ဘရာဇီးလ် လက်ရွေးစင်အသင်း၏ ခြေစမ်းပွဲစဉ်များသို့ သွားရောက်ရမည့် လူငယ်တောင်ပံ ကစားသမား အက်စ်တီဗာအို ဝီလီယံ မှာ Sky Sports သတင်းဌာနနှင့် ပြုလုပ်ခဲ့သည့် တွေ့ဆုံခန်းအစီအစဉ်၌ ချယ်လ်ဆီးအသင်းသို့ ပြောင်းရွှေ့ရာတွင် သူ၏အတွေ့အကြုံများ၊ အသင်းနှင့် အစကောင်းမွန်ခဲ့သည့် အနေအထားနှင့် ဘရာဇီးလ်လက်ရွေးစင် အသင်းတွင် ပါဝင်ခွင့်ရခဲ့သည့် အတွေ့အကြုံများကို အောက်ပါအတိုင်း ပြောပြခဲ့ပါသည်..။ 

မေး - အက်စ်တီဗာအို ရေ.. ပထမဆုံးအနေနဲ့ ကျွန်မတို့ကို အခုလိုအချိန်ပေးပြီး ဖြေကြားပေးတဲ့အတွက် အထူးကျေးဇူးတင်ရှိပါကြောင်း အရင်ဆုံး ပြောကြားလိုပါတယ်..။ အခုအချိန်မှာ ချယ်လ်ဆီးအသင်းမှာ ပြသနေတဲ့ ရှင့်ရဲ့ခြေစွမ်းအပေါ် အားလုံးက ကျေနပ်၊ အားရနေကြပါတယ်..။ ဒါဟာမျှော်မှန်းထားတာထက် ပိုပြီးကောင်းမွန်ခဲ့တဲ့ အနေအထားလို့ ပြောနိုင်လားရှင့်..?

သေချာတာပေါ့..။ ကျွန်တော်မျှော်မှန်းထားတာထက် အများကြီးသာလွန်ခဲ့ပါတယ်..။ ဘာဖြစ်လို့လည်းဆိုတော့ ချယ်လ်ဆီးအသင်းကို ရောက်လာတဲ့အချိန်ကျ ဘယ်လိုအခြေအနေတွေ ကြုံတွေ့ရနိုင်မလဲ..? ဆိုပြီး စိုးရိမ်စိတ်တွေ ရှိနေခဲ့တာ တစ်နှစ်ခွဲလောက် ရှိနေခဲ့ပြီ..။ အခုတော့ အဲဒီကာလကို ကျော်လွန်ခဲ့ပြီပေါ့ဗျာ…။ အသင်းမှာ မြန်မြန်ဆန်ဆန် အထိုင်ကျခဲ့သလို ကစားခွင့်လည်း ရရှိခဲ့ပါတယ်..။ အသင်းဖော်တွေနဲ့လည်း အသားကျနေပါပြီ..။

အခုဆိုရင် အသင်းမှာသာမက အသင်းပြင်ပ လူနေမှုဘဝမှာပါ ကျေနပ်၊ ပျော်ရွှင်နေပါပြီ..။ အခုလိုမြန်မြန်ဆန်ဆန်နဲ့ အဆင်ပြေ ချောမွေ့ခဲ့ရတဲ့အပေါ် ကျွန်တော့်ရဲ့မိသားစုဝင်တွေနဲ့ ဘုရားသခင်ကို အထူးကျေးဇူးတင်၊ ချီးမွမ်းရပါတယ်..။ ကျွန်တော်မျှော်လင့်ထားတာထက် ပိုပြီးကောင်းမွန်ခဲ့တဲ့ အခြေအနေကို ရရှိခဲ့ပါတယ်..။

မေး - ချယ်လ်ဆီးအသင်းကို ရွေးချယ်ဖြစ်ခဲ့ရတဲ့ဖြစ်စဉ်ကို သေသေချာချာ သိချင်ပါတယ်..။ ချယ်လ်ဆီးအသင်းမှာ ဘယ်လိုအောင်မြင်မှုတွေ ရရှိမယ်..လို့ ရည်မှန်းပြီး ရွေးချယ်ခဲ့တာလဲ..? ဘရာဇီးလ် ဂန္ထဝင်နောက်ခံလူ သီယာဂို ဆေးလ်ဗား က ချယ်လ်ဆီးအသင်းရဲ့အကြောင်း ရှင့်ကိုလာပြောပြတယ်.. ဆိုပြီး ကျွန်မတို့ သိထားခဲ့ပါတယ်..။ 

Yes.. မှန်ပါတယ်..။ ၂၀၂၄ ခုနှစ်တုန်းက ဘရာဇီးလ်လိဂ် စီးရီးအေပြိုင်ပွဲရဲ့ နောက်ဆုံးပွဲစဉ်အပြီးမှာ သီယာဂို ဆေးလ်ဗား နဲ့ စကာားပြောဖြစ်ခဲ့ပါတယ်..။ သူကစားခဲ့တဲ့ အသင်းတွေထဲက ချယ်လ်ဆီးအသင်းရဲ့ ဖွဲ့စည်းပုံဟာ သိပ်ကိုကောင်းမွန်တယ်.. လို့ အသိပေးခဲ့ပြီး တကယ်လို့ ဥရောပကိုပြောင်းရွှေ့ဖို့ ဆုံးဖြတ်ခဲ့မယ်ဆိုရင် ချယ်လ်ဆီးအသင်းကို စဉ်းစားဖို့ တိုက်တွန်းခဲ့တာပါ..။ အခုဆိုရင် ဒီအသင်းဟာ ကျွန်တော်လိုချင်တဲ့ အရာတွေအားလုံး ပြည့်စုံနေတာ ကိုယ်တိုင်ကြုံတွေ့နေခဲ့ပါပြီ..။ 

