မနက်ဖြန်တနင်္ဂနွေနေ့၊ စတန်းဖို့ဒ် ဘရစ်ချ်ကွင်းတွင် ပရီးမီးယားလိဂ် အမှတ်ပေးဇယားထိပ်မှ အသင်းနှစ်သင်း ဖြစ်သော ချယ်လ်ဆီးအသင်းနှင့် အာဆင်နယ်အသင်းတို့၏ ရင်ဆိုင်ပွဲစဉ်မှ နည်းပြအင်ဇို မာရက်စ်ကာ ၏ စွမ်းဆောင်ရည်အပေါ် သုံးသပ်ချက်၊ ကိုးလ် ပါးမား အား ပွဲထွက်ကစားခွင့် ပေးသင့်၊ မပေးသင့်.. နှင့် အက်စ်တီဗာအို ၏ ခြေစွမ်းများ အပါအဝင် အာဆင်နယ်အသင်း၏ ကစားပုံခန့်မှန်းချက်တို့ကို ချယ်လ်ဆီးအသင်း ဂန္ထဝင်ကွင်းလယ် ကစားသမားဟောင်းနှင့် နည်းပြဟောင်း ရော်ဘတ်တို ဒီမက်တီယို နှင့် နယူးကာဆယ် အသင်းနည်းပြဟောင်း အလန် ပါဂျူး တို့က Sky Sports သတင်းဌာနမှတင်ဆက်သည့် Premier League Friday စကားဝိုင်း အစီအစဉ်တွင် အောက်ပါအတိုင်း ဆွေးနွေးခဲ့ကြပါသည်..။

ရိုမန် ကမ့်ပ် - ပထမဆုံးမေးခွန်းကိုတော့ ရော်ဘတ်တို ကိုပဲ မေးပါ့မယ်..။ နည်းပြအင်ဇို မာရက်စ်ကာ လက်ထက်မှာ ချယ်လ်ဆီးအသင်းမှာ မျှော်လင့်ထားသလောက် စွမ်းဆောင်နိုင်စွမ်း မရှိဘူးလား.. (underachieved) ? ဒါမှမဟုတ် မျှော်မှန်းထားတာထက်ပိုပြီး စွမ်းဆောင်ပြနေလား.. (overachieved) ?

ရော်ဘတ်တို ဒီမက်တီယို - သူတို့ရောက်ရှိသင့်တဲ့နေရာ.. သူတို့ရှိသင့်တဲ့ အဆင့်အတန်းကို ရရှိနေတယ်လို့ ကျွန်တော်ယူဆပါတယ်..။ ပြီးခဲ့တဲ့ဘောလုံးရာသီမှာ ချန်ပီယံလိဂ်ပြိုင်ပွဲဝင်ခွင့်ရဖို့ ရည်မှန်းချက် ထားခဲ့ပါတယ်..။ အဲဒီရည်မှန်းချက် ပြည့်မှီခဲ့သလို ဆုဖလားနှစ်လုံး ဆွတ်ခူးနိုင်ခဲ့ပါတယ်..။ ဒါဟာကြီးမားတဲ့ အောင်မြင်မှုပါ..။ အသင်းရဲ့ဆုဖလားဘီဒိုထဲမှာ နောက်ထပ်ဖလားတွေ ထပ်ဖြည့်ခွင့်ရတဲ့ ခံစားချက်ဟာ သိပ်ကိုကျေနပ်ဖို့ ကောင်းပါတယ်..။ 

အခုဘောလုံးရာသီမှာ ချန်ပီယံလိဂ်မှာရော၊ ပရီးမီးယားလိဂ် ပြိုင်ပွဲနှစ်ခုစလုံးမှာ ရလဒ်ကောင်း၊ ခြေစွမ်းကောင်းတွေ ပြသနေပါတယ်..။ တည်ငြိမ်တဲ့ခြေစွမ်း မရရှိသေးတဲ့ (inconsistency) အားနည်းချက် ကြောင့် တစ်ပွဲ၊ နှစ်ပွဲလောက် ရလဒ်တွေ မကောင်းခဲ့ပါဘူး..။ ဒါပေမယ့် ယေဘူယျအားဖြင့် သိပ်ကိုကျေနပ်ဖို့ကောင်းတဲ့ စွမ်းဆောင်ရည် ပြသနေတယ်လို့ ပြောရမှာပါပဲ..။

