ချယ်လ်ဆီးအသင်းမှာ အင်္ဂါနေ့ညတွင် စပိန်လာလီဂါပြိုင်ပွဲ၏ လက်ရှိချန်ပီယံ ဘာစီလိုနာအသင်းအား စတန်းဖို့ဒ် ဘရစ်ချ်ကွင်း၌ ဧည့်ခံရပါမည်..။ အပြာရောင်ခြင်္သေ့များမှာ ပြိုင်ပွဲစုံ (၅) ပွဲဆက်တိုက် ရှုံးပွဲမရှိသေးသလို ပရီးမီးယားလိဂ်ပြိုင်ပွဲ၊ အမှတ်ပေးဇယားတွင် ထိပ်ဆုံးမှအာဆင်နယ်အသင်းထက် (၆) မှတ်လျော့၊ ဒုတိယနေရာ ရောက်ရှိနေပါသည်..။ 

ကွာရာဘတ်အသင်းနှင့် ချန်ပီယံလိဂ်ပွဲစဉ်တစ်ပွဲ၌သာ အမှတ်လျော့ထားသေးသည့် ချယ်လ်ဆီးအသင်းမှာ ယခုနောက်ဆုံးယှဉ်ပြိုင်ခဲ့သည့် ပွဲစဉ်များတွင် ဘောလုံးပိုင်ဆိုင်မှု အသာစီးဖြင့် ပွဲကိုစိုးမိုးနိုင်ခဲ့ပါသည်..။ ယနေ့ညတွင် ရင်ဆိုင်ရမည့် ဘာစီလိုနာအသင်းနှင့် ပွဲစဉ်တွင် ပြီးခဲ့သည့်ပြိုင်ဘက်များကဲ့သို့ ပွဲကိုစိုးမိုး၊ အသာစီး ရရှိနိုင်ရန် မလွယ်ကူသော်လည်း အပြာရောင်တွေအတွက် ရလဒ်ကောင်းများ ဖော်ဆောင်ပေးနိုင်မည့် နည်းစနစ်ပိုင်း အကြံပြုချက် (၃) ခုကို တင်ဆက်လိုက်ပါသည်..။

(၁) ဘာစီလိုနာအသင်း၏ high defense line ကို အသုံးချနိုင်ရမည်..။

ဘာစီလိုနာအသင်းကို ကိုင်တွယ်နေသော ဂျာမနီနည်းပြ ဟင်ဆီ ဖလစ်ခ် မှာ ဘိုင်ယန် မြူးနစ်အသင်းကို ကိုင်တွယ်စဉ်ကတည်းက ကွင်းလယ်အထိ ရှေ့တက်နေရာယူတတ်သည့် high defense line ခံစစ်အထိုင်ကိုသာ စွဲစွဲမြဲမြဲ အသုံးပြုခဲ့သည်..။ အကယ်၍ ချယ်လ်ဆီးအသင်းမှာ အဆိုပါခံစစ်ကြောင်းနေရာယူမှုအပေါ် အကျိုးရှိရှိ အသုံးချလိုပါက လက်ရှိအသင်း ကစားပုံကို ကြီးကြီးမားမား ပြောင်းလဲစရာ မလိုအပ်ပဲ တိုက်စစ်မှူး ‘ဂျာအို ပီဒရို’ ကို အထောင်တိုက်စစ်မှူးအဖြစ် တာဝန်ပေးခဲ့ရန်သာ လိုအပ်ပေလိမ့်မည်..။