အသင်းရဲ့ဖွဲ့စည်းပုံဟာ သိပ်ကိုကောင်းမွန်နေသလို အသင်းရဲ့နေရာတိုင်း၊ ဌာနတိုင်းမှာ အရည်အသွေး ကောင်းမွန်တဲ့ ပုဂ္ဂိုလ်တွေနဲ့ ဖွဲ့စည်းထားပါတယ်..။ အဲဒီအချိန်တုန်းက သီယာဂို ဆေးလ်ဗား နဲ့ စကားပြောဖြစ်ခဲ့တဲ့ အခိုက်အတန့်ကိုလည်း အမြဲတမ်းဂုဏ်ယူ၊ အမှတ်ရနေပါတယ်..။ သူဟာဒီအသင်းမှာ အားလုံးက စံပြုအားကျရတဲ့ ကစားသမား တစ်ယောက် ဖြစ်တယ်လို့ ကျွန်တော်သိထားပါတယ်..။ ဒါ့ကြောင့်သူနဲ့စကားပြောခွင့် ရရှိခဲ့တာဟာ ထူးခြားတဲ့အခွင့်အရေးတစ်ခု ဖြစ်ခဲံ့ပါတယ်..။

သူ့ရဲ့တိုက်တွန်းမှုကတဆင့် ကျွန်တော်ဟာ အနာဂတ်အတွက် မှန်ကန်တဲ့ ဆုံးဖြတ်ချက်ချမှတ်နိုင်ဖို့ ၂၀၂၄ ခုနှစ် ကုန်ဆုံးမယ့်အချိန်ကို မျှော်လင့်၊ စောင့်ဆိုင်းနေခဲ့ပါတယ်..။ ချယ်လ်ဆီးအသင်းရဲ့ပွဲတွေကိုလည်း ဂရုတစိုက် စောင့်ကြည့်ဖြစ်ခဲ့သလို ဘယ်သူတွေနဲ့ တွဲဖက် ကစားရနိုင်တယ်.. စသဖြင့် သေသေချာချာ လေ့လာခဲ့ပါတယ်..။ ချယ်လ်ဆီးအသင်းနဲ့ အပြောင်းအရွှေ့ ကိစ္စရပ်တွေအားလုံး ချောချောမွေ့မွေ့ ဖြစ်ခဲ့ရတဲ့အပေါ် ဘုရားသခင်ကို ထပ်မံကျေးဇူးတင်ရပါတယ်..။

မေး - ချယ်လ်ဆီးအသင်းရဲ့ ကစားဟန်၊ ပရီးမီးယားလိဂ် ပွဲစဉ်တွေရဲ့ ကစားဟန်အပေါ်မှာ ရှင့်ရဲ့အမြင်ကို သိချင်ပါတယ်..။ နောက်ပြီးအသင်းနဲ့ ပရီးမီးယားလိဂ် ပြိုင်ပွဲတွေမှာ မြန်မြန်ဆန်ဆန်နဲ့ အသားကျအောင် ဘယ်လိုအကူအညီတွေ ရယူခဲ့ရသေးလဲ..?

နည်းပြကြီးရဲ့ ယုံကြည်အားကိုးမှုနဲ့ အသင်းဖော်တွေရဲ့ အားပေးကူညီမှု၊ နွေးနွေးထွေးထွေးနဲ့ ကြိုဆို၊ လက်တွဲခေါ်ယူခဲ့မှုတွေကြောင့် ဖြစ်ပါလိမ့်မယ်..။ အသင်းကိုရောက်လာခါစမှာ လေ့ကျင့်ခန်းတွေကအစ ခက်ခဲခဲ့ပါတယ်..။ ဒီအသင်းမှာ ကစားပုံဟာ ကျွန်တော်ကျင်လည်ခဲ့တဲ့ ဘရာဇီးလ် ဘောလုံးလောကနဲ့ အရမ်းကိုခြားနားခဲ့သလို ကစားသမားတွေရဲ့ ခွန်အားသုံးကစားပုံ၊ ခန္ဓာကိုယ် ကြံ့ခိုင်မှုတွေအပြင် ရာသီဥတု အခြေအနေကအစ မတူညီပါဘူး..။ 

ဒါပေမယ့် နည်းပြအဖွဲ့ဝင်တွေနဲ့ အသင်းဖော်တွေရဲ့ ပံ့ပိုးမှု၊ ဖေးမကူညီမှုတွေကြောင့် အဲဒီအခက်အခဲတွေကို မြန်မြန်ဆန်ဆန် ကျော်လွှားနိုင်ခဲ့ပါတယ်..။ အခုဆိုရင် ကိုယ့်ရဲ့ဇာတိမြေ.. အိမ်မှာလိုပဲ ခံစားနေရပြီဖြစ်သလို ဘောလုံးသယ်ယူ ဆွဲပြေးမှုတွေ၊ ပြိုင်ဘက်ကစားသမားတွေကို ကျော်ဖြတ်မှုတွေကို သက်တောင့်သက်သာနဲ့ ပြုလုပ်နိုင်ခဲ့ပါပြီ..။ ကစားပုံကောင်းမွန်ဖို့ဆိုတာ ကိုယ့်ကိုယ်ကို ယုံကြည်မှု ကောင်းမွန်နေမှ ဖြစ်နိုင်မှာပါ..။ ဒါ့ကြောင့်အခုလိုအင်္ဂလန်မြေက ကစားပုံနဲ့ မြန်မြန်ဆန်ဆန် အသားကျနိုင်ဖို့ ယုံကြည်မှုကောင်းမွန်မှုက အဓိကကျခဲ့တယ်လို့ ကျွန်တော်ထင်ပါတယ်..။