 
အလန် ပါဂျူး - အင်ဇို မာရက်စ်ကာ နဲ့ ပတ်သက်ပြီး သတိထားမိတာက ကစားသမားတွေနဲ့ စည်းလုံးညီညွတ်မှု အရမ်းကောင်းမွန်တဲ့အချက် ဖြစ်ပါတယ်..။ ကစားသမားတွေဆီက စောဒကတွေ၊ မကျေနပ်သံတွေ မကြားခဲ့ရသလို သူ့အတွက်ပိုပြီးအရေးကြီးတဲ့ အပေါ်က ဘုတ်အဖွဲ့ဝင်တွေနဲ့လည်း အဆင်ပြေပုံ ရပါတယ်..။ ချယ်လ်ဆီးအသင်းမှာ ကစားသမားတွေ အများကြီးရှိနေတာကြောင့် သူဟာအင်မတန်မှ အလုပ်တွေများပါလိမ့်မယ်..။ ဒါပေမယ့် သူဟာအဲဒီလူငယ် ကစားသမား အများအပြားနဲ့ အကောင်းဆုံး စွမ်းဆောင်နေတာကြောင့် ကျွန်တော်ကတော့ သူ့ရဲ့စွမ်းဆောင်ရည်ဟာ အရမ်းကိုထူးချွန်လွန်းတယ်.. (exceptional) လို့ပဲ သုံးသပ်ပါတယ်..။ အခုဆိုရင် သူတို့အသင်းရဲ့စုစည်းမှုနဲ့ဟန်ချက် သိပ်ကိုကောင်းမွန်နေသလို ဘာစီလိုနာအသင်းကို အနိုင်ရသွားခဲ့တဲ့ ခြေစွမ်းဟာ တကယ့်ကို ကောင်းမွန်ခဲ့ပါတယ်..။ သူတို့ဟာ အဲဒီခြေစွမ်းကို အာဆင်နယ်နဲ့ပွဲမှာ ဆက်လက်သယ်ဆောင်နိုင်ခဲ့မှာ အသေအချာပဲဗျ..။

ရိုမန် ကမ့်ပ် - ကိုးလ် ပါးမား ဟာ ပရီးမီးယားလိဂ်ပြိုင်ပွဲမှာ နှစ်ပွဲပဲ ပွဲထွက်ခွင့်ရလိုက်ပါတယ်..။ သူ့ရဲ့ဒဏ်ရာအခြေအ‌နေ အမြန်ဆုံးကောင်းမွန်ပြီး အသင်းမှာ အမြန်ဆုံးပါဝင်လာနိုင်ဖို့ လိုအပ်နေတယ်.. လို့ ထင်မိလား..?

ရော်ဘတ်တို ဒီမက်တီယို - သူဟာတနင်္ဂနွေနေ့ပွဲမှာ ပွဲထွက်လာလိမ့်မယ်လို့ ကျွန်တော်မထင်ပါဘူး..။ ဘာဖြစ်လို့လည်းဆိုတော့ သူဟာပွဲမကန်ရတာ အတော်လေးကို ကြာနေပြီဖြစ်သလို လက်ရှိအသင်းဟာ သူမပါပဲနဲ့ အကောင်းဆုံးခြေစွမ်း ရရှိနေပါတယ်..။ တကယ်လို့ ပွဲထွက်လူစာရင်းမှာ သူသာပါဝင်လာခဲ့ရင် ကျွန်တော်တော့ အတော်လေး အံ့အားသင့်မိပါလိမ့်မယ်..။ ဒါပေမယ့် ကိုးလ် ပါးမား ဟာ ပွဲအဖြေကို ပြောင်းလဲပေးနိုင်စွမ်းရှိတဲ့ ကစားသမား တစ်ယောက် ဖြစ်ပါတယ်..။ ဒါ့အပြင်အသင်းအတွက် အရေးပါတဲ့အောင်မြင်မှုတွေ ယူဆောင်ပေးနိုင်ခဲ့တဲ့သူလည်း ဖြစ်ပါတယ်..။ 

ဒါ့ကြောင့်လာမယ့် ခရစ္စမတ်ကာလ ပွဲကျပ်တွေမတိုင်ခင် နိုဝင်ဘာလကုန်မှာ အသင်းနဲ့အတူ ပြန်လည်ပူးပေါင်းနိုင်တယ်.. ဆိုတာ သိပ်ကိုကောင်းတဲ့ သတင်းကောင်းတစ်ခု ဖြစ်ပါတယ်..။ လာမယ့်ဒီဇင်ဘာလထဲမှာ ပွဲတွေအများကြီး ယှဉ်ပြိုင်ရဖို့ ရှိနေတာကြောင့် ကစားသမားတွေ တတ်နိုင်သမျှ များများရှိနေတာ ကောင်းပါတယ်..။

