၂၀၂၅/၂၆ ဘောလုံးရာသီတွင် ချယ်လ်ဆီးအသင်းနှင့် အထူးခြေစွမ်းပြနေခဲ့သည့် အီကွေဒေါ ကွင်းလယ် ကစားသမား မွိုက်စ် ကိုင်ဆီဒို မှာ ချယ်လ်ဆီးအသင်း official website နှင့် ပြုလုပ်ခဲ့သော တွေ့ဆုံခန်းတွင် ယခုဘောလုံးရာသီ ရည်မှန်းချက်များ၊ သူ၏ကစားသမားဘဝတွင် မိသားစုဝင်များ၏ အခန်းကဏ္ဍနှင့် ငယ်စဉ်ဘဝက စံပြု၊ အားကျခဲ့ရသည့် ပုဂ္ဂိုလ်များအကြောင်း အောက်ပါအတိုင်း ပြောပြခဲ့ပါသည်..။ 

မေး - မွိုက်စ် ရေ.. ပထမဆုံးအနေနဲ့ အခုလက်ရှိ ဖြတ်သန်းနေတဲ့ ဘောလုံးရာသီအပေါ် ခင်ဗျားရဲ့အမြင်..၊ သုံးသပ်ချက်လေး အရင်ပြောပြပါလား..? အခုလက်ရှိအသင်းရဲ့ ကစားပုံအပေါ်မှာ ကျေနပ်အားရမှု ရှိရဲ့လား..?

အခုအချိန်ထိ ကျွန်တော်တို့အသင်းရဲ့ စွမ်းဆောင်ရည်ဟာ သိပ်ကိုကောင်းမွန်နေပါတယ်..။ အခုဘောလုံးရာသီမှာ ရာသီကြိုပြင်ဆင်မှု ခဏလေးပဲ ပြုလုပ်ခဲ့ရပေမယ့် ပြိုင်ပွဲတွေစတင်ချိန်မှာ အကောင်းဆုံးခြေစွမ်းနဲ့ အစကောင်းခဲ့တာဟာ ကျေနပ်စရာပါ..။ အခုအချိန်မှာ အသင်းရဲ့စုစည်းမှုနဲ့ ခြေစွမ်းပိုင်း ကောင်းမွန်နေသလို ရလဒ်ပိုင်းအရလည်း ကျေနပ်စရာလို့ မြင်မိပါတယ်..။

မေး - ဒါဆိုရင် အခုဘောလုံးရာသီမှာ ချယ်လ်ဆီးအသင်းရဲ့ ရည်မှန်းချက်က ဘာဖြစ်မလဲ..?

ဆုဖလားတွေ ဆွတ်ခူးဖို့ ရည်မှန်းထားပါတယ်..။ ကျွန်တော်တို့ ချယ်လ်ဆီးအသင်းဟာ ထိပ်တန်းအသင်းကြီး တစ်သင်းဖြစ်တာနဲ့အညီ ကျွန်တော်တို့အားလုံးကလည်း ဆုဖလားတွေကို အမြဲတမ်း ဆွတ်ခူးရယူချင်ကြပါတယ်..။ ဒါပေမယ့် အခုဘောလုံးရာသီမှာ အဓိကပြိုင်ပွဲကြီးလေးခုမှာ ယှဉ်ပြိုင်ရဖို့ ရှိနေတာကြောင့် တစ်လှမ်းချင်း ချီတက်ရင်း ရှေ့ဆက်ရမှာပါ..။ ပြိုင်ပွဲတိုင်းဟာ ရှည်လျားလှတဲ့ ပြိုင်ပွဲကြီးတွေ ဖြစ်တာနဲ့အညီ ကျွန်တော်တို့တွေဟာ ဖြည်းဖြည်းချင်းရဲ့ ရည်မှန်းချက်တွေ ပြည့်မှီတဲ့အထိ လျှောက်လှမ်းသွားနိုင်ဖို့ ရည်ရွယ်ထားပါတယ်..။