နည်းပြအင်ဇို မာရက်စ်ကာ မှာ ဘရာဇီးလ်တိုက်စစ်မှူး ဂျာအို ပီဒရို ကို အထောင်တိုက်စစ်မှူး လီယန် ဒီလပ် ၏ နောက်ချန်တိုက်စစ်မှူးအဖြစ် ကစားစေလေ့ရှိသည်..။ သို့သော် ယခုလာမည့်ပွဲစဉ်တွင် ဂျာအို ပီဒရို ၏ ကွင်းလယ်နှင့် ခံစစ်ဇုန်အထိ ဘောလုံးဆင်းယူတတ်သည့်ကစားပုံမှာ ဘာစီလိုနာအသင်း၏ ဗဟိုခံစစ်မှူးများကို မျှားခေါ်နိုင်ရန်နှင့် လျှင်မြန်မှုဖြင့် ခံစစ်ကြောင်းကို ထိုးဖောက်နိုင်ရန် လက်နက်ကောင်းတစ်ခု ဖြစ်လာပါမည်..။

နောက်ထပ်အရေးပါသည့် အချက်တစ်ချက်မှာ အင်ဇို မာရက်စ်ကာ ၏ တောင်ပံ ကစားသမားများ (wingers) အပေါ် တာဝန်ပေးပုံဖြစ်သည်..။ အီတလီနည်းပြကြီးမှာ သူ၏တောင်ပံ ကစားသမားများကို တောင်ပံတစ်လျှောက် အတက်၊ အဆင်း ပြုလုပ်ရန်သာ တာဝန်ပေးလေ့ ရှိသော်လည်း ဘာစီလိုနာအသင်း၏ ခံစစ်ကြောင်းကို ထိုးဖောက်နိုင်ရန် အတွင်းဘက်သို့ ချိုးဝင်သည့် ရွှေ့လျားမှုများ (inside movement) ပိုမိုပြုလုပ်ရန် ပြောင်းလဲညွှန်ကြားပေးနိုင်ပါသည်..။ ဂျာအို ပီဒရို မှာ တောင်ပံဘက်သို့ ပြေးထွက်မှုများ (diagonal runs) ကို ပါးပါးနပ်နပ် ပြုလုပ်တတ်သူတစ်ဦးဖြစ်ပြီး သူ၏နေရာယူမှုနှင့် တောင်ပံကစားသမားများ၏ overlapping ပြေးထွက်မှုများက ဘာစီလိုနာအသင်း၏ high defense line ခံစစ်ကြောင်းကို ထိုးဖောက်နိုင်ပါလိမ့်မည်..။

သို့သော် နည်းပြအင်ဇို မာရက်စ်ကာ ကတော့ စပိန်ချန်ပီယံအသင်း၏ high defense line အပေါ် မနေ့ကပြုလုပ်ခဲ့သည့် ပွဲကြိုသတင်းစာ ရှင်းလင်းပွဲတွေ အောက်ပါအတိုင်း မှတ်ချက်ပေးခဲ့ပါသည်..။
“သူတို့အသင်းရဲ့ high defense line ဟာ စဉ်းစားရမယ့် အချက်တစ်ချက်ဖြစ်တာာ မှန်ပါတယ်..။ ဒါပေမယ့် ကျွန်တော်တို့ဟာ off the ball အချိန်တွေအတွက် သတိထားဖို့ လိုအပ်ပါသေးတယ်..။ ဘာဖြစ်လို့လည်းဆိုတော့ သူတို့အသင်းဟာ အဲဒီ high line ခံစစ်ပိုင်း နေရာယူပုံကြောင့် အခွင့်အရေးတွေ အများကြီးဖန်တီး၊ ဂိုးတွေအများကြီး သွင်းနိုင်ခဲ့ပါတယ်..။ ဒါ့ကြောင့်ကျွန်တော်တို့အနေနဲ့ တိုက်စစ်ပိုင်းနဲ့ ခံစစ်ပိုင်း ဟန်ချက် (balance) ညီနေဖို့ အဓိကလိုအပ်ပါတယ်..။”

နည်းပြကြီး၏ ပြောဆိုချက်မှာ ချယ်လ်ဆီးအသင်း စဉ်းစားရမည့် ဒုတိယတစ်ချက် ဖြစ်လာပါသည်..။

(၂) ပြောင်းလွယ်၊ ပြင်လွယ်ဖြစ်မည့် ခံစစ်ကြောင်း (backline flexibility) တည်ဆောက်ရမည်..။ 