အလန် ပါဂျူး - သဘောတူပါတယ်..။ သူဟာအရန်ကစားသမား အနေနဲ့ပဲ ပါဝင်လာပါလိမ့်မယ်..။ မန်နေဂျာ တစ်ယောက်အနေနဲ့ ကိုယ့်အသင်းရဲ့ အရေးပါတဲ့ ကစားသမားတစ်ယောက်ကို အမြန်ဆုံးပြန်လည် ကစားခွင့်ပေးရဖို့ ဖိအားရှိနေပြီဆိုရင် အဲဒီကစားသမားအတွက် ဒဏ်ရာအနာတရဖြစ်ဖို့ အခွင့်အလမ်း ပိုများပါတယ်..။ အထူးသဖြင့် ခွန်အားအရမ်းသုံးရတဲ့ ပရီးမီးယားလိဂ်ပြိုင်ပွဲမှာ မိနစ် (၉၀) အပြည့် ကစားဖို့ဆိုရင် စွန့်စားမှု များလွန်းပါတယ်..။ ဒါ့ကြောင့်အနိုင်ရနေတဲ့အချိန်ကျမှ သူ့ကိုထည့်ကစားတာမျိုးဟာ အကောင်းဆုံး အခြေအနေပေါ့ဗျာ..။

ဒါမှမဟုတ် ပွဲပြီးဖို့မိနစ် (၂၀) လောက်အလို ကိုယ့်ဘက်အခြေအနေ မကောင်းနေတဲ့ အချိန်မျိုးမှာ သူတို့လို ကစားသမားတွေဟာ ကစားသမားတွေနဲ့ ပရိသတ်တွေရဲ့ မျှော်လင့်ချက်တွေ၊ စိတ်ဓါတ်တွေကို မြှင့်တင်ပေးနိုင်စွမ်းရှိတဲ့သူတွေ ဖြစ်ပါတယ်..။ ဒါ့အပြင်သူ့ရဲ့ပင်ကိုယ်ခြေစွမ်းကောင်းတွေကြောင့် အသင်းရဲ့ကစားပုံ ပိုမိုကောင်းမွန်လာမှာ အသေအချာပါပဲ..။

ရိုမန် ကမ့်ပ် - ပါးမား လိုမျိုး ပရိသတ်တွေနဲ့ ကစားသမားတွေရဲ့ မျှော်လင့်ချက်တွေကို မြှင့်တင်ပေးနိုင်မယ့် နောက်ထပ်ကစားသမား တစ်ယောက်က ‘အက်စ်တီဗာအို’ ဖြစ်ပါတယ်..။ ခရစ္စတယ် ပဲလေ့စ် အသင်းနဲ့ ရာသီအဖွင့်ပွဲစဉ်တုန်းက သူ့ကိုပထမဆုံးတွေ့မိတဲ့အချိန် ခင်ဗျားရဲ့အမြင်ကို ပြန်ပြီးပြောပြပေးပါဦး..
 
အလန်ပါဂျူး - Yeah..! အဲဒီပွဲတုန်းက ကျွန်တော်ဟာ ပွဲစဉ်တိုက်ရိုက် တင်ဆက်သူအဖြစ်နဲ့ စတန်းဖို့ဒ် ဘရစ်ချ်ကွင်းမှာ ရှိနေပါတယ်..။ အက်စ်တီဗာအို လူစားဝင်လာတော့ အရင်ကသူ့ရဲ့နာမည် မကြားခဲ့ဖူးပါဘူး..။ ရော်ဘတ်တို က ကျွန်တော့်ကို သူ့ရဲ့အ‌ကြောင်း အတိုချုပ် ပြောပြပါတယ်..။ ဒါပေမယ့်ကွင်းထဲကို ဝင်လာတဲ့အချိန် ချယ်လ်ဆီးပရိသတ်တွေရဲ့ စိတ်လှုပ်ရှားမှု၊ မျှော်လင့်ချက်တွေကို အီဒင် ဟာဇက် ရဲ့နောက်ပိုင်း ပထမဆုံးအကြိမ် ပြန်ပြီးမြင်လိုက်ရတာပါပဲ..။ နောက်ပြီးသူ့ရဲ့ကစားပုံကို ပထမဆုံးအကြိမ် မြင်လိုက်ရကတည်းက သူ့ရဲ့ခြေစွမ်း အဆင့်အတန်းကို သိလိုက်ပါတယ်..။

