမှာပါ..။ ဒါပေမယ့်အခုအချိန်မှာ အဲဒီအသံဗလံတွေဟာ အသင်းရဲ့ကစားဟန်၊ အနိုင်ရလဒ် ရရှိလာအောင် ကျွန်တော်တို့ရဲ့ စွမ်းဆောင်နေမှုတွေနဲ့ ပတ်သက်ပြီးတော့ပဲ ထွက်ပေါ်နေတာဆိုတော့ ဒါဟာကောင်းမွန်တဲ့အချက်လို့ ပြောရမှာပါပဲ..။ 

မေး - ချယ်လ်ဆီးအသင်းကို ခင်ဗျားသွတ်သွင်းနေတဲ့ ကစားဟန်နဲ့ ပတ်သက်လို့ ဆက်ပြီးမေးပါရစေဗျ..။ အသင်းကို ရောက်လာခါစအချိန်နဲ့ နှိုင်းယှဉ်မယ်ဆိုရင် ခင်ဗျားရဲ့နည်းစနစ်ပိုင်း အယူအဆ၊ ဒဿနတွေအပေါ် ကစားသမားတွေရဲ့ နားလည်မှု၊ လက်ခံလာမှုဟာ တိုးတက်လာတယ်လို့ ပြောနိုင်ပြီလား..? ဘာဖြစ်လို့လည်းဆိုတော့ အရင်နှစ်က ကျွန်တော်တို့ တွေ့ဆုံခန်းပြုလုပ်တဲ့အချိန်က inverted full backs တို့၊ ခင်ဗျားသွတ်သွင်းချင်တဲ့ နည်းစနစ်ပိုင်း အအပြောင်းအလဲတွေနဲ့ ပတ်သက်ပြီး ဆွေးနွေးခဲ့ကြတာကိုး..။ ပြီးခဲ့တဲ့နှစ်တုန်းက အသင်းရဲ့ဘယ်လိုအရာတွေကို ပြောင်းလဲပေးခဲ့ရလဲ..?

ကျွန်တော်ဟာ အသင်းမှာရှိနေတဲ့ ကစားဟန်နဲ့ အသားကျအောင်၊ အကျွမ်းတဝင်ဖြစ်အောင် အရင်ဆုံး ကြိုးစားခဲ့ပါတယ်..။ အဲဒီနောက်ပိုင်းမှ ပြောင်းလဲဖို့ ကြိုးစားခဲ့တာပါ..။ ပြောင်းလဲတဲ့အခါမှာ မူလကရှိနေတဲ့ ဒဿနအတိုင်း အတတ်နိုင်ဆုံး ဖြေးဖြေးချင်းပြောင်းလဲခဲ့တာ ဖြစ်ပါတယ်..။ ဒါ့ကြောင့်လေ့ကျင့်ခန်း တစ်ချိန်ပြီးတစ်ချိန်၊ တစ်ပွဲပြီးတစ်ပွဲ..၊ တစ်ရက်ပြီးတစ်ရက် သင်ယူရင်း၊ လေ့လာရင်း ပြောင်းလဲခဲ့ရပါတယ်..။

မေး - စိတ်ဝင်စားဖို့ ကောင်းတာက မနှစ်တုန်းကနှိုင်းယှဉ်ရင် ပရီးမီးယားလိဂ်ပြိုင်ပွဲ ကိုယ်တိုင်ကိုယ်က ပြောင်းလဲသွားခဲ့ပါတယ်..။ ဘယ်လိုအရာတွေမှာ ပြောင်းလဲသွားခဲ့တယ်လို့ ခင်ဗျားယူဆမိလဲ..? အပြောင်းအလဲတွေနဲ့ အသားကျလာအောင် ဘယ်လိုစီမံ၊ ခန့်ခွဲခဲ့လဲဗျ..?