အင်္ဂလန်ကပွဲတွေဟာ ပိုပြီးလျှင်မြန်တယ်..၊ ပိုပြီးခွန်အားသုံး ကစားကြသလို ခန္ဓာကိုယ် ကြံ့ခိုင်မှုကိုလည်း အရမ်းဦးစားပေးကြပါတယ်..။ ဒါ့ကြောင့်ကျွန်တော်တို့လို ဘရာဇီးလ်ကနေ ပြောင်းရွှေ့လာတဲ့ ကစားသမားတိုင်း အခက်အခဲ ကြုံတွေ့ရတာပါပဲ..။ အခုဆိုရင် ပရီးမီးယားလိဂ်ပြိုင်ပွဲတွေနဲ့ အသားကျလာပြီ ဖြစ်ပေမယ့် (၁၀၀ %) ရာခိုင်နှုန်းပြည့် အထိုင်ကျနေပြီလို့တော့ မခံစားရသေးပါဘူး..။ မျှော်မှန်းထားတာထက် ပိုပြီးကောင်းမွန်ခဲ့တာ သေချာပါတယ်..။

မေး - အဲဒီလိုယုံကြည်မှု (confidence) ကောင်းမွန်လာဖို့ ကိုယ့်ကိုယ်လည်း တည်ဆောက်နိုင်မှ ဖြစ်မှာပေါ့..။ အခုဆိုရင်ရှင်ဟာ တစ်ယောက်ချင်း 1 vs 1 ကျော်ဖြတ်မှုတွေ၊ ဘောလုံးနဲ့အတူ အရှိန်မြှင့် ဆွဲပြေးမှုတွေ ပြုလုပ်နေသလို ချန်ပီယံလိဂ်ပွဲစဉ်တုန်းက bicycle kick ကန်ချက်နဲ့တောင် ဂိုးသွင်းနိုင်ဖို့ ကြိုးစားခဲ့ပါသေးတယ်..။ အဲဒီလို အခိုက်အတန့်တွေ ပြုလုပ်နိုင်ဖို့ ယုံကြည်မှုကို ဘယ်လိုမွေးမြူခဲ့လဲ..? 

ကျွန်တော်ဟာ ပြင်းပြတဲ့ယုံကြည်မှု အမြဲတမ်းရှိနေပါတယ်..။ အဲဒီလို ကန်ချက်တွေ၊ စွမ်းရည်တွေ..၊ ပြိုင်ဘက်တွေကို ကျော်ဖြတ်မှုတွေ ပြုလုပ်နိုင်တယ်ဆိုတာ ဘုရားသခင်ရဲ့ ပေးသနားမှုကြောင့် ဖြစ်ပါတယ်..။ တခါတလေကျရင် ကိုယ့်ကိုယ်ကိုတောင် မစဉ်းစားမိပဲ ပြုလုပ်မိတဲ့ အခိုက်အတန့်တွေလည်း ရှိခဲ့ပါတယ်..။ ချန်ပီယံလိဂ်ပြိုင်ပွဲတုန်းက bicycle kick ကန်သွင်းဖို့.. စိတ်ထဲမှာမစဉ်းစားပဲ အလိုအလျောက် ပြုလုပ်လိုက်တာပါ..။

ဘောလုံးရဲ့အနေအထားကို မြင်လိုက်တာနဲ့ စိတ်ထဲမှာအများကြီး မစဉ်းစားခဲ့ပါဘူး..။ ခန္ဓာကိုယ်ကို တစ်ချက်လှည့်ပြီး ခုန်ကန်လိုက်တာပဲဗျ.. ဟားဟား..။ အလိုအလျောက်ပဲ တုံ့ပြန်သွားတယ်.. (Instinctive) လို့ ပြောရမယ်ထင်တယ်..။ ကျွန်တော်လည်း သေသေချာချာ မရှင်းပြတတ်ဘူးဗျ..။ တခါတလေကျရင် အကျဉ်းအကျပ်ထဲက ဘောလုံးတွေ ဆွဲထုတ်သွားဖို့၊ ဂိုးရှေ့မှာ bicycle kick နဲ့ ကန်သွင်းဖို့..၊ ဘယ်သူမှ မျှော်လင့်မထားတဲ့ အရာတွေ၊ ဆွဲထွက်မှုတွေ ပြုလုပ်မိတာတွေဟာ စိတ်ထဲက မစဉ်းစားပဲ သူ့အလိုအလျောက် ပြုလုပ်မိသွားတဲ့အရာတွေ ဖြစ်ကြပါတယ်..။ ဒါ့ကြောင့်ကစားပွဲတွေမှာ စိတ်ထဲက မစဉ်းစားပဲ သူ့အလိုအလျောက် ပြုမူသွားတဲ့ လှုပ်ရှားမှုတွေ ပိုပြီးများပါတယ်..။  

မေး - ရှင်ဟာကိုယ့်ရဲ့ရင်ထဲက ခံစားချက်တွေကို လွယ်လွယ်ကူကူ ထုတ်မပြောတဲ့သူ (reserved guy) ဖြစ်နေတာကြောင့် တချို့အရာတွေကို ရှင်းမပြတတ်တာ ဖြစ်နိုင်ပါတယ်..။ ကွင်းပြင်ပမှာရော ရှင့်ရဲ့အနေအထိုင်တွေဟာ အဲဒီအတိုင်းပဲလား..? 

Yes.. သေချာတာပေါ့..။ ကွင်းပြင်ပ.. အပြင်မှာဆိုရင် ကျွန်တော်ဟာ ပိုပြီးတော့ အေးဆေး၊ တည်ငြိမ် (calm) ပါတယ်..။ များသောအားဖြင့် မိသားစုဝင်တွေနဲ့ပဲ စကားပြောဖို့ ကြိုးစားပါတယ်..။ သူငယ်ချင်းတွေနဲ့ စကားသိပ်မပြောပဲ အပြင်မှာဆိုရင် ဗွီဒီယိုဂိမ်းပဲ ကစားနေတာ များတယ်ဗျ..။ ဒါပေမယ့် ကွင်းထဲရောက်တဲ့အချိန်ကျရင် ကျွန်တော်ဟာ ပွဲအပေါ်မှာ အပြည့်အဝ အာရုံစိုက်ထားလေ့ ရှိပါတယ်..။ ကစားသမား တစ်ယောက်ဟာ အာရုံစူးစိုက်မှု အပြည့်ရှိနေမှ စဉ်းစား၊ ဆုံးဖြတ်မှုတွေ မြန်ဆန်မှာပါ..။ 