ဝုလ်ဖ်အသင်းနဲ့ပွဲမှာ လူစားဝင်လာပြီး ပွဲအဖြေကို ပြောင်းလဲပေးနိုင်ခဲ့ပါတယ်..။ သူဟာတကယ့်ကို ပင်ကိုယ်ပါရမီ ကောင်းမွန်တဲ့ လူငယ်ကစားသမား တစ်ယောက်ဖြစ်သလို သိပ်ကိုလျှင်မြန်တယ်..၊ ခြေနှုတ်ခြေသိမ်း အရမ်းသွက်လွန်းပါတယ်..။ သူ့ကိုဘောလုံးပေးပြီး ဆွဲခိုင်းလိုက်ရင် လိုက်ဖျက်နိုင်ဖို့ မဖြစ်နိုင်သလောက်ပဲဗျ..။ တောင်ပံကနေ အတွင်းဘက်ချိုးဝင် (inside) မလား..? ဘေးစည်းတစ်လျှောက် ဆွဲထွက် (outside) မလား..? မှန်းဆရခက်တာကြောင့်လည်း တားဆီးရခက်တာပါ..။ 

နောက်ပြီးဘရာဇီးလ်အသင်းအတွက် ကိုယ်စားပြုခွင့်ကို အသက်ငယ်ငယ်နဲ့ ရခဲ့သလို သူ့ရဲ့ခြေစွမ်းအပေါ် ကိုယ့်ကိုယ်ကို ယုံကြည်မှု အရမ်းကိုမြင့်မားပါတယ်..။ အနာဂတ်မှာ အစွမ်းကုန်တောက်ပမယ့် ကစားသမား တစ်ယောက်ပါပဲ..။

ရိုမန် ကမ့်ပ် - အင်းဗျ..။ ဘရာဇီးလ်အသင်းအတွက် ပင်နယ်တီကန်သွင်းခွင့်ကို အသက် (၁၈) နှစ်နဲ့ ရခဲ့တာဗျ.။ သိပ်ကိုထူးချွန်လွန်းတဲ့ ပါရမီရှင် လူငယ်ကစားသမား တစ်ယောက် ဖြစ်ပါတယ်..။ ရော်ဘတ်တို ရေ.. ခင်ဗျားရော သူ့ရဲ့ခြေစွမ်းကို အံ့အားသင့်မိသေးလား..? ဆိုလိုချင်တာက ဘရာဇီးလ်လိဂ် ပြိုင်ပွဲဝင် ပါးလ်မီးရက်စ်အသင်းကနေ ချယ်လ်ဆီးအသင်းမှာ မြန်မြန်ဆန်ဆန်နဲ့ အထိုင်ကျခဲ့တဲ့အပေါ်ကိုပါ..။

ရော်ဘတ်တို ဒီမက်တီယို - Yes.. သေချာတာပေါ့..။ သူ့ရဲ့အသက်အရွယ်နဲ့မမျှအောင် ရင့်ကျက်တဲ့ခြေစွမ်းဟာ အံ့အားသင့်စရာပါ..။ ကလပ်အသင်းများ ကမ္ဘာ့ဖလားပြိုင်ပွဲမှာ သူ့ကိုပထမဆုံးအကြိမ် ကြည့်ခဲ့ဖူးတာပါ..။ ဒါပေမယ့် အင်္ဂလန်ကို ရောက်လာမယ်ဆိုရင် နိုင်ငံအသစ်၊ မတူညီတဲ့ ဘာသာစကား၊ ပတ်ဝန်းကျင်တို့ကြောင့် အချိန်တစ်ခု ပေးရလိမ့်မယ်လို့ တွေးမိခဲ့ပါတယ်..။ ဒါပေမယ့် သူဟာအံ့အားသင့်ဖို ကောင်းလောက်အောင် မြန်မြန်ဆန်ဆန် အထိုင်ကျခဲ့ကြပါတယ်..။ 