ဘာစီလိုနာအသင်းမှာ ဘောလုံးခြေထဲရှိချိန် (on the ball) တွင် ၃- ၂- ၅ ပုံစံဖြင့် ဘယ်၊ ညာတောင်ပံများမှ အဓိကအားပြု ထိုးဖောက်လေ့ရှိပါသည်..။ အခြားတစ်ဘက်တွင် ချယ်လ်ဆီးအသင်းကလည်း ခံစစ်ကစားရချိန်များ၌ back three သို့မဟုတ် back five ဖြင့် အထိုင်ချလေ့မရှိပေ..။ သို့သော်လက်ရှိအသင်းမှ ကစားသမားများသည့် နေရာစုံရွှေ့လျား (versatile) ကစားနိုင်သူများ ဖြစ်သောကြောင့် အဆိုပါကစားသမား၏ စွမ်းရည်ကိုခံစစ်ကြောင်း အထိုင်ပြောင်းလဲ ကစားရာတွင် အသုံးချနိုင်ရန် လိုအပ်ပေလိမ့်မည်..။

အထူးသဖြင့် ရိစ် ဂျိမ်းစ် နှင့် မာလို ဂူစ်တို တို့နှစ်ယောက်၏ အခန်းကဏ္ဍမှာ အရေးပါလာဖွယ် ရှိနေပြီး သူတို့နှစ်ဦးစလုံးမှာ ညာနောက်ခံလူ (right back) ရော၊ ကွင်းလယ်အဖျက် ကစားသမား (defensive midfielder) နေရာတွင်ပါ ကစားပေးနိုင်သူများ ဖြစ်ကြပါသည်..။ အထူးသဖြင့် ဘာစီလိုနာအသင်း၏ ကွင်းလယ်ကို ရင်ဆိုင်နိုင်ရန်အတွက် သူတို့နှစ်ဦး၏ ကူညီပေးနိုင်မှုမှာ အရေးပါလာဖွယ် ရှိပါသည်..။

ထို့အပြင်ယခုလာမယ့်ပွဲစဉ်၌ ဘာစီလိုနာအသင်း တိုက်စစ်ဆင်လာချိန်များတွင် သူတို့နှစ်ယောက်ထဲမှ တစ်ယောက်က တတိယမြောက် ဗဟိုနောက်ခံလူ (third center back (or) right center back) အဖြစ် အားဖြည့်ပြီး နောက်ထပ်တစ်ယောက်က right wing back အဖြစ် ကူညီခြင်းဖြင့် back five ပုံစံ ဖြစ်သွားပြီး စပိန်အသင်း၏ front five ကို ရင်ဆိုင်နိုင်စွမ်း ရှိလာပါမည်…။

နည်းပြကြီးပြောခဲ့သည့် ခံစစ်ပိုင်းနှင့် တိုက်စစ်ပိုင်း ဟန်ချက်အတွက် ‘အင်ဇို ဖာနန်ဒက်စ်’ ကို ဘိုင်ယန် မြူးနစ်၊ လီဗာပူးလ်နှင့် တော့တင်ဟမ် အသင်းနှင့်ပွဲစဉ်များတွင် တာဝန်ပေးခဲ့သည့်အတိုင်း ‘No. 10’ နေရာမှ ကစားနိုင်ပါသည်..။ အာဂျင်တီးနား ကွင်းလယ် ကစားသမားမှာ မွိုက်စ် ကိုင်ဆီဒို နှင့်အတူ တွဲဖက်ပြီး double pivot အထိုင်ဖြင့် ပုံမှန်ကစားနေကျ ၄- ၂- ၃- ၁ ပုံစံအစား off the ball အခြေအနေများတွင် ၅= ၂- ၃ (သို့မဟုတ်) ၅- ၄- ၁ ပုံစံများသို့ ပြောင်းလဲပြီး ခံစစ်ပိုင်း ပိုမိုကျစ်လျစ်သိပ်သည်းအောင် အားဖြည့်နိုင်ပါမည်..။

  
 (၃) တောင်ပံတိုက်စစ်တွေကို ထိန်းချုပ်နိုင်ဖို့ အရေးပါလာမည့် မာ့စ် ကူကူရယ်လာ..