မေး - ခင်ဗျားရဲ့ ကစားသမားဘဝအကြောင်း နည်းနည်းမေးချင်ပါတယ်..။ ခင်ဗျားဟာ အီကွေဒေါနိုင်ငံက Independiente del Valle အသင်းကနေ ၂၀၂၁ ခုနှစ်၊ ဖေဖော်ဝါရီလမှာ အင်္ဂလန်မြေကို ရောက်ရှိလာခဲ့ပါတယ်..။ ဟုတ်တယ်နော်..? ဘရိုက်တန်အသင်းကို ရောက်ရှိခဲ့တဲ့အချိန်မှာ ခင်ဗျားအတွက် တကယ့်ကို ကြီးမားလှတဲ့ အပြောင်းအလဲကြီးတစ်ခု ဖြစ်ခဲ့မှာပဲဗျ..။ ဘာဖြစ်လို့လည်းဆိုတော့ ဘောလုံးကစားတာအပြင် အခြားကွင်းပြင်ပအရာတွေဖြစ်တဲ့ ဘာသာစကား၊ ယဉ်ကျေးမှု၊ ဓလေ့ထုံးစံတွေကအစ လုံးဝကို ခြားနား၊ ကွဲပြားခဲ့တာကိုး…

Yes.. မှန်ပါတယ်..။ တကယ့်ကို ကြီးမားလှတဲ့ ပြောင်းလဲမှုကြီး ဖြစ်ခဲ့ပါတယ်..။ အဲဒီအချိန်တုန်းက ကျွန်တော့်ရဲ့ မိသားစုဝင်တွေဟာ အီကွေဒေါမှာပဲ ကျန်နေခဲ့ပါတယ်..။ အင်္ဂလန်ကို တစ်ဦးတည်းလာခဲ့ရတာ ဖြစ်တဲ့အတွက် အစစအရာရာ ခက်ခဲခဲ့ပြီး တကယ့်ကို ရုန်းကန်ခဲ့ရတဲ့ အချိန်ကာလ ဖြစ်ခဲ့ပါတယ်..။ ဒါ့အပြင် ကျွန်တော်ဟာ မိသားစုနဲ့တစ်ခါမှ အချိန်အကြာကြီး မခွဲဖူးပါဘူး..။ 

ဒါပေမယ့် ဘရိုက်တန်အသင်းရဲ့ ကမ်းလှမ်းမှုဆိုတာ အင်္ဂလန်မြေကို လာရောက်ပြီး ကျွန်တော့်ရဲ့ ကစားဟန်ကို ပြသနိုင်ဖို့အတွက် တကယ့်ကို ကြီးမားလှတဲ့ အခွင့်အရေးတစ်ခု ဖြစ်ပါတယ်..။ အခုအချိန်မှာ အားလုံးအဆင်ပြေ ချောမွေ့နေပြီ ဖြစ်တာကြောင့် တကယ့်ကို ကျေနပ်စရာကောင်းတဲ့ အခြေအနေဖြစ်ပေမယ့် အင်္ဂလန်မြေကို စတင်ခြေချခါစက ခက်ခဲခဲ့တဲ့ နေ့ရက်တွေကိုလည်း အမြဲတမ်းအမှတ်ရနေဆဲပါ..။ ဒါ့ကြောင့်အခုအချိန်မှာ ပြန်ပြီးစဉ်းစားမိရင် အိပ်မက်မက်နေသလား,,? လို့တောင် ထင်မိပါတယ်...။

မေး - အင်းဗျ..။ အချိန်တွေကုန်သွားတာ မြန်လွန်းသလိုပဲ..။ အခုဆိုရင် ခင်ဗျားကို ပရီးမီးယားလိဂ်ရဲ့ အကောင်းဆုံး ကွင်းလယ် ကစားသမား တစ်ယောက်အဖြစ် သတ်မှတ်နေကြပါပြီ..။ ဒါပေမယ့် ခင်ဗျားအနေနဲ့ ဘယ်လိုအရာတွေမှာ အခုထက်ပိုပြီး တိုးတက်ဖို့ လိုအပ်နေသေးလဲ..?