သူနဲ့တွေ့တဲ့အချိန်မှာ ရိုကျိုးမှုအပြည့်ရှိတယ်..၊ နာခံတတ်တဲ့စိတ်၊ သင်ယူချင်တဲ့စိတ် ရှိတယ်..၊ သူ့ရဲ့မိသားစုဝင်တွေကလည်း သူ့ရဲ့ဘေးနားကနေ အမြဲတမ်း အထောက်အကူ ပေးနေကြပါတယ်..။ အဲဒါကြောင့်လည်း လန်ဒန်မြို့နဲ့ ချယ်လ်ဆီးအသင်းမှာ လွယ်လွယ်ကူကူ အသားကျခဲ့တာ ဖြစ်ပါလိမ့်မယ်..။ ပထမဆုံးအကြိမ် တွေ့လိုက်တာနဲ့ သူဟာ တကယ့်ကို ထူးခြားတဲ့ပါရမီရှင် ကစားသမား တစ်ယောက်… ဆိုတာ အရမ်းကိုသိသာ၊ ထင်ရှားပါတယ်..။ အခုဆိုရင် သူဟာဖြည်းဖြည်းချင်း တိုးတက်နေပါတယ်..။ ဒါပေမယ့် သိပ်ကိုငယ်ရွယ်လွန်းတဲ့ ကစားသမားတစ်ယောက်ပဲ ဖြစ်နေသေးတယ်ဆိုတာ မမေ့စေချင်ပါဘူး..။ သူ့ရဲ့ပင်ကိုယ်ခြေစွမ်း..၊ အရည်အချင်း‌တွေကြောင့် မကြာခင်မှာ ထိပ်တန်းကစားသမား တစ်ယောက်အဖြစ် တိုးတက်လာမှာ ဧကန်မုချပါပဲ..။

ရိုမန် ကမ့်ပ် - မန်နေဂျာ တစ်ယောက်အနေနဲ့ ကိုယ့်အသင်းရဲ့ ကစားပုံ ပိုပြီးတိုးတက်လာဖို့ လိုအပ်နေတဲ့ အခြေအနေမျိုးမှာ ပရိသတ်တွေ မျှော်လင့်၊ တောင့်တနေကြတဲ့ ကစားသမားကို ထည့်သွင်းလိုက်တဲ့အခါ ဘယ်လိုအကျိုးကျေးဇူး၊ အပြောင်းအလဲတွေ ရလာလိမ့်မယ်လို့ မျှော်လင့်ခဲ့လဲ..?

အလန် ပါဂျူး - မန်နေဂျာတိုင်းဟာ ကိုယ့်အသင်းပရိသတ်တွေ ထိုင်နေရာက မတ်တပ်ရပ်ပြီး လက်ခုပ်တီးကြမယ့် ကစားသမားတွေ ရှိနေဖို့ တောင့်တကြပါတယ်..။ နယူးကာဆယ်အသင်းကို ကျွန်တော်ကိုင်တွယ်နေတုန်းက ‘ဘင် အာဖာ’ ဟာလည်း တစ်ဦးချင်းပင်ကိုယ် အရည်အချင်း သိပ်ကောင်းတဲ့ ကစားသမား ဖြစ်ပါတယ်..။ သူဝင်လာတာနဲ့ ပွဲအဖြေကို ပြောင်းလဲပေးတဲ့ လှုပ်ရှားမှုတွေ၊ သွင်းဂိုးတွေ မြင်ရတော့မှာပဲ… ဆိုပြီး ပရိသတ်တွေက အထူးမျှော်လင့်ခဲ့ကြပါတယ်..။ အဲဒီကစားသမားတွေရဲ့ သက်ရောက်မှု၊ ပရိသတ်ရဲ့ အားပေးမှုကြောင့် ကစားပုံအနည်းနဲ့အများ အပြောင်းအလဲ ဖြစ်ပါတယ်..။

ကိုးလ် ပါးမား ဆိုရင် ပရိသတ်တွေရဲ့ မျှော်လင့်ချက်တွေကို ထမ်းပိုး၊ သယ်ဆောင်နိုင်စွမ်းရှိတဲ့ ကစားသမားတစ်ယောက် ဖြစ်ပါတယ်..။ ချယ်လ်ဆီးအသင်းမှာ အဲဒီလိုကစားသမား နှစ်ယောက်တောင် ရှိနေတာ သိပ်ကိုကံကောင်းပါတယ်..။