အပြောင်းအလဲဆိုတာက အမြဲတမ်းရှိနေတာပါပဲ..။ အရာရာတိုင်းဟာ ဖြည်းဖြည်းချင်း ပြောင်းလဲနေတဲ့ (evolution) ဖြစ်စဉ်အတိုင်း ရွှေ့လျားနေကြတာပါ..။ အခုဆိုရင်အသင်းအတော်များများက long throw-in လက်ပစ်ဘောတွေကို သုံးစွဲလာကြပါတယ်..။ တကယ်တော့ အသစ်အဆန်း မဟုတ်ဘူးဗျ..။ လွန်ခဲ့တဲ့နှစ်ပေါင်း (၂၀)၊ (၃၀) လောက်က ကျင့်သုံးခဲ့တဲ့ နည်းစနစ်တွေ ဖြစ်တာကြောင့် တစ်ပတ်ပြန်လည်လာတာ.. လို့ ပြောနိုင်ပါတယ်..။ ကျွန်တော်တို့ဟာ အဲဒီအပြောင်းအလဲကို ရင်ဆိုင်နိုင်အောင် ကြိုးစားရမယ်..၊ ကိုယ်နဲ့ကြုံလာတဲ့အခါ ဖြေရှင်းနိုင်မယ့် နည်းလမ်းကို ရှာဖွေရပါတယ်..။ အဲဒီလိုအရာတွေဟာ ကျေနပ်ဖို့ ကောင်းပါတယ်..။

မေး - ဟုတ်တာပေါ့..။ ၁၉၉၀ နှစ်လွန်ကာလတွေမှာတုန်းက ခင်ဗျားလည်း ချန်ပီယံရှစ်ပြိုင်ပွဲမှာ အဲဒီလို long thorw-in တွေနဲ့ ရင်ဆိုင်ခဲ့ရတာပဲ..။ ဒါ့ကြောင့်အရင်တုန်းက အတွေ့အကြုံတွေကို ပြန်ပြီးအသုံးချရတဲ့ သဘောဖြစ်နေတာပေါ့..။ အဲဒီအချိန်တုန်းက ဘယ်လိုပုံစံနဲ့ ကာကွယ်ခဲ့ရလဲ..? မှတ်မိသေးရဲ့လား..?

နှစ်ပေါင်းများစွာ ကြာမြင့်ခဲ့ပြီ.. ဆိုပေမယ့် ဘောလုံးလောကဟာ ဒီလိုပါပဲ..။ ၁၉၉၈ ခုနှစ်၊ ချန်ပီယံရှစ်ပြိုင်ပွဲမှာ အသင်းတိုင်းလိုလို long throw-in နည်းစနစ်ကိုာ အသုံးပြုခဲ့ကြပါတယ်..။ အခုနောက်ထပ်တစ်ကြိမ် တစ်ကျော့ပြန်လာတာပါ..။

မေး - အဝေးဘောတွေနဲ့ ထိုးဖောက်တဲ့ ပုံစံကိုလည်း ပြန်လည်သုံးစွဲလာကြပါတယ်..။ ကျွန်တော်တို့ဟာ နောက်တန်းကနေ ကစားကွက်ကျကျ အပေးအယူ (passes) တွေနဲ့ build up play တွေကနေ တစ်ဆင့်ချင်း ထိုးဖောက်ခဲ့ရာကနေ အခုဆိုရင် အဝေးဘောတွေနဲ့ တိုက်ရိုက်ထိုးဖောက်တဲ့ ပုံစံကိုလည်း ပြန်လည်သုံးစွဲလာကြတာ သတိပြုမိပါတယ်..။ အဲဒီလိုပြောင်းလဲလာတာဟာ အကောင်းဘက်ကို ပြောင်းလဲခြင်းလား..? အဆိုးဘက်ကို ပြောင်းလဲလာတာလား..?