ဘာဖြစ်လို့လည်းဆိုတော့ ပွဲကစားတဲ့အချိန်ကျရင် ကွင်းထဲကအပြောင်းအလဲတွေဟာ အရမ်းကိုလျှင်မြန်ပြီး ကြိုတင်ခန့်မှန်းထားလို့ မရပါဘူး..။ ကြုံလာတဲ့ အခြေအနေတွေကို ရင်ဆိုင်ရာမှာ သူ့အလိုအလျောက် (instinctive) ပြုမူသွားတာတွေနဲ့ပဲ ဖြေရှင်းလေ့ရှိပါတယ်..။

မေး - ဒါပေါ့..။ စိတ်ထဲက မစဉ်းစားပဲ အလိုအလျောက် ပြုလုပ်မှုတွေနဲ့ ရှင်ဟာပရီးမီးယားလိဂ် သွင်းဂိုးရတယ်..၊ ချန်ပီယံလိဂ်မှာ သွင်းဂိုးရခဲ့သလို ဘရာဇီးလ်အသင်းအတွက်လည်း ဂိုးသွင်းပေးနိုင်ခဲ့ပါတယ်..။ အဲဒီလိုဂိုးတွေ သွင်းပေးနိုင်တာနဲ့အမျှ ရှင့်ရဲ့အပေါ်မှာ မျှော်လင့်ချက်တွေ ပိုပြီးများပြားလာပါတယ်..။ လူတွေရဲ့ အာရုံစိုက်မှုတွေနဲ့အတူ ဖိအားတွေပိုပြီးများပြားလာတာဆိုတော့ အဲဒီလိုဖိအားတွေကို ဘယ်လိုရင်ဆိုင်သွားဖို့ရှိလဲ..?

မျှော်လင့်ချက်တွေ၊ ဖိအားတွေနဲ့ ပတ်သက်လာရင် ကျွန်တော်ဟာ ပါးလ်မီးရက်စ်အသင်းမှာကတည်းက ဂရုမစိုက်ခဲ့တာ အခုအထိပါပဲ..။ အများရဲ့မျှော်လင့်ချက်.. ဖိအားတွေကို အခုအချိန်ထိ ရင်ဆိုင်နိုင်ခဲ့တဲ့နေရာမှာ မိသားစုဝင်တွေရဲ့ ကူညီမှုဟာလည်း အရေးပါခဲ့ပါတယ်..။ ဒါ့ကြောင့်သူတို့ကိုလည်း ကျေးဇူးတင်ရပါတယ်..။ သူတို့တွေဟာ ကျွန်တော့်ကို ရိုကျိုး၊ နှိမ့်ချမှုအမြဲရှိနေဖို့ သတိပေးလေ့ ရှိပါတယ်..။ ကျွန်တော်ဟာ အခုထက်ပိုပြီး အများကြီးတိုးတက်ဖို့ လိုအပ်နေသေးသလို သင်ယူစရာတွေ အများကြီးရှိနေသေးတယ်.. ဆိုတာ သိထားပါတယ်..။

ကျွန်တော်ရောက်ရှိချင်တဲ့နေရာ၊ လိုချင်တဲအဆင့်ကို ရောက်ရှိနိုင်ဖို့ အဝေးကြီးလိုအပ်နေသေးသလို မနက်ဖြန်ကျရင် ဘာတွေဖြစ်လာမလဲ..? ဘယ်သူကမှ မသိနိုင်ပါဘူး..။ ဒါ့ကြောင့်ရိုကျိုး၊ နှိမ့်ချမှုအပြည့်ရှိဖို့..၊ အမြဲတမ်းသင်ယူချင်စိတ်ရှိနေဖို့ အရေးကြီးပါတယ်..။ အခုအချိန်မှာ ရရှိနေတဲ့ အခြေအနေတွေကို ခံစားပျော်ရွှင်ရင်း တည်တည်ငြိမ်ငြိမ် ဖြတ်သန်းရမှာပါ..။

မေး - ရှင်အပေါ် အများက အာရုံစိုက်.. စောင့်ကြည့်ခဲ့တာ အချိန်အတော်ကြာခဲ့ပါပြီ..။ ပထမဆုံးဘောလုံးကန်ဖိနပ် စပွန်ဆာကို အသက် (၁၀) နှစ်အရွယ်ကတည်းက ရရှိခဲ့တယ်လို့ သိရပါတယ်..။ အဲဒီလိုအသက်ငယ်ငယ်ရွယ်ရွယ်မှာပဲ ကြီးမားတဲ့ ဖိအားတွေနဲ့ ရင်ဆိုင်ခဲ့ရတာဟာ ရှင့်အတွက် ဘယ်လောက်အထိ အထောက်အကူ ဖြစ်စေခဲ့လဲ..? ဆိုလိုချင်တာက ကလေးအရွယ်ကတည်းက ရှင့်အပေါ်မှာ အများကမျှော်လင့်ချက်တွေ ကြီးမားခဲ့တယ်မလား..?

အဲဒီလိုကြီးမားတဲ့ မျှော်လင့်ချက်တွေဟာ ကျွန်တော့်ကို မြန်မြန်ဆန်ဆန် ပိုပြီးရင့်ကျက်စေခဲ့ပါတယ်..။ ဒါ့အပြင်မျှော်လင့်မထားတဲ့ အခြေအနေတွေနဲ့ ရင်ဆိုင်ရာမှာလည်း အထောက်အကူ ရခဲ့ပါတယ်..။ ပွဲတစ်ပွဲမှာ ဂိုးသွင်းနိုင်ခဲ့လို့ ရရှိခဲ့တဲ့ ပျော်ရွှင်မှုကို ထိန်းချုပ်နိုင်ဖို့ လိုအပ်သလို ဂိုးမသွင်းနိုင်လို့… ခြေစွမ်းမပြနိုင်လို့ စိတ်ပျက်ခဲ့ရတဲ့ပွဲတွေကိုလည်း ရင်ဆိုင်နိုင်ရပါမယ်..။ ကြီးမားတဲ့ မျှော်လင့်ချက်တွေနဲ့အတူ ချီးမွမ်း၊ ဂုဏ်ပြုမှုတွေ ရရှိသလို ဝေဖန်မှုတွေ၊ အပြစ်တင်မှုတွေလည်း ခံစားရတာပါပဲ..။ ဒါ့ကြောင့်ကျွန်တော်ဟာ ငယ်စဉ်ကတည်းက အများရဲ့အာရုံစိုက်မှု၊ ချီးမွမ်းမှု၊ ကဲ့ရဲ့အပြစ်တင်မှု.. စတဲ့အရာတွေကို ဘယ်လိုနည်းနဲ့ ရင်ဆိုင်ရမယ်.. ဆိုတာ နားလည်ထားခဲ့ပါတယ်..။  