ရိုမန် ကမ့်ပ် - ပြီးခဲ့တဲ့အပါတ်က ပရီးမီးယားလိဂ်ပွဲစဉ် (၁၂) အပြီးမှာ အာဆင်နယ်အသင်းက အမှတ်ပေးဇယားကို (၆) မှတ်အကွာနဲ့ ထိပ်ဆုံးကဦးဆောင်နေပါတယ်..။ သူတို့နဲ့အနီးဆုံးပြိုင်ဘက် ဖြစ်နေတဲ့ ချယ်လ်ဆီးအသင်းနဲ့ လာမယ့် တနင်္ဂနွေနေ့ကျရင် စတန်းဖို့ဒ် ဘရစ်ချ်ကွင်းမှာ ယှဉ်ပြိုင်ရဖို့ ရှိနေပါတယ်..။ အလန် ရေ.. အဲဒီပွဲဟာ တကယ့်ပွဲကြီးပွဲကောင်း ဖြစ်လာမှာပါ..။ ဟုတ်တယ်မလား..? နောက်ပြီးမကြာသေးခင်က ပြုလုပ်သွားခဲ့တဲ့ သတင်းစာရှင်းလင်းပွဲမှာ ချယ်လ်ဆီးအသင်းဟာ ချန်ပီယံဆုဖလားကို စိန်ခေါ်နိုင်မယ့် အသင်းတစ်သင်း ဖြစ်တယ်.. ဆိုတဲ့ မီခေးလ် အာတီးတာ ရဲ့ မှတ်ချက်ကို ခင်ဗျားရော သဘောတူရဲ့လား..?

အလန် ပါဂျူး - လက်ရှိသူတို့ရရှိနေတဲ့ ရလဒ်ကောင်းတွေအရ သူတို့ဟာ ဆုဖလားစိန်ခေါ်နိုင်စွမ်းရှိမယ့် အသင်းတွေထဲမှာ ထည့်သွင်းစဉ်းစားသင့်တာပေါ့..။ ပြီးခဲ့တဲ့အင်္ဂါနေ့က ချန်ပီယံလိဂ်ပြိုင်ပွဲမှာ ခြေစွမ်းပြခဲ့တဲ့ လူငယ် ကစားသမား အက်စ်တီဗာအို ဆိုရင် ကိုးလ် ပါးမား မပါဝင်နိုင်သေးတဲ့ အခြေအနေမှာကို ချယ်လ်ဆီးအသင်းပရိသတ်တွေရဲ့ မျှော်မှန်းချက်တွေကို မြှင့်တင်ပေးနိုင်ခဲ့ပါတယ်..။ ဒါပေမယ့် အခုလာမယ့် တနင်္ဂနွေကျရင် ကိုးလ် ပါးမား ပြန်လည်ပါဝင်နိုင်မှာ ဖြစ်တယ်.. လို့ နည်းပြအင်ဇို မာရက်စ်ကာ က အတည်ပြုသွားခဲ့တယ်နော..။

ချယ်လ်ဆီးအသင်းဟာ ဆုဖလား စိန်ခေါ်နိုင်စွမ်းရှိတဲ့ အသင်းတစ်သင်း ဖြစ်ပြီလား..? လို့ စဉ်းစားလိုက်ရင် ဂိုးသမားနဲ့ ဗဟိုနောက်ခံလူနေရာတွေမှာ စုစည်းကျစ်လျစ်မှု၊ အချင်းချင်းနားလည်မှု (cohesion) ကောင်းမွန်ဖို့ လိုအပ်နေသေးတယ်လို့ ယူဆမိပါတယ်..။ အာဆင်နယ်အသင်းမှာဆိုရင် အဓိကနောက်ခံလူဖြစ်တဲ့ ဂါဘရီယယ်လ် ဒဏ်ရာရနေပေမယ့် အဲဒီစွမ်းအား အပြည့်ရှိနေပါတယ်..။ ချယ်လ်ဆီးအသင်းရဲ့ အားနည်းချက်က ခံစစ်ပိုင်းမှာပဲ ဖြစ်နေပါတယ်..။ ကျန်တဲ့နေရာတွေမှာတော့ ချန်ပီယံဆုတွက် လုံလောက်တဲ့အင်အား ရှိနေပါတယ်..။