ဒီလိုအပြောင်းအလဲတွေဟာ ပရီးမီးယားလိဂ်က အသင်းတိုင်း၊ မန်နေဂျာတိုင်းရဲ့အမြင်၊ လေ့လာမှုတွေကနေတဆင့် ဖြစ်ပေါ်လာခဲ့တဲ့ ပြောင်းလဲမှုတွေ ဖြစ်ပါတယ်..။ ကောင်းတဲ့အချက်က အဲဒီလိုပြောင်းလဲလာတဲ့ ကစားပုံနဲ့ အသားကျအောင် ကြိုးပမ်းရတယ်..၊ အဲဒီလို အဝေးဘောတွေနဲ့ ထိုးဖောက်လာမယ့် အသင်းတွေကို ရင်ဆိုင်နိုင်အောင် ကြိုးစားရပါတယ်..။ 

မေး - အခုလက်ရှိ ပရီးမီးယားလိဂ်ပြိုင်ပွဲဟာ ပြိုင်ဆိုင်မှု အင်မတန် ပြင်းထန်ပါတယ်..။ အသင်းတိုင်းလိုလို ရေကုန်ရေခမ်း ကြိုးစား၊ အားထုတ် ယှဉ်ပြိုင်နေကြတာ ဖြစ်တာကြောင့် မန်နေဂျာတစ်ယောက်အနေနဲ့ ခင်ဗျားရဲ့အမြင်မှာရော အပါတ်စဉ်တိုင်းမှာ ခက်ခဲတဲ့ပြိုင်ဘက်တွေရဲ့ ရင်ဆိုင်ရမယ့် အခြေအနေအပေါ် တွေးပူမိတာတွေ ဖြစ်ခဲ့မှာပေါ့…

Yes.. complicated.. အတော်လေးကို ရှုပ်ထွေးပါတယ်..။ ခင်ဗျားပြောသလိုပါပဲ.. အသင်းတိုင်းဟာ ရေကုန်ရေခမ်း အစွမ်းကုန် ယှဉ်ပြိုင်နိုင်ဖို့ ကြိုးစားလာကြသလို အသင်းတိုင်းဟာ ကစားသမားကောင်းတွေ၊ မန်နေဂျာကောင်းတွေနဲ့ ဖွဲ့စည်းထားကြပါတယ်..။ သူတို့တွေဟာ ပြိုင်ဘက်တိုင်းကို အကောင်းဆုံး ရင်ဆိုင်နိုင်ဖို့ ပြင်ဆင်လာကြတယ်..၊ အဆင်သင့်ရှိနေကြပါတယ်..။ ဒါ့ကြောင့်ပွဲစဉ်တိုင်းဟာ ခက်ခဲတဲ့ပွဲစဉ်တွေ ဖြစ်ကြပါတယ်..။

မေး - အသင်းတိုင်းမှာ သူတို့အဓိကအာရုံစိုက် ပြင်ဆင်ကြတဲ့ကဏ္ဍတွေ၊ ပုံစံတွေ ခြားနားကြပါတယ်..။ ဥပမာ အခုဆိုရင် ဆန်းဒါးလန်းအသင်းရဲ့ ကစားဟန်၊ ဘုန်းမောက်အသင်းရဲ့ ကစားဟန်တွေအပေါ် ချီးမွမ်းနေကြတာတွေ ရှိပါတယ်..။ အခုလက်ရှိမှာ ခင်ဗျားသတိထားပြီး စောင့်ကြည့်နေတဲ့ နည်းပြ.. ဒါမှမဟုတ် အသင်းတစ်သင်းရဲ့ ထူးခြားတဲ့ ကစားဟန်.. ရှိနေရဲ့လား..? ပရီးမီးယားလိဂ်ထဲက မဟုတ်လဲ.. ဥရောပပြိုင်ပွဲတွေထဲက ဆိုရင်လည်း ရပါတယ်..