နောက်ပြီးခုနက ပြောခဲ့သလိုပေါ့..။ မိသားစုဝင်တွေရဲ့ ပံ့ပိုးကူညီမှု၊ ဖေးမလမ်းညွှန်မှုတွေကလည်း အရေးပါခဲ့ပါတယ်..။ သူတို့တွေဟာ လိုအပ်တဲ့အချိန်တိုင်းမှာ အသင့်ရှိနေပြီး ကျွန်တော့်ကို ကူညီပေးခဲ့သလို ကျွန်တော်ဖြစ်ချင်တဲ့အရာ၊ ကျွန်တော့်ရဲ့ဆန္ဒတွေကိုလည်း သိထားပါတယ်..။ ကျွန်တော်ဟာ ကြုံတွေ့လာတဲ့ အရာတွေကို ဘယ်လိုနည်းနဲ့ ရင်ဆိုင်လေ့ရှိလဲ.. မိသားစုဝင်တွေ ကောင်းကောင်းသိကြပါတယ်..။

 

မေး - လက်ရှိအချိန်ထိ ချယ်လ်ဆီးအသင်းနဲ့ အမှတ်ရဆုံး အခိုက်အတန့်တစ်ခုကို ပြောပြပေးနိုင်မလား..? အရမ်းကို ကျေနပ်ခဲ့ရတဲ့ အခိုက်အတန့်တစ်ခု ဖြစ်နိုင်သလို ‘Wow..! ဒီလိုဖြစ်ခဲ့တာ မယုံနိုင်စရာပဲ..’ ဆိုပြီး စဉ်းစားခဲ့ရတဲ့ အခိုက်အတန့်လည်း ဖြစ်နိုင်ပါလိမ့်မယ်..။

ကျွန်တော့်ရဲ့ ပရီးမီးယားလိဂ် ပထမဆုံးပွဲစဉ် ဖြစ်ပါလိမ့်မယ်..။ တကယ့်ကို မယုံနိုင်စရာပဲဗျ..။ ကွင်းထဲကိုရောက်တဲ့အချိန်.. ‘Wow..! ပရီးမီးယားလိဂ်ဆိုတာ ဒီလိုပါလား..’ ဆိုတဲ့ ခံစားချက်ကို ရရှိခဲ့ပါတယ်..။ ငယ်ငယ်ကတည်းက ပရီးမီးယားလိဂ်ပွဲတွေကို TV ကနေ အစဉ်တစိုက် ကြည့်ရှုခဲ့တာ.. ဆိုတော့ အခုဆိုရင် ကိုယ်တိုင် မြက်ခင်းစိမ်းပေါ် ရောက်ရှိနေတဲ့ အခိုက်အတန့်ကို အထူးကျေနပ်ခဲ့ရပါတယ်..။ 

ချန်ပီယံလိဂ်ပြိုင်ပွဲ.. ဘေယန် မြူးနစ်နဲ့ပွဲမှာလည်း အလားတူပါပဲ..။ ချန်ပီယံလိဂ်ပြိုင်ပွဲရဲ့ သီချင်းသံကို အရန်ခုံပေါ်ကနေ နားဆင်ခဲ့ရတဲ့ အခိုက်အတန့်မှာ ကြက်သီးတွေ တဖြန်းဖြန်း ‘ထ’ ခဲ့ရသလို အဲဒီသီချင်းသံကို မြက်ခင်းစိမ်းပေါ်မှာ ခံစားခွင့်ရချင်တဲ့ဆန္ဒတွေ ပေါ်ပေါက်လာခဲ့ပါတယ်..။ အခုနောက်ဆုံးယှဉ်ပြိုင် ကစားခဲ့တဲ့ အိမ်ကွင်းပွဲစဉ်မှာတော့ ကွင်းထဲမှာ ကိုယ်တိုင်ခံစားခွင့်ရခဲ့ပါပြီ..။ ချန်ပီယံလိဂ် ပြိုင်ပွဲကိုလည်း TV ကနေ ကြည့်နေခဲ့ရတဲ့သူတစ်ယောက်အနေနဲ့ ချန်ပီယံလိဂ်ပြိုင်ပွဲမှာ ကစားခွင့်ရဖို့ဆိုတာ အိပ်မက်တစ်ခုပါပဲ..။

ချန်ပီယံလိဂ်ပြိုင်ပွဲမှာ ကစားခွင့်ရခဲ့တယ်..၊ ချန်ပီယံလိဂ်တေးသွားကို မြက်ခင်းစိမ်းထက်မှာ နားဆင်၊ ခံစားခွင့်ရခဲ့တယ်..၊ သွင်းဂိုးနဲ့အတူ ချယ်လ်ဆီးအသင်းကို ကူညီနိုင်ခဲ့တယ်.. အဲဒီအခိုက်အတန့်တွေဟာ တကယ့်ကို မယုံကြည်နိုင်စရာကောင်းလှတဲ့ အခိုက်အတန့်တွေပေါ့ဗျာ..။