ရာသီအစပိုင်းမှာတုန်းက ချယ်လ်ဆီးအသင်းရဲ့ အလားအလာအပေါ် အားလုံးကသံသယ ရှိခဲ့ကြပါတယ်..။ အထူးသဖြင့် သူတို့ဟာကလပ်အသင်းများ ကမ္ဘာ့ဖလားပြိုင်ပွဲအပြီး ရာသီကြိုပြင်ဆင်မှု ကောင်းကောင်းပြုလုပ်ချိန် မရခဲ့တဲ့ အခက်အခဲတွေ ရှိခဲ့ပါတယ်..။ ဒါပေမယ့် သူတို့ဟာအဲဒီအခက်အခဲတွေ၊ သံသယတွေကို ကျော်လွှားပြီး အကောင်းဆုံးခြေစွမ်းနဲ့ စွမ်းဆောင်ပြနေပါတယ်..။ လာမယ့်တနင်္ဂနွေနေ့ပွဲစဉ်ဟာ တကယ့်ကို ကြည့်လို့ကောင်းမယ့် ပွဲတစ်ပွဲ ဖြစ်လာမှာ အသေအချာပဲဗျ..။

ရိုမန် ကမ့်ပ် - ဟုတ်ကဲ့ပါခင်ဗျ..။ ရော်ဘတ်တို ရေ.. အခုလက်ရှိအချိန်မှာ အာဆင်နယ်အသင်းဟာ လွန်ခဲ့တဲ့အပါတ် လန်ဒန်ဒါဘီမှာ တော့တင်ဟမ် အသင်းကို ပြတ်ပြတ်သားသား အနိုင်ရခဲ့သလို ဂျာမန်ဘီလူးကြီး ဘိုင်ယန် မြူးနစ်ကိုလည်း ဆက်ပြီးအနိုင်ရခဲ့ပြန်ပါတယ်.။ အခုအချိန်မှာ သူတို့အသင်းကို ရပ်တန့်သွားအောင် ဘယ်လိုနည်းနဲ့ စွမ်းဆောင်နိုင်လိမ့်မယ်လို့ ထင်မိလဲ..?

ရော်ဘတ်တို ဒီမက်တီယို - အခုအချိန်မှာတော့ သူတို့ဟာ ဘယ်လိုမှရပ်တန့်လို့ မရနိုင်မယ့်ပုံစံ မြင်တွေ့နေရပါတယ်..။ သူတို့ဟာ တည်ငြိမ်တဲ့ခြေစွမ်းတစ်ခုကို ရရှိနေတာ အခုရာသီမှ မဟုတ်ပါဘူး..။ လွန်ခဲ့တဲ့ နှစ်ရာသီ၊ သုံးရာသီလောက်ကတည်းက တစ်ရာသီထက်တစ်ရာသီ ပိုပြီးတိုးတက်လာခဲ့တာပါ..။ အခုဆိုရင် သူတို့အသင်းဟာ အရမ်းကိုကျစ်လျစ်နေသလို ခံစစ်ပိုင်းစုစည်းမှု အရမ်းကိုကောင်းမွန်ပါတယ်..။ အဲ့ဒါကြောင့်လည်း ပရီးမီးယားလိဂ်ပြိုင်ပွဲမှာ ပေးဂိုးအနည်းဆုံးအသင်း ဖြစ်နေတာပါ..။ ဒါ့အပြင်တိုက်စစ်ပိုင်းမှာလည်း သိပ်ကိုထက်မြက်တယ်ဗျ..။ သူတို့တွေနဲ့ ရင်ဆိုင်ဖို့ရာ အရမ်းကိုခက်ပါတယ်..။ pressing ကစားပုံ သိပ်ကိုမြန်ဆန်သလို ခွန်အားလည်း အရမ်းပါပါတယ်.။

ဒါ့ကြောင့်သူတို့နဲ့ ရင်ဆိုင်တဲ့ အသင်းတွေဟာ ဘောလုံးကိုင်ထားဖို့ အချိန်သိပ်မရပါဘူး..။ သူတို့ကိုအနိုင်ရချင်တယ်.. ဆိုရင် သူတို့ရဲ့တိုက်စစ်ကစားသမားတွေရဲ့ ဖိအားပေးကစားမှု (first press) ကို ကျော်လွှားနိုင်မှ ရပါမယ်..။ အဲဒီလို first press ကို ကျော်နိုင်ခဲ့ရင် ခင်ဗျားတို့အတွက် နေရာလွတ် (space) တွေ ရလာနိုင်ပါတယ်…။ ဒီလိုမှမဟုတ်ရင်တော့ သူတို့တွေကပဲ ပွဲစပွဲဆုံး ဖိအားပေးသွားပါလိမ့်မယ်..။