ခင်ဗျားပြောသလိုပါပဲ..။ ပရီးမီးယားလိဂ်ပြိုင်ပွဲ.. ဥရောပပြိုင်ပွဲတွေမှာ မန်နေဂျာကောင်း၊ နည်းပြကောင်းတွေ အများကြီးရှိနေပါတယ်..။ ခင်ဗျားပြောခဲ့တဲ့ ဆန်းဒါးလန်း.. ဘုန်းမောက်အသင်း မန်နေဂျာတွေ အပါအဝင် သတိထား၊ စောင့်ကြည့်နေရတဲ့ နည်းပြကောင်းတွေ အများကြီးပါပဲ..။

မေး - ခင်ဗျားရဲ့အသင်းမှာ မွိုက်စ် ကိုင်ဆီဒို ဟာ ခန္ဓာကိုယ်ကြံ့ခိုင်မှု အကောင်းဆုံး ကစားသမားလို့ ပြောရပါမယ်..။ သူဟာအထူးခြေစွမ်းပြနေသလို ပရီးမီးယားလိဂ်ရဲ့ အကောင်းဆုံး ကွင်းလယ် ကစားသမားလို့ သတ်မှတ်လို့ရပြီလား..?

သူနဲ့ ရိုဒရီ (မန်ချက်စတာ စီးတီး) တို့နှစ်ယောက်ဟာ အကောင်းဆုံး ကွင်းလယ်အဖျက် ကစားသမားတွေ ဖြစ်ကြတယ်.. လို့ မကြာသေးခင် ကျွန်တော်ပြောခဲ့ဖူးပါတယ်..။ 

မေး - ချယ်လ်ဆီးအသင်းကို ခင်ဗျားရောက်ရှိပြီး တစ်နှစ်အတွင်း မွိုက်စ် ကိုင်ဆီဒို ဟာ ဘယ်လိုနေရာတွေမှာ တိုးတက်လာခဲ့လဲ..? ဘာဖြစ်လို့လည်းဆိုတော့ အခုဆိုရင် သူဟာခံစစ်ပိုင်းတင်မက တခြားစွမ်းရည်တွေမှာ ပိုပြီးတိုးတက်လာတာ မြင်တွေ့နေရပါတယ်..

သူဟာအကောင်းဆုံး ခြေစွမ်းပြနေသလို နေ့စဉ်နေ့တိုင်း တဟုန်တိုး တိုးတက်နေတဲ့ ကစားသမား တစ်ယောက် ဖြစ်ပါတယ်..။ မွိုက်စ် ဟာ သူ့ရဲ့စိတ်ကို အမြဲတမ်းဖွင့်ထားတဲ့ ကစားသမား တစ်ယောက်ဖြစ်ပြီး သင်ယူချင်စိတ် အမြဲတမ်းရှိနေပါတယ်..။ ဒါ့အပြင် သူဟာပွဲစဉ်တိုင်းမှာ အသင်းဖော်တွေကို အမြဲတမ်းပံ့ပိုး၊ ကူညီပေးနေတဲ့သူလည်း ဖြစ်ပါတယ်..။

 
မေး - လက်ရှိခင်ဗျားရဲ့အသင်းမှာ သူကစားနေရတဲ့ပုံစံကလည်း စိတ်ဝင်စားဖို့ ကောင်းတယ်ဗျ..။ သူဟာသမာရိုးကျ ကွင်းလယ်အဖျက် ကစားသမား အနေနဲ့ စတင်ခဲ့ပေမယ့် အခုဆိုရင် တစ်ကွင်းလုံးနေရာအနှံ့ ပြေးလွှားကစားနေတယ်..၊ ပြိုင်ဘက်ခံစစ် ကစားသမားတွေကိုပါ ဖိအားပေး (pressing) ကစားနေပြီး သွင်းဂိုးတွေပါ ရရှိနေပါတယ်..။ အဲဒီအရာတွေဟာလည်း သူ့ရဲ့တိုးတက်မှုလို့ ပြောလို့ရတာပဲမလား..?