မေး - အဲဒီလိုအခိုက်အတန့်တွေကို ခံစားနေရတဲ့အချိန်မှာ ရှင့်ရဲ့ငယ်စဉ်ဘဝ.. ဖြတ်သန်းခဲ့ရတဲ့ နေ့ရက်တွေကိုရော ပြန်ပြီးအမှတ်ရမိသေးလား..? ဘာဖြစ်လို့လည်းဆိုတော့ ရှင်တို့မိသားစုဟာ အခုလိုအခြေအနေ ရောက်လာဖို့ တကယ့်ကိုခက်ခဲခဲ့တဲ့နေ့ရက်တွေကို ကျော်လွှား၊ ဖြတ်သန်းလာခဲ့ရတာ မဟုတ်လား..? ရှင်ဟာလည်း ဘရာဇီးလ်က‌ ပေါ်ထွက်လာခဲ့တဲ့ တခြားကစားသမားတွေလိုပဲ အခက်ခဲကြားထဲကနေ မွေးဖွားလာခဲ့တဲ့သူတစ်ယောက် ဖြစ်ခဲ့ပါတယ်..။

မှန်ပါတယ်..။ အခုလိုကြည်နူးဖို့ကောင်းတဲ့ အခိုက်အတန့်တွေကို ပျော်ရွှင်ခံစားနေရချိန်မှာ ငယ်စဉ်ကအကြောင်းတွေ ခေါင်းထဲရောက်လာတာပေါ့…။ ကျွန်တော်နဲ့ ကျွန်တော်တို့ မိသားစုဝင်တွေ ဘယ်လောက်တောင် ရုန်းကန်ခဲ့ရတယ်..၊ အခုလိုနေရာရောက်လာအောင် ဘယ်လောက်အထိ ကြိုးစားခဲ့ရတယ်.. ဆိုတာ ဘုရားသခင်ပဲ သိပါတယ်..။ ကျွန်တော်တို့ဟာ ‘စိုင်ကော်လို့၊ ခြုံပေါ်ရောက်လာတာ’ မဟုတ်ပါဘူး.။ မလျော့တဲ့ ဇွဲ၊ လုံ့လ၊ ကြိုးစားအားထုတ်မှုတွေနဲ့ အခက်အခဲတွေကို မတုန်မလှုပ်.. ရင်ဆိုင်၊ ကျော်လွှားနိုင်ခဲ့လို့သာ အခုလိုအခြေအနေ ရောက်ရှိလာခဲ့ရတာ ဖြစ်ပါတယ်..။

 

အခုဆိုရင် ကျွန်တော်ဟာ ကလပ်အသင်းများ ကမ္ဘာ့ဖလားကို ဗိုလ်စွဲထားတဲ့ ကမ္ဘာ့ချန်ပီယံအသင်းမှာ ရောက်ရှိနေခဲ့ပါတယ်..။ လက်ရှိမှာ ပရီးမီးယားလိဂ်နဲ့ ချန်ပီယံလိဂ်ဖလားတွေ ယှဉ်ပြိုင်နေပါတယ်..။ ဆုဖလားတွေကို တိုက်ပွဲဝင်တယ်..၊ ရည်မှန်းချက်‌တွေ ပြည့်မှီလာအောင် ကြိုးစားတဲ့အခါ အသင်းတစ်သင်းကို ရောက်လာပြီး ချက်ချင်းကစားရတာလောက် မလွယ်ကူပါဘူး..။ ဒါ့ကြောင့် မြက်ခင်းစိမ်းပေါ်ကို ရောက်လာတဲ့အချိန် ကျွန်တော့်ရဲ့လှုပ်ရှားမှုတိုင်း၊ ခွန်အားစိုက်ထုတ်မှုတိုင်းဟာ မိသားစုဝင်တွေ ဂုဏ်ယူရမယ့်အရာတွေပဲ ဖြစ်ရပါမယ်..။

မိသားစု.. ဆိုတာ အခုဒီမှာ ကျွန်တော်နဲ့အတူ ရှိနေတဲ့ မိသားစုဝင်တွေအပြင် ဘရာဇီးလ်နိုင်ငံက ဖရန်ကာမြို့လေးမှာ ကျန်နေခဲ့တဲ့ မိတ်ဆွေသူငယ်ချင်း.. ဆွေမျိုးအသိုင်းအဝိုင်းတွေလည်း ပါဝင်ပါတယ်..။ ကျွန်တော်ဘယ်လောက်အထိ တိုက်ပွဲဝင်.. ရုန်းကန်ခဲ့ရတယ်.. ဆိုတာ သူတို့အားလုံး သိကြပါတယ်..။ သူတို့တွေဟာ အိပ်မက်တွေရဲ့နောက်ကို ယုံကြည်မှုအပြည့်နဲ့ ကောက်ကောက်ပါအောင် လိုက်နေခဲ့တဲ့ လူငယ်လေး တစ်ယောက်ဘဝကနေ ကျွန်တော့်ကို အနီးကပ်ကြည့်ရှု၊ စောင့်ရှောက်လာခဲ့ကြတဲ့သူတွေ ဖြစ်ကြတာကြောင့် သူတို့တွေမရှိပဲနဲ့ ရပ်တည်ဖို့မဖြစ်နိုင်ပါဘူး..။

မေး - အခုအချိန်ပြန်စဉ်းစားကြည့်ရင် အဝေးကြီးလို ဖြစ်နေပေမယ့် ဖရန်ကာမြို့လေးရဲ့ လမ်းမတွေပေါ်မှာ ခြေဗလာနဲ့ ဘောလုံးကစားခဲ့တဲ့နေ့ရက်တွေဟာ ဘာမှမကြာသေးဘူးမလား..?