ကျွန်တော်ဟာ နေ့စဉ်နေ့တိုင်း ဆက်လက် တိုးတက်ချင်တဲ့စိတ် အပြည့်ရှိနေပါတယ်..။ ဘာဖြစ်လို့လည်းဆိုတော့ ကျွန်တော်တို့ဟာ သင်ယူနေတာတွေကို ရပ်တန့်လိုက်လို့ မရပါဘူး..။ အမြဲတမ်းပဲ သင်ယူနေရပါတယ်..။ မနက်အိပ်ယာထလို့ လေ့ကျင့်ခန်းကို သွားတာပဲဖြစ်ဖြစ်၊ ပွဲကစားတာပဲဖြစ်ဖြစ် သင်ယူစရာ တစ်ခုခုကတော့ အမြဲတမ်းရရှိပါတယ်..။ အခုအချိန်မှာ ကျွန်တော့်ရဲ့ ခြေစွမ်းကောင်းမွန်နေပေမယ့် လေ့ကျင့်ခန်းတိုင်းမှာ တစ်ရက်ထက်တစ်ရက် ပိုပြီးတိုးတက်နေရမယ်..၊ ကစားခွင့်ရတဲ့ ပွဲစဉ်တိုင်းမှာ အရင်ပွဲကထက် ပိုပြီးကောင်းမွန်နေရပါမယ်..။ ဒါ့ကြောင့်အခုလက်ရှိ ခြေစွမ်းအပေါ် ကျေနပ်အားရမိပေမယ့် ဆက်လက်ပြီး သင်ယူသွားရဦးမှာပါ..။

မေး - ခင်ဗျားဟာ အခုဘောလုံးရာသီမှာ သွင်းဂိုးတွေပိုပြီး ရရှိနေပါတယ်..။ အခုအချိန်ထိ (၄) ဂိုးသွင်းယူပေးထားပြီး ပြီးခဲ့တဲ့ဘောလုံးရာသီ (၃) ခုပေါင်း ရရှိထားတဲ့ သွင်းဂိုးအရေအတွက်နဲ့ တူညီနေပါပြီ..။ အဲဒီစွမ်းဆောင်ရည် အချက်အလက်ကို ကြည့်မယ်ဆိုရင် အခုရာသီမှာ ဂိုးသွင်းနိုင်ဖို့ကို ပိုပြီးအာရုံစိုက်ထားခဲ့သလား..?

ကန်သွင်းနိုင်မယ့် အခွင့်အရေးရတာနဲ့ ဂိုးပေါက်ထဲကို ကန်သွင်းဖို့ အဖေက ကျွန်တော့်ကို တိုက်တွန်းနေခဲ့တာ အတော်ကြာခဲ့ပါပြီ..။ ဘာဖြစ်လို့လည်းဆိုတော့ ပြီးခဲ့တဲ့ဘောလုံးရာသီတွေမှာလည်း ဂိုးရနိုင်မယ့် အခွင့်အရေးတွေ အများကြီးရရှိခဲ့ပါတယ်..။ အခုအချိန်မှာ ဂိုးတွေပိုပြီး ရရှိလာတာဟာ အဖေ့ရဲ့အကြံပေးချက်ကို နားထောင်လိုက်လို့ ဖြစ်နိုင်ပါတယ်..။ အခုနောက်ပိုင်းမှာ အခွင့်အရေး ရလာတာနဲ့ ကန်သွင်းနိုင်ဖို့ ကြိုးစားလေ့ရှိပြီး ဂိုးသွင်းနိုင်လိုက်တိုင်း အဖေ့ကို သတိရမိပါတယ်..။ ဂိုးတွေပိုပြီး သွင်းယူလာနိုင်တာဟာ အဖေ့ရဲ့တိုက်တွန်းမှုကြောင့်လို့ ပြောနိုင်ပါတယ်..။