Yes.. မှန်တာပေါ့..။ သူ့ရဲ့ကစားပုံ အပြောင်းအလဲဟာ အသင်းရဲ့ကစားပုံ၊ အသင်းရဲ့ pressing ကစားပုံတွေနဲ့လည်း သက်ဆိုင်သွားတာပေါ့..။ တော့တင်ဟမ်အသင်းနဲ့ ကစားခဲ့တဲ့ပွဲမှာဆိုရင် သူဟာတစ်ဘက်အသင်းရဲ့ ပင်နယ်တီဧရိယာထဲအထိ pressing လိုက်ကစားရင်း ဂိုးရအောင် ဖန်တီးပေးခဲ့ပါတယ်..။ ဒါဟာကျွန်တော်တို့ရဲ့ pressing ကစားပုံကြောင့် ဖြစ်သလို ကိုယ့်ဘက်က ဘောလုံးဆုံးသွားတာနဲ့ ချက်ချင်းအတင်းလိုက် ဖိအားပေးဖို့ သူတို့တွေကို မှာကြားထားပါတယ်..။

မေး - ခင်ဗျားကိုယ်တိုင်ကလည်း box to box ကွင်းလယ် ကစားသမား တစ်ယောက် ဖြစ်ခဲ့ပါတယ်..။ မွိုက်စ် ကိုင်ဆီဒို ကစားတာကိုကြည့်ပြီး ကိုယ့်ကိုယ်ကိုရော ပြန်ပြီးမြင်ယောင်နေမိသေးလား..? ဟားဟား..
သူဟာကျွန်တော့်ထက် ပိုပြီအဆင့်မြင့်တာပေါ့.. ဟားဟား..။ 

မေး - ပြီးခဲ့တဲ့နှစ်ရာသီလောက်က ရိုဒရီ ဟာ ကမ္ဘာ့အကောင်းဆုံး ကစားသမား Ballon d’Or ဆု ချီးမြှင့်ခံခဲ့ရပါတယ်..။ အခုဆိုရင် မွိုက်စ် ကိုင်ဆီဒို ဟာ လက်ရှိကမ္ဘာ့အကောင်းဆုံး ကစားသမားတွေထဲက တစ်ယောက်လို့ ရဲရဲဝံ့ဝံ့ ပြောနိုင်နေပါပြီ..။ သူဟာအဲဒီ Ballon d;Or ဆု ရရှိနိုင်မယ့် အဆင့်အထိ တိုးတက်သွားနိုင်လား..?

သူဟာအခုထက်ပိုပြီး တိုးတက်ဦးမှာပါ…။ သူဟာအခုအချိန်မှာ ထိပ်တန်း ကစားသမား တစ်ယောက် ဖြစ်နေပါပြီ..။ ဆက်လက်တိုးတက်ဖို့လည်း ရှိနေပါတယ်..။ ကမ္ဘာ့အကောင်းဆုံး ကစားသမားဆု ရတဲ့အထိ တိုးတက်နိုင်ဦးမလား..? ဆိုတာ ကျွန်တော်မပြောနိုင်ပါဘူး..။

မေး - ဟုတ်ကဲ့ပါ..။ သူဟာအသင်းကို ဦးဆောင်ပေးနိုင်တဲ့ ကစားသမားတွေထဲမှာ ပါဝင်နေပါတယ်..။ ဒါ့အပြင် ကွင်းလယ်မှာ အသင်းခေါင်းဆောင်ဖြစ်တဲ့ ရိစ် ဂျိမ်းစ် နဲ့ပါ တကယ့်ကို အတွဲဖက်မိမိ.. တောင့်တင်းတဲ့ ကွင်းလယ် အတွဲအစပ်အဖြစ် တည်ဆောက်နိုင်ခဲ့ပါတယ်..။ ကျွန်တော်တို့ အင်္ဂလန်အသင်းပရိသတ် တစ်ယောက်အနေနဲ့ ရိစ် ဂျိမ်းစ် တစ်ယောက် အခုလိုကြံ့ခိုင်မှု ပြန်လည်ကောင်းမွန်လာတာ..၊ သုံးရက်တစ်ပွဲနှုန်းနဲ့ ပွဲတွေဆက်တိုက် ကစားပေးနိုင်တာကို မြင်တွေ့ခဲ့ရတာ ကျေနပ်စရာပါပဲ..။ သူတို့နှစ်ယောက်ရဲ့ ကွင်းလယ်အတွဲအစပ်အပေါ်မှာ ခင်ဗျားရဲ့ သုံးသပ်ချက်၊ အမြင်လေး သိပါရစေ..