ဟားဟား..။ မှန်ပါတယ်..။ ဒါ့ကြောင့်တခါတလေကျရင် ‘မင်းဟာ အသက် (၁၈) နှစ်.. ပဲ ရှိနေသေးတယ်ဆိုတာ ဘယ်လိုနည်းနဲ့မှ မဖြစ်နိုင်ဘူး..’ ဆိုပြီး သူတို့တွေလာပြီး ပြောနေကြတာဗျ..။ ကျွန်တော်ကိုယ်တိုင်လည်း တခါတလေ ကိုယ့်ရဲ့အိပ်ခန်းထဲမှာ ဗွီဒီယိုဂိမ်း ကစားနေရင်း ကိုယ့်ကိုယ်ကို ပြန်ကြည့်လိုက်တဲ့အခါ (၁၈) နှစ်သားပဲ ရှိနေသေးတယ်ဆိုတော့ တခါတလေကျရင် မယုံကြည်သလိုတောင် ဖြစ်ရပါတယ်..။ ဘယ်လိုရှင်းပြရမှန်း မသိဘူးဗျာ..။

အခုလိုအခြေအနေ ရောက်လာတဲ့အတွက် ကလေးဘဝမှာ ရရှိသင့်တဲ့အရာတွေ ဆုံးရှုံးခဲ့ရတာ ရှိပါတယ်..။ ကျွန်တော်လည်းပဲ တခြားဘဝတူ လူငယ်လေးတွေအတိုင်း ကိုယ့်ရဲ့အိပ်မက်တွေကို ဖမ်းဆုတ်နိုင်ဖို့ ကြိုးစားတဲ့အခါ အခြားတစ်ဘက်နေ ပေးဆပ်လိုက်ရတဲ့အရာတွေ ရှိခဲ့ပါတယ်..။ အခုအချိန်မှာ ပေးဆပ်မှုနဲ့ ထိုက်တန်တဲ့ ဆုလာဘ်တွေ ရရှိနေတယ်.. လို့ ခံစားမိပါတယ်..။

မေး - ရှင်ဟာအခုဆိုရင် အသက် (၁၈) နှစ်ပြည့်ခဲ့ပါပြီ..။ အဖြစ်အပျက်တွေဟာ သိပ်ကိုမြန်ဆန်လွန်းခဲ့ပြီး ပရီးမီးယားလိဂ်၊ ချန်ပီယံလိဂ်တွေအပြင် အခုဆိုရင် ဘရာဇီးလ်နိုင်ငံရဲ့ လက်ရွေးစင်အသင်းကိုပါ ကိုယ်စားပြုခွင့်ရနေပါပြီ..။ ရှင့်ရဲ့ကွင်းပြင်ပ ပုဂ္ဂလိကဘဝမှာလည်း မော်တော်ကား စပြီးမောင်းနှင်နေပြီလို့ ကြားရတယ်ရှင့်..။ ကိုယ်ပိုင်မော်တော်ကား ရှိနေပြီမလား..? နည်းပြကာလို အန်စလော့တီ က ကားမောင်းလိုင်စင် စာမေးပွဲဖြေဖို့ ရှင့်ကိုခွင့်တစ်ရက် ပေးလိုက်ရတယ်.. လို့ ကျွန်မတို့ကြားခဲ့ပါတယ်..။ အဲဒီသတင်း မှန်ကန်ရဲ့လား..?

ဘရာဇီးလ်အသင်းအတွက် ဆော် ပေါ်လိုမြို့ကို ရောက်နေတဲ့အချိန်တုန်းကပါ..။ အချိန်ဇယားတွေက အရမ်းကိုကြပ်တည်းနေတာကြောင့် လန်ဒန်ကိုပြန်မလာခင် ကြားထဲမှာ အချိန်နည်းနည်းပဲ ရပါတယ်..။ ဒါပေမယ့် ကျွန်တော့်အတွက် ကားမောင်းလိုင်စင်ရရှိဖို့က မဖြစ်မနေ လိုအပ်နေပါတယ်..။ ဒါ့ကြောင့်ကျွန်တော့်ကို ယာဉ်မောင်းလိုင်စင် စာမေးပွဲဖြေဖို့ အချိန်သတ်မှတ်ပေးပါတယ်..။ စာမေးပွဲဖြေပြီးမှ ဘရာဇီးလ်အသင်းနဲ့ ပူးပေါင်းဖို့.. ဆိုပြီး စီစဉ်ပေးပါတယ်..။

လိုင်စင်စာမေးပွဲဖြေပြီး ဘရာဇီးလ်အသင်းရှိရာ လာရောက်တဲ့အချိန်မှာ ကာလို အန်စလော့တီ က တံခါးဝကနေ ဆီးကြိုပြီး လိုင်စင်စာမေးပွဲ အောင်၊ မအောင် မေးပါတယ်..။ ကျွန်တော်က ‘ဘော့စ်.. စာမေးပွဲ အောင်တယ်ဗျ..။’ လို့ ပြန်ဖြေပါတယ်..။ နေ့လည်စားတဲ့အချိန် အသင်းသားတွေလည်း စုံကြရော.. ကာလို ကြီးက အားလုံးကို နားထောင်ခိုင်းပြီး ‘ဟေးးး..! သတင်းတခု ပြောဖို့ရှိတယ်..၊ အက်စ်တီဗာအို ယာဉ်မောင်းလိုင်စင် သွားဖြေတာ အောင်သွားပြီတဲ့..’ လို့ အော်ပြောခဲ့ပါတယ်..။ တစ်သင်းလုံး ကျွန်တော့်ကို ဝိုင်းပြီးဟားတိုက်၊ ရယ်မောကြတာပေါ့ဗျာ..ဟားဟား..။ တကယ့်ကို ပျော်ရွှင်စရာ အခိုက်အတန့်ပါပဲ..။ အခုဆိုရင် ကျွန်တော်ဟာ ကိုယ်တိုင်ကားမောင်းနေပါပြီ..။ ဒါပေမယ့် ဘရာဇီးလ်မှာတော့ ကားမမောင်းရဲသေးဘူးဗျ.. ဟားဟား..။

မေး - ဘရာဇီးလ်အသင်းမှာ ကာလို အန်စလော့တီ..၊ ချယ်လ်ဆီးအသင်းမှာ အင်ဇို မာရက်စ်ကာ.. သူတို့တွေနဲ့ ဆက်ဆံရေးအကြောင်း ပြောပြပါဦး..။ သူတို့နှစ်ယောက်စလုံးဟာ လက်ရှိကမ္ဘာ့ဘောလုံးလောကရဲ့ နာမည်ကျော် နည်းပြကြီးတွေ ဖြစ်ကြပါတယ်..။