မေး - ဖခင်ဖြစ်တဲ့သူရဲ့ လွှမ်းမို့မှုအကြောင်း ပြောခဲ့တယ်ပေါ့..။ ငယ်စဉ်တုန်းက ခင်ဗျားအတုယူ၊ အားကျခဲ့ရတဲ့ ပုဂ္ဂိုလ်တွေ၊ ကစားသမားတွေရော ရှိခဲ့သေးလား..?

ကျွန်တော်အတုယူ၊ အားကျခဲ့ရတဲ့ စံပြကစားသမားတွေကို ပြောရမယ်ဆိုရင် ပထမဆုံးက ‘ခရစ္စတီယာနို ရော်နယ်လ်ဒို’ ဖြစ်ပါတယ်..။ သူ့ရဲ့ကြိုးစားအားထုတ်မှုနဲ့ နိုင်ပွဲဆာလောင်စိတ် ပြင်းထန်မှုတွေကို အားကျခဲ့ရသလို အီကွေဒေါအသင်းရဲ့ တောင်ပံ ကစားသမားဟောင်း ‘အန်တိုနီယို ဗလင်စီယာ’ ကိုလည်း အားကျခဲ့ပါတယ်..။ သူဟာကျွန်တော်တို့ အီကွေဒေါကနေ ပရီးမီးယားလိဂ်ရဲ့ အကောင်းဆုံး အသင်းတစ်သင်းမှာ ကစားခွင့်ရခဲ့တဲ့သူ ဖြစ်ပါတယ်..။ ဒါ့ကြောင့်သူဟာလည်း ကျွန်တော့်ရဲ့ စံပြပုဂ္ဂိုလ်တစ်ယောက် ဖြစ်ပါတယ်..။ နောက်ပြီး အန်ဂိုလို ကန်တေး၊ ကလော့ဒ် မက်ခလီလီ တို့ကိုတော့ သူတို့ရဲ့ကစားပုံကြောင့် နှစ်သက်ခဲ့ရသလို သူတို့တွေရဲ့ ကစားဟန်ကို အတုယူခဲ့တယ်..၊ သင်ယူခဲ့ပါတယ်..။

မေး - ခင်ဗျားရဲ့နည်းပြတွေအကြောင်း ဆက်ပြီးမေးချင်ပါတယ်..။ အခုလက်ရှိ ခင်ဗျားတို့အသင်းရဲ့နည်းပြ အင်ဇို မာရက်စ်ကာ ဟာ ဘယ်လိုလူပုဂ္ဂိုလ်တစ်ယောက် ဖြစ်နေခဲ့လဲ..?

သူဟာသိပ်ကိုခင်မင်၊ ရင်းနှီးဖို့ကောင်းတဲ့ လူတစ်ယောက် ဖြစ်ပါတယ်..။ သူဟာကျွန်တော်တို့တွေရဲ့ နည်းပြအဖြစ်သာမက ခင်မင်ရတဲ့ မိတ်ဆွေ၊ သူငယ်ချင်းတစ်ယောက်နဲ့ပါ ပြောဆို၊ ဆက်ဆံနိုင်တဲ့သူ၊ ဆွေးနွေး တိုင်ပင်လို့ရတဲ့သူလည်း ဖြစ်ပါတယ်..။ အင်ဇို ဟာ ကျွန်တော်တို့နဲ့ အမြဲတမ်းဆွေးနွေးနိုင်ဖို့ တံခါးဖွင့်ထားတာကြောင့် ကစားသမားတွေအနေနဲ့ အချိန်မရွေး သူ့ကိုပြောဆိုနိုင်ခွင့်၊ တိုင်ပင်နိုင်ခွင့်ရှိနေတာဟာ အရေးပါတဲ့အချက်တစ်ခု ဖြစ်ပါတယ်..။ 