သူတို့နှစ်ယောက်ကြားက နားလည်မှု သိပ်ကိုကောင်းပါတယ်..။ သူတို့နှစ်ယောက်စလုံးဟာ အသင်းမှာလိုအပ်နေတဲ့ ခန္ဓာကိုယ်ကြံ့ခိုင်မှု၊ မာမာထန်ထန် ဖျက်ထုတ်နိုင်မှုကို ပေးစွမ်းနိုင်ပါတယ်..။ ရိုမီယို လားဗီးယား လည်း ကြံ့ခိုင်မှုပြည့်ဝနေတဲ့အချိန်တွေမှာ သူတို့လိုပဲ ကစားပေးနိုင်ပါတယ်..။ ဒါပေမယ့် အခုအချိန်မှာတော့ မွိုက်စ် နဲ့ ရိစ် ဂျိမ်းစ် တို့နှစ်ယောက်ဟာ အသင်းမှာ အရေးပါလှတဲ့ အစိတ်အပိုင်းတွေ ဖြစ်နေကြပါတယ်..။

မေး - ရိစ် ဂျိမ်းစ် နဲ့ ပတ်သက်ပြီး နည်းနည်းဆက်မေးချင်ပါတယ်..။ ၂၀၂၆ ခုနှစ်၊ ကမ္ဘာ့ဖလားပြိုင်ပွဲက နီးကပ်လာပြီ ဖြစ်သလို သူဟာအင်္ဂလန်အသင်းမှာ ညာနောက်ခံလူအဖြစ် တာဝန်ယူရပေမယ့် ကွင်းလယ်မှာပါ လိုအပ်ရင် ကစားပေးနိုင်ပါတယ်..။ သူ့ရဲ့ခြေစွမ်းအပေါ် ခင်ဗျားရဲ့အမြင်ကိုရော သိချင်မိပါတယ်..။ တကယ်တော့ ရိစ် ဟာ ပြီးပြည့်စုံတဲ့ ကစားသမား တစ်ယောက်လို့ ပြောနိုင်တယ်မလား..?

သူဟာသိပ်ကိုထူးချွန်လှတဲ့ ကစားသမား တစ်ယောက် ဖြစ်ပါတယ်..။ သူ့အတွက် အရေးအကြီးဆုံးက ကြံ့ခိုင်မှုအခြေအနေ ကောင်းမွန်နေဖို့ပါပဲ..။ သူဟာကြံ့ခိုင်မှု ပြည့်ဝနေမယ်ဆိုရင် ထိပ်တန်းကစားသမား တစ်ယောက် ဖြစ်တယ်ဆိုတာ သံသယရှိစရာ မလိုပါဘူး..။

 
မေး - သူ့ရဲ့ကြံ့ခိုင်မှုအကောင်းဆုံး အခြေအနေ ပြန်လည်ရရှိဖို့အတွက် ကစားချိန်ကို ဘယ်လိုစီမံခဲ့လဲဗျ..? အခုဆိုရင် သူဟာကြံ့ခိုင်မှုပြဿနာ မရှိတော့ပဲ အသင်းအတွက် ပွဲအများဆုံး ကစားသမားတစ်ယောက် ဖြစ်လာမယ့် အနေအထား မြင်တွေ့နေရပါပြီ..။