ဘာစီလိုနာအသင်းနှင့် ယနေ့ညပွဲစဉ်တွင် မာ့စ် ကူကူရယ်လာ မှာ အရေးပါသော အခန်းကဏ္ဍမှ ပါဝင်လာပါလိမ့်မည်..။ စပိန်လက်ရွေးစင် နောက်ခံလူမှာ သူ၏အသင်းဖော်လည်း ဖြစ်သလို ဘာစီလိုနာအသင်း၏ အရေးအပါဆုံး တိုက်စစ်လမ်းကြောင်းဖြစ်လာမည့် No. 10 လာမင်း ယာမယ်လ် ကို တစ်ဦးချင်း 1 vs 1 ရင်ဆိုင်ရမည်ဖြစ်သလို ပွဲကြိုကာလ မီဒီယာများမှတဆင့် ပြောကြားခဲ့သည့်အတိုင်း အသက် (၁၈) နှစ်သားလေးဟာ စိတ်ပိုင်းဆိုင်ရာ (mentally) အသာစီး ရယူသွားနိုင်ရန်ပါ လိုအပ်နေပေသည်..။

မာ့စ် ကူကူရယ်လာ မှာ သူ၏ပြိုင်ဘက် ကစားသမားများကို စိတ်အနှောက်အယှက်ဖြစ်အောင် နည်းမျိုးစုံဖြင့် ကစားတတ်သူဖြစ်ပြီး သူ့အပေါ် အာရုံစိုက်လာခြင်းဖြင့် ပြိုင်ဘက် ကစားသမားများ၏ ပွဲအပေါ် စူးစိုက်နိုင်စွမ်း ကျဆင်းလာတတ်ပါသည်..။ နည်းစနစ်ပိုင်းအရဆိုလျှင်လည်း လာမင်း ယာမယ်လ် မှာ ညာတောင်ပံမှ နေရာယူ ထိုးဖောက်ရန် အလားအလာများနေပါသည်..။ စပိန်လူငယ် တိုက်စစ်မှူးလေးမှာ ယခုဘောလုံးရာသီတွင် လာလီဂါပြိုင်ပွဲ (၁၂) ပွဲ ပါဝင်ခဲ့ရာ ကွင်းလယ်ဇုန်တွင် ဘောလုံးထိချက် (touches) (၁၀) ကြိမ် ကျော်ခဲ့သည့်ပွဲ (၃) ပွဲသာ ရှိနေသေးသည်..။

သူ၏ထိုးဖောက်မှုကို တားဆီးနိုင်ရန်မှာ အင်ဇို မာရက်စ်ကာ နှင့် ချယ်လ်ဆီးအသင်းအတွက် ကြီးမားသည့် စိန်ခေါ်မှုဖြစ်နေပါလိမ့်မည်..။ ဘာစီလိုနာအသင်းမှာ တိုက်စစ်ပိုင်းအထူး အားကောင်းသော်လည်း နောက်ဆုံးယှဉ်ပြိုင်ခဲ့သည့် (၁၁) ပွဲအတွင်း ပေးဂိုးမရှိ clean sheet တစ်ပွဲသာ ရရှိသေးသည့် ခံစစ်ပိုင်းအားနည်းချက်က စပိန်ဘီလူကြီးကို အလဲထိုးနိုင်မည့် အခွင့်အရေး ဖြစ်နိုင်ပါကြောင်း မှန်းဆတင်ဆက်လိုက်ပါသည်..။

(Squawka မှ ဆောင်းပါးရှင် Guilherme Mirra ၏ ‘Chelsea vs Barcelona tactical preview: Three key decisions that could lead Blues to victory’ ဆောင်းပါးကို ပြန်ဆိုပါသည်..။)