ရိုမန် ကမ့်ပ် - ပြီးခဲ့တဲ့အပါတ်က တော့တင်ဟမ်အသင်းနဲ့ပွဲစဉ်မှာ အက်ဘာရီချီ အက်ဇေး ဟာ hattrick သွင်းပြီး ခြေစွမ်းပြနိုင်ခဲ့ပါတယ်..။ အခုလာမယ့်ပွဲမှာ သူ့ရဲ့နေရာမှာ ကစားပေးနိုင်တဲ့ အသင်းခေါင်းဆောင် မာတင် အိုဒီဂါ့ဒ် လည်း ပြန်လည်ပါဝင်လာနိုင်ပြီလို့ သိရပါတယ်..။ ဒါ့ကြောင့်နည်းပြမီခေးလ် အာတီးတာ အနေနဲ့ သူတို့နှစ်ယောက်မှာ ဘယ်သူ့ကို ဦးစားပေး၊ ပွဲထွက်စေမယ်လို့ ယူဆထားလဲဗျ..

ရော်ဘတ်တို ဒီမက်တီယို - အတော့်ကို ခက်ခဲတဲ့ ဆုံးဖြတ်ချက်ပါ..။ ကျွန်တော်တော့ မခန့်မှန်းတတ်ပါဘူး..။ သူတို့အသင်းဟာ သိပ်ကိုစုစည်း၊ ကျစ်လျစ်လွန်းတာကြောင့် သူတို့နှစ်ယောက်ထဲက ဘယ်သူကစားသည်ဖြစ်စေ.. အရမ်းကြီးခြားနားသွားမှာတော့ မဟုတ်ဘူးဗျ..။ အက်ဇေး ကတော့ ပြီးခဲ့တဲ့အပါတ်တုန်းက ခြေစွမ်းပြခဲ့တာကြောင့် ယုံကြည်မှုရော၊ ခြေစွမ်းပိုင်းမှာပါ အမြင့်ဆုံးကို ရောက်ရှိနေပါမယ်..။ ဒါပေမယ့် သူဟာတစ်ပါတ်အတွင်းမှာ နှစ်ပွဲစလုံး ကစားထားခဲ့ရတဲ့အချက်ကို ထည့်စဉ်းစားရပါမယ်..။ ဒါ့ကြောင့်လာမယ့် တနင်္ဂနွေနေ့ပွဲမှာ ပိုပြီးလန်းဆန်းနေမယ့် ကစားသမားကို ဦးစားပေးတာလည်း ဖြစ်နိုင်ပါတယ်..။ 

ဒါပေမယ့် သူတို့တွေရဲ့ လေ့ကျင့်ကွင်းက နေ့စဉ်အခြေအနေတွေကို မန်နေဂျာဖြစ်တဲ့သူကပဲ ပိုသိပါလိမ့်မယ်..။ ဒါ့ကြောင့်ဘယ်သူတွေ ပွဲထွက်ခွင့်ရမလဲ..? ဆိုတဲ့အချက်ဟာ အဲဒီလေ့ကျင့်ကွင်းကခြေစွမ်းနဲ့ ကြိုးစားမှုတွေအပေါ်မှာပဲ မူတည်သွားမှာပါ..။

အလန် ပါဂျူး - မန်နေဂျာ အာတီးတာ အတွက်က ဘယ်သူ့ကိုထည့်ကစားသည်ဖြစ်စေ.. အကျိုးမယုတ်နိုင်မယ့် win – win situation အခြေအနေပါ..။ အရန်ခုံပေါ်မှာ ထိုင်ရလည်း အဲဒီလူစားဝင်လာမယ့် ကစားသမားဟာ ပွဲအဖြေကို ပြောင်းလဲပေးနိုင်စွမ်းရှိတဲ့သူ ဖြစ်ပါတယ်..။ အက်ဇေး ပဲ ဆက်ပြီး ပွဲထွက်ခွင့်ရမယ်လို့ ကျွန်တော်ခန့်မှန်းပါတယ်..။ ဘာဖြစ်လို့လည်းဆိုတော့ ကျွန်တော်ဆိုရင် အသင်းမှာလက်ရှိ ပုံစံကောင်းရနေတဲ့ ကစားသမားတွေကိုပဲ ပိုပြီးဦးစားပေးလေ့ ရှိပါတယ်..။ နောက်ပြီး hattrick ရခဲ့ပြီးနောက် သူ့ရဲ့ယုံကြည်မှုတွေ၊ ခံစားချက်တွေ အရမ်းမြင့်တက်နေတာဆိုတော့ ကျွန်တော်ဆိုရင် အက်ဇေး ကိုပဲ ပွဲထွက်ခွင့်ပေးပါမယ်..။