သူ့ရဲ့ကစားချိန်ကို ကျွန်တော်တို့ စနစ်တကျ စီမံ၊ ခန့်ခွဲခဲ့တာနဲ့ တိုက်ရိက်သက်ဆိုင်မှု ရှိတယ်လို့ ကျွန်တော်ယူဆမိပါတယ်..။ ကွင်းလယ် ကစားသမားအဖြစ်.. ဒါမှမဟုတ် အတွင်းဘက်ကိုဝင်ပြီး ကစားရတဲ့ နောက်ခံအစွန်လူအဖြစ်နဲ့ ကစားရတာဟာ တောင်ပံတစ်လျှောက် အတက်အဆင်း ပြုလုပ်ရတာလောက် ပြေးလွှားမှုတွေ မပြုလုပ်ရပါဘူး..။ အဲဒီလိုအတက်အဆင်း များများပြုလုပ်ရမယ်..၊ ကွင်းထဲမှာ တာဝန်ယူရမယ့် နေရာပိုပြီး ကျယ်မယ်ဆိုရင် မနားတမ်း ပြေးလွှားမှုတွေ ပြုလုပ်ရပါတယ်..။ ဒါဆိုရင်ဒဏ်ရာရဖို့ ပိုပြီးအလားအလာရှိတယ်လို့ မြင်မိတာပဲ..။ ဒါကကျွန်တော့်ရဲ့ တကိုယ်ရည်အယူအဆပါ..။ 

မေး - ရိစ် ဂျိမ်းစ် ဟာ အခုဆိုရင် အသင်းမှာ စံနမူနာယူရမယ့် ကစားသမား တစ်ယောက်ဖြစ်နေပြီး အသင်းရဲ့ခေါင်းဆောင် ဖြစ်နေပါပြီ..။ ဒါ့အပြင်အသင်းကို ဦးဆောင်ပေးမယ့် ကစားသမား အုပ်စုကိုလည်း ဦးဆောင်ပေးနေသူ ဖြစ်ပါတယ်..။ သူဟာအသင်းရဲ့ ကွင်းပြင်ပ (off the field) မှာပါ ဦးဆောင်ပေးနိုင်သူ ခေါင်းဆောင်တစ်ယောက်အဖြစ် ဘယ်လိုပုံစံ တိုးတက်၊ ပြောင်းလဲလာခဲ့ပါသလဲ..?

ချယ်လ်ဆီးအသင်းကို ကျွန်တော်ရောက်လာပြီးနောက်ပိုင်း သူဟာအများကြီး တိုးတက်လာခဲ့ပါတယ်..။ အခုဆိုရင် သူဟာအသင်းက တာဝန်ပေးထားတဲ့ ခေါင်းဆောင် တစ်ယောက်မဟုတ်ပဲ ကိုယ်တိုင်ကိုယ်ကျ ဦးဆောင်ပေးနိုင်တဲ့ ခေါင်းဆောင်တစ်ယောက် ဖြစ်လာခဲ့ပါပြီ..။ သူ့ရဲ့ကွင်းတွင်း၊ ကွင်းပြင်ပ နေထိုင်ပြုမူပုံတွေဟာ သိပ်ကိုကောင်းပါတယ်..။

မေး - ခင်ဗျားတို့အသင်းမှာ လူငယ်ကစားသမားတွေ အများအပြားရှိနေတာကြောင့် ရိစ် ဂျိမ်းစ် ဟာ အဝတ်လဲခန်းမှာလည်း သူတို့ကို ကူညီပေးရမှာပါ..။ အခုအချိန်မှာ ရိစ် ဂျိမ်းစ် နဲ့ လူငယ် ကစားသမားတွေရဲ့ ကြားထဲက ဆက်သွယ်မှု အခြေအနေ ဘယ်လိုရှိလဲဗျ..? ဆိုလိုချင်တာက ချယ်လ်ဆီးအသင်း ကစားသမား တစ်ယောက်အနေနဲ့ ရှိသင့်တဲ့ နေထိုင်၊ ကျင့်ကြံ၊ ပြုမူပုံတွေ..၊ ခံယူချက်၊ စိတ်ဓါတ်.. အစဉ်အလာတွေကို လက်ဆင့်ကမ်း.. ဝေမျှပေးရမှာပေါ့..