ကာလို အန်စလော့တီ ဟာ အင်ဇို မာရက်စ်ကာ ကိုလည်း လေ့ကျင့်ပေးခဲ့တယ်လို့ ကျွန်တော့်ကို ပြောပြဖူးပါတယ်..။ ဒါ့အပြင်သူတို့နှစ်ယောက်စလုံးဟာ အီတလီလူမျိုးတွေ ဖြစ်ကြပါတယ်..။ အင်ဇို မာရက်စ်ကာ ဟာ သိပ်ကိုခင်မင်ရင်းနှီးဖို့ကောင်းတဲ့ ပုဂ္ဂိုလ်တစ်ယောက်ဖြစ်ပြီး ကျွန်တော့်ဆီက အကောင်းဆုံးခြေစွမ်းကို ရရှိနိုင်ဖို့ အစွမ်းကုန် ကြိုးစားနေပါတယ်..။ သူနဲ့ပြောဆိုတဲ့အခါမှာ အင်္ဂလိပ်လို ပြောဆိုဖို့ အခက်အခဲရှိတဲ့အတွက် သူဟာကျွန်တော့်ကို စပိန်ဘာသာနဲ့ပဲ ပြောလေ့ရှိပါတယ်..။ ညွှန်ကြားချက်တွေ ပေးတဲ့အခါမှာလည်း စပိန်လိုပဲ လမ်းညွှန်ပေးလေ့ရှိတာကြောင့် ကျွန်တော့်အတွက် အရမ်းအဆင်ပြေပါတယ်..။

ကာလို အန်စလော့တီ ကိုတော့ ဘရာဇီးလ် လက်ရွေးစင်အသင်းကြီးမှာ အခွင့်အရေးပေးခဲ့တာကြောင့် သူ့ကိုအထူး ကျေးဇူးတင်ရပါတယ်..။ ဘရာဇီးလ်အသင်းအတွက် ရွေးချယ်ခံရဖို့ မလွယ်ကူပါဘူး..။ ဒါ့ကြောင့်နိုင်ငံ လက်ရွေးစင်အသင်းကို ကိုယ်စားပြုခွင့်ရတဲ့အတွက် အထူးကျေနပ်၊ ပျော်ရွှင်ရပါတယ်..။ အသင်းမှာ ဆက်လက်ပါဝင်ခွင့်ရအောင် အစွမ်းကုန်ကြိုးစား၊ ပေးဆပ်သွားပါမယ်..။

မေး - ချယ်လ်ဆီးအသင်းက ရှင့်ရဲ့အသင်းဖော်တွေအကြောင်း နည်းနည်းပြောပြပါလား..။ ဘာဖြစ်လို့လည်းဆိုတော့ လီဗာပူးလ်နဲ့ပွဲမှာ အနိုင်ဂိုးသွင်းလိုက်တဲ့အချိန် တစ်သင်းလုံးက ရှင့်ကိုဝိုင်းပြီး ပွေ့ဖက်၊ ဂုဏ်ပြုကြတာ သတိပြုမိလိုက်ပါတယ်..။ ဒါ့ကြောင့်အခုဆိုရင် ရှင်ဟာအသင်းသားတွေနဲ့အတူ တစ်သွေးတည်း၊ တစ်သားထဲ  ဖြစ်နေပြီလို့ ပြောရမှာပဲ..

ကျွန်တော့်ရဲ့အသင်းဖော် ကစားသမားတွေဟာ ကစားသမားကောင်းတွေ ဖြစ်ကြသလို လူတိုင်းက ကျွန်တော့်အပေါ်မှာ နွေးနွေးထွေးထွေး ဆက်ဆံကြပါတယ်..။ ပြင်သစ်ကစားသမားတွေ၊ အင်္ဂလိပ် ကစားသမားတွေ.. အားလုံးက ကျွန်တော့်ကိုလာပြီးနှုတ်ခွန်းဆက်.. စကားပြောကြပါတယ်..။ အစပိုင်းမှာတော့ အတော်ခက်ခဲတယ်ဗျ..။ ဘာဖြစ်လို့လည်းဆိုတော့ ကျွန်တော်ဟာ အင်္ဂလိပ်စကား မပြောတတ်သလို အခုထိလည်း ကောင်းကောင်းမပြောနိုင်သေးပါဘူး..။ ဒါ့ကြောင့်သူတို့နဲ့ စကားပြောဖို့ဆိုရင် ဘရာဇီးလ်က ကစားသမားတွေကတဆင့် ပြောဆိုရပါတယ်..။ ဒါမှမဟုတ်ရင် ပီဒရို နက်တို နဲ့ ပေါ်တူဂိလိုပြော..၊ ပြီးမှသူကနေ တစ်ဆင့်ဘာသာပြန်ပေးရတာတွေလည်း ရှိပါတယ်..။

ဒါပေမယ့် အခုအချိန်မှာတော့ လူတိုင်းနဲ့ပြောဆို၊ ဆက်ဆံနေနိုင်ပါပြီ..။ အဲဒီအတွက် ကျေနပ်ရသလို အသင်းကို စပြီးရောက်လာတဲ့အချိန်ကတည်းက အားလုံးက နွေးနွေးထွေးထွေး လက်ခံ၊ ကြိုဆိုခဲ့ကြသလို အသင်းသားတွေအားလုံး ကြိုးစားအားထုတ်မှု အပြည့်ရှိတယ်..၊ စည်းလုံးညီညွတ်ကြပါတယ်..။ ဒါ့ကြောင့်ကျွန်တော်ဟာ အသင်းကို ထိရောက်တဲ့ ကူညီမှုတွေ ပေးစွမ်းနိုင်နေပြီ ဖြစ်တာကြောင့် ပိုပြီးကျေနပ်ရပါတယ်..။