ဒါ့အပြင်နည်းပြကြီးရဲ့အားပေးမှု၊ ရင်းရင်းနီးနှီး ပြောဆို၊ လမ်းညွှန်မှုတွေကြောင့် ကျွန်တော်တို့ ကစားသမားတွေရဲံ ယုံကြည်မှုပိုင်းမှာပါ ပိုပြီးတိုးတက်လာခဲ့ပါတယ်..။ ဒါ့ကြောင့်ကျွန်တော်တို့တွေအတွက် သူဟာသိပ်ကိုကျေနပ်ဖို့ ကောင်းတဲ့ နည်းပြတစ်ယောက်လို့ ပြောရမှာပါပဲ..။ အသင်းမှာရှိတဲ့ လူတိုင်းဟာ လက်ရှိအခြေအနေအပေါ် အားလုံးပျော်ရွှင်နေကြပါတယ်..။ နည်းပြကြီးကလည်း အသင်းရဲ့ရလဒ်တွေ ကောင်းမွန်နေဖို့ အကောင်းဆုံး ကြိုးစားနေသလို ကျွန်တော်တို့အားလုံးဟာ တက်ညီလက်ညီနဲ့ အစွမ်းကုန် ကြိုးစား၊ ပေးဆပ်နေကြပါတယ်..။  

မေး - ကျွန်တော်က ဒိန်းမတ်နိုင်ငံက လာခဲ့တာဆိုတော့ ခင်ဗျားတို့ချယ်လ်ဆီးအသင်းက ဒိန်းမတ် ကစားသမား တစ်ယောက်ဖြစ်တဲ့ ဂိုးသမား ‘ဖိလစ်ပ် ဂျော်ဂျင်ဆင်’ နဲ့ ပတ်သက်ပြီး မေးချင်ပါတယ်..။ သူနဲ့ခင်ဗျားနဲ့ကြားက ဆက်ဆံရေးကရော ဘယ်လိုရှိလဲ..? သူဟာစပိန်ဘာသာနဲ့ ပြောဆိုတတ်တာကိုလည်း သိထားပါတယ်..။ ဒါ့ကြောင့်သူနဲ့ခင်ဗျားနဲ့ကြားက ဆက်ဆံရေးအခြေအနေ ဘယ်လိုရှိလဲဗျ..?

 ဖိလစ်ပ် ဟာ ကျွန်တော့်ရဲ့ အရင်းနှီးဆုံး သူငယ်ချင်းတစ်ယောက် ဖြစ်ပါတယ်..။ တစ်ချို့ရက်တွေမှာ လေ့ကျင့်ကွင်းကပြန်ရင် သူ့ရဲ့ကားနဲ့ပဲ လိုက်ပါစီးနင်းဖြစ်ပါတယ်..။ သူဟာစပိန်လို ကောင်းကောင်း ပြောတတ်ပြီး အင်မတန်မှ ခင်မင်ဖို့ကောင်းတဲ့ လူတစ်ယောက် ဖြစ်ပါတယ်..။ အဝေးကွင်းအတွက် ခရီးတွေထွက်ရင် သူနဲ့အတူတူ ထိုင်ဖြစ်ပါတယ်..။ သူဟာကစားခွင့်ရတဲ့အချိန်မှာ အသင်းအတွက် အစွမ်းကုန် ကြိုးစား၊ ကစားပေးတဲ့သူ တစ်ယောက်ဖြစ်တာကြောင့် သူ့ကိုအသင်းဖော်အဖြစ်နဲ့ ခင်မင်ခွင့်ရတာဟာ ကျေနပ်ဖို့ ကောင်းပါတယ်..။ တခြားအသင်းဖော်တွေကလည်း သူ့ကိုသဘောကျကြတယ်ဗျ..။