Yes.. သေချာတာပေါ့..။ အခုဆိုရင် သူဟာကျွန်တော်တို့အသင်းမှာ လူငယ် ကစားသမားတွေရဲ့ စံပြုရမယ့် ကစားသမား တစ်ယောက်အဖြစ် ပေါ်ထွက်လာပြီဆိုတာ သိပ်ကိုထင်ရှားနေပါတယ်..။

မေး - ခင်ဗျားတို့အသင်းဟာ လူငယ် ကစားသမားတွေနဲ့ ဖွဲ့စည်းထားပြီး လက်ရှိအသင်း ပွဲထွက် (၁၁) ယောက်ရဲ့ ပျမ်းမျှအသက်ဟာ ပရီးမီးယားလိဂ်မှာ အငယ်ဆုံးအသင်း ဖြစ်နေပါတယ်..။ ဟိုးအရင်တုန်းက လီဗာပူးလ်အသင်း နောက်ခံလူဟောင်း အလန် ဟန်ဆန် ပြောဖူးတဲ့ ‘ကလေးတွေနဲ့ ပရီးမီးယားလိဂ်မှာ ဘာအောင်မြင်မှုမှ ရနိုင်မှာ မဟုတ်ဘူး..’ ဆိုတဲ့ စကားလည်း ရှိနေပါတယ်...။ ဒါပေမယ့် ဆာ အဲလက်စ် ဖာဂူဆန် ဟာ အဲဒီစကား မှားယွင်းတယ်.. ဆိုတာ သက်သေပြခဲ့ပြီးပါပြီ..။ အခုဆိုရင် အသင်းရဲ့ခြေစွမ်းနဲ့ ရလဒ်ဟာ ကျေနပ်စရာကောင်းတဲ့ အနေအထားမှာရှိနေတာဆိုတော့ ပရီးမီးယားလိဂ် ပွဲစဉ်တွေရဲ့ ပွဲထွက်လူစာရင်းမှာ လူငယ်ကစားသမားတွေကို ဟန်ချက်ညီအောင် ဘယ်လိုပုံစံ စီမံခန့်ခွဲခဲ့လဲ..?

ဒါပေါ့..။ အရေးအကြီးဆုံးက အသင်းရဲ့ဟန်ချက် (balance) ကောင်းမွန်နေဖို့ ဖြစ်ပါတယ်..။ အသင်းတစ်သင်းမှာ ကစားသမားတွေရဲ့ အသက်အရွယ်.. ငယ်တာ..၊ ကြီးတာ ထက်စာရင် သူတို့တွေဟာ အရည်အချင်း ပြည့်ဝတဲ့ ကစားသမားကောင်းတွေ ဖြစ်နေဖို့က အရေးကြီးဆုံး ဖြစ်ပါတယ်..။ ကျွန်တော့်ရဲ့ ကစားသမားတွေဟာ လူငယ် ကစားသမားတွေ ဖြစ်တာကြောင့် သူတို့လေးတွေကို အမှားအယွင်းတွေ ပြုလုပ်ခွင့် ပေးရပါတယ်..။ အဲဒီအမှားတွေကို သင်ယူရင်း ပိုပြီးကောင်းမွန်တဲ့ ကစားသမားတွေ ဖြစ်လာမယ်..။

အမှားအယွင်းတွေ ကျူးလွန်တယ်.. ဆိုတာ လူငယ်ကစားသမားတွေရဲ့ တိုးတက်မှု ဖြစ်စဉ်ထဲက တစိတ်တပိုင်း ဖြစ်ပါတယ်..။ သူတို့တွေဟာ ပိုပြီးကောင်းမွန်တဲ့ ကစားသမားတွေအဖြစ်နဲ့ တိုးတက်လာမယ်ဆိုတာ သံသယဖြစ်စရာ မရှိပါဘူး..။ ကျွန်တော်တို့ မန်နေဂျာတွေအနေနဲ့ ကစားသမားတွေကို ပိုမိုထူးချွန်တဲ့ ကစားသမားတွေ ဖြစ်လာအောင် ပြုစု၊ ပျိုးထောင်ပေးရမယ့် တာဝန်ရှိတယ်လို့ ရည်ရွယ်ချက်ထား.. ခံယူထားပါတယ်..။